- Detalles
- Escrito por Alicentis
- Categoría: novas
- Visto: 222
-
O Concello solicitará unha achega nominativa á Deputación de 200.000 euros para mellorar o tramo de Lañas ata Pazo
-
As persoas voluntarias que atendan servizos como o de Madrugadores poderán percibir ata 8,33 €/hora, a mesma cantidade que fixa a Xunta para os comedores escolares
-
O goberno aproba a moción reclamándolle á Xunta e a Sogama que non suban o canon pola recollida de lixo e manteñan a bonificación do 15%
A Corporación da Baña aprobou por unanimidade no pleno de onte solicitarlle unha subvención nominativa á Deputación da Coruña para continuar coa mellora da estrada de Lañas. Tamén por unanimidade se aprobou o convenio de cesión de terreos para a mellora do camiño de Monelos, a conta xeral de 2023 e a modificación do Plan Municipal de Voluntariado.
O proxecto de mellora do tramo entre Lañas e Pazo da CP-0702 ten un orzamento de 299.999 euros, e o Concello da Baña vaille solicitar á Deputación da Coruña unha subvención nominativa de 200.000 euros, comprometéndose a financiar os 99.999 euros restantes con fondos propios ou con achegas doutras administracións.
Tamén por unanimidade se aprobou a conta xeral de 2023 e o convenio firmado cos propietarios implicados para a cesión de terreos que permitirán arranxar o primeiro tramo do Camiño de Monelos.
Todos os grupos estiveron tamén de acordo en modificar o Plan Municipal de Voluntariado, permitindo agora unha compensación económica polos gastos de dedicación e desprazamento xerados pola colaboración das persoas voluntarias cun importe de 8,33 euros/hora. Este cambio está pensado, fundamentalmente, para facilitar que o servizo de Madrugadores poida ser atendido por persoas voluntarias, que percibirán o mesmo importe que a Xunta destina as persoas que colaboran cos servizos de comedor. Deste xeito, o Concello poderá prestar un servizo fundamental de conciliación para familias que levan as súas crianzas tanto ao CPI San Vicente como a CRA de Lañas.
No capítulo de mocións, a presentada polo equipo de goberno reclamándolle á Xunta e a Sogama que non apliquen o incremento do canon previsto para 2025 e que se manteña o desconto do 15% actual foi aprobada cos votos a favor de PSdeG e BNG (6). A proposta tamén pide ampliar as plantas de biorresiduos existentes, como estaba previsto no plan de xestión de residuos urbanos de Galicia 2010-2022.
O PP votou en contra desta iniciativa, e presentou unha moción tamén sobre o canon de Sogama na que reclamaban que, primeiro, o Goberno central retirara o imposto que se aplicará a incineración de residuos e non aplique aínda a directiva de Bruxelas, como fan a maioría de países da Unión Europea, dixo o portavoz popular, Andrés García Cardeso.
O alcalde, José Antonio Pereira (PSdeG), e a tenente de alcalde Mónica González (BNG), insistiron que “quen aplica subida do canon é Sogama, que é unha empresa controlada pola Xunta. Se suben o canon, ese incremento vai repercutir na subida do recibo do lixo da veciñanza da Baña. É Sogama que debe tomar a decisión e non subir o canon”, aseguraron dende o goberno da Baña. A moción do PP foi rexeitada cos seis votos en contra de PSdeG e BNG, e cinco a favor do PP.
Tamén foi rexeitada a moción presentada polo PP sobre Venezuela.
No último apartado, en resposta á pregunta formulada polo PP de cando vai tomar posesión o persoal que aprobou a oposición do proceso de estabilización, o alcalde comprometeuse a que se fará antes do 31 de decembro, que é o prazo que establece a normativa vixente. José Antonio Pereira explicou que está á espera de que a secretaria-interventora analice o expediente para culminar o proceso.
Mónica González, pola súa banda, explicou que tras unha reunión co director xeral de Familia, Jacobo Rey, o Concello da Baña vaille solicitar á Xunta unha subvención para converter o PAI nunha escola infantil con 35-40 prazas e poder así atender todas as solicitudes das familias. O punto de atención á infancia conta actualmente con 20 prazas, e este curso moitas familias quedaron en lista de agarda.
- Detalles
- Escrito por Alicentis
- Categoría: novas
- Visto: 286
- As risas e o bo humor chegarán da man de pezas como ‘Monólogos 3 en 1’, ‘Marcho que teño que marchar’, ‘Vicio houbo sempre’, ‘E ti de quen ves sendo’ e ‘Enredadas’
O Concello da Baña, a través da Concellería de Acción Social, Cultural e Servizos á Cidadanía, presenta unha nova edición do seu programa Outono Cultural co ciclo Outono de Monólogos.
