- Detalles
- Escrito por Alicentis
- Categoría: novas
- Visitas: 3863
-
A programación anual inclúe eventos destacados como a II Ruta Ciclista da Filloa, a Carreira Popular ou o X Trail da Baña
-
O obxectivo é promover hábitos de vida saudables e a participación veciñal
O Concello da Baña, a través da Concellería de Turismo, Deporte e Relacións Institucionais, vén de presentar o seu Programa de Actividades Deportivas 2026. Trátase dunha planificación integral que combina propostas competitivas, formativas e de lecer co obxectivo de converter o deporte nun motor de saúde e convivencia veciñal.
O calendario arrincará este domingo 8 de febreiro coa II Ruta Ciclista da Filloa, unha xornada popular que combina deporte e tradición no marco da XXII Festa da Filloa da Pedra.
En marzo celebrarase o Torneo de Minibásquet, orientado á promoción do deporte base e dos valores do traballo en equipo. Xa no mes de abril terán lugar o I Torneo de Tenis de Mesa e un Campamento Deportivo, dúas iniciativas centradas no deporte individual e no lecer activo da infancia e da mocidade.
En maio será a quenda da segunda edición da Carreira Popular da Baña, unha cita que volverá reunir participantes de diferentes idades nunha proba aberta e que busca consolidarse no calendario deportivo local.
O mes de xuño marcará a clausura das Escolas Deportivas Municipais e a celebración do V Torneo de Xadrez, reforzando a aposta polo deporte formativo.
O período estival continuará en xullo coa organización dunha saída ao parque acuático e un curso de natación, mentres que en agosto terá lugar a Festa da Auga, unha actividade lúdico-deportiva dirixida ao conxunto da veciñanza.
Tras o verán, en setembro, celebrarase o X Trail da Baña, coincidindo co inicio dunha nova tempada das Escolas Deportivas. O calendario continuará en outubro co V Torneo de Pádel, unha competición que gaña inscritos ano a ano, e en novembro cunha Xornada de Hábitos Saudables e Primeiros Auxilios, de carácter formativo e preventivo.
O programa pecharase en decembro cunha saída á pista de xeo, pensada como actividade de lecer deportivo para a veciñanza de todas as idades durante o período festivo de Nadal.
Ademais destas accións concretas, o Concello da Baña manterá ao longo de todo o ano o Circuito de Andainas ‘Descubre A Baña’, así como a asistencia a eventos deportivos de interese, reforzando o compromiso municipal coa promoción da actividade física e do benestar social.
O Concello da Baña deseñou esta programación como unha aposta firme polo deporte como ferramenta de saúde, integración e cohesión social, garantindo unha oferta accesible e variada para o conxunto da cidadanía.
As persoas interesadas en obter máis información poden chamar aos teléfonos 981 886 501 ou 669 368 413.
- Detalles
- Escrito por Alicentis
- Categoría: novas
- Visitas: 3938
-
Celebrarase o domingo 8 de febreiro e está dirixido ao público infantil e familiar
-
A actividade é gratuíta pero por motivos organizativos precísase inscrición previa
O Concello da Baña, a través da Concellería de Acción Social, Cultura e Servizos á Cidadanía, organiza o obradoiro de máscaras En-mascara-ARTE, que se celebrará o domingo 8 de febreiro como parte da programación da XXII Festa da Filloa da Pedra da Baña.
A actividade desenvolverase en dúas sesións diferenciadas, unha dirixida á rapazada de 4 a 8 anos e outra para participantes a partir dos 8 anos, cunha duración aproximada de dúas horas. O obradoiro é gratuíto, inclúe todo o material necesario para a elaboración das máscaras, pero por motivos organizativos solicítase inscrición previa.
As persoas interesadas poden formalizar a súa inscrición chamando ao 981 88 65 01 ou a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.
Durante o obradoiro, as persoas participantes crearán as súas propias máscaras inspiradas na natureza, no bosque e nos animais propios de Galicia, elementos moi presentes na contorna do concello da Baña, favorecendo a expresión artística e a participación colectiva nun ambiente lúdico e educativo.
