- Detalles
- Escrito por Alicentis
- Categoría: novas
- Visitas: 6238
-
O gran desfile celebrarase o sábado 21 de febreiro polas rúas Castelao e Tedelle
-
A gran novidade é a creación dun premio específico para recoñecer a participación local dotado de 150 euros
-
O prazo de inscrición ampliouse ata o martes 17 de febreiro a través da sede electrónica e o Rexistro Xeral
O Concello da Baña, a través da Concellería de Acción social, cultura e servizos á cidadanía, organiza o sábado 21 de febreiro o Concurso de Disfraces do Entroido, unha cita que volverá encher as rúas Castelao e Tedelle de cor, música e creatividade a partir das 16.30 horas e que chega este ano cunha importante novidade: a creación, por primeira vez, dun premio específico para recoñecer a participación local..
O Entroido da Baña reforza así a súa aposta por implicar á veciñanza e poñer en valor o tecido social do municipio, cunha dotación económica que supera os 3.000 euros en premios, repartidos entre as seis categorías do concurso. Entre elas destaca o novo premio de participación local, dotado con 150 euros, destinado a aquelas comparsas ou grupos nos que, cando menos, o 75 % das persoas integrantes sexan veciñas ou veciños da Baña, non sendo acumulable con outros galardóns.
Na modalidade de carrozas, cun mínimo de sete integrantes, estableceranse tres premios: 900 euros para o primeiro posto, 400 euros para o segundo e 150 euros para o terceiro, unha contía que se reproduce tamén na categoría de comparsas.
Na categoría de grupos, formados por entre dúas e seis persoas, concederanse dous premios: 150 euros para o primeiro clasificado e 100 euros para o segundo. Pola súa banda, as modalidades de disfrace individual adulto e disfrace individual infantil contarán cun premio único de 100 euros en cada caso.
As persoas e grupos interesados en participar deberán formalizar a súa inscrición como data máxima o venres 13 de febreiro (prazo ampliado ata o martes 17 de febreiro). O trámite pode realizarse telemáticamente na sede electrónica municipal ou presencialmente no Rexistro Xeral do Concello. No caso de participantes menores de idade, será imprescindible achegar a correspondente autorización asinada por titor/a legal.
Criterios de valoración
O xurado, composto por persoas alleas á organización para garantir a total imparcialidade, puntuará de 1 a 5 aspectos como o vestiario e a maquillaxe -valorando especialmente o traballo artesanal e o uso de materiais de refugallo-, a orixinalidade, a posta en escena e a capacidade para involucrar ao público. Cada formación disporá dun máximo de 3 minutos de actuación diante do xurado.
Plan de continxencia por choiva
En caso de que a meteoroloxía impida o desfile exterior, a festa trasladarase ao pavillón municipal de San Vicenzo. Nese suposto, a categoría de carrozas quedaría deserta por motivos loxísticos e de seguridade, e as comparsas adaptarían a súa actuación a un máximo de 20 membros en pista.
O Concello da Baña fai un chamamento a todos os colectivos, asociacións e particulares para que saian á rúa e fagan súa esta festa. O obxectivo é unir o talento de pequenos e maiores nunha xornada de convivencia que busca gañar o seu oco propio no calendario festivo da comarca a través da ilusión e a creatividade.
As bases completas do concurso, así como o formulario de inscrición e a autorización para menores, están dispoñibles nos ficheiros adxuntos.
 Entroido 2026: autorización menores.pdf | [ ] | 213 kB |
| Entroido 2026: bases.pdf | [ ] | 194 kB |
| Entroido 2026: ficha de inscrición no Concurso de Disfraces.pdf | [ ] | 141 kB |
- Detalles
- Escrito por Alicentis
- Categoría: novas
- Visitas: 4697
-
A concelleira Mónica González debullou na praza de Abastos de Santiago os detalles dunha edición que aposta pola inclusión social e a artesanía
-
O domingo 8 de febreiro, A Baña converterase no epicentro gastronómico con degustacións, obradoiros e as actuacións de De Ninghures e a Escola de Música Tradicional
O Concello da Baña presentou este xoves en Santiago de Compostela a XXII Festa da Filloa da Pedra, nun acto celebrado na Aula Gastronómica da Praza de Abastos que combinou divulgación, tradición e experiencia en directo. A concelleira de Acción social, cultural e servizos á cidadanía, Mónica González, foi a encargada de debullar os detalles dunha nova edición que reforza a identidade da festa “como referente gastronómico e cultural de Galicia” e que contará coa actuación do recoñecido grupo De Ninghures como un dos grandes atractivos da xornada.
