- Detalles
- Escrito por Alicentis
- Categoría: Servizos sociais INICIO
- Visitas: 198
-
‘Cartas de amor’ poderá visitarse do 29 de setembro ao 12 de outubro e abordará a prevención da violencia de xénero entre a mocidade a través das obras de quince artistas
-
‘Sinaladas, provincia da Coruña’ chegará ao municipio do 21 de outubro ao 1 de novembro cun percorrido por cen anos de loita das mulleres galegas
-
As dúas mostras estarán abertas ao público con entrada gratuíta na Escola Municipal de Música da Baña Emilio Andújar
A Concellería de Acción Social, Cultura e Servizos á Cidadanía do Concello da Baña organiza nas próximas semanas unha programación cultural centrada na igualdade de xénero. A iniciativa inclúe dúas exposicións gráficas que abordan a prevención da violencia de xénero entre a mocidade e a loita das mulleres galegas ao longo do século XX.
A primeira proposta será Cartas de amor, unha mostra integrada por ilustracións de quince artistas que reflexionan sobre a violencia nas relacións de parella entre adolescentes. A exposición poderá visitarse desde o 29 de setembro ata o 12 de outubro na Escola Municipal de Música da Baña Emilio Andújar.
As obras convidan a identificar comportamentos violentos e a cuestionar os mitos asociados ao amor romántico. A mostra salienta a importancia de construír relacións baseadas no respecto, na liberdade e na igualdade, e constitúe unha ferramenta de sensibilización especialmente dirixida á xente nova.
Cartas de amor chega á Baña no marco da colaboración da Dirección Xeral de Igualdade e a Federación Galega de Municipios e Provincias (FEGAMP).
A programación continuará do 21 de outubro ao 1 de novembro coa exposición Sinaladas, provincia da Coruña, promovida pola Deputación da Coruña. A mostra propón unha andaina por cen anos de loita das galegas, con especial atención ás mulleres da provincia, desde o agrarismo de finais do século XIX ata o proceso de recuperación das liberdades democráticas.
A través de 39 paneis, a exposición recupera a memoria de centos de mulleres que participaron nas mobilizacións agrarias, sindicais, políticas e culturais. Tamén aborda a represión exercida contra elas durante a ditadura franquista, a súa presenza no exilio e na guerrilla, o seu papel nas loitas obreiras e estudantís e a aparición do movemento feminista organizado.
Sinaladas, provincia da Coruña busca dar visibilidade a mulleres que, malia a relevancia das súas achegas, foron perseguidas ou relegadas ao esquecemento. A exposición está estruturada con criterios cronolóxicos e temáticos para facilitar o achegamento a unha parte fundamental da historia contemporánea de Galicia.
As dúas mostras instalaranse na Escola Municipal de Música da Baña Emilio Andújar e poderán visitarse con entrada gratuíta. Con esta programación, o Concello da Baña reforza o seu compromiso coa educación en igualdade e co recoñecemento da contribución das mulleres á sociedade.
- Detalles
- Escrito por Alicentis
- Categoría: Servizos sociais INICIO
- Visitas: 299
O Concello da Baña abre o prazo de inscrición para participar no programa de envellecemento activo, dirixido a persoas maiores de 60 anos. As solicitudes poderán presentarse ata o 30 de setembro.
As actividades comezarán na primeira semana de outubro e prolongaranse ata maio. O programa inclúe estimulación cognitiva, con técnicas destinadas a traballar capacidades como a memoria ou a atención, e ximnasia de mantemento para favorecer a mobilidade e a autonomía funcional.
Como novidade, este ano promoverase un ciclo de charlas formativas sobre diferentes cuestións relacionadas co envellecemento activo. As persoas inscritas poderán escoller as actividades que máis lles interesen ou participar en todas.
As sesións de estimulación cognitiva celebraranse os martes. En San Vicenzo haberá dous grupos, de 16.00 a 17.30 e de 17.30 a 19.00 horas, mentres que en Fiopáns serán de 19.15 a 20.45 horas.
