- Detalles
- Escrito por Alicentis
- Categoría: novas
- Visto: 4303
-
A Corporación garda un minuto de silencio no Pleno polo pasamento do ex concelleiro José Antonio Ramos Calvo
-
Apoio unánime á moción do BNG para adiantar os cribados do cancro de mama aos 40 anos
-
Aprobada tamén por unanimidade a moción do PP para erradicar a violencia contra as mulleres
O Concello da Baña vai destinar a partida de 215.000 euros que lle corresponden do POS+ Adicional 4/2025 da Deputación da Coruña a financiar tres obras “moi necesarias para a veciñanza”, segundo explicou o alcalde, José Antonio Pereira. A Corporación aprobou por unanimidade facer as obras de adaptación á normativa en vigor da antiga aula do do Punto de Atención á Infancia (19.912 euros), e aglomerar viarios en San Cibrán (115.723 €) e Busto (79.425,03 euros).
O Pleno ordinario celebrado este 26 de novembro comezou coa Corporación gardando un minuto de silencio polo pasamento do ex concelleiro socialista José Antonio Ramos Calvo, “coñecido polos veciños da Baña como Suso”, explicou o alcalde. Na sesión tamén se aprobaron por unanimidade as mocións do BNG para adiantar o cribado do cancro de mama ás mulleres de 40 anos, e a do PP para impulsar medidas para erradicar a violencia contra as mulleres
A Baña vai destinar a investimentos financeiramente sostibles os 215.061,57 euros que lle corresponden do POS+ Adicional 4/2025 da Deputación da Coruña. No pleno ordinario de onte aprobáronse os proxectos que se van incluír neste plan de obras e servizos, que será financiado integramente pola Deputación da Coruña.
O alcalde explicou que nesta fase do POS+ vanse incluír “dúas obras moi necesarias para facilitar a comunicación entre a veciñanza da Baña e que permitirán aglomerar tanto o núcleo de San Cibrán como a entrada do Busto, na área de autocaravanas, e levalo ata a saída cara a Cotobade. En ambos casos utilizarase aglomerado en quente para mellorar a capa de rodaxe nas dúas zonas”, asegurou José Antonio Pereira.
O proxecto para a estrada de San Cibrán conta cun orzamento de 115.723,55 euros, mentres o de Busto ascende a 79.425,03 euros. En ambos casos, as obras inclúen tamén a limpeza de gabias e outras melloras.
No caso do Punto de Atención á Infancia vanse acometer melloras no edificio para adaptar os accesos e os servicios ás actuais esixencias hixiénicos sanitarias. O obxectivos é independizar os espazos de acceso, oficina, cociña e aseo do persoal da aula en funcionamento no actual edificio do PAI, unha obra que suporá un investimento de 19.912,99 euros.
A construción do novo módulo para que o PAI da Baña conte con once prazas máis (obras que rematarán este ano) fai obrigatoria a adaptación do edificio existente a normativa en vigor.
Tanto Mónica González (BNG) como Andrés García Cardeso (PP) consideraron as obras moi necesarias, polo que votaron a favor.
O Pleno tamén apoiou por unanimidade a moción do BNG para solicitarlle á Consellería de Sanidade que os programas para a detección precoz do cancro de mama se adianten aos 40 anos (actualmente diríxense a mulleres de entre 50 e 74 anos). Na exposición, Mónica González explicou que diferentes estudos científicos e recomendacións de sociedades médicas sinalan que o aumento de casos de cancro de mama en mulleres de entre 40 e 49 anos xustifican adiantar a idade de inicio destes cribados para detectar precozmente o cancro de mama e poder tratalos con maiores garantías de éxito.
Dende o PSdeG, Vanessa Gil apoio unha iniciativa que “pretende mellorar a calidade sociosanitaria da nosa sociedade. Con esta moción facemos honra a todas as mulleres que padeceron, que padecen e que padecerán cancro no futuro. Agardamos que se adiante os cribados do cancro de mama”, afirmou a concelleira.
