- Detalles
- Escrito por Alicentis
- Categoría: novas
- Visitas: 232
-
A saída realizarase o sábado 28 de decembro
-
Inclúe unha visita á Casa do Patrón e cocido en Lalín e un paseo polas rúas allaricenses decoradas polo Nadal
-
As prazas son limitadas, con inscricións abertas ata o 23 de decembro
O Concello da Baña organiza unha excursión a Lalín e Allariz o sábado 28 de decembro, unha oportunidade para desfrutar dunha xornada que combina cultura, gastronomía e a maxia do Nadal. A actividade, promovida pola Concellería de Turismo, Deporte e Relacións Institucionais, está aberta a toda a veciñanza, con prazas limitadas e inscricións ata o 23 de decembro.
A saída será ás 8.15 horas da Baña, con chegada a Lalín ás 10.00 horas para unha visita á vila ata as 11.15 horas. Posteriormente, ás 11.30 horas, o grupo desprazarase á Casa do Patrón, un museo etnográfico único con 15 salas repartidas pola aldea onde se expoñen máis de 4.500 pezas recollidas por toda Galicia. A visita guiada terá unha duración aproximada dunha hora e media.
Despois da visita cultural, as persoas asistentes degustarán o emblemático cocido de Lalín, incluído no prezo da excursión. Pola tarde, a actividade continuará en Allariz, cun paseo polas súas rúas engalanadas con luces e adornos de Nadal elaborados de maneira artesanal, que destacan pola súa beleza e orixinalidade.
O prezo da excursión é de 40 euros para as persoas empadroadas no Concello da Baña e de 50 euros para as non empadroadas. Os menores de 16 anos terán un prezo reducido de 15 euros. As prazas son limitadas e as inscricións deberán realizarse no Concello da Baña antes do 23 de decembro, chamando ao teléfono 981 886 501.
- Detalles
- Escrito por Alicentis
- Categoría: novas
- Visitas: 442
O alcalde asegura no pleno que buscará outros recursos para compensar o déficit
Modificaranse as ordenanzas do IBI, IAE e ICIO para fomentar a creación de emprego e poder optar a máis subvencións
Bonificarase o imposto de construción dos panteóns de San Mamede, como solicitou a Asociación de Veciños Outeiro
Ratificado o convenio de cesión de terreos para a mellora do primeiro tramo do Camiño de Monelos
O Pleno da Baña aprobou na sesión deste 27 de novembro subir o recibo do lixo só un 10% para o vindeiro ano, ao considerar que o incremento dun 50% que establece o novo canon de Sogama “é inasumible para a veciñanza”, segundo o alcalde. Na sesión tamén se aprobou modificar as ordenanzas do IBI, IAE e ICIO en base ao convenio de Concellos Doing Business Galicia para favorecer a creación de emprego no municipio e optar a máis subvencións. A Corporación atendeu a petición da Asociación de Veciños Outeiro e bonificará o imposto de construcións do cemiterio de San Mamede de Monte.
A Corporación iniciou a sesión gardando un minuto de silencio en memoria das vítimas da DANA que afectou a Valencia e outras comunidades autónomas.
O alcalde, José Antonio Pereira, volveu criticar con dureza o forte incremento do canon que aplicará a Xunta a partir do ano que ven pola recollida de lixo. Sogama pasará de cobrar 66 euros por tonelada a fixar unha tarifa de 95 euros, despois do desconto de 12 euros que aplica a Xunta. Para José Antonio Pereira “esta subida é inasumible para a veciñanza da Baña”, motivo polo que o goberno local presentou no pleno unha proposta de incremento de tan só un 10%.
“Buscaremos recursos por outras vías para compensar o déficit desta taxa”, asegurou Pereira Gil para xustificar a proposta do equipo de goberno. O informe da secretaría e intervención recoñece que con esta subida a taxa só cubrirá a metade do custe do servizo.
A proposta foi aprobada cos 6 votos a favor do equipo de goberno (PSdeG e BNG) e os 5 en contra do PP.
Na sesión tamén se acordou por unanimidade modificar as ordenanzas reguladoras da contribución (IBI rústica e urbana), de actividades económicas (IAE) e de construción (ICIO) adaptándoas ao convenio Concellos Doing Business Galicia asinado entre Xunta e Fegamp para o fomento do emprego e para favorecer o asentamento de empresas no polígono industrial e noutras zonas do municipio para crear postos de traballo. Ademais de actualizar as tarifas e favorecer os descontos a aquelas iniciativas que xeren postos de traballo na Baña, con esta medida o Concello poderá recibir máis subvencións doutras administracións.
Por unanimidade aprobouse bonificar o imposto de construcións dos panteóns de San Mamede do Monte, como solicitaba a Asociación de Veciños Outeiro. Tamén co voto favorable de todos os concelleiros e concelleiras ratificouse o convenio de cesión de terreos para a mellora do primeiro treito do Camiño de Monelos.
