• Concello e Irmandade Xurídica Galega colocan unha placa no busto do fillo predilecto bañense lembrando a efeméride e a súa figura como “adiantado no uso do galego na Xudicatura” ||

  • O alcalde: “É de xustiza recoñecer o traballo de todas aquelas persoas que como Daniel García Ramos destacaron polo seu compromiso coa lingua e culturas galegas e co seu pobo” ||

  • O secretario xeral de Política Lingüística, Valentín García, definiu ao maxistrado como “un dos mascaróns de proa da galeguización da Xustiza” ||

  • Xoaquín Monteagudo Romero: “Necesitamos paradigmas como o que representa Daniel García Ramos que nos serve para reforzar o noso traballo e compromiso coa nosa lingua e a nosa cultura” ||

  • O acto contou cunha ampla representación de maxistrados, amigos e familiares do falecido maxistrado e membros da Corporación ||

20230416 homenaxe daniel garcia ramos 90 anos nacemento 8

 

O Concello da Baña e a Irmandade Xurídica Galega homenaxearon esta mañá a Daniel García Ramos, coincidindo co 90 aniversario do seu nacemento, destacando a traxectoria do fillo predilecto bañense a prol do galeguismo e do rural, sendo o primeiro maxistrado do Tribunal Superior de Xustiza de Galicia que empregou o galego nun procedemento xudicial. Unha placa colocada no seu busto coa data de hoxe, 16 de abril de 2023, e co lema En lembranza do maxistrado Daniel García Ramos, adiantado no uso da lingua galega na Xudicatura no 90º aniversario do seu nacemento, lembra esta efeméride.

O acto, celebrado na Casa de Cultura, foi presidido polo alcalde, Andrés García Cardeso, que estivo acompañado do secretario xeral de Política Lingüística, Valentín García Gómez; do presidente da Irmandade Xurídica Galega, Xoaquín Monteagudo Romero; o exfiscal Superior de Galicia, Carlos Varela García; o maxistrado Luciano Varela Castro e do reitor da USC, Antonio Díaz. A homenaxe contou tamén coa presencia, do tenente de alcalde César Ramos, e da concelleira de Cultura, Lorena Trillo (que foi a condutora do acto), membros da Corporación da Baña, de familiares do homenaxeado, integrantes da Irmande Xurídica, maxistrados e amigos de Daniel García Ramos, veciños e veciñas.

Durante a súa intervención, o alcalde destacou a figura humana e profesional de Daniel García Ramos, ao que definiu como “unha persoa afable, agarimosa, que se integraba ben coa veciñanza cando viña a xogar ao dominó”.  García Cardeso dixo que coñeceu ao maxistrado cando “eu era un neno e viña á casa do meus pais a coller o leite”.  O alcalde agradeceu á Irmandade Xurídica Galega a súa presencia e a todas as persoas presentes que secundaron a homenaxe de hoxe e dixo que “é de xustiza recoñecer o traballo de todas aqueles veciños e veciñas da Baña que, como Daniel García Ramos, destacaron nas súas distintas facetas polo amor e compromiso co seu pobo e coa lingua e a cultura galegas”.

20230416 homenaxe daniel garcia ramos 90 anos nacemento

Pola súa banda, o secretario xeral de Normalización Lingüística definiu ao homenaxeado como “un dos mascaróns de proa da galeguización da Xustiza, un ámbito no que aínda queda moito por traballar”. Mentres que o presidente da Irmandade Xurídica Galega, Xoaquín Monteagudo remarcou que “necesitamos paradigmas como o que representa Daniel que nos sirve para reforzar o noso traballo e o noso compromiso coa cultura e a nosa lingua”.

O exfiscal Superior de Galicia e amigo de Daniel, Carlos Varela fixo un repaso pola biografía do fillo predilecto da Baña e a súa traxectoria; mentres que o reitor da USC, Antonio Díaz centrou a súa intervención na figura de Daniel no eido da universidade e nas “rodeiras” que deixou García Ramos. “Nesa aposta pola Cultura e a lingua el buscaba contaxiar ilusión, algo polo que temos que seguir loitando”, dixo o reitor.

