- Detalles
- Escrito por Alicentis
- Categoría: novas
- Visto: 520
-
O vicepresidente segundo estivo acompañado polo alcalde e o tenente de alcalde, a directora xeral de Administración Local e polo delegado territorial do Goberno galego
-
Entre outras melloras, a asociación fixo unha ampliación e acondicionamento do local, colocando pavimentos nos aseos, fiestras e portas
-
O presidente da asociación solicitoulle axuda para actuar sobre o tellado
O alcalde da Baña, Andrés García Cardeso, acompañou onte pola tarde ao vicepresidente segundo da Xunta, Diego Calvo, durante a visita que fixo ao local da Asociación de veciños Nosos Aires da Riba, que foi mellorado cunha achega da Xunta de 12.000 euros. Diego Calvo estivo acompañado pola directora xeral de Administración Pública, Natalia Prieto; polo delegado territorial da Xunta na Coruña, Gonzalo Trenor; e polo tenente de alcalde bañense, César Ramos.
O presidente da asociación, José Manuel Ramos Freita, e membros da directiva, ensináronlle os traballos realizados no local coa subvención do Goberno galego. As melloras consistiron en actuacións nas cimentacións, na estrutura ou no peche das fachadas para gañar superficie coa zona ampliada, ademais de colocar as fiestras e portas e o pavimento dos aseos, proceder ao pintado das paredes mantendo a harmonía co edificio principal e á montaxe dun falso teito. Os traballos incluíron a instalación dunha bomba para a captación de auga e melloras no saneamento, no sistema eléctrico e no alumeado.
A Asociación de veciños Nosos Aires resultou beneficiaria con 12.000 euros das axudas anuais da Xunta destinadas a asociacións de veciños e de mulleres rurais e a comunidades de usuarios de augas, ao abeiro do Plan específico de acción comunitaria. Segundo informou a Xunta, esta liña estivo dotada con 3 millóns de euros destinados tanto a obras de acondicionamento, reforma e ampliación dos locais sociais e nas instalacións das traídas de augas comunitarias, como á adquisición de equipamento como mobiliario, material de oficina, equipamento informático ou acústico e audiovisual, ademais doutros recursos específicos.
Diego Calvo puxo en valor o importante labor desenvolvido polo asociacionismo local a prol da dinamización da vida social e incidiu na necesidade de que conten con espazos axeitados para o desenvolvemento das súas actividades. Así, lembrou que o obxectivo destas subvencións é mellorar a calidade de vida local, tendo en conta que os colectivos beneficiarios son as entidades máis próximas á cidadanía á hora de atender e canalizar as súas demandas.
O presidente da asociación explicoulles ás autoridades as melloras realizadas no local social, que mellorou a súa accesibilidade cunha rampla exterior que foi financiada pola Xunta en convocatorias anteriores. Ao mesmo tempo aproveitou para explicarlles que o colectivo necesita reformar o tellado do edificio, que se encontra deteriorado, para o que solicitou tamén o apoio da administración autonómica.
Andrés García Cardeso destacou a necesidade de que o Goberno galego se implique e axude a colectivos como Nosos Aires para poder seguir realizando actividades. “Esta asociación é moi activa e organizan moitas actividades durante todo o ano”, recalcoulle o alcalde ao vicepresidente segundo.
- Detalles
- Escrito por Alicentis
- Categoría: novas
- Visto: 690
-
O orzamento municipal para 2023 quedou aprobado definitivamente por unanimidade dos grupos políticos
-
Os tres grupos apoiaron a proposta do BNG contra os parques eólicos
-
Actualizada a ordenanza municipal de administración electrónica e a modificación do POS+ 2023
A Corporación da Baña celebrou hoxe o último pleno ordinario desta lexislatura apoiando todos os puntos por unanimidade, entre os que destaca a aprobación definitiva do orzamento municipal para este ano e o recoñecemento que se lle fixo Antonio Martínez. O Pleno decidiu poñerlle o seu nome ao campo de fútbol en atención aos “seus méritos como veciño da Baña e no seu labor na promoción do deporte, en especial do fútbol, no municipio”.
Segundo a proposta presentada polo equipo de goberno, todos os veciños e veciñas da Baña e toda a xente que estivo dalgunha forma ligada á SD A Baña “é coñecedora do traballo e dedicación continua” de Antonio Martínez en diferentes labores do equipo de fútbol. “Toda unha vida dedicada de forma altruísta á SD A Baña, e tendo un labor moi importante na promoción do deporte no municipio”.
