- Detalles
- Escrito por Alicentis
- Categoría: novas
- Visto: 3934
29 de xuño de 2026
O Concello da Baña fai pública a listaxe definitiva de persoas admitidas para participar no Campamento Xuvenil de Verán 2026. A resolución pode consultarse no arquivo adxunto.
As persoas admitidas dispoñen de 7 días naturais para realizar o pagamento da actividade e presentar o correspondente xustificante, ben sexa presencialmente en Servizos Sociais ou no Rexistro xeral do Concello; ben a través da sede electrónica municipal.
19 de xuño de 2026
Faise pública a listaxe provisional de persoas admitidas e excluidas para participar no Campamento Xuvenil de Verán do Concello da Baña 2026.
A resolucion da alcaldía pode consultarse no documento adxunto
5 de xuño de 2026
-
A actividade, dirixida a mozas e mozos de 12 a 18 anos, desenvolverase do 13 ao 31 de xullo no Local Social de San Vicenzo
-
O prazo para presentar as solicitudes remata o vindeiro 17 de xuño e as prazas están limitadas a un total de 20 participantes
-
O programa inclúe actividades educativas, culturais e de fomento de valores, con bonificacións especiais nas taxas para familias con menos recursos
O Concello da Baña, a través Concellería de Acción Social, Cultural e Servizos á Cidadanía, abre a convocatoria para o Campamento Xuvenil de Verán 2026. Este programa, consolidado como un espazo para a conciliación e o ocio educativo no municipio, ofrecerá á mocidade un amplo abano de actividades lúdicas, sociais e culturais durante o mes de xullo.
O campamento está dirixido a mozas e mozos con idades comprendidas entre os 12 e os 18 anos. As actividades levaranse a cabo entre os días 13 e 31 de xullo, en horario de mañá (de 09.00 a 14.00 horas), tendo como sede principal o Local Social de San Vicenzo da Baña, aínda que tamén se fará uso doutras instalacións municipais como o pavillón ou a axencia de lectura.
Inscricións e criterios de acceso
O prazo para apuntarse xa está aberto e as familias interesadas terán ata o vindeiro 17 de xuño para presentar as súas solicitudes. Estas deberán entregarse asinadas polos proxenitores ou titores legais a través do Rexistro Xeral do Concello ou de xeito telemático na Sede Electrónica (https://sede.concellodabana.gal/).
O campamento conta cun total de 20 prazas. No caso de que a demanda supere a oferta, as bases establecen un sistema de prioridades que prima, en primeiro lugar, ás familias totalmente empadroadas na Baña, seguido dos fillos/as do persoal municipal e, por último, de mozos non censados. De ser necesario, realizaríase un sorteo público.
Prezos públicos e bonificacións sociais
As tarifas están reguladas segundo a ordenanza fiscal do municipio. Para as persoas empadroadas, o prezo do primeiro fillo/a será de 60 €, 48 € para o segundo e 30 € a partir do terceiro. No caso de non censados, os prezos van desde os 90 € ata os 45 €.
Ademais, cun marcado carácter social, o Concello contempla bonificacións especiais (reducindo a taxa á metade: 30 €, 24 € e 15 € respectivamente) para aquelas familias empadroadas cuxos ingresos non superen dúas veces o IPREM, previo informe dos Servizos Sociais.
O pago da taxa deberase realizar nos sete días naturais posteriores á publicación da listaxe definitiva de admitidos.
Desde o Concello da Baña lémbrase que toda a documentación necesaria (ficha de inscrición, tarxeta sanitaria e anexos médicos e de autorizacións) xa está dispoñible para a súa descarga na web municipal.
Consulta as bases e descarga o formulario de inscrición nos documentos adxuntos.
Para máis información:
- Concello da Baña - Servizos Sociais
- Teléfonos: 981 886 501 / 981 886 516
- Correo electrónico: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.