Tamén por unanimidade aprobouse a moción do PP con motivo do 25N. Patricia Lois defendeu unha iniciativa que solicita a execución de medidas tanto a nivel local, como autonómico e estatal para loitar e erradicar a violencia contra as mulleres. Entre elas incluíase accións de formación do persoal municipal e promover campañas divulgativas e preventivas entre o alumnado bañense.
Dende o goberno local, Ana Pensado (PSdeG), considerou “esencial erradicar a violencia machista de todos os nosos ámbitos e dar protección a quen a sofre”, polo que se amosou partidaria promover accións formativas e divulgativas tanto entre o persoal municipal como entre a mocidade bañense, “ademais de facer seguimento de posibles casos dende os servizos sociais municipais”.
Mónica González (BNG) tamén considerou necesario “poñer recursos enriba da mesa para que as vítimas non teñan que convivir co seu maltratador”, e cualificou de “fundamental” impulsar medidas de prevención e sensibilización entre a mocidade “e traballar nos centros escolares dende idades moi temperás”.
- Detalles
- Escrito por Alicentis
- Categoría: novas
- Visto: 4682
Os dous grupos queren incluír tamén a persoal laboral fixo na súa composición
O alcalde lembrou que sempre estivo formada por persoal funcionario, como figuraba na súa proposta
Rexeitada a adhesión do Concello á Rede Composta cos votos en contra do grupo popular e coa abstención do nacionalista
A conta xeral de 2024, cun resultado positivo de 75.101 euros, foi aprobada cos votos de PSdeG e BNG e coa abstención do PP
O Pleno do Concello da Baña rexeitou este 1 de outubro modificar a mesa de contratación permanente do Concello ao votar en contra os cinco concelleiros do Partido Popular e a concelleira do BNG. Os dous grupos solicitaron incluír na súa composición o persoal laboral fixo e non só a funcionarios municipais. Tamén foi rexeitada a proposta da alcaldía para incluír A Baña na Rede Composta, nesta ocasión cos votos en contra do PP e coa abstención do BNG. A conta xeral de 2024 amosa un resultado positivo de 75.101 euros e foi aprobada cos votos a favor do equipo de goberno (PSdeG e BNG) e a abstención da oposición do PP.
O alcalde Baña, José Antonio Pereira, non puido sacar adiante no pleno de onte a modificación da mesa de contratación permanente. A súa intención era nomear a actual secretaria e a dúas funcionarias municipais para os postos vacantes da mesa. Dende o BNG, Mónica González propuxo que se tivese en conta o persoal laboral fixo do Concello para ocupar algún deses postos, e Andrés García Cardeso (PP) pediu que se establecese un sistema rotatorio entre o persoal municipal.
José Antonio Pereira replicoulles que, dende que cambiou a normativa, a mesa de contratación permanente sempre estivo composta por persoal funcionario do Concello. A proposta da alcaldía foi rexeitada cos 6 votos en contra de PP (5) e BNG (1), e co voto a favor do PSdeG (4).
A Corporación tamén rexeitou a proposta de incorporar o Concello da Baña á Rede Composta, unha coordinadora de entidades locais de todo o Estado, para fomentar a compostaxe. José Antonio Pereira lembrou que dende o Concello se están a incrementar as accións de concienciación entre a veciñanza para apostar pola compostaxe doméstica ou comunitaria, coa finalidade de reducir os residuos orgánicos e preservar o medio ambiente. Pereira indicou que xa se repartiran máis de 175 composteiros individuais e colocáronse dous colectivos, un en San Vicenzo e outro preto do colexio, e lembrou que Rede Composta garante a formación dun mestre composteiro na Baña para seguir traballando nesta liña.
O PP opúxose a esta iniciativa alegando que A Baña xa conta con apoio de Sogama para fomentar a reciclaxe e tamén co apoio da Xunta. Pola súa banda, Mónica González optou pola abstención, argumentando que carecía de información sobre esta iniciativa e que non lle fora posible entrar na páxina web desta rede.
O lugar e colocación dos dous composteiros comunitarios foi tamén motivo de discrepancias entre os grupos políticos. PP e BNG amosaron o seu desacordo cos sitios onde están situados, mentres que o alcalde considera que son os máis axeitados para fomentar a participación tanto da veciñanza coma do colexio.