Esta actividade forma parte do conxunto de propostas culturais organizadas polo Concello arredor da Festa da Filloa da Pedra, co obxectivo de complementar a celebración gastronómica cunha programación cultural dirixida á veciñanza de todas as idades.
Unha tradición ligada ao Entroido e á natureza
O obradoiro En-mascara-ARTE nace coa vontade de recuperar e reinterpretar unha tradición ancestral vinculada ao inicio do Entroido, presente historicamente en todos os pobos de Galicia. Aínda que A Baña non pertence a unha comarca especialmente vencellada ao Entroido das máscaras nin conta con testemuñas gráficas propias desta práctica, a tradición permanece viva na memoria colectiva do concello.
O seu enfoque simbólico remite á figura do home verde, personaxe asociado ao bosque e á natureza, símbolo da chegada da primavera e presente en numerosos edificios galegos medievais, renacentistas e modernistas. Esta figura segue manifestándose no paso das estacións e nas fragas, soutos e bosques de Galicia, tamén na contorna da Baña.
Os entroidos tradicionais galegos manteñen unha estreita relación coa natureza, cunha forte presenza de representacións zoomórficas e rituais vencellados ao ciclo vital, elementos que conectan directamente coas tradicións gastronómicas destas datas, como a Festa da Filloa da Pedra.
A través desta proposta, o Concello da Baña aposta por poñer en valor o patrimonio inmaterial galego, fomentando a creatividade, a transmisión cultural e a participación da veciñanza no marco dunha das festas máis representativas do municipio.
- Detalles
- Escrito por Alicentis
- Categoría: novas
- Visitas: 3956
-
O gran desfile celebrarase o sábado 21 de febreiro polas rúas Castelao e Tedelle
-
A gran novidade é a creación dun premio específico para recoñecer a participación local dotado de 150 euros
-
O prazo de inscrición permanecerá aberto ata o venres 13 de febreiro a través da sede electrónica e o Rexistro Xeral
O Concello da Baña, a través da Concellería de Acción social, cultura e servizos á cidadanía, organiza o sábado 21 de febreiro o Concurso de Disfraces do Entroido, unha cita que volverá encher as rúas Castelao e Tedelle de cor, música e creatividade a partir das 16.30 horas e que chega este ano cunha importante novidade: a creación, por primeira vez, dun premio específico para recoñecer a participación local..
O Entroido da Baña reforza así a súa aposta por implicar á veciñanza e poñer en valor o tecido social do municipio, cunha dotación económica que supera os 3.000 euros en premios, repartidos entre as seis categorías do concurso. Entre elas destaca o novo premio de participación local, dotado con 150 euros, destinado a aquelas comparsas ou grupos nos que, cando menos, o 75 % das persoas integrantes sexan veciñas ou veciños da Baña, non sendo acumulable con outros galardóns.
Na modalidade de carrozas, cun mínimo de sete integrantes, estableceranse tres premios: 900 euros para o primeiro posto, 400 euros para o segundo e 150 euros para o terceiro, unha contía que se reproduce tamén na categoría de comparsas.
Na categoría de grupos, formados por entre dúas e seis persoas, concederanse dous premios: 150 euros para o primeiro clasificado e 100 euros para o segundo. Pola súa banda, as modalidades de disfrace individual adulto e disfrace individual infantil contarán cun premio único de 100 euros en cada caso.
As persoas e grupos interesados en participar deberán formalizar a súa inscrición como data máxima o venres 13 de febreiro. O trámite pode realizarse telemáticamente na sede electrónica municipal ou presencialmente no Rexistro Xeral do Concello. No caso de participantes menores de idade, será imprescindible achegar a correspondente autorización asinada por titor/a legal.
Criterios de valoración
O xurado, composto por persoas alleas á organización para garantir a total imparcialidade, puntuará de 1 a 5 aspectos como o vestiario e a maquillaxe -valorando especialmente o traballo artesanal e o uso de materiais de refugallo-, a orixinalidade, a posta en escena e a capacidade para involucrar ao público. Cada formación disporá dun máximo de 3 minutos de actuación diante do xurado.