Este sábado, 1 de abril, celebrarase unha homenaxe a Antonio Martínez, coñecido como o Cubano, durante o encontro que disputarán os veteranos da SD A Baña a partir das 17.00 horas. No descanso descubrirase a placa coa que se dá cumprimento ao acordo plenario de hoxe, para denominar as instalacións como Campo municipal de fútbol Antonio Martínez.
No Pleno de hoxe tamén se aprobou definitivamente o orzamento municipal do Concello da Baña para este ano, que ascende a 4.077.000 euros, e a ordenanza que regulará a administración electrónica no municipio.
Co apoio de todos os concelleiros acordouse modificar o POS+ 2023 para incorporar a execución de tres obras por importe de 147.747,25 euros, que son a pavimentación dunha vía pública na Edreira, as melloras da capa de rodaxe de Troitosende ao límite con Ames e do viario de Paradas a Valiñas. Este importe reducirase da partida que o Concello tiña previsto destinar a gasto corrente.
Tamén por unanimidade se aprobou unha moción presentada polo BNG sobre os parques eólicos. Dado que o grupo nacionalista non ten representación na Corporación, a súa proposta foi presentada polo tenente de alcalde, César Ramos. Tras enumerar os seis proxectos de parques eólicos previstos para a Baña, que suman en total 256,5 MW, os nacionalistas solicitan que o Concello elabore informes técnicos sectoriais para rexeitar a súa implantación, que se comprometa a asesorar á veciñanza e que se comprometa a personarse como parte nun proceso contencioso-administrativo, contemplando a partida orzamentaria para un futurible proceso xudicial.
O debate xerou un duro enfrontamento entre goberno e oposición. O alcalde, Andrés García Cardeso, explicou que o Concello xa ten encargados os informes sectoriais solicitados polo BNG e que “xa leva tempo informando a toda a veciñanza dos dereitos que lle asisten”. Respecto do proceso xudicial, García Cardeso volveu aclarar que “chegado o momento” o Concello se presentará como parte prexudicada.
Dende o grupo socialista, José Antonio Pereira criticou que o equipo de goberno apoiase esta moción dos nacionalistas e que votase en contra da que presentou o PSdeG, momento no que o tenente de alcalde, César Ramos, lle preguntou se “se refería a moción que presentou e logo non acudiu ao pleno para defendela”.
No capítulo de rogos e preguntas, o PSdeG propuxo que se ampliara o horario do campus deportivo de Semana Santa e quixo saber cantas persoas están a utilizar o servizo de bonotaxi, entre outros temas.
- Detalles
- Escrito por Alicentis
- Categoría: novas
- Visto: 645
As contas foron aprobadas cos votos a favor do equipo de goberno de PP e Compromiso, e a abstención do PSdeG
A Baña destinará 352.509 euros do POS+ da Deputación a gasto corrente e 30.230 a investimentos
As obras do Plan complementario ascende a 1,19 millóns de euros e para gasto social extraordinarios resérvanse 68.539 euros
A Corporación da Baña aprobou hoxe, cos votos a favor do equipo de goberno de PP e Compromiso (7) e a abstención do PSdeG, os orzamentos municipais para o presente exercicio, que ascenden a 4.077.000 euros. Polo que respecta ao POS+, o goberno local destina case a súa totalidade a gastos corrente (352.509 euros), reservando unha partida de 30.230 euros para investimentos. As obras previstas para o Plan complementario ascenden a 1,19 millóns de euros e o reservado para gasto social extraordinario a 68.539 euros. Estes puntos foron aprobados cos votos de PP e Compromiso.
O alcalde, Andrés García Cardeso, explicou as principais partidas económicas incluídas nos orzamentos do Concello da Baña para 2023, que ascenden a pouco máis de catro millóns de euros. No capítulo de gastos, resérvanse para persoal 1,391 millóns de euros (o 34,14% do presuposto) e 1,634 millóns para operacións correntes e os gastos derivados do funcionamento dos servizos existentes no Concello (40,09%).
Neste capítulo de gastos en bens correntes e servizo, Andrés García Cardeso dixo que este ano se incluíra unha partida de 48.000 euros para financiar os programas de conciliación que se poñen en marcha nas vacacións escolares (campamentos de verán, actividades en Nadal, Semana Santa ou Entroido).
Para investimentos reais o goberno municipal da Baña contará este ano cunha partida de 825.763 euros, o 20,25% do presuposto. Neste capítulo inclúense un plan de construción e reforma de equipamentos sociais públicos (332.492 €), a pavimentación da estrada entre Vilar da Torre e Lañas (250.213 euros) e a adquisición dun vehículo para desprazamento de persoal de servizos sociais (21.014 €), entre outras.
Os gastos financeiros (6.000 €), as transferencias correntes (163.800 €), o fondo de continxencia e outros imprevistos (40.000 €) e os pasivos financeiros (15.000 €) completan o capítulo de gastos.