A presentación converteuse nunha auténtica experiencia sensorial grazas ao showcooking en directo a cargo das mestras filloeiras Elena López e Nieves Martínez, que elaboraron filloas da pedra ante o público asistente, amosando unha técnica que forma parte do patrimonio inmaterial da Baña.
Durante o acto deuse tamén a coñecer o merchandising oficial da festa, “un proxecto cun marcado carácter social deseñado, ao igual que o cartel desta edición, dende a Fundación para a Protección dos Discapacitados Psíquicos da Comarca de Barcala, reforzando así o compromiso do Concello coa inclusión e coa economía social”, afirmou Mónica González. A directora da entidade, Rosa Tuñas, e Jennifer Riveira, autora do deseño, explicaron esta mañá que as persoas usuarias da fundación participaron na elaboración de todos os produtos, que se poderán adquirir tanto no posto que se habilitará o día da festa como a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.
O alcalde da Baña, José Antonio Pereira, asistiu á presentación acompañado polo concelleira de Obras Jesús Pena; membros do grupo popular bañense; Hadrián García, integrante do grupo De Ninghures; e o director da Escola de Música Tradicional da Baña, Emilio Lois.
Unha xornada chea de citas
Na presentación detallouse o amplo programa previsto para o domingo 8 de febreiro, unha xornada na que A Baña será o epicentro gastronómico e festivo da comarca. A festa comezará ás 09.30 horas coa apertura de portas e o inicio das degustacións. O prezo da filloa será de 1,5 euros, mentres que as racións de orella e chourizo terán un custo de 6 euros.
A programación combina propostas gastronómicas, deportivas e culturais, como a celebración da segunda Ruta Ciclista da Filloa (con saída ás 10.00 horas), ou os obradoiros gratuítos de treboada (11.00 h) e de cestería tradicional (12.15 h), pensados para poñer en valor os saberes tradicionais.
“O itinerario deste ano é moi completo. A nosa idea é que as persoas que se acheguen á Baña non veñan só a comer a filloa, que iso está moi ben e é un dos obxectivos, senón que poidan desfrutar doutros aspectos culturais. Todo o programa está moi enfocado á recuperación de oficios tradicionais e de elementos propios da nosa contorna”, destacou a concelleira.
Neste senso, explicou que o obradoiro de cestería, impartido por Luis do Río, está a espertar un notable interese: “Na nosa zona era moi habitual a elaboración de cestos con vimbio, e hoxe en día custa atopar persoas que manteñan viva esta tradición. Agardamos que esta actividade sirva tamén para que a xente máis nova se anime a recuperar este tipo de artesanía”.
Destaca tamén o obradoiro de treboada, “unha tradición do Baixo Miño nacida do grupo musical do mesmo nome, que emprega tambores de distintos tipos acompañados da gaita. Nós achegaremos os instrumentos e a todas as persoas que queiran participar ensinaráselles como tocar e como realizar un pequeno pasarrúas”. A actividade desenvolverase na carpa habilitada no colexio.
A música tradicional terá un papel destacado coa actuación da Escola de Música Tradicional da Baña e As Atrevidas de Monte ás 12.00 horas, mentres que o momento institucional chegará co pregón do escritor bañense Manuel Iglesias Turnes, previsto para as 13.30 horas.
Fin de festa con De Ninghures
Xa pola tarde, a festa continuará cun animado tardeo musical a partir das 14.00 horas a cargo do Trío Alborada, Bouba e A Requinta de Lampai, para culminar, ás 19.00 horas, co concerto de De Ninghures, un dos pratos fortes desta edición. A banda destaca por fusionar a música tradicional galega con sons actuais e unha proposta escénica moi traballada, o que a converte nun dos proxectos máis atractivos do panorama musical galego que conquista públicos de todas as idades.
Coa XXII Festa da Filloa da Pedra, segundo indicou Mónica González, ““o Concello da Baña reafirma o seu compromiso coa defensa das tradicións, a promoción da gastronomía local e a dinamización cultural e social do municipio”, consolidando unha cita que cada ano reúne a centos de persoas arredor dun dos símbolos máis recoñecidos da identidade bañense.
