- Detalles
- Escrito por Alicentis
- Categoría: Desenvolvemento local
- Visitas: 329
-
O alcalde, José Antonio Pereira, reuniuse co director de Amtega para apremialo a realizar as actuacións necesarias canto antes //
O alcalde da Baña, José Antonio Pereira, visitou onte a sede de Amtega en Santiago para reunirse co director deste organismo, Julián Cerviño, e apremialo a realizar as actuacións necesarias para dotar de cobertura móbil todos os lugares das parroquias da Riba, Lañas e Cabanas.
Nesta xuntanza, o director da Axencia para a Modernización Tecnolóxica de Galicia (Amtega) comprometeuse a axilizar os trámites para a instalación no prazo máis breve posible de dúas antenas 5G, que lles darán cobertura móbil de voz e datos de alta velocidade aos lugares das tres parroquias bañenses que hoxe en día carecen de servizos de telefonía móbil ao non prestalos ningunha das grandes operadoras (Movistar, Vodafone e Orange).
Unha das antenas de nova instalación servirá para darlle cobertura ás persoas afectadas na Riba e a outra levaralle o sinal á veciñanza de Lañas e Cabanas.
A Baña sumouse no seu día ao convenio marco que Amtega asinou coa Federación Galega de Municipios e Provincias (FEGAMP) para mellorar a cobertura móbil no rural. O Concello, encargado de identificar que núcleos de poboación teñen cobertura nula, facilitará agora as parcelas onde se construirán as novas torres e a asumirá as acometidas eléctricas necesarias para que funcionen.
A reunión deste martes cos responsables de Amtega foi solicitada polo goberno local ante a demora no cumprimento do convenio. Ademais do alcalde, tamén asistiu o concelleiro de Obras, Urbanismo e Medio Rural, Jesús Pena.
- Detalles
- Escrito por Alicentis
- Categoría: Desenvolvemento local
- Visitas: 187
A Baña forma parte dun total de oito municipios da provincia da Coruña que participará nun programa piloto da Axencia Tributaria para facilitarlle os trámites da declaración da renda aos habitantes rural e, nomeadamente, ás persoas maiores de 65 anos.
Este novo servizo supón o acompañamento por videochamada das persoas interesadas, que poderán facer a declaración na casa consistorial da Baña cunha atención semellante á presencial pero sen se ter que desprazar ás oficinas da Axencia Tributaria en Santiago ou en Carballo. O Concello da Baña colabora co programa facilitando a instalación no salón de plenos dun equipo para as videochamadas, ademais de poñer persoal municipal á disposición da veciñanza para axudala.
O prazo para pedir as citas ábrese este luns 29 de abril e as declaracións comezarán a facerse a partir do martes 7 de maio. As citas poden solicitarse nos por teléfono chamando ao 91 553 00 71 ou ao 901 22 33 44, e tamén por internet a través da sede electrónica da Axencia Tributaria.
Ademais de na Baña, o servizo prestarase este ano nos concellos coruñeses da Capela, Frades, Irixoa, Lousame, Monfero, Santiso e Toques, todos eles rurais e con menos de tres mil habitantes. En Galicia faranse as videochamadas en 52 municipios.
Dende hoxe, todas as persoas que o desexen poderán solicitar tamén a cita telefónica para facer a declaración da renda nos mesmos teléfonos: 91 553 00 71 ou 901 22 33 44.
Na páxina web da Axencia Tributaria danse a coñecer os requisitos que deben cumprir as persoas interesadas para poder facer a declaración na AET.
- Detalles
- Escrito por Alicentis
- Categoría: Desenvolvemento local
- Visitas: 1266
-
O Pleno acorda que os festivos locais en 2024 serán o 22 de xaneiro, día de San Vicenzo; e o 9 de setembro, festividade da Virxe das Dores //
-
A Festa da Terceira Idade adíase ata a primavera do ano que vén pola forte débeda do Concello, que o goberno municipal cifra en 1,6 millóns //
-
Aproba por unanimidade a modificación do convenio de Atención Temperá con Santa Comba para incrementar as horas de logopedia e diminuír a lista de agarda //
-
O goberno remitiulle dous oficios ao exalcalde reclamándolle o pagamento dos gastos de seguro médico e a localización de sete teléfonos móbiles //
A Corporación da Baña aprobou onte destinar 142.000 euros do POS+ Adicional á realización de obras e outros 268.000 a gasto corrente para pagar facturas atrasadas nun pleno no que, agás este, os outros puntos foron aprobados por unanimidade. A preguntas do PP, a primeira tenente de alcalde, Mónica González, dixo que a Festa da Terceira Idade vaise adiar ata a primavera debido “á forte débeda que ten o Concello”, que o alcalde cuantificou en 1.600.000 euros “segundo os informes de tesourería”. Ao rematar o pleno, o alcalde, José Antonio Pereira, informou ao portavoz do PP e exalcalde, Andrés García Cardeso, que se lle remitiran dous oficios; un deles para reclamarlle o pago do seu seguro médico, aboado polo Concello, e o outro para saber onde están sete teléfonos móbiles que costaron máis de seis mil euros, dos doce encargados no último ano polo anterior goberno.
