Detalles

Escrito por Alicentis

Categoría: Urbanismo

Published: 20 Xullo 2023

Visitas: 508

• Durante este período atenderase só con cita previa os días 28 de xullo, 1 e 8 de agosto, chamando ao teléfono 981 886 501 

A Oficina de Urbanismo permanecerá pechada ao público por vacacións dende hoxe, xoves 20 de xullo, e ata o martes 15 de agosto. O Concello da Baña informa que ao longo deste período estableceranse tres xornadas de atención ao público, pero será necesario concertar cita previa, chamando ao número de teléfono 981 886 501. A atención con cita previa realizarase os días 28 de xullo, 1 e 8 de agosto, en horario de 9.30 a 13.00 horas.

A Oficina de Urbanismo volverá abrir diariamente a partir do mércores 16 de agosto.

Detalles

Escrito por Alicentis

Categoría: Urbanismo

Published: 28 Xuño 2022

Visitas: 844

• O alcalde afirma que “utilizaremos todas as armas ao noso alcance” para que non se instalen máis parques eólicos

• As asociacións veciñais O Outeiro e A Fonte Seca piden a moratoria na tramitación de todos os proxectos ata que se adapte a lei a situación actual

• “Deixannos sen futuro e sen auga” aseguran Carme Varela e Cándido Iglesias

• O xoves haberá un pleno extraordinaria ás 20.00 horas

O alcalde da Baña e representantes das asociacións veciñais O Outeiro, de San Mamede de Monte, e A Fonte Seca solicitáronlle  esta tarde a Xunta de Galicia que paralice a tramitación do parque eólico de Troitomil e dos demais parques que se queren implantar na comarca “ata que se adapte a lei a situación actual”. Nunha rolda de prensa ante varias ducias de veciños e veciñas, Andrés García Cardeso, Carme Varela e Cándido Iglesias pediron poñer fin “ao asedio e ao expolio eólico” que está a sufrir o municipio. “Utilizaremos todas as ferramentas que temos ao noso alcalce”, afirmou o alcalde. 

O Concello da Baña pon a disposición da veciñanza a un equipo técnico para axudarlle a presentar alegacións contra a declaración de utilidade pública do parque de Troitomil (o anuncio foi publicado no DOG o día 16). O vindeiro xoves celebrarase un pleno extraordinario no que a Corporación volverá reclamar de novo a paralización de todos os proxectos de parques eólicos. A sesión comezará ás 20.00 horas.

Carme Varela, da Asociación Veciñal O Outeiro, asegurou que os seis parques eólicos que se están a tramitar na Baña (300 en Galicia) “deixannos sen futuro e anulan totalmente o PXOM”, e pediu unha moratoria na tramitación de todos os proxectos “ata que se modifique a lei para adaptala a situación actual. Antes os muíños tiñan 70 metros de alto, e agora 200”, asegurou.

No mesmo sentido se pronunciou o vicepresidente da Asociación A Fonte Seca, Cándido Iglesias, quen asegurou que o parque eólico de Troitomil é “a base dunha pirámide” doutros moitos parques que van ocupar case todo o territorio. “Vannos deixar sen auga”, asegurou, e pediulle ao Concello que se persone contra a tramitación destes miniparques e, incluso, que presente un contencioso.

O alcalde, Andrés García Cardeso, coincidiu cos representantes veciñais ao asegurar que se están tramitando como individuais parques eólicos que, en conxunto, conforman un gran complexo que ocupará gran parte do municipio. O alcalde leu unha carta que lle vai remitir á veciñanza e que recolle as actuacións que vai emprender o Concello. “Pedimos que se tramiten os proxectos completos, e non partilos en pequenos parques”, dixo, antes de anunciarlle a toda a veciñanza que o Concello porá a un equipo técnico ata o 1 de agosto a disposición das persoas interesadas para que poidan presentar as alegacións que estimen necesarias contra o parque eólico de Toitomil.

