- Detalles
- Escrito por Alicentis
- Categoría: novas
- Visitas: 4301
-
O Goberno municipal pon en marcha un servizo de asesoramento técnico para facilitar a veciñanza o acceso ás axudas autonómicas de rehabilitación e eficiencia enerxética
-
A administración local solicita o programa VI422F para a reconversión de inmobles municipais en desuso en vivendas destinadas a novos residentes
O Concello da Baña vén de activar un servizo municipal específico de asesoramento en materia de vivenda co obxectivo de facilitar á veciñanza o acceso ás axudas públicas para a rehabilitación de inmobles e a mellora da eficiencia enerxética. Esta medida enmárcase na estratexia do Goberno local para converter a política de vivenda nun eixo prioritario de fixación de poboación e dinamización do municipio.
O alcalde, José Antonio Pereira, explicou que a iniciativa responde á vontade de “que ningún veciño quede sen axuda para mellorar a súa casa e que o Concello recupere patrimonio para atraer novos residentes”.
Apoio técnico para tramitar axudas
A través do Departamento de Emprego e Desenvolvemento Local, o Concello ofrece asesoramento técnico individualizado para a tramitación de dúas liñas clave da Xunta de Galicia: o Programa VI435E, destinado á rehabilitación de infravivendas, co fin de garantir fogares dignos e seguros ás persoas con menos recursos; e o Programa MT402A, centrado na corrección de impactos paisaxísticos e na mellora da eficiencia enerxética, contribuíndo á redución do consumo eléctrico e á sustentabilidade das vivendas.
“Non imos permitir que a complexidade administrativa frea oportunidades para a nosa xente. Este Goberno local está ao carón da veciñanza, acompañándoa en cada trámite para garantir que as axudas se transformen en melloras reais nas vivendas da Baña”, destacou o alcalde. José Antonio Pereira enmarcou esta iniciativa dentro dun plan estratéxico máis amplo orientado a revitalizar o municipio, atraer novos residentes e converter a política de vivenda nun instrumento eficaz para encher de vida o concello.
Esta acción complétase coa solicitude presentada polo Concello ao abeiro do programa VI422F, que permitiría rehabilitar edificios municipais en desuso cun financiamento de ata o 95% para convertelos en vivendas.
“Cada vivenda que rehabilitamos é unha oportunidade real para favorecer o asentamento de novas familias”, subliñou o alcalde, quen incidiu en que este esforzo permite garantir a viabilidade económica do municipio, dinamizar a vida social e reforzar a prestación de servizos públicos.
O obxectivo final é transformar inmobles municipais actualmente en desuso en fogares que xeren actividade, atraian poboación e contribúan a frear o envellecemento demográfico.
Con esta liña de actuación, o Concello da Baña reafirma a súa aposta decidida pola rehabilitación e polo impulso demográfico como piares dun modelo de xestión rural moderno, sostible e orientado ao futuro.
- Detalles
- Escrito por Alicentis
- Categoría: novas
- Visitas: 4506
-
A veciñanza arroupou un desfile que rematou coa entrega de premios no pavillón de San Vicenzo
-
‘El show del Gran Hotel’, ‘Polbo á Barcalesa’ e ‘Os insumerxibles de Barcala’ foron as formacións máis premiadas
O Concello da Baña celebrou este sábado o seu tradicional Desfile e Concurso de Entroido cunha destacada participación e unha notable presenza de público nas rúas Castelao e Tedelle. A tarde solleira acompañou unha xornada na que comparsas, carrozas, grupos e disfraces individuais encheron o centro da vila de cor, música e posta en escena.
Ao longo do percorrido, o público puido gozar dunha sucesión de propostas moi diversas e coidadas ao detalle: dende a velocidade dos corredores de Fórmula 1 ata un tributo ás tradicións máis nosas; houbo tamén festa e reivindicación gastronómica con Polbo á Barcalesa, a recreación minuciosa de Titanic con todos os seus protagonistas, un gran hotel convertido nun espectáculo de baile e ambientación, unha simpática viaxe a Tailandia e, como non podía faltar no Entroido, espazo para a retranca e a actualidade coa aparición de Donald Trump ou Maduro esposado, entre outras escenas. Un conxunto de propostas que puxo de manifesto a variedade temática e o traballo das formacións participantes.
Unha vez rematado o desfile, a celebración trasladouse ao pavillón municipal de San Vicenzo, onde tivo lugar o fin de festa e a entrega de premios nas distintas categorías.