O maxistrado Luciano Varela Castro pola súa banda falou dende unha óptica máis persoal, a da súa relación con Daniel García Ramos e da pegada que deixou nel. “Probablemente de non ter coñecido a Daniel eu nunca fixera unha sentencia en galego. Estaría durmido, aparvado. El conseguiu que eu despertara”, remarcou Varela Castro.

Durante o acto tamén se proxectou o documental Daniel García Ramos, a forza da palabra, realizado pola Irmandade Xurídica Galega en 2005 e que se atopa dispoñible na web da entidade (www.galeguizargalicia.gal), e no seu canal de youtube. Tamén repartíronse entre o público exemplares do libro Daniel García Ramos. A reafirmación en nós mesmos.

20230416 homenaxe daniel garcia ramos 90 anos nacemento 11

Rematadas as intervencións, autoridades e persoas asistentes desprazáronse ata a praza do Concello, onde alcalde, o presidente da Irmandade Xurídica Galega e Inmaculada Ramos, prima sobrina de Daniel, depositaron  ante o busto do falecido maxistrado un ramo de flores. Acompañaba o acto os acordes dos gaiteiros da Baña.

Apuntes biográficos

Daniel García Ramos naceu na Baña o 16 de abril de 1933. Foi fillo de mestres de escola e neto dun médico rural que lle inculcou o amor ao pobo e a entrega desinteresada. Viviu en San Vicenzo e en Marcende ata que aos nove anos marchou a estudar a Santiago e, logo de cursar a carreira de Dereito, a Madrid. Foi na capital de España onde descubriu o galeguismo, que marcará toda a súa traxectoria. Catedrático e xuíz, desenvolveu o seu labor en distintas localidades galegas e españolas ata ser nomeado maxistrado do Tribunal Superior de Xustiza de Galicia.

O compromiso de Daniel García Ramos con Galicia e coa lingua lévao ao longo dos anos a ser un dos primeiros membros fundadores de Xuíces para a democracia, asociación dende a que defende a utilización do galego na administración de xustiza. Integrouse tamén despois en Funcionarios para a Normalización Lingüística de Galicia, plataforma que propiciou que en 1987 un pequeno número de xulgados e notarías comezasen a empregar a lingua galega. Foi tamén un firme defensor da pluralidade e a democracia, ademais de reivindicar os montes comunais.

Daniel García Ramos morreu o 23 de febreiro de 1998, aos 64 anos, de forma prematura. O Concello da Baña nomeouno Fillo Predilecto en agosto do ano seguinte. Entre outros moitos recoñecementos, foi declarado como Galego egrexio pola Fundación Premios da Crítica Galicia. E, dende o pasado ano, a figura do maxistrado da nome ao Premio Daniel García Ramos impulsado polo Concello bañense para recoñecer, coincidindo co Día das Letras Galegas, o traballo de persoas vencelladas ao municipio en favor da nosa lingua e da nosa cultura.

Preme no enlace para ver a galeria de fotos en facebook

20230416 homenaxe daniel garcia ramos 90 anos nacemento 13

  • O alcalde, Andrés García Cardeso, destaca a valía do homenaxeado ||

  • César Ramos: “Con este acto cumprimos unha vella reivindicación” ||

  • Viúva e familiares non puideron conter a emoción nun acto con gran asistencia de público e no que tamén se inauguraron os novos vestiarios do campo de fútbol ||

 20230401 Banha pon nome Campo Municipal Futbol Antonio Martinez 38

O Concello da Baña rendeulle unha homenaxe ao que fora un dos fundadores da SD A Baña e gran impulsor do deporte no concello, coñecido como O Cubano, ao inaugurar unha placa para chamarlle ao campo de Cartas, Campo municipal de fútbol Antonio Martínez.