Reclámanlle á Xunta que faga obras na Baña
As tres moción presentadas no pleno, unha por cada grupo políticos, foron aprobadas por unanimidade.
O grupo socialista volveu denunciar a discriminación que está a manter a Xunta de Galicia coa Baña, ao non incluír ningunha obra nos orzamentos autonómicos, e presentou unha moción na que lle pide ao Goberno galego que inclúa nos orzamentos de 2025 sendas partidas para executar o saneamento nas parroquias de Troitosende e de San Cibrán e unha partida para urbanizar o polígono industrial.
A moción en defensa da lingua galega presentada polo BNG reclámalle á Xunta diferentes accións para defender o noso idioma como patrimonio colectivo de incalculable valor e poñer en marcha medidas que permitan darlle a volta a situación actual (cada vez menos xente fala a lingua propia). A moción tamén recolle que o Concello da Baña se adhira á Plataforma Queremos Galego.
O Partido Popular presentou unha proposta con motivo do 25N na que se solicita ao Concello da Baña, á Xunta e ao Goberno central por en marcha diferentes iniciativas para acabar coa violencia contra as mulleres.
- Detalles
- Escrito por Alicentis
- Categoría: novas
- Visitas: 365
-
O convenio permitirá mellorar a eficacia e accesibilidade dos servizos municipais grazas á interconexión coa plataforma dixital da Deputación
-
O alcalde José Antonio Pereira asistiu ao acto de sinatura do convenio no Pazo de Mariñán
A Deputación da Coruña continúa promovendo a dixitalización nos concellos da provincia. O alcalde da Baña, José Antonio Pereira, asistiu o luns 11 de novembro á sinatura dun convenio de colaboración coa Deputación no Pazo de Mariñán, co obxectivo de impulsar a implantación da administración electrónica e mellorar a eficiencia e accesibilidade dos servizos municipais en concellos de menos de 20.000 habitantes.
O convenio, cunha duración inicial de catro anos prorrogables, permitirá reducir os tempos de tramitación administrativa e facilitará a interacción entre o Concello e a cidadanía. Mediante este proxecto, a Baña contará cunha interconexión co sistema integral de servizos da Deputación, que inclúe un amplo catálogo de ferramentas de administración electrónica e soporte para o persoal municipal e a veciñanza.
Esta iniciativa enmárcase dentro do programa Concello Dixital, un proxecto da Deputación que busca modernizar as administracións locais e que leva un investimento de máis de 16 millóns de euros en estratexias de transformación dixital para os concellos. Segundo o presidente da Deputación, Valentín González Formoso, "beneficiou xa a preto de 500.000 persoas, que viron reducidos os tempos de primeira resposta administrativa nun 25%, e nun 40% na resolución de expedientes".
A Deputación estima que o uso da administración electrónica supuxo no que vai de 2024 un aforro ás arcas públicas de preto de 20 millóns de euros. A institución provincial segue reforzando este obxectivo con medidas adicionais como un Plan de Ciberseguridade para os sistemas da Deputación e das administracións locais, e as Oficina do Dato, de Accesibilidade e Servizos Dixitais, e o proxecto Acelera Pyme, destinado a superar a fenda dixital e a dar un impulso tecnolóxico no rural.
- Detalles
- Escrito por Alicentis
- Categoría: novas
- Visitas: 432
-
O Apalpador e Papá Noel, xuntos por primeira vez, visitarán o pavillón de San Vicenzo
-
CantoEncanto, grupos de gaita e pandeireta da Escola de Música Tradicional e o Mago Paco protagonizan a programación escénica
-
Unha ampla oferta de postos artesanais e produtos locais estará dispoñible para as compras de Nadal
O domingo 15 de decembro, o pavillón municipal de San Vicenzo converterase no escenario da novena edición do Mercadiño de Nadal da Baña, unha cita consolidada no calendario local que cada ano atrae veciñanza e visitantes da comarca. Dende as 12.00 do mediodía e ata as 20.00 horas, o Concello da Baña ofrecerá unha xornada chea de artesanía, música e actividades pensadas para toda a familia, cunha especial atención á cativada.
O evento contará cun amplo programa de actividades culturais e de lecer que comezará ás 12.30 horas coa animación musical a cargo do grupo de gaiteiros da Escola de Música Tradicional (EMT) da Baña. A partir das 16.00 horas, á música dos gaiteiros sumarase a das pandeireteiras da EMT e a de CantoEncanto, un conxunto de música tradicional local creado en 2023 que se define como “un grupo de amigos que se xuntan nas foliadas para cantar e bailar”.
A programación inclúe tamén unha dose de maxia e fantasía co espectáculo do Mago Paco, especializado en entretemento infantil, que terá lugar ás 17.00 horas. Pero a gran novidade deste ano será a presenza conxunta, por primeira vez, de dúas figuras imprescindibles do Nadal en Galicia: o Apalpador e Papá Noel, que chegarán ás 18.00 horas para espertar a ilusión de nenas e nenos.