- Detalles
- Escrito por Alicentis
- Categoría: novas
- Visto: 466
-
A nova torre de telecomunicacións de Retegal xa está plenamente operativa e ofrece servizos de voz e datos de alta velocidade a través da rede de Vodafone
-
O Concello xa solicitou que outras operadoras poidan prestar servizo desde esta instalación para ampliar as opcións dispoñibles para a veciñanza
As parroquias de Lañas e Cabanas contan xa cunha mellora substancial nas súas comunicacións grazas á entrada en servizo da nova torre de telecomunicacións instalada por Retegal, que permite ofrecer cobertura móbil de voz e datos 5G en zonas que ata o de agora presentaban importantes carencias neste ámbito.
A instalación, que xa se atopa plenamente operativa tras superar o correspondente período de probas, presta servizo a través da rede de Vodafone e de todas aquelas compañías que empregan esta infraestrutura para a prestación dos seus servizos.
Este despregamento supón un avance moi significativo para a veciñanza das parroquias de Lañas e Cabanas, ao posibilitar por primeira vez o acceso a servizos de comunicación móbil e internet de alta velocidade en condicións equiparables ás das contornas urbanas, tanto no interior como no exterior dos fogares.
A posta en funcionamento desta infraestrutura dá resposta a unha demanda histórica da veciñanza e contribúe a reducir a fenda dixital existente entre o rural e os núcleos urbanos. A nova cobertura permitirá acceder con maiores garantías a servizos dixitais, realizar trámites electrónicos, facilitar o teletraballo, a formación en liña e mellorar as comunicacións persoais e profesionais da poboación residente.
Esta actuación enmárcase no convenio de colaboración entre a Axencia para a Modernización Tecnolóxica de Galicia (Amtega) e a Federación Galega de Municipios e Provincias (FEGAMP) para mellorar a cobertura móbil no rural galego, ao que está adherido o Concello da Baña.
Xestións para ampliar os servizos dispoñibles
Co obxectivo de acelerar a chegada deste servizo, o goberno municipal realizou diversas xestións ante Amtega para trasladar a necesidade de actuar nas zonas con maiores déficits de cobertura do municipio. Entre elas figurou a reunión mantida polo alcalde da Baña, José Antonio Pereira, e o concelleiro de Obras, Urbanismo e Medio Rural, Jesús Pena, co director da Axencia para a Modernización Tecnolóxica de Galicia, Julián Cerviño, para abordar a situación das parroquias de Lañas, Cabanas e A Riba.
O Concello da Baña colaborou activamente no desenvolvemento do proxecto mediante a identificación das zonas afectadas e a posta á disposición dos terreos e infraestruturas necesarias para facer posible o despregamento da rede.
Ademais, desde a administración local xa se solicitaron as actuacións necesarias para que outras operadoras de telefonía móbil poidan prestar servizo a través desta nova instalación, ampliando así as alternativas dispoñibles para a veciñanza e aproveitando ao máximo as capacidades da infraestrutura recentemente posta en funcionamento.
A mellora das telecomunicacións constitúe un elemento fundamental para reforzar a competitividade do rural, favorecer a fixación de poboación e garantir a igualdade de oportunidades entre toda a cidadanía.
- Detalles
- Escrito por Alicentis
- Categoría: novas
- Visto: 384
-
A conselleira María Martínez Allegue e o alcalde José Antonio Pereira asinaron o convenio que permitirá financiar as obras mediante un préstamo sen xuros
O Concello da Baña contará cun financiamento de 293.611,10 euros procedente do Fondo de Cooperación da Xunta de Galicia para executar as obras de mellora dun viario municipal na zona de Troitosende, unha actuación destinada a reforzar as condicións de circulación e seguridade nunha vía que conecta co límite municipal en dirección a Vilacova.
O convenio foi asinado este martes, 9 de xuño, en San Caetano pola conselleira de Vivenda e Planificación de Infraestruturas, María Martínez Allegue, o secretario xeral de Vivenda e Urbanismo, Heriberto García Porto, e o alcalde da Baña, José Antonio Pereira Gil.