As actuacións comezarán xa este venres 20 de setembro da man de Debullando Teatro e o seu Monólogos 3 en 1 cargado de gargalladas e bo humor.
No mes de outubro a cita é coa compañía Inventi Teatro, que o venres 4 ofrece Marcho que teño que marchar. Trátase dun emocionante e divertido espectáculo unipersonal protagonizado por Bea Campos que ofrece un momento para a reflexión sobre os roles establecidos, as herdanza culturais e as tradicións familiares.
O mes de novembro estará repleto de humor e teatro, con tres espectáculos programados. O día 8 de novembro, Xarope Tulú achegará ao público a obra Vicio houbo sempre onde Atenea García recolle historias de vía nas marxes de mulleres maiores de 85 anos. Estas charlas acaban, en moitas ocasións, falando de pracer e sexualidade, de cousas supostamente prohibidas tempo atrás, deixando entrever que cousas como chegar virxe ao matrimonio sucedía, pero non sempre.
O día seguinte, o 9 de novembro, Debullando Teatro volverá ao escenario, desta vez en Lañas, cunha nova función titulada E ti de quen ves sendo ás 19:00 horas.
O ciclo pecharase o venres 22 de novembro coa actuación de Leti da Taberna que presentará Enredadas. Neste monólogo Leticia Miraz explora en ton irónico a nosa relación coas redes sociais e como nos inflúen no noso día a día, provocando que o público se vexa identificado coas situacións que se presentan e acabe ríndose de si mesmo.
Todas as actuacións levaranse a cabo na Casa da Cultura ás 20.30 horas excepto E ti de que ves sendo que terá lugar en Lañas ás 19.00 horas.
Este Outono de Monólogos está organizado co apoio da Deputación da Coruña, ofrecendo unha programación variada e de calidade para todas as idades, que promete encher de risas e bo humor as tardes de outono á veciñanza do Concello da Baña.
- Detalles
- Escrito por Alicentis
- Categoría: novas
- Visto: 140
-
A cita ten como obxectivo principal recrear o ambiente das antigas romarías dos anos cincuenta
-
As Pandereteiras de Monte, a Escola de Música Tradicional da Baña, o Trío DeTres e o grupo de cantareiras Maianas amenizarán a xornada
O vindeiro domingo 15 de setembro, o Concello da Baña celebra unha nova edición da Festa da Re-Volta na carballeira de Seilán. A cita ten como obxectivo principal recrear o ambiente das antigas romarías dos anos cincuenta, unha época na que a música, os xogos populares e a convivencia eran protagonistas da vida comunitaria.
A Festa da Re-Volta naceu co propósito de manter viva a memoria destas celebracións tradicionais, permitindo á veciñanza e aos visitantes viaxar no tempo e vivir unha xornada que mestura o pasado coa festa actual. O evento ofrecerá unha animada programación musical coa actuación das Pandereteiras de Monte, ás 12:45 horas, da Escola de Música Tradicional da Baña, ás 13:00h, e do Trío DeTres, a partir das 16:30 horas, que garantirán unha xornada chea de ritmo e tradición.
Ás 17:00 horas será o momento dos xogos populares onde as familias poderán gozar das actividades tradicionais nun ambiente de convivencia e participación interxeracional.
A xornada contará pola tarde coa actuación do grupo de cantareiras Maianas.
A Festa da Re-Volta preserva as tradicións e costumes que foron parte da historia colectiva da Baña, ao tempo que ofrece un espazo para o encontro e a diversión.
- Detalles
- Escrito por Alicentis
- Categoría: novas
- Visto: 112
As Atrevidas de Monte Alto e os gaiteiros da Escola de Música Tradicional animaron a sesión matinal
O Trío deTres e As Maianas puxeron o colofón a unha romaría que tenta emular ás celebradas nos anos cincuenta
Os xogos populares e un xantar na carballeira de Seilán completaron a oferta
A música tradicional foi unha das protagonistas este domingo na Feira da Re-Volta da Baña, coa que o Concello lembra as tradicionais feiras dos anos cincuenta do século pasado. Un xantar ao aire libre e os xogos populares completaron a oferta na carballeira do Seilán, á que se achegaron bañenses e visitantes, moitos vestidos con roupas de época.
As Atrevidas de Monte Alto e os gaiteiros da Escola de Música Tradicional da Baña animaron a sesión matinal, despois da misa celebrada na capela. Tras os bailes da sesión vermú tocaba repoñer forzas nun xantar celebrado na propia carballeira do Seilán, cun menú a basea de churrasco, callos, orellas e chourizos ao viño.