Ademais das actividades, o mercadiño ofrecerá unha coidada selección de postos con produtos de artesanía e delicias gastronómicas, permitíndolles ás persoas asistentes mercar agasallos únicos nun ambiente festivo e acolledor. Como en anos anteriores, habilitarase un posto de empaquetado solidario, no que quen merque no Mercadiño poderá preparar os seus agasallos ao tempo que colabora cunha causa solidaria.
A organización desta novena edición, a cargo do Concello da Baña e coa colaboración da Deputación da Coruña, busca reafirmar o Mercadiño como un evento de referencia na comarca. O pavillón de San Vicenzo converterase, un ano máis, nun punto de encontro para celebrar o Nadal en comunidade, promovendo a música, a tradición e a convivencia.
- Detalles
- Escrito por Alicentis
- Categoría: novas
- Visitas: 524
-
O Concello solicitará unha achega nominativa á Deputación de 200.000 euros para mellorar o tramo de Lañas ata Pazo
-
As persoas voluntarias que atendan servizos como o de Madrugadores poderán percibir ata 8,33 €/hora, a mesma cantidade que fixa a Xunta para os comedores escolares
-
O goberno aproba a moción reclamándolle á Xunta e a Sogama que non suban o canon pola recollida de lixo e manteñan a bonificación do 15%
A Corporación da Baña aprobou por unanimidade no pleno de onte solicitarlle unha subvención nominativa á Deputación da Coruña para continuar coa mellora da estrada de Lañas. Tamén por unanimidade se aprobou o convenio de cesión de terreos para a mellora do camiño de Monelos, a conta xeral de 2023 e a modificación do Plan Municipal de Voluntariado.
O proxecto de mellora do tramo entre Lañas e Pazo da CP-0702 ten un orzamento de 299.999 euros, e o Concello da Baña vaille solicitar á Deputación da Coruña unha subvención nominativa de 200.000 euros, comprometéndose a financiar os 99.999 euros restantes con fondos propios ou con achegas doutras administracións.
Tamén por unanimidade se aprobou a conta xeral de 2023 e o convenio firmado cos propietarios implicados para a cesión de terreos que permitirán arranxar o primeiro tramo do Camiño de Monelos.
Todos os grupos estiveron tamén de acordo en modificar o Plan Municipal de Voluntariado, permitindo agora unha compensación económica polos gastos de dedicación e desprazamento xerados pola colaboración das persoas voluntarias cun importe de 8,33 euros/hora. Este cambio está pensado, fundamentalmente, para facilitar que o servizo de Madrugadores poida ser atendido por persoas voluntarias, que percibirán o mesmo importe que a Xunta destina as persoas que colaboran cos servizos de comedor. Deste xeito, o Concello poderá prestar un servizo fundamental de conciliación para familias que levan as súas crianzas tanto ao CPI San Vicente como a CRA de Lañas.
No capítulo de mocións, a presentada polo equipo de goberno reclamándolle á Xunta e a Sogama que non apliquen o incremento do canon previsto para 2025 e que se manteña o desconto do 15% actual foi aprobada cos votos a favor de PSdeG e BNG (6). A proposta tamén pide ampliar as plantas de biorresiduos existentes, como estaba previsto no plan de xestión de residuos urbanos de Galicia 2010-2022.
O PP votou en contra desta iniciativa, e presentou unha moción tamén sobre o canon de Sogama na que reclamaban que, primeiro, o Goberno central retirara o imposto que se aplicará a incineración de residuos e non aplique aínda a directiva de Bruxelas, como fan a maioría de países da Unión Europea, dixo o portavoz popular, Andrés García Cardeso.
O alcalde, José Antonio Pereira (PSdeG), e a tenente de alcalde Mónica González (BNG), insistiron que “quen aplica subida do canon é Sogama, que é unha empresa controlada pola Xunta. Se suben o canon, ese incremento vai repercutir na subida do recibo do lixo da veciñanza da Baña. É Sogama que debe tomar a decisión e non subir o canon”, aseguraron dende o goberno da Baña. A moción do PP foi rexeitada cos seis votos en contra de PSdeG e BNG, e cinco a favor do PP.
Tamén foi rexeitada a moción presentada polo PP sobre Venezuela.
No último apartado, en resposta á pregunta formulada polo PP de cando vai tomar posesión o persoal que aprobou a oposición do proceso de estabilización, o alcalde comprometeuse a que se fará antes do 31 de decembro, que é o prazo que establece a normativa vixente. José Antonio Pereira explicou que está á espera de que a secretaria-interventora analice o expediente para culminar o proceso.
Mónica González, pola súa banda, explicou que tras unha reunión co director xeral de Familia, Jacobo Rey, o Concello da Baña vaille solicitar á Xunta unha subvención para converter o PAI nunha escola infantil con 35-40 prazas e poder así atender todas as solicitudes das familias. O punto de atención á infancia conta actualmente con 20 prazas, e este curso moitas familias quedaron en lista de agarda.