- Detalles
- Escrito por Alicentis
- Categoría: Urbanismo
- Visto: 271
-
O goberno local impulsa unha ducia de actuacións estratéxicas que inclúen a mellora de viarios, extensión de redes de abastecemento e saneamento e reformas en centros educativos
-
O investimento, que ascende a 2.000.000 € (IVE incluído), finánciase con fondos propios e a colaboración da Deputación da Coruña
- Detalles
- Escrito por Alicentis
- Categoría: Urbanismo
- Visto: 3475
-
Trátase das pistas que van de Carballeira a Liñares, de Carballeira á Riba e da Riba a Ferreiros //
-
O convenio foi asinado o luns polo alcalde, José Antonio Pereira, e a conselleira de Vivenda e Infraestruturas //
O Concello da Baña obtivo un préstamo da Xunta de máis de 380.000 euros para mellorar diferentes viarios do municipio. Así o recolle o convenio de colaboración que asinou este luns o alcalde da Baña, José Antonio Pereira, coa conselleira de Vivenda e Planificación de Infraestruturas, María Martínez Allegue, e co secretario xeral técnico, Yago Borrajo. Ao acto asistiu tamén o concelleiro de Obras, Urbanismo e Medio Rural, Jesús Manuel Pena.
O convenio ten como obxectivo concreto a mellora da capa de rodaxe da pista que comunica as zonas de Liñares e A Carballeira, a capa de rodaxe entre Carballeira e A Riba e a capa de rodaxe que une A Riba e Ferreiros.
O préstamo, que ascende a un total de 382.618 euros e está libre de xuros, enmárcase na convocatoria do ano 2025 do Fondo de Cooperación da Xunta para municipios de menos de 50.000 habitantes. Esta liña, dotada cun total de 3,7 millóns de euros, está destinada a financiar obras de conservación de patrimonio, de rexeneración urbana ou de adquisición de inmobles para rehabilitar.
- Detalles
- Escrito por Alicentis
- Categoría: Urbanismo
- Visto: 3920
-
O Concello cubrirá o 100 % do custo do seguro de morosidade co obxectivo de ofrecerlles maiores garantías aos propietarios
-
As persoas interesadas en participar contarán coa axuda dun profesional que as orientará en cuestións legais, contratos e xestións administrativas
O Concello da Baña pon en marcha un Plan de Vivenda co obxectivo de dinamizar o mercado de alugueiro, dar uso ás vivendas baleiras e atraer nova veciñanza ao municipio. Trátase dunha iniciativa pensada para mellorar a accesibilidade á vivenda, fomentar o asentamento de persoas novas e loitar contra o despoboamento do rural.
Nunha carta remitida recentemente á veciñanza, o alcalde, José Antonio Pereira, destaca que a medida responde á vontade do goberno local de "aproveitar os recursos existentes e contribuír á revitalización do territorio". Nun contexto no que cada vez é máis difícil acceder a unha vivenda nos núcleos urbanos, A Baña quere poñer en valor as vantaxes de vivir no rural. "En tempos nos que o acceso á vivenda nos núcleos urbanos é cada vez máis difícil, as contornas rurais como a nosa ofrecen calidade de vida, tranquilidade e oportunidades", explica o rexedor.
O Plan de Vivenda contempla dúas liñas principais de apoio para aquelas persoas que dispoñan de inmobles desocupados e queiran poñelos en alugueiro. Por unha banda, a subvención do 100% do seguro de morosidade, ca fin de garantirlles seguridade e confianza aos propietarios que aposten por esta vía. Ademais, ofrece asesoramento técnico gratuíto, a través dun profesional do Concello que ofrecerá acompañamento en todos os trámites: elaboración de contratos, cumprimento dos requisitos legais, acceso a subvencións ou melloras, etc.
Deste xeito, o Concello pretende eliminar as barreiras que moitas veces frean aos propietarios á hora de alugar unha vivenda, facilitando e simplificando todo o proceso.