A actuación permitirá acometer a rehabilitación do firme existente mediante a renovación da capa de rodaxe, así como melloras nos sistemas de drenaxe e na sinalización viaria, contribuíndo a incrementar a seguridade dos usuarios desta estrada municipal e a mellorar a conectividade na zona rural do concello.
O financiamento materialízase a través dun préstamo sen xuros concedido ao abeiro do Fondo de Cooperación da Xunta para concellos de menos de 50.000 habitantes, unha liña de apoio destinada a facilitar investimentos municipais en actuacións de rehabilitación e conservación do patrimonio construído. Os préstamos poden ser devoltos nun prazo máximo de oito anos.
O convenio asinado permitirá ao Concello da Baña executar unha intervención considerada prioritaria para a mellora da rede viaria municipal, favorecendo unhas mellores condicións de circulación e reforzando a seguridade viaria neste tramo.
Con esta actuación, o Concello da Baña continúa impulsando investimentos destinados á mellora das infraestruturas e dos servizos públicos, contribuíndo a reforzar a calidade de vida da veciñanza e o desenvolvemento equilibrado do territorio.
- Detalles
- Escrito por Alicentis
- Categoría: novas
- Visto: 3591
-
Ofrécense 70 prazas para favorecer a conciliación familiar
-
O programa desenvolverase entre o 22 de xuño e o 8 de setembro en diferentes quendas adaptadas ás necesidades das familias
-
As inscricións poderán realizarse do 25 de maio ao 5 de xuño
12 de xuño de 2026
Faise pública a listaxe definitiva de persoas admitidas no Campamento de Verán 2026, que pode consultarse no arquivo adxunto.
Así mesmo, convócase unha reunión informativa coas familias das persoas participantes para o mércores 17 de xuño ás 20.00 horas na Casa da Cultura, na que se ofrecerán indicacións sobre o desenvolvemento da actividade e se resolverán posibles dúbidas.
As familias deberán formalizar o pagamento da actividade e presentar o correspondente xustificante no Rexistro Xeral do Concello ou a través da sede electrónica. O prazo para realizar este trámite permanecerá aberto desde a publicación da listaxe definitiva ata o venres 19 de xuño.
O ingreso deberá efectuarse na conta bancaria ES92 2080 0326 1731 1000 0035, indicando no concepto o nome da persoa participante seguido da expresión «Campamento de Verán 2026».
9 de xuño de 2026
Faise pública a listaxe provisional de admitidos/as e excluídos/as para o campamento municipal de conciliación de verán para menores de idade do Concello da Baña 2026.
Outórgase un prazo para reclamacións e/ou mellor voluntaria da documentación de dous (2) días hábiles dende a data de publicación deste decreto na sede electrónica municipal e na páxina web do Concello da Baña.
O decreto pode consultarse nos arquivos adxuntos.
19 de maio de 2026
O Concello da Baña, a través da Concellería de Acción social, cultura e servizos á cidadanía, pon en marcha unha nova edición do Campamento de Verán Municipal, un servizo destinado a facilitar a conciliación da vida laboral e familiar durante o período estival ao tempo que ofrece aos nenos e nenas un espazo de ocio educativo, convivencia e aprendizaxe.
O programa contará este ano con 70 prazas dirixidas a menores escolarizados de entre 3 e 14 anos e desenvolverase entre o 22 de xuño e o 8 de setembro de 2026 en horario de 8.00 a 15.00 horas.
As actividades terán carácter educativo, cultural e lúdico, fomentando valores como a convivencia, a cooperación, os hábitos saudables e a creatividade. O servizo prestarase principalmente na área recreativa municipal de Chans, pero no caso de condición meteorolóxicas adversas trasladaranse ás instalacións municipais a cuberto.
O campamento estrutúrase nas seguintes quendas: do 22 ao 30 de xuño; do 1 ao 15 de xullo; do 16 ao 31 de xullo; do 1 ao 15 de agosto; do 16 ao 31 de agosto e do 1 ao 8 de setembro.