Na votación, a proposta foi rexeitada cos votos en contra do PP (5), a favor do PSdeG (4) e coa abstención do BNG (1).
Na sesión de onte tamén se aprobou a conta xeral do exercicio 2024, cos votos a favor de PSdeG (4) e BNG (1) e coa abstención do PP (5), que deixa un remanente positivo de 75.101 euros “grazas á boa xestión económica que está a facer o equipo de goberno”, afirmou o alcalde. José Antonio Pereira lembrou durante a súa exposición que cando accedeu á alcaldía o Concello tiña unha débeda de millón e medio de euros. “Agora mesmo gozamos dun remanente positivo de tesourería de 294.046 euros, coa incorporación dos 75.101 euros do ano pasado”, asegurou.
No apartado de rogos e preguntas, o concelleiro de Obras salientou as obras de ampliación do PAI, para converter o centro nunha escola infantil. Está previsto que rematen no mes de decembro, dentro do prazo establecido para xustificar a subvención.
Pola súa banda, Mónica González contestoulle ao PP que as clases da Escola de Música Tradicional comezarán nese mes de outubro, como todos os anos.
- Detalles
- Escrito por Alicentis
- Categoría: novas
- Visto: 4362
O Concello da Baña continúa avanzando nas súas políticas de sostibilidade coa posta en marcha de dous centros de compostaxe comunitaria no núcleo urbano de San Vicenzo da Baña. Trátase dunha nova fase do proxecto municipal iniciado coa entrega de composteiros individuais, que contou cunha ampla acollida por parte da veciñanza.
Estes espazos estarán abertos a todas as persoas interesadas en participar e permitirán transformar os restos orgánicos dos fogares en abono natural. O obxectivo é reducir a xeración de lixo e, ao mesmo tempo, obter un recurso de valor para mellorar as zonas verdes municipais.
O Concello subliña que o éxito da iniciativa dependerá da colaboración da cidadanía, á que anima a sumarse para avanzar cara a un municipio máis sostible e respectuoso co medio ambiente.
Nas próximas semanas organizaranse xornadas informativas e obradoiros prácticos co fin de explicar o funcionamento dos centros de compostaxe comunitaria e resolver posibles dúbidas das persoas usuarias.
Con este novo paso, A Baña consolida o seu compromiso co fomento da economía circular e a redución de residuos, reforzando o papel activo da veciñanza na construción dun futuro máis ecolóxico.
- Detalles
- Escrito por Alicentis
- Categoría: novas
- Visto: 4521
-
O evento que se celebra este domingo contará con 108 persoas na andaina, 89 no minitrail, 67 no trail promesa e 59 no trail longo
-
Ademais das probas deportivas, ofreceranse degustacións de Ternera Gallega e das tradicionais filloas da pedra
-
A cita é puntuable para o ranking absoluto, máster, Sub 23, Sub 20, Sub 18 e Sub 16
O Trail da Baña celebra este domingo, 28 de setembro, a súa oitava edición con máis de 320 persoas inscritas, cifra que supón un novo récord para esta proba xa consolidada no calendario galego oficial de trail running. O evento será puntuable para o ranking absoluto, máster, Sub 23, Sub 20, Sub 18 e Sub 16.
A cita deportiva contará con catro modalidades: trail longo de 28 quilómetros cun desnivel acumulado de 1.000 metros, minitrail de 16 quilómetros cun desnivel de 650 metros, trail promesa de 8 quilómetros e andaina non competitiva de 10 quilómetros.
O grupo máis numeroso será o da andaina, con 108 participantes. No minitrail inscribíronse 89 persoas, no trail promesa chegan este ano aos 67 e no trail longo 59.
A saída efectuarase desde o pavillón de San Vicenzo ás 9.45 horas co trail longo. O minitrail iniciarase ás 9.55, o trail promesa ás 10.00 e a andaina ás 10.05.
As distancias de trail longo contarán coas categorías sénior, máster 1, máster 2 e absoluta. O trail promesa inclúe Sub 20, Sub 18, Sub 16, sénior e absoluta. Establécense premios para os tres primeiros homes e mulleres de cada categoría, para os tres primeiros clubs clasificados no trail longo, para o club con maior participación e para os mellores atletas locais do Val de Barcala.