O alcalde anima as persoas que teñan vivendas baleiras habitables a informarse e participar neste plan, e fai un chamamento ao compromiso colectivo: "Entre todos e todas podemos facer da Baña un lugar aínda mellor para vivir. Este plan é unha oportunidade para xerar comunidade, atraer xente nova e aproveitar o que xa temos: casas que poden volver ter vida e familias que queren empezar un proxecto aquí".
O Concello manterá canles abertas de comunicación directa para resolver dúbidas e atender as persoas interesadas. Toda a información poderá consultarse tamén nas oficinas do propio Concello.
- Detalles
- Escrito por Alicentis
- Categoría: Urbanismo
- Visto: 3600
-
O concelleiro de Urbanismo reúnese coa xerente de Suelo Empresarial del Atlántico para avanzar na viabilidade do parque
-
A xuntanza celebrada en Santiago o 14 de maio serviu para analizar servizos, topografía e custos do solo
O Concello da Baña segue dando pasos firmes para facer realidade un parque empresarial no lugar da Eiroa, co obxectivo de atraer actividade económica ao municipio e facilitarlles solo industrial ás empresas interesadas en asentarse na comarca.
O concelleiro de Urbanismo, Jesús Manuel Pena, e persoal técnico reuníronse o mércores 14 de maio coa xerente de Suelo Empresarial del Atlántico (SEA), Beatriz Sestayo, nas oficinas deste organismo en Santiago de Compostela. Durante o encontro, abordáronse cuestións como a topografía do terreo, a dotación de servizos como a auga e a electricidade, e a necesidade de garantir uns custos asumibles para as parcelas empresariais.
Neste contexto, o Concello comprometeuse a redactar o proxecto de urbanización da superficie prevista —uns 200.000 metros cadrados— co fin de concretar a viabilidade técnica e económica do parque. O goberno local tamén traballa na adaptación dalgunhas ordenanzas municipais para facilitar a implantación de empresas de diversos sectores.
O proxecto conta cunha valoración positiva tanto polos informes iniciais elaborados pola SEA como polos estudos realizados previamente polo Concello. A colaboración entre ambas as entidades continúa a ser fluída e constante, coa intención común de converter este polígono nun motor de desenvolvemento para A Baña.
Beatriz Sestayo destacou a boa localización do municipio, próximo a Santiago, e a disposición de SEA para impulsar o proxecto sempre que se manteñan os compromisos adquiridos. “Compartimos co Concello a necesidade de dotar á Baña dunha superficie industrial adaptada ás necesidades actuais. Cremos que sería un bo investimento e imos facer todo o posible para que sexa viable”, sinalou.
- Detalles
- Escrito por Alicentis
- Categoría: Urbanismo
- Visto: 3747
O Concello da Baña ten aberto o proceso de licitación para a obra de mellora da pista de Liñares a Suevos e outras actuacións, enmarcada no Plan de mellora de camiños municipais de acceso a parcelas agrícolas 2024-2025, promovido pola Axencia Galega de Desenvolvemento Rural (Agader). Esta iniciativa conta co financiamento do Fondo Europeo Agrícola de Desenvolvemento Rural (Feader), co obxectivo de mellorar a rede viaria rural do municipio.
O proxecto, que ten un presuposto base de licitación de 71.505 euros (IVE excluído), céntrase no reforzo e mantemento de camiños municipais, especialmente a mellora do firme e a limpeza e perfilado de noiros e cunetas. O prazo para a presentación de ofertas por parte das empresas interesadas está aberto ata o 1 de outubro de 2024.
Entre os obxectivos desta actuación destacan a mellora da seguridade viaria e a redución dos tempos de desprazamento dos veciños, así como a conservación da rede viaria en boas condicións e a minimización do impacto ambiental. A obra busca tamén corrixir os desequilibrios territoriais, facilitando o acceso a zonas rurais máis desfavorecidas, e evitar posibles responsabilidades por accidentes nas vías municipais.
O prazo estimado para a execución dos traballos será de 6 meses desde a adxudicación do contrato.
Para máis información, pódese consultar o expediente na Plataforma de Contratación do Sector Público, premendo nesta ligazón.