Prazos de inscrición
O prazo de inscrición abrirase oficialmente o próximo luns 25 de maio, coincidindo coa activación do procedemento na sede electrónica municipal, e permanecerá aberto ata o 5 de xuño.
A lista provisional publicarase o 8 de xuño, sendo o prazo de reclamacións do 9 ao 10 de xuño. A lista definitiva coñecerase o 12 de xuño.
As solicitudes poderán presentarse preferiblemente por vía electrónica a través da sede electrónica do Concello da Baña, aínda que tamén será posible facelo presencialmente no Rexistro Xeral municipal ou polos medios previstos na normativa administrativa.
As tarifas do servizo variarán en función da duración da quenda, do número de fillos/as inscritos e da condición de empadroamento. Así, os prezos para persoas censadas serán:
- 1º fillo/a: semana: 20 € e quincena: 40 €.
- 2º fillo/a: semana: 16 € e quincena: 32 €
- 3º fillo/a: semana: 10 € e quincena: 20 €
- Os prezos para as persoas non censadas son:
- 1º fillo/a: semana: 30 € e quincena: 60 €
- 2º fillo/a: semana: 22,50 € e quincena: 45 €
- 3º fillo/a: semana: 15 € e quincena: 30 €
No caso da semana correspondente do 22 ao 30 de xuño e da quenda do 1 ao 8 de setembro, aplicarase unha tarifa reducida: 1º fillo/a: 10 €; 2º fillo/a: 8 €; e 3º fillo/a: 5 €.
As bases tamén contemplan exencións para unidades familiares con ingresos iguais ou inferiores a dúas veces o IPREM e establecen criterios de prioridade para favorecer ás familias con necesidades de conciliación laboral.
O Concello da Baña destaca que este programa “supón unha ferramenta fundamental para apoiar ás familias durante os meses de verán, ofrecendo unha alternativa educativa e de lecer de calidade para a infancia do municipio”.
O Concello da Baña pon en valor a continuidade dun servizo moi demandado polas familias do municipio, que permite combinar conciliación, socialización e actividades de ocio educativo nun entorno pensado para o desenvolvemento persoal e o benestar da rapazada.
As bases completas e os formularios de solicitude poden consultarse nos documentos adxuntos e estarán dispoñibles na sede electrónica a partir do 25 de maio.
- Detalles
- Escrito por Alicentis
- Categoría: novas
- Visto: 275
-
A Escola de Música Tradicional da Baña, DJ Mr. Vieito e a charanga O Rumbo animaron a festa coa súa música
A terceira edición do Xantar Veciñal da Baña volveu ser un éxito. Máis de 500 persoas achegáronse este domingo 7 de xuño ata o polideportivo de San Vicenzo para participar nunha xornada de convivencia para compartir experiencias e anécdotas entre a veciñanza, organizada pola Concellería de Acción Social, Cultura e Servizos á Cidadanía.
Pouco despois do mediodía comezaron a achegarse ata o polideportivo veciños e veciñas procedentes de todas as parroquias bañenses, que gozaron coas actuacións do grupo da Escola Tradicional de Música da Baña e, na sobremesa, tamén co DJ Mr. Vieito e coa charanga O Rumbo.
No xantar, máis de medio milleiro de persoas degustou un menú composto por empanada de bonito, polbo á feira con cachelos, carne ao caldeiro con patacas, larpeira con xeado, cafés e licores galegos servidos por Casa Taboada.
Os asistentes estiveron acompañados polo goberno local, encabezado polo alcalde, José Antonio Pereira, e a tenente de alcalde, Mónica González, e polo líder do grupo popular.
Despois da sobremesa, moitos dos asistentes animáronse a xogar ao bingo e nun sorteo de produtos exclusivos do merchandising da Festa da Filloa da Pedra, mentres compartían anécdotas e se citaban para a cuarta edición desta xuntanza.
A organización deste Xantar Veciñal contou coa colaboración do departamento de Cultura da Deputación da Coruña.