- Detalles
- Escrito por Alicentis
- Categoría: Servizos sociais INICIO
- Visitas: 2355
-
A iniciativa ofrece 20 prazas para crianzas de entre 3 e 13 anos durante os días 16, 17 e 18 de febreiro
-
O servizo desenvolverase no Local Social de San Vicenzo en horario de 08.00 a 15.00 horas.
-
As familias interesadas teñen ata o 6 de febreiro para formalizar a súa solicitude no Rexistro do Concello
O Concello da Baña, a través da Concellería de Acción Social, Cultural e Servizos á Cidadanía pon en marcha unha nova edición do programa de conciliación Entroido 2026. Esta iniciativa busca ofrecer ás familias do municipio un recurso eficaz para compatibilizar a vida laboral e persoal durante as vacacións escolares de febreiro, ao tempo que proporciona ás crianzas un espazo lúdico, social e educativo de calidade.
O campamento desenvolverase os días 16, 17 e 18 de febreiro nas instalacións do Local Social de San Vicenzo. O horario de atención será de 08.00 a 15.00 horas, cubrindo a xornada de mañá con actividades culturais, promovendo valores como a cooperación e a convivencia, supervisadas por monitorado especializado.
O programa oferta un total de 20 prazas dirixidas a menores escolarizados con idades comprendidas entre os 3 e os 13 anos. Á hora de adxudicar as prazas, o Concello establece unha orde de prioridade que favorece ás crianzas empadroadas na Baña, seguidas dos fillos e fillas do persoal municipal e, finalmente, crianzas non censadas no municipio.
Inscrición e prezos
O prazo de inscrición permanecerá aberto ata o 6 de febreiro de 2026. Serán admitidas todas as solicitudes que cumpran os requisitos de idade, acheguen a documentación esixida e aboen as taxas correspondentes. As solicitudes presentadas fóra de prazo pasarán a unha listaxe de agarda.
A documentación necesaria inclúe a solicitude oficial, xustificante de pagamento, acreditación da necesidade de conciliación por motivos laborais, tarxeta sanitaria e, de ser o caso, informe médico. As tarifas mantéñense accesibles para facilitar a participación:
- Censados: 10€ para o primeiro fillo/a e 5€ para o segundo e sucesivos.
- Non censados: 20€ para o primeiro fillo/a e 10€ para o segundo e sucesivos.
As bases completas da convocatoria poden consultarse nos documentos adxuntos, na Sede Electrónica do Concello da Baña e nas dependencias de Servizos Sociais municipais.
As familias que precisen máis información poden contactar cos Servizos Sociais no teléfono 981 88 65 01.
 Decreto e Bases Concilia Entroido 2026.pdf | [ ] | 254 kB |
| Inscricións Concilia Entroido 2026.pdf | [ ] | 148 kB |
- Detalles
- Escrito por Alicentis
- Categoría: Servizos sociais INICIO
- Visitas: 4320
9-12-2025
Publícase a listaxe definitiva de persoas admitidas e excluídas no Brincanadal 2025-2026, o campamento de Nadal organizado polo Concello da Baña para facilitar a conciliación laboral e familiar durante as vacacións escolares.
O prazo para facer o pagamento e confirmar a praza é de 5 días naturais. Este pagamento realizarase nun dos números de contas seguintes das que é titular o Concello da Baña:
• ES92 2080 0326 1731 1000 0035 (ABANCA)
• ES26 0238 8191 8806 6000 1061 (SANTANDER)
A resolución pode consultarse no documento adxunto ou nesta ligazón
19-11-2025
O Concello abre o prazo de inscrición no BrincaNadal ata o 3 de decembro
-
O campamento de conciliación das vacacións de inverno vai dirixido a crianzas de 3 a 13 anos
-
Desenvolverase no local social de San Vicenzo entre o 22 de decembro e o 7 de xaneiro en horario de mañá
O Concello da Baña pon en marcha unha nova edición do BrincaNadal, o campamento de conciliación pensado para que as crianzas poidan desfrutar dun espazo lúdico e educativo durante todas as vacacións escolares de Nadal. A inscrición estará aberta entre o 20 de novembro e o 3 de decembro, e toda a documentación necesaria para realizar o trámite atópase dispoñible na sede electrónica e no documento adxunto.
O BrincaNadal celebrarase no Local Social de San Vicenzo, nos días laborais comprendidos entre o 22 de decembro e o 7 de xaneiro, ambos os dous incluídos. O horario será de 08.00 a 15.00 horas, co obxectivo de facilitar a conciliación das familias durante este período non lectivo. A actividade está dirixida a nenos e nenas de entre 3 e 13 anos, que poderán gozar de actividades variadas de carácter lúdico e educativo.
As inscricións deberán presentarse no Rexistro Xeral do Concello ou a través da sede electrónica, asinadas pola nai, pai ou titor legal. O proceso require a solicitude cuberta, os documentos de identidade das persoas menores e da titular da conta bancaria, así como o informe médico no caso de seren precisos tratamentos ou condicións especiais e a tarxeta sanitaria das persoas usuarias. As solicitudes fóra de prazo pasarán automaticamente á listaxe de agarda.