Polo que respecta aos ingresos, as transferencias correntes que proceden da participación do Concello dos tributos do Estado ou da Xunta de Galicia, entre outros, ascende a 2.381.530 euros, o 58,42% dos ingresos. Os impostos directos suman 644.500 euros (15,81%) e os indirectos, 36.000 (0,84%).
As taxas e outros prezos públicos estímanse en 425.271 euros de ingreso para este exercicio, o 10,44% do total do orzamento. 3.200 euros de ingresos patrimoniais e 586.498 de transferencias de capital completan o resumo dos orzamentos de 2023.
O voceiro socialista José Antonio Pereira, asegurou que “os orzamentos chegan tarde” e criticounos “por non incluír” as propostas do seu grupo e polo incremento do soldo do alcalde e da concelleira de Cultura.
Andrés García Cardeso respondeulle que non había suba de salario dos cargos políticos. Tal como explicou o secretario, a subida do 1,5% o pasado mes de novembro estivo motivado pola aplicación dun Real Decreto do Goberno central que obrigaba a facer ese incremento para todo o persoal a cargo da administración, e que se lle aplicou a todo o persoal municipal.
O tenente de alcalde César Ramos (Compromiso) asegurou que era a primeira vez en anos que os orzamentos se aprobaban tan cedo, en febreiro, e criticoulle aos socialistas que de todo o expediente dos presupostos tan só se fixaran na subida dun 1,5% obrigada por un real decreto do goberno central.
As contas foron aprobadas cos votos do goberno local (PP e Compromiso), coa abstención do PSdeG.
Plan de Obras e Servizos
As posturas de goberno e oposición foron similares no debate sobre o Plan de Obras e Servizos da Deputación. O goberno local vai destinar a gasto corrente 352.509 euros e outros 30.230 para a pavimentación dunha estrada en Edreira.
As obras do plan complementario ascenden a 1.193.660 euros e inclúen, como actuacións máis relevantes, a mellora da capa de rodaxe da pista de Liñares á Carballeira (245.946 euros) ou a da pista de Marcelle a Reguengo (Suevos), con 232.384 euros.
“Son os mesmos proxectos que o ano pasado”, asegurou o alcalde. O voceiro socialista reclamou os proxectos para poder revisalos e volveu criticar que se destinase a maioría do POS a gasto corrente.
Este punto foi aprobado cos votos do goberno municipal (7) e a abstención dos socialistas (4).
O mesmo resultado produciuse na aprobación da solicitude de subvención para o POS+ adicional para gastos sociais extraordinarios deste exercicio, que conta con 68.539 euros, “segundo o informe emitido polo departamento de Servizos Sociais”, dixo o alcalde.
O importe total divídese en 13.000 euros para reforzo e ampliación de persoal técnico ou administrativo do departamento de Servizos Sociais; 7.739 euros para emerxencia social; 35.500 para ampliar o servizo de axuda no fogar; 2.300 para alugar equipamento técnico asistencial para cederllo ás persoas que o necesiten, e 10.000 euros para axudas económicas para que persoas vulnerables poidan facer fronte a gastos enerxéticos.
- Detalles
- Escrito por Alicentis
- Categoría: novas
- Visto: 797
-
Integrantes da Asociación Filloas da Pedra prepararán ‘in situ’ o manxar artesán empregando na súa elaboración produtos 100% ecolóxicos ||
-
A delegación, encabezada polo alcalde, viaxará á capital de España o martes 28 de febreiro ||
O Concello da Baña e a Asociación Filloas da Pedra da Baña promocionarán o produto estrela da súa gastronomía local, a filloa de pedra, en Madrid, nun acto que terá lugar o martes 28 de febreiro na Casa de Galicia e ao que están invitados os centros rexionais, galegas e galegos residentes na capital de España e medios de comunicación. Ademais de dar a coñecer as potencialidades turísticas e gastronómicas deste manxar tradicional, integrantes da asociación poñerán en funcionamento 2 pedras sobre as que elaborarán en vivo e en directo as filloas, que logo serán degustadas.
Todos os ingredientes que se empregarán na elaboración das filloas (ovos, fariña, touciño...) serán 100% ecolóxicos, ao igual que xa se fixo na XIX Festa da Filloa da Pedra celebrada na Baña a fin de semana do 11 e 12 de febreiro e que bateu récord de asistencia.
A delegación estará encabezada polo alcalde da Baña, Andrés García Cardeso, quen aproveitará para dar a coñecer as potencialidades turísticas do municipio. Mónica Tomé Rey, secretaria da Asociación Filloas da Pedra da Baña, Lola Landeira e o chef Manuel Mallón Ardións, tamén integrantes da entidade, serán os encargados de divulgar e exaltar o potencial gastronómico da filloa da pedra, elaborar o amoado e facer as filloas.