No acto, presidido polo alcalde, Andrés García Cardeso, e o tenente de alcalde e concelleiro de Promoción da Vida Activa e Deporte, César Ramos, estiveron presentes a viúva do homenaxeado, Teresa Méndez, e vario familiares; así como os expresidentes da SD A Baña Francisco Villaverde (que tamén foi alcalde da Baña), José Manuel Ramos, Antonio Negreira, Raúl Mayo e Victorino García, así como directivos e ex directivos do club.

20230401 Banha pon nome Campo Municipal Futbol Antonio Martinez 21

García Cardeso entregoulle un ramo de rosas a dúas netas de O Cubano, Carla e Iria, que o recolleron moi emocionadas. Despois, autoridades, familiares e público asistentes achegáronse ata a entrada do recinto deportivo para descubrir a placa co novo nome das instalacións: Campo municipal de fútbol Antonio Martínez. Un momento no que a viúva e algúns familiares non puideron conter as lágrimas.

O alcalde agradeceu a presencia do numeroso público e destacou a valía de Antonio Martínez , mentres que César Ramos remarcou que “Con este acto cumprimos unha vella reivindicación. Pola súa banda, Franciso Villaverde recordou como el e O Cubano fundaron a SD A Baña a finais dos anos setenta e comezaron a inculcar na xuventude o amor polo fútbol.

20230401 Banha pon nome Campo Municipal Futbol Antonio Martinez 43

Despois, unha neta de Antonio Martínez cortou a cinta inaugurando os novos vestiarios do campo municipal de fútbol. Estas instalacións foron acondicionadas pola brigada municipal nuns módulos que foron doados ao Concello por Antonio Casal, a quen César Ramos deu as gracias pola súa colaboración.

A homenaxe coincidiu co partido de fútbol da liga de veteranos que disputaron os equipos da Baña Veteranos e o Advoc JR Motor & Arturo un combinado que tamén xoga como local na Baña. O encontro rematou con 4-0 a favor da Baña Veteranos.

Ao rematar o encontro, o público asistente puido degustar unha churrascada ofrecida pola SD A Baña, A Baña Veteranos e a Concellería de Promoción da Vida Activa e Deporte do Concello da Baña.

Podes ver máis fotos do acto no facebook neste enlace

20230401 Banha pon nome Campo Municipal Futbol Antonio Martinez 24

  • O orzamento municipal para 2023 quedou aprobado definitivamente por unanimidade dos grupos políticos

  • Os tres grupos apoiaron a proposta do BNG contra os parques eólicos

  • Actualizada a ordenanza municipal de administración electrónica e a modificación do POS+ 2023

 

A Corporación da Baña celebrou hoxe o último pleno ordinario desta lexislatura apoiando todos os puntos por unanimidade, entre os que destaca a aprobación definitiva do orzamento municipal para este ano e o recoñecemento que se lle fixo Antonio Martínez. O Pleno decidiu poñerlle o seu nome ao campo de fútbol en atención aos “seus méritos como veciño da Baña e no seu labor na promoción do deporte, en especial do fútbol, no municipio”.

Segundo a proposta presentada polo equipo de goberno, todos os veciños e veciñas da Baña e toda a xente que estivo dalgunha forma ligada á SD A Baña “é coñecedora do traballo e dedicación continua” de Antonio Martínez en diferentes labores do equipo de fútbol. “Toda unha vida dedicada de forma altruísta á SD A Baña, e tendo un labor moi importante na promoción do deporte no municipio”. 

Este sábado, 1 de abril, celebrarase unha homenaxe a Antonio Martínez, coñecido como o Cubano, durante o encontro que disputarán os veteranos da SD A Baña a partir das 17.00 horas. No descanso descubrirase a placa coa que se dá cumprimento ao acordo plenario de hoxe, para denominar as instalacións como Campo municipal de fútbol Antonio Martínez.

No Pleno de hoxe tamén se aprobou definitivamente o orzamento municipal do Concello da Baña para este ano, que ascende a 4.077.000 euros, e a ordenanza que regulará a administración electrónica no municipio. 