Os prezos desta edición establécense en 25 euros para o primeiro participante censado (50 se non o está), 20 euros para o segundo (40 para non censados) e 15 euros para o terceiro (25 para non censados). O campamento está organizado pola Concellería de Acción Social, Cultural e Servizos á Cidadanía.
| Listaxe definitiva de admitidos/as | [ ] | 219 kB |
| Ficha de inscrición no BrincaNadal 2025-2026 | [ ] | 159 kB |
- Detalles
- Escrito por Alicentis
- Categoría: Servizos sociais INICIO
- Visitas: 3913
-
Isabel Risco protagoniza mañá o monólogo de humor ‘Bravas’ que pon en valor a traxectoria de mulleres galegas
-
O alumnado do CPI San Vicenzo lerá o manifesto institucional o martes 25 na praza do Concello
O Concello da Baña pon en marcha unha programación institucional con motivo do 25N, Día Internacional contra a violencia de xénero, coa finalidade de sensibilizar á veciñanza e reforzar unha convivencia baseada no respecto e a igualdade. As accións están coordinadas pola Concellería de Acción Social, Cultural e Servizos á Cidadanía.
O venres 21 de novembro, o Auditorio da Casa de Cultura acollerá o monólogo Bravas, interpretado por Isabel Risco, integrado no programa Venres de humor e na programación especial do 25N. A función comeza ás 20.00 horas e a entrada será libre ata completar aforo. A obra destaca a traxectoria de mulleres galegas que abriron camiños con determinación, valentía e compromiso social.
O martes 25 de novembro terá lugar na praza do Concello a lectura dun manifesto institucional ás 12.00 horas, coa participación do alumnado do CPI San Vicenzo. Este acto institucional pretende visibilizar a implicación da mocidade e reforzar a educación en valores de respecto e igualdade.
O Concello da Baña reitera o seu compromiso na loita contra a violencia de xénero e continuará promovendo iniciativas que garanten espazos seguros e fomenten a participación da cidadanía en actividades de sensibilización e prevención.
- Detalles
- Escrito por Alicentis
- Categoría: Servizos sociais INICIO
- Visitas: 5718
-
O CPI San Vicenzo acolleu a lectura do manifesto e unha acción simbólica en memoria das vítimas
-
A comunidade educativa, o Concello e a veciñanza comparten un acto marcado pola reflexión
O Concello da Baña celebrou esta mañá os actos con motivo do 25N, Día Internacional para a Eliminación da Violencia contra as Mulleres, nun encontro que finalmente tivo lugar no patio de columnas do CPI San Vicenzo debido ás condicións meteorolóxicas. A convocatoria mantivo o horario das 12.00 horas e reuniu a representantes institucionais, membros da comunidade educativa e veciñanza.
O alumnado de oratoria da ESO do CPI San Vicenzo realizou a lectura do manifesto institucional, un texto que chamou á responsabilidade colectiva. No escrito lembrouse que a violencia contra as mulleres vulnera a liberdade e a seguridade e que require un compromiso firme da sociedade. Subliñou ademais que se trata dun problema estrutural que segue presente nos ámbitos sociais e laborais, ao tempo que chamou a manter o apoio ás vítimas e ás súas familias, a rexeitar o negacionismo e a garantir recursos accesibles para todas as mulleres. O manifesto destacou tamén a importancia do marco legal vixente e apelou á unidade cidadá para avanzar cara a unha igualdade real.
A intervención estivo acompañada pola música de Soraya e Ramón, que interpretaron varias pezas durante o acto.
O centro educativo desenvolveu tamén unha acción simbólica mediante a colocación de zapatos cos nomes de vítimas de violencia de xénero, unha forma de lembrar cada historia e manter viva a memoria das mulleres que perderon a vida por causa desta lacra.
A Concellería de Acción Social, Cultural e Servizos á Cidadanía promove estas actividades co propósito de acompañar á comunidade e avanzar na loita contra a violencia de xénero. O Concello da Baña continuará impulsando accións que favorezan espazos seguros e respectuosos para toda a poboación.
DECLARACIÓN INSTITUCIONAL 25 DE NOVEMBRO DE 2025, DÍA INTERNACIONAL PARA A ELIMINACIÓN DA VIOLENCIA CONTRA AS MULLERES:
Hoxe estamos aquí para deixar claro que a violencia contra as mulleres non encaixa nunha sociedade xusta e democrática. Garantir a liberdade, a seguridade e a vida das mulleres é responsabilidade de todas e todos nós.
A violencia machista é un problema que lle afecta a todas as institucións e, por iso, temos que loitar contra elas con todo o que está ao noso alcance. Por isto, este 25 de novembro non abonda con repetir os lemas de sempre; é o momento de comprometerse de verdade.