Agasallo para todas as persoas participantes
Cada persoa inscrita recibirá uns calcetíns de running personalizados co logotipo do Trail da Baña. Están deseñados para favorecer a adaptación ao pé e a transpiración, co obxectivo de que poidan empregarse tanto durante a proba como no adestramento habitual. O Concello destaca que este detalle pretende recoñecer o esforzo de cada participante e reforzar o carácter conmemorativo desta oitava edición.
Degustación de filloas da pedra GDR
Ao rematar a proba habilitarase un espazo de encontro para participantes e acompañantes, onde se ofrecerá unha degustación de filloas da pedra da Baña. Estas filloas, elaboradas ao estilo máis tradicional, son un símbolo da gastronomía local e poderán probarse grazas á colaboración do GDR Terras de Compostela dentro do xeodestino Terras de Santiago. O Concello destaca que actividades como esta serven para poñer en valor a cultura do municipio e reforzar a difusión dun produto que identifica á contorna. Ademais, lembra que segue a traballar para que a Festa da Filloa da Pedra obteña o recoñecemento de Festa de Interese Turístico.
O Concello da Baña agradece a colaboración das entidades e empresas patrocinadoras que fan posible esta oitava edición do trail como Ternera Gallega, Gadis, que facilitará auga para participantes e acompañantes, e Hyundai AutoXallas, que apoia á organización coa cesión dun vehículo.
As persoas participantes no trail terán á súa disposición unha guía na que se recollen os distintos itinerarios e os puntos de abastecemento, ademais dalgúns lugares de interese para visitar se queren prolongar a súa estadía na Baña. A guía pode descargarse tamén na páxina web do Concello da Baña.
Os dorsais tanto para a Andaina como para as modalidade de Trail poderán recollerse o día do trail a partir das 08.15 horas na praza do Concello da Baña, San Vicente.
As persoas participantes no trail terán á súa disposición unha guía na que se recollen os distintos percorridos e os puntos de abastecemento. A guía pode descargarse tamén no documento adxunto.
 Guía do participante 2025 | [ ] | 2466 kB |
- Detalles
- Escrito por Alicentis
- Categoría: novas
- Visto: 4647
-
As sesións terán lugar todos os luns, de 19:00 a 20:30 horas, na Escola Municipal de Música Emilio Andújar, e estarán dirixidas por Xan Martínez
-
Co obxectivo de dar a coñecer esta disciplina haberá unha primeira clase de proba o luns 29 de setembro
O Concello da Baña vén de abrir o prazo de inscricións para a actividade de expresión corporal, que se inclúe dentro da programación da Escola Municipal de Teatro. As persoas interesadas poderán formalizar a súa matrícula a través da sede electrónica do Concello ou na Concellería de Cultura, permanecendo o prazo aberto ata cubrir prazas.
As sesións terán lugar todos os luns, en horario de 19:00 a 20:30 horas, na Escola Municipal de Música Emilio Andújar, e estarán dirixidas por Xan Martínez. O curso está previsto que comece no mes de outubro, no marco do programa 2025/2026.
Co obxectivo de dar a coñecer esta disciplina, organizarase unha primeira clase de proba o luns 29 de setembro, aberta á cidadanía, na que se poderá experimentar de primeira man a proposta de traballo.
A actividade de expresión corporal busca favorecer o benestar a través do movemento e da creatividade, incidindo en aspectos como a atención, a memoria, a verbalización, a intelixencia emocional e os procesos cognitivos, factores que repercuten directamente na mellora da calidade de vida.
Para máis información, o Concello da Baña pon a disposición da veciñanza o teléfono de contacto 686 148 512.
Os formularios de inscrición, o documento de pago e as autorización de imaxe e uso de teléfono podes descargarse nos documentos adxuntos.
| Anexo-2 - Orde de domiciliacion de recibos.pdf | [ ] | 92 kB |
| Anexo-3 - Autorizacion captacion imaxe e son.pdf | [ ] | 91 kB |
| Anexo-4 - Autorizacion uso numero de telefono.pdf | [ ] | 84 kB |
| Anexo1-Formulario de inscricions.pdf | [ ] | 156 kB |