A ximnasia de mantemento desenvolverase os luns e mércores, de 17.30 a 18.30 horas en San Vicente e de 19.00 a 20.00 horas en Fiopáns.
As persoas interesadas poden obter máis información ou formalizar a súa inscrición no Departamento de Servizos Sociais, situado na rúa Tedelle, ou chamar ao teléfono 981 88 65 01. A folla de inscrición pode descargarse nos arquivos adxuntos ou nesta ligazón.
Este proxecto da Concellería de Acción Social, Cultura e Servizos á Cidadanía lévase a cabo con cargo á subvención FOEAC/2026 da Deputación Provincial da Coruña.
 Envellecemento activo: Ficha de inscrición | [ ] | 90 kB |
- Detalles
- Escrito por Alicentis
- Categoría: Servizos sociais INICIO
- Visitas: 3099
-
O encontro celebrarase no pavillón de San Vicenzo e contará con actuacións musicais ao longo da xornada
-
A programación inclúe a participación da Escola de Música Tradicional da Baña, da Charanga O Rumbo e do DJ Vieito
O Concello da Baña celebrará este domingo, 7 de xuño, a III edición do Xantar Veciñal, unha cita de convivencia que reunirá a arredor de 500 persoas no pavillón polideportivo municipal de San Vicenzo.
Organizado a través da concellería de Acción Social, Cultural e Servizos á Cidadanía, o encontro consolídase como unha das actividades de participación social do calendario municipal, favorecendo o reencontro entre a veciñanza e creando un espazo para compartir unha xornada en común.
Ademais do xantar ás 14.00 horas, a programación contará con varias actuacións musicais que amenizarán a celebración. A Escola de Música Tradicional da Baña abrirá a parte cultural da xornada, que continuará coa actuación da Charanga O Rumbo e coa sesión musical de DJ Vieito. Estas actividades desenvolveranse co apoio da Rede Cultural da Deputación da Coruña.
O Concello habilitará tamén un servizo de autobús para facilitar o desprazamento das persoas asistentes que o solicitaron previamente no momento da retirada das invitacións.
Desde o Concello da Baña agradécese a resposta da veciñanza a esta convocatoria, que volverá converter o municipio nun punto de encontro para persoas de diferentes xeracións nunha xornada de convivencia e participación.
- Detalles
- Escrito por Alicentis
- Categoría: Servizos sociais INICIO
- Visitas: 809
-
A actividade desenvolverase do 26 de agosto ao 4 de setembro nas instalacións do Campamento Xuvenil de Pontemaril
24 de xullo
O Concello da Baña aprobou a listaxe definitiva de persoas admitidas e en lista de agarda para o campamento de verán con pernocta que se desenvolverá nas instalacións do Campamento Xuvenil Pontemaril, en Forcarei.
Finalmente, o número de prazas increméntase de 17 a 20, despois de que a entidade xestora do campamento comunicase a dispoñibilidade de tres prazas adicionais, o que permitiu ampliar a oferta inicial.
Ademais, as persoas que figuraban inicialmente como excluídas e presentaron a documentación requirida foron admitidas ao cumprir os requisitos establecidos nas bases da convocatoria.
A resolución inclúe tamén unha lista de agarda formada por cinco solicitudes.
Comproba a listaxe premendo neste enlace ou no documento adxunto.
21 de xullo
Publícase a listaxe provisional istaxe provisional de persoas admitidas, en agarda e excluídas para o Campamento de Verán con pernocta 2026, que se celebrará do 26 de agosto ao 4 de setembro nas instalacións de Pontemaril (Forcarei).
Presentáronse 25 solicitudes para as 17 prazas ofertadas, polo que se aplicaron os criterios de prioridade recollidos nas bases da convocatoria.
Ábrese agora un prazo de dous días hábiles para presentar reclamacións ou emendar a documentación antes da publicación da listaxe definitiva.
Comproba a listaxe premendo neste enlace ou no documento adxunto.
