- Detalles
- Escrito por Alicentis
- Categoría: Cultura e educación
- Visto: 184
- Manuel Iglesias Turnes afirmou que “as filloas son cultura, son raíz, son parte da nosa historia, da nosa forma de vida. Os barcaleses levámolas no ADN”
- A organización repartiu máis de 8.000 unidades durante todo o día, soas ou acompañadas de chourizo ou orella
- Milleiros de persoas gozaron dunha variada oferta cultural e musical
- De Ninghures pechou a festa cun concerto que xuntou a centos de persoas
“As filloas ou son da pedra ou non son”, asegurou esta mañá Manuel Iglesias Turnes, pregoeiro dunha multitudinaria Festa da Filloa da Pedra da Baña. “As filloas son cultura, son raíz, son parte da nosa historia, da nosa forma de vida. Os barcaleses levámolas no ADN”, engadiu o escritor bañense durante o pregón. A organización repartiu durante todo o día máis de 8.000 filloas da pedra, asegurou a tenente de alcalde, Mónica González, encargada da organización.
Foron milleiros de persoas as que este domingo se achegaron ata a Baña para degustar as famosas filloas da pedra, que voluntarias e voluntarios estiveron preparando toda a fin de semana nas 35 pedras colocadas no polideportivo de San Vicenzo. Dende primeiras horas da mañá comezaron a despacharse unidades soas ou acompañadas de chourizo ou orella.
“Están boísimas”, aseguraron algunhas das persoas que acudiron á festa, corroborando así a afirmación que fixo Manuel Iglesias Turnes durante o pregón: “Non coñezo a ningunha persoa a que non lle gusten as filloas”.
Nos actos oficiais participaron o alcalde, José Antonio Pereira; Mónica González; o vicepresidente da Deputación da Coruña, José Regueira; a deputada provincial de Servizos Sociais, Mar García; a concelleira do PP, Belén Capeáns, así como membros do goberno e da Corporación municipal.
A festa comezou xa a primeira hora coa II Ruta ciclista da Filloa, e continuou con degustación de Ternera Gallega e, todo o día, cunha variada e ampla programación cultural. O obradoiro de treboada, impartido por Oli Xiráldez, ou o de cestería tradicional de Luis do Río estiveron moi concorridos, aínda que non tanto como as actuacións da Escola de Música Tradicional da Baña, As Atrevidas de Monte ou a dos Pequenos da Baña, que animaron a bailar a moitas das persoas presentes.
O Trío Alborada animou a sesión vermú e, pola tarde, a música continuou coas actuacións de Bouba e A Requinta de Lampai, que se foron intercalando co obradoiro de máscaras En-mascara-Arte, e visitas ao mercado de artesanía situado no exterior do pavillón.
Unha das bandas galegas de moda, De Ninghures, protagonizaron un multitudinario concerto co que rematou a XXII Festa da Filloa da Baña.
Os Reis Magos levan a maxia do Nadal ao pavillón de San Vicenzo na Festa de Reis do Concello da Baña
- Detalles
- Escrito por Alicentis
- Categoría: Cultura e educación
- Visto: 178
-
A Festa de Reis incluíu a entrega de premios do I Concurso de Decoración de Nadal, que recoñeceu a creatividade das aldeas participantes
-
A actuación do ilusionista Martín Camiña sorprendeu o público e completou unha xornada pensada para todos os públicos
A Festa de Reis da Baña volveu reunir este luns numerosas persoas no pavillón de San Vicenzo, onde a visita das súas Maxestades os Reis Magos se converteu no eixo central dunha tarde chea de ilusión, especialmente para a rapazada.
Os Reis Magos foron recibidos nun ambiente festivo no que repartiron agasallos e doces e escoitaron con atención as peticións e desexos dos nenos e das nenas. A celebración completouse cunha merenda de rosca e chocolate e coa actuación do ilusionista Martín Camiña, que sorprendeu o público cun espectáculo dinámico e participativo.
Ao longo da tarde tivo lugar tamén a entrega dos premios do I Concurso de Decoración de Nadal das aldeas da Baña, unha iniciativa impulsada polo Concello para fomentar a participación veciñal e ambientar o municipio durante as festas do Nadal. No acto participaron o alcalde da Baña, José Antonio Pereira, e a concelleira de Turismo, Ana Pensado, que fixeron entrega dos galardóns ás aldeas gañadoras desta primeira edición.
O primeiro premio, consistente nun lote de produtos de decoración de Nadal valorado en 300 euros, foi para Vilar de Cerdeiras, na parroquia de Corneira. O segundo premio, cun lote valorado en 200 euros, recaeu na Rúa das Dores, na Baña, mentres que o terceiro premio, dotado cun lote de 100 euros, foi para Vilar da Torre, na parroquia de Lañas.
Desde o Concello da Baña puxéronse en valor tanto a alta participación rexistrada no concurso como o ambiente vivido durante a Festa de Reis, destacando a boa acollida desta primeira edición e a vontade de seguir promovendo iniciativas que reforcen a convivencia e a implicación da veciñanza.