Gañadores do Concurso de Entroido 2026
Na categoría de comparsas, o primeiro premio foi para El show del Gran Hotel; o segundo para Polbo á Barcalesa; e o terceiro para Os insumerxibles de Barcala.
O premio á participación local foi para As marcianas do Barcala.
En disfrace individual infantil, o primeiro premio recaeu en Moi do noso, mentres que en disfrace individual adulto o galardón foi para Non me tóquelo cesto!
Na categoría de grupos, o primeiro posto foi para Esperansa e Claridá e o segundo para Desayuna con alegría.
En carrozas, o primeiro premio foi para Polbo á Barcalesa; o segundo para Os insumerxibles de Barcala; e o terceiro para El show del Gran Hotel.
O xurado estivo composto por Estrela Lois, Jennifer Cambeiro e Jennifer Riveira, que valoraron aspectos como a orixinalidade, o vestiario, a posta en escena e a capacidade de animación.
A concelleira de Acción social, cultura e servizos á cidadanía, Mónica González, agradece a implicación das persoas participantes e a presenza do público nunha xornada que volveu converter o Entroido nun punto de encontro para a veciñanza.
Consulta a galeria de fotos picando neste enlace ao Facebook do Concello
- Detalles
- Escrito por Alicentis
- Categoría: novas
- Visitas: 6249
-
A programación anual inclúe eventos destacados como a II Ruta Ciclista da Filloa, a Carreira Popular ou o X Trail da Baña
-
O obxectivo é promover hábitos de vida saudables e a participación veciñal
O Concello da Baña, a través da Concellería de Turismo, Deporte e Relacións Institucionais, vén de presentar o seu Programa de Actividades Deportivas 2026. Trátase dunha planificación integral que combina propostas competitivas, formativas e de lecer co obxectivo de converter o deporte nun motor de saúde e convivencia veciñal.
O calendario arrincará este domingo 8 de febreiro coa II Ruta Ciclista da Filloa, unha xornada popular que combina deporte e tradición no marco da XXII Festa da Filloa da Pedra.
En marzo celebrarase o Torneo de Minibásquet, orientado á promoción do deporte base e dos valores do traballo en equipo. Xa no mes de abril terán lugar o I Torneo de Tenis de Mesa e un Campamento Deportivo, dúas iniciativas centradas no deporte individual e no lecer activo da infancia e da mocidade.
En maio será a quenda da segunda edición da Carreira Popular da Baña, unha cita que volverá reunir participantes de diferentes idades nunha proba aberta e que busca consolidarse no calendario deportivo local.
O mes de xuño marcará a clausura das Escolas Deportivas Municipais e a celebración do V Torneo de Xadrez, reforzando a aposta polo deporte formativo.
O período estival continuará en xullo coa organización dunha saída ao parque acuático e un curso de natación, mentres que en agosto terá lugar a Festa da Auga, unha actividade lúdico-deportiva dirixida ao conxunto da veciñanza.
Tras o verán, en setembro, celebrarase o X Trail da Baña, coincidindo co inicio dunha nova tempada das Escolas Deportivas. O calendario continuará en outubro co V Torneo de Pádel, unha competición que gaña inscritos ano a ano, e en novembro cunha Xornada de Hábitos Saudables e Primeiros Auxilios, de carácter formativo e preventivo.
O programa pecharase en decembro cunha saída á pista de xeo, pensada como actividade de lecer deportivo para a veciñanza de todas as idades durante o período festivo de Nadal.
Ademais destas accións concretas, o Concello da Baña manterá ao longo de todo o ano o Circuito de Andainas ‘Descubre A Baña’, así como a asistencia a eventos deportivos de interese, reforzando o compromiso municipal coa promoción da actividade física e do benestar social.
O Concello da Baña deseñou esta programación como unha aposta firme polo deporte como ferramenta de saúde, integración e cohesión social, garantindo unha oferta accesible e variada para o conxunto da cidadanía.
As persoas interesadas en obter máis información poden chamar aos teléfonos 981 886 501 ou 669 368 413.
- Detalles
- Escrito por Alicentis
- Categoría: novas
- Visitas: 4181
A colaboración entre o Concello da Baña e Suelo Empresarial do Atlántico (SEA) deu un paso decisivo cara á construción do futuro parque empresarial de Eiroa, un proxecto que ocupará preto de 200.000 metros cadrados e que suporá un impulso económico e empresarial para o municipio.