Co apoio de todos os concelleiros acordouse modificar o POS+ 2023 para incorporar a execución de tres obras por importe de 147.747,25 euros, que son a pavimentación dunha vía pública na Edreira, as melloras da capa de rodaxe de Troitosende ao límite con Ames e do viario de Paradas a Valiñas. Este importe reducirase da partida que o Concello tiña previsto destinar a gasto corrente.

Tamén por unanimidade se aprobou unha moción presentada polo BNG sobre os parques eólicos. Dado que o grupo nacionalista non ten representación na Corporación, a súa proposta foi presentada polo tenente de alcalde, César Ramos. Tras enumerar os seis proxectos de parques eólicos previstos para a Baña, que suman en total 256,5 MW, os nacionalistas solicitan que o Concello elabore informes técnicos sectoriais para rexeitar a súa implantación, que se comprometa a asesorar á veciñanza e que se comprometa a personarse como parte nun proceso contencioso-administrativo, contemplando a partida orzamentaria para un futurible proceso xudicial.

O debate xerou un duro enfrontamento entre goberno e oposición. O alcalde, Andrés García Cardeso, explicou que o Concello xa ten encargados os informes sectoriais solicitados polo BNG e que “xa leva tempo informando a toda a veciñanza dos dereitos que lle asisten”. Respecto do proceso xudicial, García Cardeso volveu aclarar que “chegado o momento” o Concello se presentará como parte prexudicada.

Dende o grupo socialista, José Antonio Pereira criticou que o equipo de goberno apoiase esta moción dos nacionalistas e que votase en contra da que presentou o PSdeG, momento no que o tenente de alcalde, César Ramos, lle preguntou se “se refería a moción que presentou e logo non acudiu ao pleno para defendela”.

No capítulo de rogos e preguntas, o PSdeG propuxo que se ampliara o horario do campus deportivo de Semana Santa e quixo saber cantas persoas están a utilizar o servizo de bonotaxi, entre outros temas. 

20230328 Banha pleno ordinario campo futbol Antonio Martinez 1

  • O vicepresidente segundo estivo acompañado polo alcalde e o tenente de alcalde, a directora xeral de Administración Local e polo delegado territorial do Goberno galego

  • Entre outras melloras, a asociación fixo unha ampliación e acondicionamento do local, colocando pavimentos nos aseos, fiestras e portas

  • O presidente da asociación solicitoulle axuda para actuar sobre o tellado

20230328 Diego Calvo visita local social A Riba 12

 

20230328 Diego Calvo visita local social A Riba 5O alcalde da Baña, Andrés García Cardeso, acompañou onte pola tarde ao vicepresidente segundo da Xunta, Diego Calvo, durante a visita que fixo ao local da Asociación de veciños Nosos Aires da Riba, que foi mellorado cunha achega da Xunta de 12.000 euros. Diego Calvo estivo acompañado pola directora xeral de Administración Pública, Natalia Prieto; polo delegado territorial da Xunta na Coruña, Gonzalo Trenor; e polo tenente de alcalde bañense, César Ramos.

O presidente da asociación, José Manuel Ramos Freita, e membros da directiva, ensináronlle os traballos realizados no local coa subvención do Goberno galego. As melloras consistiron en actuacións nas cimentacións, na estrutura ou no peche das fachadas para gañar superficie coa zona ampliada, ademais de colocar as fiestras e portas e o pavimento dos aseos, proceder ao pintado das paredes mantendo a harmonía co edificio principal e á montaxe dun falso teito. Os traballos incluíron a instalación dunha bomba para a captación de auga e melloras no saneamento, no sistema eléctrico e no alumeado.

A Asociación de veciños Nosos Aires resultou beneficiaria con 12.000 euros das axudas anuais da Xunta destinadas a asociacións de veciños e de mulleres rurais e a comunidades de usuarios de augas, ao abeiro do Plan específico de acción comunitaria. Segundo informou a Xunta, esta liña estivo dotada con 3 millóns de euros destinados tanto a obras de acondicionamento, reforma e ampliación dos locais sociais e nas instalacións das traídas de augas comunitarias, como á adquisición de equipamento como mobiliario, material de oficina, equipamento informático ou acústico e audiovisual, ademais doutros recursos específicos.