7 de xullo
O Concello da Baña abre o prazo de inscrición no Campamento de verán con pernocta 2026, dirixido a rapaces e rapazas de entre 8 e 16 anos. A actividade desenvolverase do 26 de agosto ao 4 de setembro nas instalacións do Campamento Xuvenil de Pontemaril, no municipio pontevedrés de Forcarei.
O programa oferta un total de 17 prazas e fai parte do programa de conciliación municipal desenvolvido pola Concellería de Acción social, cultural e servizos á cidadanía. O seu obxectivo é ofrecerlle á rapazada unha experiencia de convivencia durante as vacacións estivais, cunha programación de carácter lúdico e educativo, ao tempo que contribúe a facilitar a conciliación das familias.
As actividades previstas terán carácter educativo e cultural e estarán orientadas a favorecer a convivencia, a cooperación e o desenvolvemento persoal e colectivo das persoas participantes.
O prazo de inscrición permanecerá aberto ata o 18 de xullo. As solicitudes deberán ser asinadas pola nai, pai ou persoa titora legal do menor e poderán presentarse no Rexistro Xeral do Concello da Baña, a través da sede electrónica municipal ou por calquera dos medios previstos na normativa de procedemento administrativo. O formulario e a documentación necesaria están dispoñibles na web municipal.
As bases establecen unha orde de prioridade para a adxudicación das prazas. Terán preferencia, en primeiro lugar, os menores pertencentes a unidades familiares empadroadas na súa totalidade na Baña ou, nos supostos previstos, aqueles nos que estean empadroados o menor e o seu pai, nai ou persoa titora legal. A continuación sitúanse os fillos e fillas do persoal que presta servizo no Concello e, finalmente, menores de familias non censadas no municipio.
O prezo público do campamento é de 140 euros para o primeiro fillo ou filla, 105 euros para o segundo e 70 euros para o terceiro. Para as unidades familiares empadroadas na Baña que cumpran os requisitos socioeconómicos establecidos nas bases e non conten con ingresos iguais ou superiores a dúas veces o IPREM, contémplanse tarifas bonificadas de 40 euros para o primeiro fillo ou filla, 30 euros para o segundo e 25 euros para o terceiro.
Unha vez publicada a listaxe definitiva de solicitudes admitidas, as persoas beneficiarias deberán efectuar o pagamento nun prazo de 5 días hábiles. A falta de pagamento suporá a perda da praza.
Para máis información, as persoas interesadas poden contactar coa Concellería de Acción Social, Cultural e Servizos á Cidadanía no teléfono 981 886 501.
- Detalles
- Escrito por Alicentis
- Categoría: Servizos sociais INICIO
- Visitas: 3107
O Concello da Baña celebrou este luns, 1 de xuño, o acto de clausura das actividades do programa de Envellecemento Activo correspondentes ao curso 2025/2026, unha iniciativa impulsada desde a área de Servizos Sociais que volveu reunir ao longo do ano numerosas persoas maiores do municipio.
A xornada foi organizada pola Concellería de Acción Social, Cultural e Servizos á Cidadanía, dirixida por Mónica González, en colaboración co persoal dos Servizos Sociais municipais. Durante o encontro fíxose entrega dos diplomas que recoñecen a implicación das persoas participantes nas actividades de estimulación cognitiva e de ximnasia de mantemento desenvolvidas ao longo do curso. O acto contou tamén coa participación dos monitores Jenni e Kevin, encargados de impartir estas actividades, así como coa presenza do alcalde da Baña, José Antonio Pereira.
A programación da clausura completouse cunha das actividades máis agardadas polas persoas asistentes, as tradicionais partidas de bingo, que serviron para pechar a xornada nun ambiente de convivencia.
Desde o Concello da Baña agradecen a acollida que volveu ter este programa e destacan a súa contribución á participación social e ao mantemento de hábitos activos entre as persoas maiores do municipio.
Co remate das actividades chega agora o descanso estival, á espera dunha nova edición do programa no próximo curso.