Ligazóns:
- Detalles
- Escrito por Alicentis
- Categoría: Cultura e educación
- Visto: 2372
-
A iniciativa busca fomentar a creatividade e fortalecer o uso do idioma nas celebracións de Nadal
-
As creacións exhibiranse no Mercado de Nadal e poderán formar parte das felicitacións institucionais
-
O concurso está dirixido ao alumnado do CPI San Vicenzo e á rapazada empadroada no municipio
-
O prazo de entrega dos traballos concluirá ás 14.00 h do mércores 10 de decembro
O Concello da Baña presenta o IV Concurso de Postais de Nadal en Galego, dirixido a menores de ata 16 anos. A iniciativa pretende favorecer a participación da comunidade escolar e da veciñanza, impulsar o uso do galego durante o Nadal e preservar as tradicións propias da zona.
O certame está aberto ao alumnado de Educación Infantil, Primaria e Secundaria do CPI San Vicenzo e a toda a rapazada empadroada no municipio. As postais deberán inspirarse no Nadal en Galicia e incorporar unha mensaxe de felicitación en galego. Admitirase calquera técnica plástica en formato DIN A4 e todas as creacións deberán ser orixinais e inéditas.
As propostas poderán presentarse no CPI San Vicenzo, na Casa do Concello ou a través do correo electrónico Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.. O prazo permanecerá aberto ata as 14.00 h do mércores 10 de decembro de 2025.
A convocatoria recolle catro categorías segundo o ano de nacemento, desde 2020 ata 2022 (Educación Infantil), de 2017 a 2019 (1º, 2º e 3º de Educación Primaria), de 2014 a 2016 (4º, 5º e 6º de Educación Primaria) e nados a partir de 2013 (Educación Secundaria Obrigatoria).
As persoas premiadas recibirán caixas con material escolar adaptado á etapa educativa. A entrega terá lugar o 14 de decembro no Mercado de Nadal do pavillón municipal, onde tamén se exhibirán todos os traballos nun espazo aberto ao público. As postais finalistas poderán difundirse nas redes sociais municipais e utilizarse nas felicitacións institucionais.
O xurado estará formado por Antón González Pérez, auxiliar administrativo, Ainhoa Barreiro Fuentes, técnica de normalización lingüística, e María Cousillas Ramos, educadora social. A súa decisión será definitiva e a acta publicarase na Sede electrónica e nos perfís institucionais do Concello.
A avaliación terá en conta a orixinalidade, a adecuación ao Nadal en Galicia, a técnica empregada, o uso do galego e a calidade do conxunto.
As bases poden consultarse na sede electrónica do Concello.
A Concellería de Acción Social, Cultural e Servizos á Cidadanía impulsa esta convocatoria para reforzar a creatividade da mocidade, promover o galego e manter vivas as expresións culturais do municipio durante estas datas.
- Detalles
- Escrito por Alicentis
- Categoría: Cultura e educación
- Visto: 214
O Concello da Baña organiza o luns 5 de xaneiro unha programación especial para celebrar a véspera de Reis, que terá lugar no pavillón de San Vicenzo a partir das cinco da tarde.
A xornada comezará coa recepción oficial das súas Maxestades os Reis Magos, que repartirán agasallos para a rapazada e escoitarán as súas peticións e desexos. Ao rematar este primeiro encontro, as persoas asistentes poderán desfrutar de rosca e chocolate, nun ambiente festivo que contará tamén coa actuación do ilusionista Martín Camiña.
A programación continuará ás sete e media da tarde coa entrega dos premios do primeiro Concurso de Decoración de Nadal do Concello da Baña, unha iniciativa posta en marcha pola concellería de Turismo, deporte e relacións institucionais para fomentar a participación veciñal e ambientar o municipio durante as festas.
Esta actividade está organizada pola concellería de Acción Social, Cultural e Servizos á Cidadaníaoa colaboración da Rede Cultural da Deputación da Coruña.
- Detalles
- Escrito por Alicentis
- Categoría: Cultura e educación
- Visto: 288
-
A xornada de convivencia e tradición estivo animada polos grupos de gaitas e de canto da Escola de Música Tradicional //
-
Participaron na cita o alcalde, José Antonio Pereira, e a tenente de alcalde, Mónica González //
Veciñas e veciños de todas as idades reuníronse este sábado, 18 de outubro, na Escola de Música Emilio Andújar para celebrar o Magosto da Baña 2025.
O Mago Teto foi o gran protagonista da primeira parte da xornada. Nun auditorio ateigado, conquistou o público co seu espectáculo O Afiador, no que combinou humor e trucos de ilusionismo, ademais de promover a participación das persoas asistentes.
Despois da función, chegou o momento máis esperado da tarde: a degustación de castañas asadas, que estivo acompañada dunha animada foliada a cargo dos grupos de gaitas e de canto da Escola de Música Tradicional da Baña.
Na cita participaron o alcalde da Baña, José Antonio Pereira, e a tenente de alcalde, Mónica González, que compartiron coa veciñanza unha tarde de lecer e convivencia.
O Magosto 2025 estivo organizado pola Concellería de Acción social, cultural e servizos á cidadanía, coa colaboración da Asociación Alborada. O Concello da Baña continúa así coa súa aposta por actividades que manteñen vivas as tradicións galegas e fortalecen o espírito comunitario.
A seguinte gran cita do outono chegará o sábado 1 de novembro, cando A Baña celebre o Samaín, cunha xincana familiar pola contorna de San Vicenzo.