Reivindicamos o noso rexeitamento total á violencia machista e lembramos as mulleres que xa non están por este motivo, e farémolo aquí, diante do Concello, pero tamén o levaremos ao noso día a día: nas rúas, nas prazas, no instituto, nos centros de traballo de cada un e cada unha de nós... Esta condena está presente en todas as partes.
A cidadanía debe ser consciente da urxencia de erradicar este tipo de violencia que, polo feito de ser mulleres, continúa a ser estrutural na nosa sociedade. Reafirmamos o noso compromiso firme e irrenunciable para poñerlle fin dunha vez.
Hoxe lembrámonos do Convenio de Istambul, que recorda que a violencia contra as mulleres non é algo puntual, senón un problema estrutural baseado no xénero, que mantén ás mulleres nunha situación de desvantaxe fronte os homes.
Ademais, este ano estanse cumprindo 30 anos da Conferencia Mundial sobre a Muller de Pequín (1995), un momento clave na loita pola igualdade. Alí, 30.000 persoas e representantes de 189 gobernos afirmaron que a violencia de xénero nace de costumes e ideas culturais que colocan ás mulleres nun nivel inferior e erradicar estas ideas é esencial para a igualdade e para acadar unha sociedade máis xusta e en paz.
En 2025, 32 mulleres foron asasinadas en España polas súas parellas, dúas delas en Galicia. Tamén tres menores perderon a vida en situacións de violencia de xénero, sumando xa 65 desde 2003. Ademais, en Galicia as denuncias por violencia de xénero incrementaron nun 5 % respecto do ano pasado.
Por todo isto, hoxe e cada día do ano, a veciñanza da Baña quere deixar claro o seguinte:
- Condenamos de forma absoluta todas as formas de violencia contra as mulleres. Condenamos a cada agresor e tamén a quen nega, minimiza ou xustifica a existencia desta violencia. O negacionismo non só lles fere a memoria das vítimas, senón que tamén desprotexe ás que sofren e debilita o compromiso social necesario para combatela. Negar ou relativizar a violencia machista é contribuír á súa persistencia e, fronte a isto, a sociedade debe manterse firme, unida e comprometida.
- Sabemos que a desigualdade segue aí. Os estereotipos e os roles de xénero continúan presentes na economía, na cultura, na política, no deporte... En todo. E detrás de todo iso segue habendo un sistema que mantén a desigualdade e permite que exista este tipo de violencia, atacando o corazón da liberdade.
- Debemos erguer a voz por aquelas mulleres que atopan máis barreiras para acceder á información e á protección: mulleres con discapacidade, maiores, migrantes ou que non dominan as nosas linguas. Seguiremos traballando para garantir os seus dereitos cos servizos e recursos adecuados, en condicións de plena igualdade.
- A sociedade galega debe apoiar as vítimas e as súas familias e deixar claro que non se vai permitir a normalización da violencia de xénero, nin que se vulnere o dereito á igualdade. A violencia machista é unha grave violación dos dereitos humanos que nos empobrece como sociedade.
- Contamos cun amplo marco legal, xudicial e de protección para as vítimas, como o Pacto de estado contra a violencia de xénero, a Lei Orgánica de medidas de protección integral contra a violencia de xénero ou a Lei galega para a prevención e o tratamento integral da violencia de xénero.
- Finalmente, queremos chamar ao compromiso da cidadanía galega na loita contra a violencia machista e animala a actuar con unidade e a rexeitar con firmeza os comportamentos violentos. Ás mulleres, pola súa parte, queremos tenderlles a man: hai saída, non estades soas. Nin hoxe, nin nunca.
Comezan as obras de ampliación do PAI da Baña para a súa conversión en escola infantil con 31 prazas
- Detalles
- Escrito por Alicentis
- Categoría: Servizos sociais INICIO
- Visitas: 6034
-
Grazas a esta actuación crearase 11 novas prazas e mellorarase o servizo de atención á infancia no municipio
O Concello da Baña iniciou as obras de ampliación do Punto de Atención á Infancia (PAI) de San Mamede, que permitirá a súa conversión en escola infantil e a creación de 11 novas prazas. Grazas a esta actuación, o centro pasará das 20 prazas actuais ás 31 dispoñibles, ampliando a capacidade e mellorando o servizo de atención á infancia no municipio.
O alcalde, José Antonio Pereira, e o concelleiro de Obras, Jesús Manuel Pena Varela, desprazáronse ata San Mamede para visitar a parcela e coñecer de primeira man o inicio dos traballos e o replanteo destas obras.
As obras foron adxudicadas á empresa Pavimentos Noia, Obras e Contratas S.L. por un importe de 162.745 euros con IVE. O proceso de licitación contou cun único licitador presentado.
Esta ampliación enmárcase no programa de creación e mellora de prazas de escola infantil promovido pola Xunta de Galicia a través da Consellería de Política Social e Igualdade. A administración autonómica achega 68.038 euros para o proxecto, mentres que o Concello da Baña asumirá con recursos propios o importe restante ata cubrir a totalidade do investimento.
A ampliación suporá un importante avance para as familias da Baña, xa que permitirá dar resposta á demanda de prazas e mellorar as condicións do servizo.