O día de San Vicenzo (22 de xaneiro) e o día da Virxe das Dores (9 de setembro) serán festivos locais na Baña o vindeiro ano, un acordo aprobado por unanimidade. Os tres grupos tamén votaron a favor de aprobar a conta xeral de 2022, da ordenanza de administración electrónica e do regulamento de control interno do Concello, que define o réxime de fiscalización de gastos e ingresos para mellorar a eficiencia da administración local.
A proposta para modificar o convenio do servizo de Atención Temperá con Santa Comba foi apoiado por todos os concelleiros. Segundo explicou Mónica González, a intención é incrementar as horas de logopedia, para acabar coas listas de agarda, e un reaxuste do equipo de profesionais do servizo, “xa que unha persoa remata o contrato e hai que informar á Consellería”. Actualmente, reciben atención neste servizo 57 nenos e nenas menores de 6 anos dos municipio da Baña e de Santa Comba.
O POS+ Adicional, Plan Único de Concellos da Deputación da Coruña, foi aprobado unicamente cos 6 votos do equipo de goberno de PSdeG e BNG e a abstención do PP (5). Dos 411.237,10 euros que lle corresponden ao Concello da Baña o alcalde presentou a proposta de destinar 268.540 euros a gasto corrente para pagar facturas e 142.697 euros á realización de obras, entre elas a mellora do entorno da igrexa de Fiopáns, o acceso a unha vivenda en Emes e outro en Corneira, así como dous tramos da estrada de Vigobó a Pandoira. “Son as actuacións máis necesarias agora mesmo”, dixo José Antonio Pereira.
Dende o PP mostráronse a favor de mellorar a contorna da igrexa de Fiopáns, pero criticaron os arranxos de accesos a vivendas particulares en vez de presentar un plan máis global. José Antonio Pereira replicoulle que, coa mellora dos accesos en Emes e Corneira, “cumprimos cunha promesa que lle fixo vostede (Andrés García Cardeso) hai oito anos á veciñanza e que seguen estando en terra”. Pereira Gil tamén lle criticou ao PP que non incluíra no POS de 2018, 2019 ou 2022 a mellora da contorna da igrexa de Fiopáns. Ademais, engadiu, “nós presentamos un orzamento duns 80.000 euros, a metade do que tiña preparado o PP”.
Débeda de 1,6 millóns e Festa da Terceira Idade
Nos rogos e preguntas, cando Andrés García Cardeso preguntou polo estado das obras executadas con cargo a subvencións, José Antonio Pereira díxolle que moitas estaban rematadas ou en fase de execución e que outras non se podían executar pola forte débeda do Concello.
Pereira Gil presentou un informe da Tesourería municipal que cifra a débeda do Concello en 1.600.000 euros. “Cando chegamos ao goberno atopámonos con facturas pendentes de pagamento do ano 2022 por importe de 185.000 euros, e case outro millón de euros sen pagar entre xaneiro e xuño deste ano. Non temos capacidade financeira para aportar o 20 por cento que nos piden moitas subvencións”.
Por causa da débeda, o Concello non vai organizar este ano a Festa da Terceira Idade, como lle sinalou a concelleira do BNG ao portavoz popular. “Valoramos facela este ano, pero coa situación económica do Concello é inviable”, dixo Mónica González. “Farémola na primavera, agora temos que pagar o que debemos”, afirmou. A primeira tenente de alcalde criticou que o anterior goberno municipal destinase á Festa Castrexa uns 30.000 euros, “que aínda están sen pagar, e así con moitas outras cousas”.
José Antonio Pereira e Mónica González dixeron que hai departamentos, como deportes ou cultura, que teñen as súas partidas económicas en negativo, “gastouse máis do previsto”.
Ao rematar o pleno, o alcalde informoulle ao portavoz do PP que se lle remitiran dous oficios. Un deles reclamándolle que pague ao Concello “752 euros correspondentes ao seguro médico dos meses de xullo, agosto, setembro e outubro” que foron aboados polas arcas municipais.