A continuación reproducimos íntegra a carta que lle vai enviar o alcalde á veciñanza (pactada coas dúas asociacións) e que consta de doce puntos:

O pasado 16 de xuño de 2022, saíu publicado no Diario Oficial de Galicia e en La Voz de Galicia a información pública da declaración de utilidade pública do parque eólico de Troitomil polo que lle queremos transmitir a nosa preocupación así como o rexeitamento público e total á implantación e tramitación de todos os parques eólicos iniciados.

Por todo isto, temos previsto:

1. Demandar formalmente a paralización do proceso de declaración de interese público do parque mentres a Consellería de Industria non dea contestacións ás anteriores alegacións e ás seguintes solicitudes presentadas e pendentes de aceptar. Pediremos tamén amparo á Valedora do Pobo.
2. Solicitar unha reunión informativa, aberta á cidadanía, na que sexa o secretario do Concello o que nos informe dos pasos dados e do percorrido que temos por diante. É importante que sexa un técnico.
3. Presentar unha demanda de paralización da declaración de utilidade pública pola alteración significativa sobre o PXOM, xa que de facto é unha alteración total sobre boa parte dos terreos e das construcións xa existentes.
4. Enviar o Concello unha solicitude de alegacións ás expropiacións da rede viaria.
5. Mandar unha solicitude de traslado á Deputación da Coruña para que faga o mesmo.
6. Profundar na alegación contra a partición dos parques. Hai novas sentenzas e hai que insistir en que non ter en conta que esas sentenzas sentan xurisprudencia, podería xerar demandas contra o funcionariado que as asinen.
7. Incidir en que a totalidade das infraestruturas do parque, incluídas as de evacuación da enerxía xerada, deberán estar incluídas para a súa consulta pública e avaliación global no presente documento de inicio e non noutros proxectos independentes que lle impiden á cidadanía a avaliación dos impactos ambientais globais do conxunto das infraestruturas do proxecto industrial.
8. Solicitarlle a Medio Rural documentación que acredite todos os incendios habidos nese monte durante os últimos 35 anos.
9. Insistir en que o Concello non ten capacidade para abastecer de auga potable a poboación afectada e, polo tanto, tratándose dun ben básico, faise inviable a declaración de utilidade pública xa que hai risco severo de que as obras afecten os mananciais, o que supón unha afección moi severa e prexuízos significativos para os recursos hídricos e a vulneración flagrante da Directiva marco da auga (DMA). 

Ademais non existe un estudo hidrolóxico e hidroxeolóxico que garanta a calidade das masas de auga superficiais e soterradas e a non afección dos acuíferos. A mercantil promotora obvia as captacións de auga para o uso humano e agrogandeiro e os mananciais e fontes que hai na poligonal do parque eólico e no traxecto da liña de evacuación.

10. Insistir en que hai unha forte alteración social e que polo tanto se demanda a paralización desta declaración de utilidade pública.
11. Solicitar unha reunión no Parlamento de Galicia co vicepresidente e co conselleiro de Industria, Francisco Conde para que o grupo de goberno vaia da man dos colectivos veciñais e trasladarlle a repulsa ao proxecto eólico de Troitomil.
12. Solicitar unha reunión con Valentín Formoso, presidente da Deputación, para que presente alegacións pola estrada O Seilán-Lañas e para que lle  mostre o seu apoio ao Concello da Baña.

Co fin de colaborar coas persoas afectadas, o Concello da Baña ponse ao servizo da veciñanza, ata o 1 de agosto, para axudar a tramitar os escritos de alegacións coa finalidade de paralizar a implantación deste parque eólico de Troitomil nesta información pública e nos demais de Barrosino e Vilartoxo.