A última reunión de traballo celebrouse nas oficinas de SEA en Santiago de Compostela na que participaron o alcalde, José Antonio Pereira Gil, e o concelleiro de Urbanismo, Jesús Manuel Pena, xunto coa directora de SEA, Beatriz Sestayo, e os técnicos José Rey e Antonio Quintela. O encontro tivo como obxectivo afianzar os avances do proxecto e concretar os aspectos clave relacionados coa urbanización do polígono..
Durante a reunión, o Concello presentou un estudo detallado con memoria e orzamentos, solicitado tras un encontro previo, que servirá como base para axustar a inversión e facilitar a planificación do parque. A proposta municipal inclúe a definición de instalacións básicas, zonas verdes e outros elementos urbanísticos esenciais.
Ademais, acordouse iniciar un proceso de contacto coas empresas locais e con posibles interesados, co fin de determinar a demanda real e avaliar as achegas que deberán asumir as compañías que se integren no futuro polígono.
O alcalde José Antonio Pereira Gil destacou que “estes encontros permiten ao Concello da Baña liderar o proxecto e garantir que cada decisión estea adaptada ás necesidades do noso municipio”. Subliñou tamén que a colaboración con SEA é “fundamental para levar a cabo un dos proxectos máis importantes para A Baña” e asegurou que “os estudos de custos achegan cada vez máis á execución do parque empresarial”.
A directora de SEA, Beatriz Sestayo, sinalou que “avanzamos nun estudo rigoroso de necesidades e investimento, abrindo agora un paso imprescindible: escoitar aos empresarios de A Baña sobre cuestións máis concretas” e destacou a implicación do Concello no impulso do proxecto.
O Concello da Baña seguirá coordinándose con SEA para definir os próximos pasos e consolidar o parque empresarial de Eiroa como un espazo estratéxico para o desenvolvemento económico local.
- Detalles
- Escrito por Alicentis
- Categoría: novas
- Visitas: 6137
-
Celebrarase o domingo 8 de febreiro e está dirixido ao público infantil e familiar
-
A actividade é gratuíta pero por motivos organizativos precísase inscrición previa
O Concello da Baña, a través da Concellería de Acción Social, Cultura e Servizos á Cidadanía, organiza o obradoiro de máscaras En-mascara-ARTE, que se celebrará o domingo 8 de febreiro como parte da programación da XXII Festa da Filloa da Pedra da Baña.
A actividade desenvolverase en dúas sesións diferenciadas, unha dirixida á rapazada de 4 a 8 anos e outra para participantes a partir dos 8 anos, cunha duración aproximada de dúas horas. O obradoiro é gratuíto, inclúe todo o material necesario para a elaboración das máscaras, pero por motivos organizativos solicítase inscrición previa.
As persoas interesadas poden formalizar a súa inscrición chamando ao 981 88 65 01 ou a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.
Durante o obradoiro, as persoas participantes crearán as súas propias máscaras inspiradas na natureza, no bosque e nos animais propios de Galicia, elementos moi presentes na contorna do concello da Baña, favorecendo a expresión artística e a participación colectiva nun ambiente lúdico e educativo.
Esta actividade forma parte do conxunto de propostas culturais organizadas polo Concello arredor da Festa da Filloa da Pedra, co obxectivo de complementar a celebración gastronómica cunha programación cultural dirixida á veciñanza de todas as idades.
Unha tradición ligada ao Entroido e á natureza
O obradoiro En-mascara-ARTE nace coa vontade de recuperar e reinterpretar unha tradición ancestral vinculada ao inicio do Entroido, presente historicamente en todos os pobos de Galicia. Aínda que A Baña non pertence a unha comarca especialmente vencellada ao Entroido das máscaras nin conta con testemuñas gráficas propias desta práctica, a tradición permanece viva na memoria colectiva do concello.
O seu enfoque simbólico remite á figura do home verde, personaxe asociado ao bosque e á natureza, símbolo da chegada da primavera e presente en numerosos edificios galegos medievais, renacentistas e modernistas. Esta figura segue manifestándose no paso das estacións e nas fragas, soutos e bosques de Galicia, tamén na contorna da Baña.
Os entroidos tradicionais galegos manteñen unha estreita relación coa natureza, cunha forte presenza de representacións zoomórficas e rituais vencellados ao ciclo vital, elementos que conectan directamente coas tradicións gastronómicas destas datas, como a Festa da Filloa da Pedra.
A través desta proposta, o Concello da Baña aposta por poñer en valor o patrimonio inmaterial galego, fomentando a creatividade, a transmisión cultural e a participación da veciñanza no marco dunha das festas máis representativas do municipio.