No outro oficio, o goberno local pídelle a García Cardeso que informe onde están sete teléfonos móbiles, valorados en máis de seis mil euros, dos doce comprados con fondos municipais, “que non sabemos a quen están asignados. Os teléfonos chegaron ao concello ao seu nome”, lle dixo José Antonio Pereira.
Andrés García Cardeso respondeu que non recibira ningunha notificación. “Todos os teléfonos foron solicitados para a brigada de obras e a outros departamentos municipais, e distribuídos dende o departamento de Cultura. Eu non pedín nada”, concluíu o exalcalde.
- Detalles
- Escrito por Alicentis
- Categoría: Desenvolvemento local
- Visitas: 746
-
As persoas usuarias recibirán en tempo real e por orde cronolóxica todas as mensaxes municipais //
-
O servizo é completamente gratuíto e anónimo; nin administradores nin o resto de usuarios poderán ver os datos dos seguidores //
-
“Apostamos polas posibilidades das novas tecnoloxías para achegarlle a actualidade municipal ao maior número de persoas”, subliña o concelleiro Álvaro Silva //
O Concello da Baña reforza a comunicación coa veciñanza incorporando á súa oferta informativa unha canle de whatsapp na que se compartirán comunicacións de interese como novas, datas e prazos de trámites municipais, a axenda cultural ou mesmo avisos.
Esta información, que o Concello xa vén proporcionando a través da web municipal e os perfís oficiais de Facebook e Instagram, poderá chegar así ao maior número de persoas e, pensando nos maiores, o obxectivo do Concello é achegarlla sobre todo a aquelas con máis dificultades para manexarse no mundo virtual. Outra gran vantaxe da canle de wathsapp é que as persoas usuarias reciban todas as comunicacións e, ademais, por orde cronolóxica.
Para facer uso deste novo servizo, o único que teñen que facer as persoas interesadas é entrar na canle de whatsapp do Concello da Baña premendo nesta ligazón. Unha vez dentro, terán que darlle a ‘Seguir’ na parte superior da pantalla do móbil e é importante tamén que activen as notificacións (na campaíña) para que whatsapp mande avisos cada vez que o Concello da Baña faga unha nova publicación e poder así estar informados en tempo real de todo o que aconteza.
“Esta canle de whatsapp supón dar un paso máis de cara a potenciar a comunicación entre o Concello e a veciñanza apostando polas posibilidades que nos ofrecen as novas tecnoloxías”, subliña Álvaro Silva, concelleiro de Contas, comunicación e novas tecnoloxías, quen incide tamén en que o novo servizo “permitirános achegarlle a actividade municipal ao maior número de persoas dun xeito máis áxil e eficaz”.
Silva explica que o novo servizo da popular aplicación de mensaxería instantánea salvagarda o anonimato das persoas usuarias. As mensaxes están cifradas e os datos e o número de teléfono das persoas que se subscriban non son visibles nin para os demais usuarios nin para os administradores.
Así mesmo, as persoas usuarias non poderán escribir nin facer comentarios, aínda que si poden reaccionar e compartir as publicacións, e poden darse de baixa no servizo en calquera momento.
- Detalles
- Escrito por Alicentis
- Categoría: Desenvolvemento local
- Visitas: 859
-
A temporada de verán prolongarase ata o venres 15 de setembro //
-
A entrada diaria custará 2 euros e os abonos mensuais serán de 25 euros para unha persoa e de 45 euros para familias //
A veciñanza da Baña poderá gozar este verán da piscina municipal de Agra de Chans dende o vindeiro luns, 26 de xuño, ata o venres 15 de setembro en horario de mañá e tarde. Nestes primeiros días, ata o sábado 1 de xullo, o acceso será gratuíto.
Ata o 31 de agosto, e de luns a venres, a piscina abrirá de 10.00 a 14.00 horas polas mañás e de 15.00 a 21.00 horas polas tardes. Nas fins de semana, retrasarase a apertura ata ás 12.00 horas e, a partir de setembro, pechará ás 20.30 horas.
A entrada será gratuíta para os menores de 14 anos, mentes que o público en xeral pagará dous euros por acceder ao recinto. Tamén haberá abonos mensuais, que custarán 25 euros de xeito individual e 45 euros para familias. Para dúas semanas, o prezo por persoa será de 15 euros.
As persoas interesadas en retirar os abonos ou ter máis información, pódense dirixir ao departamento de Deportes nas oficinas da Casa Consistorial ou chamar ao 981 886 501.