20230328 Diego Calvo visita local social A Riba 4Diego Calvo puxo en valor o importante labor desenvolvido polo asociacionismo local a prol da dinamización da vida social e incidiu na necesidade de que conten con espazos axeitados para o desenvolvemento das súas actividades. Así, lembrou que o obxectivo destas subvencións é mellorar a calidade de vida local, tendo en conta que os colectivos beneficiarios son as entidades máis próximas á cidadanía á hora de atender e canalizar as súas demandas.

O presidente da asociación explicoulles ás autoridades as melloras realizadas no local social, que mellorou a súa accesibilidade cunha rampla exterior que foi financiada pola Xunta en convocatorias anteriores. Ao mesmo tempo aproveitou para explicarlles que o colectivo necesita reformar o tellado do edificio, que se encontra deteriorado, para o que solicitou tamén o apoio da administración autonómica.

Andrés García Cardeso destacou a necesidade de que o Goberno galego se implique e axude a colectivos como Nosos Aires para poder seguir realizando actividades. “Esta asociación é moi activa e organizan moitas actividades durante todo o ano”, recalcoulle o alcalde ao vicepresidente segundo.

  • Integrantes da Asociación Filloas da Pedra prepararán ‘in situ’ o manxar artesán empregando na súa elaboración produtos 100% ecolóxicos ||

  • A delegación, encabezada polo alcalde, viaxará á capital de España o martes 28 de febreiro ||

O Concello da Baña e a Asociación Filloas da Pedra da Baña promocionarán o produto estrela da súa gastronomía local, a filloa de pedra, en Madrid, nun acto que terá lugar o martes 28 de febreiro na Casa de Galicia e ao que están invitados os centros rexionais, galegas e galegos residentes na capital de España e medios de comunicación. Ademais de dar a coñecer as potencialidades turísticas e gastronómicas deste manxar tradicional, integrantes da asociación poñerán en funcionamento 2 pedras sobre as que elaborarán en vivo e en directo as filloas, que logo serán degustadas.

Todos os ingredientes que se empregarán na elaboración das filloas (ovos, fariña, touciño...) serán 100% ecolóxicos, ao igual que xa se fixo na XIX Festa da Filloa da Pedra celebrada na Baña a fin de semana do 11 e 12 de febreiro e que bateu récord de asistencia.

A delegación estará encabezada polo alcalde da Baña, Andrés García Cardeso, quen aproveitará para dar a coñecer as potencialidades turísticas do municipio. Mónica Tomé Rey, secretaria da Asociación Filloas da Pedra da Baña, Lola Landeira e o chef Manuel Mallón Ardións, tamén integrantes da entidade, serán os encargados de divulgar e exaltar o potencial gastronómico da filloa da pedra, elaborar o amoado e facer as filloas.

Os asistentes ao acto (previsto para ás 19.30 horas) terán a oportunidade de degustar as filloas da pedra e comprobar as particularidades únicas deste manxar natural e artesán, cuxo arte de elaboración foi conservado con agarimo nas cociñas dos fogares bañenses xeración tras xeración. Quen o desexe tamén poderá probar a facer a súa propia filloa nunha das pedras.

Fieis ao seu compromiso de divulgación da filloa da pedra como produto natural e artesán, a asociación mantén dende hai anos unha estreita colaboración con outras entidades filloeiras galegas, como a de Muimenta (Cospeito) para a promoción conxunta da filloa.

E, en recoñecemento ao seu labor e como promotora dunha das catro festas máis senlleiras de Galicia dedicadas á exaltación da filloa, a Asociación Filloas da Pedra da Baña recibirá este domingo, 26 de febreiro, o Mandil de Honra da Asociación Cultural da Filloa de Lestedo, no transcurso da XL edición da festa da filloa desta localidade boqueixonesa.