Os asistentes ao acto (previsto para ás 19.30 horas) terán a oportunidade de degustar as filloas da pedra e comprobar as particularidades únicas deste manxar natural e artesán, cuxo arte de elaboración foi conservado con agarimo nas cociñas dos fogares bañenses xeración tras xeración. Quen o desexe tamén poderá probar a facer a súa propia filloa nunha das pedras.
Fieis ao seu compromiso de divulgación da filloa da pedra como produto natural e artesán, a asociación mantén dende hai anos unha estreita colaboración con outras entidades filloeiras galegas, como a de Muimenta (Cospeito) para a promoción conxunta da filloa.
E, en recoñecemento ao seu labor e como promotora dunha das catro festas máis senlleiras de Galicia dedicadas á exaltación da filloa, a Asociación Filloas da Pedra da Baña recibirá este domingo, 26 de febreiro, o Mandil de Honra da Asociación Cultural da Filloa de Lestedo, no transcurso da XL edición da festa da filloa desta localidade boqueixonesa.
- Detalles
- Escrito por Alicentis
- Categoría: novas
- Visto: 581
-
A concelleira de Normalización Lingüística da Baña, Lorena Trillo, asistiu á gala celebra en Carballo //
-
Toxío impúxose na categoría de Canle e Histérikas Histórikas como Youtubeira revelación //
-
'Eduardita’, de Piratas sen parche, recibe o Premio Vídeo; Pingando-Laura Veiga o Pioneiro; Loba Today o de Rede; a canle Falemos do Reino de Galicia, o de Calidade Lingüística e o vídeo de Xabi Gómez ‘Bembibre coas Tanxugueira’, o do Público //
A concelleira de Normalización Lingüística da Baña, Lorena Trillo, asistiu o sábado, 28 de xaneiro, á gala de entrega dos Premios Youtubeiras, celebrada no Pazo da Cultura de Carballo. Os Premios Youtubeiras, que chegaron á súa sexta edición, están organizados polos servizos de Normalización Lingüística dos Concellos da Baña, Rois, Ames, Carballo, O Grove, Moaña, Negreira, Pontevedra, Ribadeo, Rianxo, Santiago de Compostela e Teo, das universidades da Coruña, Santiago e Vigo, e da Deputación da Coruña.
Un total 22 propostas finalistas, das 75 canles que se presentaron, competían por un dos oitos galardóns dos Premios Youtubeiras..
O xurado, composto por Mario Brión, Mónica Fernández Valencia, Carmen Nieto, Elvira Nercellas e Alba Rodríguez outorgou o Premio Youtubeiro do ano a Neeumatiko, de quen o xurado destacou o seu carácter de “referente do youtube en galego” e a alta capacidade comunicativa e lingüística do youtubeiro.
O premio á Canle foi Toxío para pola “súa alta calidade comunicativa, técnica e estética e a continuidade e periodicidade dos contidos cun dominio emocional e ético”. Mentres que Histérikas Histórikas álzase co de Youtubeira revelación por “por unha forma fresca de presentar contidos, cunha alta repercusión e cun formato innovador no youtube en galego”, segundo remarcou o xurado.
O Premio Vídeo levouno Piratas sen parche polo vídeo Eduardita, de quen o xurado puxo en valor a “calidade técnica, creatividade e orixinalidade á hora de transmitir mensaxes”.
A canle Falemos do Reino de Galicia recibiu o galardón de Calidade Lingüística pola “súa capacidade para manter os trazos dialectais nun rexistro culto e normativo”, segundo remarcou na acta o xurado. Mentres que Pingando-Laura Veiga foi galardoada co de Pioneiro, por “introducir unha nova temática na Rede galega” dun xeito innovador e atractivo.
“Pola súa constancia para fortalecer a comunidade virtual galega, por crear e manter vínculos e asociacións” o xurado otorgou o Premio Pioneiro á Lobeira Today. Mentres que o galardón do público foi para o vídeo Bembibre coas Tanxugueiras, de Xabi Gómez.
Todos os premios conta cunha dotación económica de 1.000 euros, agás o Premio do Público que dispón de 500 euros. En total repartíronse 7.500 euros en premios e as persoas gañadoras recibiron tamén un diploma e unha medalla simbólica deseñada para a ocasión por Nahuel Pérez.
Á gala foi conducida por Cristina Collazo e contou coa actuación musical de LaMontagne e PicoAmerio
Nesta ligazón podes ver os vídeos e as canles gañadoras dos Premios Youtubeiras 2022: