- Detalles
- Escrito por Alicentis
- Categoría: novas
- Visto: 2138
-
As Escolas Deportivas Municipais acadaron este curso 2025-2026 unha participación histórica, con 167 persoas inscritas
-
O pavillón de San Vicenzo acolleu unha xornada festiva con xogos e exhibicións do alumnado diante de familiares e da veciñanza
-
O alcalde, José Antonio Pereira, e a concelleira de Deportes, Ana Pensado, entregáronlles aos rapaces e ás rapazas un agasallo conmemorativo
O deporte base volveu converterse este sábado no gran protagonista na Baña, coa celebración da clausura das Escolas Deportivas Municipais 2025-2026. A xa tradicional xornada festiva no pavillón de San Vicenzo que serviu para despedir un curso marcado por un novo récord de alumnado, con 167 persoas entre rapazada e adultos, a cifra máis alta rexistrada ata o momento.
Durante máis de dúas horas, os distintos grupos das escolas amosaron todo o aprendido ao longo do curso, con exhibicións de baloncesto, de judo, de tenis de mesa, de baile, de acrosport, de ximnasia rítmica e de patinaxe artística, que foron moi aplaudidas desde as bancadas polo público asistente, composto por familiares e pola veciñanza.
A festa contou coa participación do alcalde, José Antonio Pereira, e da concelleira de Deportes, Ana Pensado, que fixeron entrega a todo o alumnado dun agasallo conmemorativo: unha faldriqueira co logo do Concello da Baña como recordo da súa participación neste curso, e dentro da que, para o que vén, a rapazada poderá traer metidos os seus obxectos persoais.
A xornada completouse cun espazo de inchables e de xogo libre para os máis pequenos e pequenas, convertendo a cita nun encontro de convivencia arredor do deporte e do lecer.
Preparando xa o vindeiro curso
As actividades ofertadas este 2025-2026 polas Escolas Deportivas Municipais da Baña foron: pilates, con 25 participantes; tenis de mesa, tamén con 25; patinaxe artística, con 19; baloncesto, con 11; judo, con 10, e acrosport, ximnasia rítmica e baile moderno, con 8 cada unha.
Tamén houbo pádel, que volveu ser a modalidade con maior demanda, ao reunir un total de 53 alumnos e alumnas.
O Concello celebra o crecemento sostido da participación rexistrado nos últimos anos e subliña a importancia de seguir fomentando hábitos de vida saudables tanto entre a cativada como entre a xente adulta. Por iso, xa traballa na planificación das Escolas Deportivas Municipais do próximo curso 2026-2027, coa intención de “reforzar a programación actual e incorporar novas propostas adaptadas ás demandas da veciñanza”, afirmou o alcalde.
- Detalles
- Escrito por Alicentis
- Categoría: novas
- Visto: 2240
O Pleno da Corporación apoiou por unanimidade as propostas, baseadas na normativa marco da Xunta e similares ás existentes ata o momento
O goberno local pide “prudencia” ante situacións como as vividas no centro polas altas temperaturas para “non xerar alarmas innecesarias. A cativada estivo sempre ben atendida”
O Pleno da Corporación da Baña aprobou por unanimidade na sesión ordinaria deste mércores a ordenanza sobre o funcionamento da Escola infantil municipal e os prezos públicos deste servizo. Na sesión, o equipo de goberno pediu prudencia a hora de valorar situacións como a vivida esta semana no centro polas altas temperaturas. “Estamos xerando unha alerta que non é verdade, porque os nenos estiveron ben atendidos en todo momento por unhas traballadoras que son profesionais, e xa buscamos solucións transitorias para evitar que se volva a repetir esta situación. As obras están visadas pola Xunta e cumpren as condicións”, afirmou Mónica González Blanco.
O Concello da Baña modificou a ordenanza reguladora da Escola infantil municipal, unha vez que entrou en funcionamento o novo servizo ao rematar as obras de ampliación do punto de atención a infancia para incrementar o número de prazas.
A ordenanza está baseada na normativa marco da Xunta de Galicia e contempla, entre outras particularidades, prioridade na primeira matrícula para as familias empadroadas na Baña e tamén unha ampliación da atención durante a primeira quincena de agosto, segundo explicou o alcalde, José Antonio Pereira.
Os prezos públicos fixados por este servizo son similares aos que estaban en vigor ata o momento. “Mantemos as mesmas taxas que xa había, pero temos que ter en conta que aínda que a Xunta financia o 100% da atención educativa da cativada, o Goberno galego só nos financia 11 meses ao ano. A primeira quincena de agosto, e outros gastos, son sufragados con fondos do Concello”, explicou a tenente de alcalde Mónica González.
Os dous puntos foron aprobados por unanimidade de todos os concelleiros. Ambos documentos serán sometidos agora a un período de exposición pública.
No capítulo de rogos e preguntas, o PP preguntou polas queixas trasladadas por algunhas familias aos medios de comunicación esta mesma semana, polo calor que facía na escola infantil municipal.
Todo o equipo de goberno pediu prudencia ao respecto, sinalando que se utilizaron termos que non están contrastados por profesionais sanitarios, como supostas situacións de hipertermia nalgún menor. Mónica González Blanco aclarou que as obras de ampliación cumpren todos os requisitos establecidos pola Xunta de Galicia, que foi a que visou o proxecto e supervisou a posta en funcionamento da Escola infantil municipal.
“So houbo unha familia que se queixou no escrito entregado no Concello. Dende o luns e ata hoxe non houbo máis queixas, nin das familias nin das traballadoras”, afirmou Mónica González. A concelleira de Acción social, cultura e servizos a cidadanía recoñece que os nenos pasaron calor, “como en moitos outros centros educativos públicos”.
Para paliar provisionalmente esta situación, mentres se busca unha solución definitiva, xa se puxeron aparellos portátiles de aire acondicionado e ventiladores na escola infantil.
Mónica González e todo o goberno local ratificaron que “os nenos estiveron ben atendidos en todo momento, por unhas traballadoras que son profesionais e hidrataron cada media hora á cativada”. Segundo a tenente de alcalde, “a información que saíu na prensa non é certa. Estamos xerando unha alerta que non é verdade”, engadiu. Todo o equipo de goberno pediu actuar con prudencia ante situacións coma esta.
- Detalles
- Escrito por Alicentis
- Categoría: novas
- Visto: 357
-
A competición celebrarase o 31 de maio no Polideportivo Municipal de San Vicenzo e repartirá 800 euros en premios
-
A cita contará con categorías xerais, locais e especiais para xogadores de distintas idades e niveis
O Polideportivo Municipal de San Vicenzo será escenario o próximo domingo 31 de maio da celebración do V Torneo Concello da Baña, unha cita incluída no X Circuito Intercomarcal de Xadrez Deputación da Coruña 2026.
A competición reunirá xogadores e xogadoras de diferentes categorías nun torneo valedoiro para ELO FIDE de xadrez rápido, consolidando esta proba como unha das citas destacadas do calendario provincial.
O torneo desenvolverase mediante sistema suízo a 7 ou 8 roldas, dependendo do número de participantes, cun ritmo de xogo de 10 minutos máis 3 segundos de incremento por movemento. A presentación dos xogadores terá lugar ás 15.45 horas e a primeira rolda comezará ás 16.00 horas, estando prevista a clausura e entrega de premios arredor das 21.00 horas.
A competición contará con premios nas categorías xeral, local e especiais. Haberá recoñecementos para xogadores sub-2000, sub-1700, veteranos maiores de 55 anos, mellor xogadora feminina e categorías base sub-18, sub-16, sub-14, sub-12, sub-10 e sub-8.
En total repartiranse 800 euros en premios, ademais de trofeos para os mellores clasificados. O primeiro posto da clasificación xeral recibirá 130 euros e trofeo.
O torneo tamén inclúe premios para os mellores xogadores locais e o sorteo dun cheque regalo de Gadis e dunha cesta de Frutas Fondo, ademais dun libro entre os participantes non premiados.
Inscricións
As persoas interesadas poderán formalizar a súa inscrición ata o venres 29 de maio premendo neste enlace ou no teléfono 617 234 393. O custe da inscrición é de 12 € (xeral), 10 € (sub-16) e 5 € (persoas empadroadas na Baña). Os pagamentos deben facerse de forma anticipada por transferencia (Caixabank ES15 2100 5097 2002 0012 6301) indicando nome e apelidos, club e inscrición torne. Máis información en Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo. ou no 617234393.
Desde o Concello da Baña animamos á veciñanza e ás persoas afeccionadas ao xadrez a achegarse ao Polideportivo Municipal de San Vicenzo para desfrutar dunha xornada deportiva que combinará competición e promoción do deporte.
As persoas que se acheguen ao municipio o día do torneo poderán tamén gozar da oferta hostaleira local, con opcións de xantar en distintos establecementos da zona, como Restaurante O Arranca; Parrillada Begomar; Casa Salvador; Parrillada O Val de Barcala; Parrillada O Barro; Café–Bar Restaurante O Muíño e Taberna O Barro.
 19-5-2026: Bases do torneo | [ ] | 415 kB |
- Detalles
- Escrito por Alicentis
- Categoría: novas
- Visto: 208
-
O colectivo premiado leva case dúas décadas promovendo encontros literarios e actividades arredor da lectura compartida no CPI San Vicente
-
As Pandeireteiras da Baña e a Maga Fani completaron unha programación centrada na defensa e transmisión da lingua galega
-
A concelleira Mónica González destacou que “a cultura non é un luxo: é identidade, pensamento crítico e cohesión social”
O Concello da Baña celebrou este domingo o Día das Letras Galegas cun acto institucional no que a entrega do V Premio Daniel García Ramos ao Club de lectura Ars Legendi se converteu no eixo central dunha xornada marcada pola defensa e posta en valor da lingua galega.
A programación desenvolveuse na Escola Municipal de Música Emilio Andújar e reuniu numeroso público arredor dunha proposta cultural que combinou maxia, reflexión e recoñecemento ao compromiso coa cultura galega.
A xornada arrancou ás 11.00 horas co espectáculo As nosas ancestras anóxanse. Que acontece coa nosa lingua?, presentado pola Maga Fani. A actuación mesturou ilusionismo e reflexión sobre a situación actual do galego, convidando ás persoas asistentes a pensar sobre o uso e a transmisión da lingua propia.
Posteriormente tivo lugar a entrega do V Premio Daniel García Ramos por parte da concelleira de Acción Social, Cultural e Servizos á Cidadanía, Mónica González, ao Club de lectura Ars Legendi, colectivo que desde o ano 2007 promove encontros literarios e cafés arredor da lectura compartida no CPI San Vicente, converténdose nun referente cultural e participativo no municipio.
Durante o acto interviñeron en representación do club a súa directora, Mar Sueiro, así como Mari Carmen Vázquez e Dolores Allo, quen puxeron en valor o papel da lectura como ferramenta de encontro, aprendizaxe e dinamización cultural. Tamén estiveron presentes o alcalde da Baña, José Antonio Pereira, así como integrantes da corporación municipal.
A lingua como patrimonio
Mónica González puxo o foco na figura de Begoña Caamaño, homenaxeada neste 2026 polas Letras Galegas, sinalando que foi “unha autora comprometida coa lingua, coa igualdade e coa defensa dunha cultura crítica e transformadora”, destacando que “a súa obra e a súa traxectoria deixáronnos un exemplo de literatura feita desde a conciencia social, desde a reivindicación do papel das mulleres e desde un profundo amor por Galicia e pola nosa lingua”.
A edil subliñou ademais que “a lingua galega é patrimonio vivo” e que “celebrar as Letras Galegas é reivindicar ese orgullo colectivo e lembrar que unha lingua só permanece viva cando se usa, se coida e se transmite con naturalidade e cariño”.
Grupos que crean comunidade
En relación ao recoñecemento concedido, a concelleira salientou que se trata dunha iniciativa que “implicou a posta en funcionamento de varios grupos de lectura tanto de alumnado como de docentes e familias do noso CPI, todos eles unidos polo amor á lectura”. Tamén destacou que o club “non só pretende fomentar a lectura senón tamén ofertar a posibilidade de conversar, reflexionar e ser conscientes da diversidade de perspectivas existentes”, ademais de crear “comunidade máis alá do CPI San Vicente implicando non só ás familias senón tamén á veciñanza”.
Mónica González reafirmou igualmente “o compromiso co galego desde todos os ámbitos” concluíndo que “cada vez que falamos galego, escribimos galego ou creamos en galego, estamos facendo país”.
O acto contou tamén coa actuación das Pandeireteiras da Baña, que puxeron a nota musical á celebración e contribuíron a realzar unha xornada de homenaxe á cultura e ás tradicións galegas.
O obsequio entregado ás persoas homenaxeadas foi elaborado por persoas usuarias da Fundación Discapacitados Psíquicos Barcala, un detalle cargado de simbolismo co que o Concello da Baña quixo poñer tamén en valor o traballo inclusivo e creativo desenvolvido pola entidade.
Cinco edicións do Premio
O Premio Daniel García Ramos foi instituído polo Concello da Baña co obxectivo de recoñecer o traballo en favor da lingua e da cultura galegas, rendendo homenaxe á figura do maxistrado e fillo predilecto do municipio Daniel García Ramos, destacado polo uso do galego na xustiza e pola defensa do rural.
Nas edicións anteriores, o galardón recaeu nas Pandeireteiras da Baña e CantoEncanto (2025), en Mª Jesús Álvarez Ramos (2024), en Emilio Lois (2023) e en Alonso Barreiro Caxade (2022).
A actividade estivo organizada pola Concellería de Acción Social, Cultural e Servizos á Cidadanía, coa colaboración da Rede Cultural da Deputación da Coruña.
- Detalles
- Escrito por Alicentis
- Categoría: novas
- Visto: 362
-
A xornada desenvolveuse ao longo de todo o día cun programa que combinou tradición, convivencia e actividades culturais
-
Familias enteiras participaron xunto ao artista Oli Xiráldez na confección dun fermoso Maio que logo levaron en procesión ata a Praza do Concello
A Baña foi escenario este domingo, 10 de maio, dunha celebración que uniu xeracións arredor dunha das tradicións máis ancentrais da cultura galega, os Maios. A segunda edición desta festa popular serviu para darlle a benvida á primavera nun ambiente marcado pola participación veciñal e a posta en valor das tradicións.
A celebración arrancou ás 10.00 horas cunha intensa mañá de traballo colectivo arredor da creación do Maio. Malia que pola mañá a choiva obrigou a trasladar a xornada á Escola de Música Municipal Emilio Andújar, logo esta deu unha tregua e familias enteiras desfrutaron ao aire libre creando co artista Oli Xiráldez un fermoso Maio.
Foi o resultado de moitas horas de traballo en equipo, que incluíu desde a recollida de fiúncho, flores e demais elementos naturais, ata a confección de estruturas florais e adornos. Baixo a dirección de Xiráldez, todas as persoas asistentes, tanto grandes como pequenas, participaron no laborioso proceso de montaxe do Maio, recuperando así unha expresión artística tradicional moi vencellada á identidade cultural galega.
Un xantar veciñal, no que entre outras viandas non faltaron as famosas filloas á pedra da Baña, serviu para repoñer forzas ao mediodía, tras o que o traballo e o bo ambiente continuaron pola tarde.
Lupe Blanco e Nuria Penas animaron a xornada coas súas regueifas e bailes, mentres que o espectáculo infantil de K’Paparota Teatro completou a programación da festa.
O broche final chegou coa procesión do Maio ata a Praza do Concello, acompañado pola música tradicional dun gaiteiro. Diante da casa consistorial, e tamén previamente no exterior da Escola de Música, a música, os bailes e as coplas satíricas arredor do Maio converteron a festa nunha auténtica homenaxe viva á cultura popular galega.
A iniciativa foi organizada pola Concellería de Acción Social, Cultural e Servizos á Cidadanía que dirixe Mónica González, quen participou activamente na celebración xunto á veciñanza e destacou a boa acollida dunha iniciativa que, un ano máis, “cumpriu co obxectivo de promover a identidade local e o encontro interxeracional”.