Plan de continxencia por choiva
En caso de que a meteoroloxía impida o desfile exterior, a festa trasladarase ao pavillón municipal de San Vicenzo. Nese suposto, a categoría de carrozas quedaría deserta por motivos loxísticos e de seguridade, e as comparsas adaptarían a súa actuación a un máximo de 20 membros en pista.
O Concello da Baña fai un chamamento a todos os colectivos, asociacións e particulares para que saian á rúa e fagan súa esta festa. O obxectivo é unir o talento de pequenos e maiores nunha xornada de convivencia que busca gañar o seu oco propio no calendario festivo da comarca a través da ilusión e a creatividade.
As bases completas do concurso, así como o formulario de inscrición e a autorización para menores, están dispoñibles nos ficheiros adxuntos.
 Entroido 2026: autorización menores.pdf | [ ] | 213 kB |
| Entroido 2026: bases.pdf | [ ] | 194 kB |
| Entroido 2026: ficha de inscrición no Concurso de Disfraces.pdf | [ ] | 141 kB |
- Detalles
- Escrito por Alicentis
- Categoría: novas
- Visitas: 4349
-
A proba celebrarase o 8 de febreiro coincidindo coa XXII edición da Festa da Filloa da Pedra da Baña
-
A organización establece dous percorridos de 5 e 10 quilómetros para fomentar a participación de todas as idades
No marco da celebración da XXII Festa da Filloa da Pedra, o Concello da Baña organiza a segunda edición da Ruta Ciclista da Filloa. Esta cita, que terá lugar o vindeiro domingo 8 de febreiro, busca promover hábitos de vida saudables ao tempo que se pon en valor o patrimonio gastronómico do municipio.
A xornada deportiva comezará ás 10.00 horas dende a Praza do Concello. Co obxectivo de ser unha proba inclusiva e familiar, a organización deseñou dous trazados diferenciados: un de 5 quilómetros, ideal para os máis novos, e outro de 10 quilómetros para aqueles que busquen un desafío un pouco maior.
Seguridade e inscricións
Dende o departamento de Deportes do Concello lémbrase que o uso do casco será estritamente obrigatorio para todos os participantes. Así mesmo, establécese que os menores de 11 anos deberán realizar o percorrido acompañados por unha persoa adulta. Como recoñecemento ao esforzo, ao remate da ruta haberá un servizo de abastecemento e petiscos para todos os ciclistas.
As persoas interesadas en participar nesta experiencia deportiva e gastronómica teñen de prazo ata o venres 6 de febreiro para formalizar a súa inscrición. O trámite pode realizarse a través do teléfono 669 368 413 ou enviando un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo..
Esta iniciativa conta co apoio da Deputación da Coruña, consolidándose como unha das actividades máis dinámicas da programación festiva de febreiro na comarca.
- Detalles
- Escrito por Alicentis
- Categoría: novas
- Visitas: 4480
-
A concelleira Mónica González debullou na praza de Abastos de Santiago os detalles dunha edición que aposta pola inclusión social e a artesanía
-
O domingo 8 de febreiro, A Baña converterase no epicentro gastronómico con degustacións, obradoiros e as actuacións de De Ninghures e a Escola de Música Tradicional
O Concello da Baña presentou este xoves en Santiago de Compostela a XXII Festa da Filloa da Pedra, nun acto celebrado na Aula Gastronómica da Praza de Abastos que combinou divulgación, tradición e experiencia en directo. A concelleira de Acción social, cultural e servizos á cidadanía, Mónica González, foi a encargada de debullar os detalles dunha nova edición que reforza a identidade da festa “como referente gastronómico e cultural de Galicia” e que contará coa actuación do recoñecido grupo De Ninghures como un dos grandes atractivos da xornada.
A presentación converteuse nunha auténtica experiencia sensorial grazas ao showcooking en directo a cargo das mestras filloeiras Elena López e Nieves Martínez, que elaboraron filloas da pedra ante o público asistente, amosando unha técnica que forma parte do patrimonio inmaterial da Baña.
Durante o acto deuse tamén a coñecer o merchandising oficial da festa, “un proxecto cun marcado carácter social deseñado, ao igual que o cartel desta edición, dende a Fundación para a Protección dos Discapacitados Psíquicos da Comarca de Barcala, reforzando así o compromiso do Concello coa inclusión e coa economía social”, afirmou Mónica González. A directora da entidade, Rosa Tuñas, e Jennifer Riveira, autora do deseño, explicaron esta mañá que as persoas usuarias da fundación participaron na elaboración de todos os produtos, que se poderán adquirir tanto no posto que se habilitará o día da festa como a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.
O alcalde da Baña, José Antonio Pereira, asistiu á presentación acompañado polo concelleira de Obras Jesús Pena; membros do grupo popular bañense; Hadrián García, integrante do grupo De Ninghures; e o director da Escola de Música Tradicional da Baña, Emilio Lois.
Unha xornada chea de citas
Na presentación detallouse o amplo programa previsto para o domingo 8 de febreiro, unha xornada na que A Baña será o epicentro gastronómico e festivo da comarca. A festa comezará ás 09.30 horas coa apertura de portas e o inicio das degustacións. O prezo da filloa será de 1,5 euros, mentres que as racións de orella e chourizo terán un custo de 6 euros.
A programación combina propostas gastronómicas, deportivas e culturais, como a celebración da segunda Ruta Ciclista da Filloa (con saída ás 10.00 horas), ou os obradoiros gratuítos de treboada (11.00 h) e de cestería tradicional (12.15 h), pensados para poñer en valor os saberes tradicionais.
“O itinerario deste ano é moi completo. A nosa idea é que as persoas que se acheguen á Baña non veñan só a comer a filloa, que iso está moi ben e é un dos obxectivos, senón que poidan desfrutar doutros aspectos culturais. Todo o programa está moi enfocado á recuperación de oficios tradicionais e de elementos propios da nosa contorna”, destacou a concelleira.
Neste senso, explicou que o obradoiro de cestería, impartido por Luis do Río, está a espertar un notable interese: “Na nosa zona era moi habitual a elaboración de cestos con vimbio, e hoxe en día custa atopar persoas que manteñan viva esta tradición. Agardamos que esta actividade sirva tamén para que a xente máis nova se anime a recuperar este tipo de artesanía”.
Destaca tamén o obradoiro de treboada, “unha tradición do Baixo Miño nacida do grupo musical do mesmo nome, que emprega tambores de distintos tipos acompañados da gaita. Nós achegaremos os instrumentos e a todas as persoas que queiran participar ensinaráselles como tocar e como realizar un pequeno pasarrúas”. A actividade desenvolverase na carpa habilitada no colexio.
A música tradicional terá un papel destacado coa actuación da Escola de Música Tradicional da Baña e As Atrevidas de Monte ás 12.00 horas, mentres que o momento institucional chegará co pregón do escritor bañense Manuel Iglesias Turnes, previsto para as 13.30 horas.
Fin de festa con De Ninghures
Xa pola tarde, a festa continuará cun animado tardeo musical a partir das 14.00 horas a cargo do Trío Alborada, Bouba e A Requinta de Lampai, para culminar, ás 19.00 horas, co concerto de De Ninghures, un dos pratos fortes desta edición. A banda destaca por fusionar a música tradicional galega con sons actuais e unha proposta escénica moi traballada, o que a converte nun dos proxectos máis atractivos do panorama musical galego que conquista públicos de todas as idades.
Coa XXII Festa da Filloa da Pedra, segundo indicou Mónica González, ““o Concello da Baña reafirma o seu compromiso coa defensa das tradicións, a promoción da gastronomía local e a dinamización cultural e social do municipio”, consolidando unha cita que cada ano reúne a centos de persoas arredor dun dos símbolos máis recoñecidos da identidade bañense.