Detalles

Escrito por Alicentis

Categoría: Urbanismo

Published: 07 Febreiro 2023

Visitas: 662

• A Xunta financiará as obras cun investimento de preto de 360.000 euros //

• A actuación comprende a execución de beirarrúas de polo menos dous metros de ancho nas dúas marxes da AC-444 //

• Tamén se implantará a canalización de abastecemento e se rematará cos vertidos das vivendas cara á estrada //

A Baña contará na zona do Seilán cun itinerario peonil continuo de 900 metros, que transcorrerá por ámbalas dúas marxes da estrada AC-444 entre os puntos quilométricos 0+570 e 1+450. As obras, orzamentadas en preto de 360.000 euros, correrán a cargo da Xunta e teñen como obxectivo mellorar a accesibilidade e a seguridade peonil. Así llo comunicou a conselleira de Infraestruturas e Mobilidade, Ethel Vázquez, ao alcalde da Baña, Andrés García, no encontro de traballo que mantiveron a semana pasada en San Caetano e no que tamén participou o delegado territorial da Xunta na provincia da Coruña, Gonzalo Trenor.

Ethel Vázquez puxo en valor o traballo do Goberno galego para manter en boas condicións de seguridade e de comodidade a rede viaria autonómica, con actuacións como o reforzo do firme levado a cabo recentemente nas estradas AC-406 e AC-546, que supuxeron un investimento de preto de 300.000 € só no concello da Baña.

Detalles

Escrito por Alicentis

Categoría: Urbanismo

Published: 06 Mai 2022

Visitas: 687

• O delegado na Coruña, Gonzalo Trenor, visitou esta mañá co alcalde, José Andrés García Cardeso, as dúas instalacións

• A achega forma parte da iniciativa da Xunta na súa aposta polo fermosismo

O delegado da Xunta na Coruña, Gonzalo Trenor, visitou esta mañá o Concello da Baña, para reunirse co seu alcalde, José Andrés García Cardeso, e informarlle de que resultou beneficiario dunha axuda de case 40.000 euros para corrixir impactos paisaxísticos nos equipamentos e edificios públicos do municipio.

A Consellería de Medio Ambiente, Territorio e Vivenda concedeulle á Baña unha axuda de 20.000 euros a cargo da Liña 1 para actuar no centro da terceira idade coa limpeza e reparación da súa fachada para o seu posterior pintado; e outra, tamén de 20.000 euros, para mellorar no marco da Liña 2 o lavadoiro de Cabanas, un elemento de formigón armado que na actualidade presenta manchas e humidades polo que se procederá á súa limpeza e á reparación de fendas antes de pintalo.

No conxunto da comarca de Santiago, a Xunta concedeu unha destas subvencións –ou ata dúas nalgún caso– a 5 concellos: Santiso, Ordes, Boimorto, O Pino e A Baña, por un importe global de máis de 136.000 euros. 

A Consellería vén de resolver a convocatoria de 2022 da orde de axudas para avanzar na loita contra o feísmo nos concellos de menos de 20.000 habitantes.

Cómpre lembrar que este programa de incentivos —convocado en xaneiro por 600.000 euros e cuxo crédito se ampliou ata os 800.000 euros esta mesma semana— recolle dúas liñas de actuacións subvencionables: a Liña 1 para intervencións coas que emendar o impacto negativo que poden causar sobre a contorna edificios e dependencias que acollen servizos municipais; e a Liña 2 pensada para mellorar outros equipamentos públicos ou elementos etnográficos —como fontes, hórreos, palcos de música e lavadoiros— propiedade dos concellos.

As actuacións subvencionables, que poderán acadar o 70% do custo estimado, deberán adaptarse ou ben aos criterios fixados na Guía de cor e materiais de Galicia, ou ben aos da Guía de boas prácticas de caracterización e integración paisaxística de valados.

O ano pasado a primeira convocatoria das ordes de axudas para a corrección de impactos paisaxísticos, tanto para particulares como para concellos, saldouse con máis de medio milleiro beneficiarios que recibiron subvencións por un importe total de 2 millóns de euros e permitiron intervir en 222 municipios galegos

 En vista do éxito da primeira convocatoria, a Xunta decidiu convocar de novo este ano ambas liñas de subvención no marco da súa aposta polo fermosismo e para garantir unha integración harmónica entre as construcións urbanas, tanto públicas como privadas, e a contorna paisaxística.