Pola tarde, o Trío DeTres amenizou a sobremesa, antes de que desen comezo os xogos populares. As Maianas pecharon o programa festivo cunha actuación moi aplaudida polo público presente.
Album de fotos na páxina de Facebook do Concello da Baña (neste enlace).
- Detalles
- Escrito por Alicentis
- Categoría: novas
- Visto: 1073
-
Tenis, pilates, baloncesto, pádel, tenis de mesa, xadrez en liña, patinaxe artística, karate, judo e baile moderno continúan formando parte da oferta
-
As clases comezan o mércores 11 de setembro e desenvolveranse principalmente en horario de tarde coincidindo co calendario escolar
-
O obxectivo deste servizo é promover a actividade física e o deporte entre toda a poboación ao tempo que facilita a conciliación familiar
-
Durante a primeira semana ofrécese a posibilidade de poder asistir ás clases de balde para probar as diversas modalidades antes de realizar a inscrición oficial
O Concello da Baña abre o período de inscricións para as Escolas Deportivas Municipais 2024/25, que se desenvolverán entre o vindeiro mércores 11 de setembro e o mes de maio, coincidindo co calendario escolar. Este servizo ten como obxectivo promover a actividade física e o deporte entre toda a poboación ao tempo que facilita a conciliación das familias.
As Escolas Deportivas ofertarán diversas disciplinas adaptadas a diferentes idades e preferencias. Entre as actividades que se ofrecerán están o baloncesto, baile moderno, judo, karate, patinaxe artística e tenis, dirixidas a nenos e nenas de 3 a 16 anos. Ademais, haberá opcións como tenis de mesa, xadrez, pilates e pádel para maiores de 3 anos.
As clases desenvolveranse nos seguintes horarios:
- Baile moderno: luns e xoves de 15:30 a 16:30 horas
- Baloncesto: luns e xoves de 15:30 a 16:30 horas
- Judo: luns de 16:30 a 17:30 horas
- Patinaxe artística: grupo A os martes e venres de 17:00 a 18:00 horas e grupo B os martes e venres de 18:00 a 19:00 horas.
- Karate: martes e xoves de 16:30 a 17:30 horas.
- Pilates: mércores e venres de 19:00 a 20:00 horas.
- Xadrez: xoves de 18:30 a 19:30 horas.
- Tenis: xoves de 17:00 a 19:00 horas.
- Tenis de mesa: venres de 15:30 a 17:30 horas.
- Pádel: venres de 17:00 a 22:00 horas e sábado de 10:00 a 12:00 horas.
Cada actividade requirirá un mínimo de cinco participantes para poder levarse a cabo. Establécese un prazo de inscrición de 10 días hábiles, e as solicitudes presentadas fóra deste prazo serán incluídas nunha lista de agarda. No caso de non alcanzar o número mínimo de inscritos, a actividade poderá ser cancelada.
Durante a primeira semana ofrécese ademais a posibilidade de poder asistir ás clases de balde para probar as diversas modalidades antes de realizar a inscrición oficial.
Inscricións
As cotas de participación estableceranse en 60 euros por tempada e actividade para usuarios individuais. Quen se inscriba en máis dunha actividade abonará 90 euros por curso. Ofrecerase tamén un bono familiar, que suporá un custo de 99 euros por tempada para dous membros da mesma unidade familiar, e de 132 euros no caso de que un dos integrantes realice dúas ou máis actividades. Para tres ou máis membros dunha mesma familia, a cota será de 120 euros se cada un participa nunha actividade, e de 150 euros se un dos membros realiza dúas ou máis.
Para inscribirse, os interesados deberán cubrir un formulario dispoñible na páxina web do Concello da Baña, que poderá ser remitido a través da sede electrónica ou enviado por correo electrónico a Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo., xunto coa documentación requirida. As inscricións tamén poderán entregarse presencialmente na Concellería de Deportes. Será necesario presentar, ademais do formulario de inscrición, as autorizacións de imaxe e teléfono e a domiciliación bancaria, documentos que están dispoñibles en formato PDF editable nos documentos adxuntos desta páxina web.
O Departamento de Deportes será o encargado de supervisar e coordinar as actividades, asegurando que o servizo se preste con calidade e adaptado ás necesidades dos usuarios. Así mesmo, levaranse a cabo accións para fomentar o coñecemento do deporte desde a infancia, organizaranse exhibicións e campionatos, e manterase un contacto constante coas familias dos participantes.
Con esta oferta deportiva, o Concello da Baña segue a impulsar o deporte local, proporcionando opcións de aprendizaxe, diversión e socialización para todas as idades durante a tempada 2024/25.