- Detalles
- Escrito por Alicentis
- Categoría: novas
- Visitas: 255
-
O alcalde José Antonio Pereira xuntouse cos representantes da SD A Baña, da Asociación Cultural e Deportiva A Baña Veteranos, do Club A Baña Futsal e da Asociación Deportiva de Cazadores SanCan
- Detalles
- Escrito por Alicentis
- Categoría: novas
- Visitas: 2302
-
No plan complementario, o concello inclúe a mellora do viario de Nantón a O Barro, cun orzamento de 230.000 euros
-
Aprobado un expediente extraxudicial de crédito para pagar facturas por importe de 369.000 euros
-
A Corporación apoia a moción do BNG solicitando cubrir a praza de pediatra no centro de saúde
Os diferentes Plans de Obras e Servizos (POS+) da Deputación da Coruña foron os protagonistas do primeiro pleno ordinario deste ano no Concello da Baña. A Corporación debateu a solicitude do POS+ 2026; a incluída no adicional 1/2026 para gastos sociais extraordinarios, o adicional 3/2026 para a redución de débeda e a modificación do adicional 4/2025. En conxunto todas as propostas incluídas nos diferentes POS+ superan os 870.000 de euros, e todas elas aprobáronse por unanimidade dos concelleiros.
Polo que respecta ao Plan provincial de cooperación ás obras e servizos de competencia municipal POS+2026 da Deputación da Coruña, no que o Concello da Baña ten asignados 660.202,91 euros, o Pleno aprobou onte reservar 533.199,11 euros para gasto corrente e pagar a provedores, e outros 127.003,80 euros para a mellora dun viario na parroquia de Fiopáns.
O proxecto contempla a mellora da capa de rodaxe nun tramo de 1,8 quilómetros con 5 centímetros de aglomerado en quente, da estrada que vai de Vilar de Suso ata o límite do municipio. Tamén inclúe a limpeza de gabias e a realización dun cruce de pluviais cun tubo de oitenta centímetros de diámetro. O orzamento total é de 127.003,80 euros.
Neste mesmo apartado, e dentro do Plan complementario, o equipo de goberno incluíu o proxecto de mellora do viario de Nantón ata O Barro, que ten un orzamento de 230.491,53 euros. Este proxecto contempla a mellora da capa de rodaxe nun tramo de tres quilómetros con 5 centímetros de aglomerado en quente, previo bacheo con grava e tratamento asfáltico semiprofundo. Tamén contempla a limpeza de gabias, entre outras actuacións.
O Pleno tamén aprobou a distribución dos 77.670,93 euros do POS+ adicional 1/2026 para gastos sociais extraordinarios que lle corresponden ao Concello da Baña. Segundo explicou a tenente de alcalde, Mónica González, 22.670,93 euros resérvanse para reforzo ou ampliación do persoal técnico do departamento de Servizos Sociais para “contratar outra traballadora social para garantir a continuidade do servizo”, asegurou. Outros 5.000 euros destinaranse para axudas de emerxencia; 35.000 para reforzo do Servizo de Axuda no Fogar e de carácter básico, e 15.000 para poñer en marcha o “un programa de loita contra a soidade non desexada no concello da Baña”, dixo Mónica González.
Os tres grupos políticos coincidiron en que se precisa un acordo para que “Xunta e Goberno central financien o sistema de dependencia e non nos carguen aos concellos cunhas competencias impropias, sen facilitarnos financiamento”, como resumiu o alcalde, José Antonio Pereira.
Do mesmo xeito, acordouse destinar os 116.506,40 euros no POS+ adicional 3/2026 para reducir a débeda do Concello coa Deputación da Coruña, pola utilización de préstamo provincial dos plans 2015 a 2023. Por outra banda, A Baña solicítalle á Deputación que os 19.912,99 euros do POS+ adicional 4/2025 se sumen ao Plan adicional POS 2026.
Por outra banda, o alcalde defendeu a necesidade de aprobar un recoñecemento extraxudicial de crédito por un importe total de 369.004,01 euros “para poder pagar facturas a provedores dos últimos meses”. A proposta aprobouse cos 6 votos a favor do grupo de goberno (5 do PSdeG-PSOE e 1 do BNG) e a abstención do PP (5).
Tamén por unanimidade acordouse que o Concello da Baña se sume ao convenio de colaboración subscrito entre a Xunta e o Seaga en materia de prevención e defensa contra incendios forestais, para a consolidación do sistema público de xestión de biomasa nas faixas secundarias. Neste apartado, os portavoces dos tres grupos coincidiron en destacar que a responsabilidade de manter limpos os montes, sobre todo nas zonas próximas ás casas, é dos propietarios das leiras.
O Pleno tamén aprobou por unanimidade modificar a política de seguridade do Concello da Baña para adaptarse aos requisito establecidos pola Deputación da Coruña e polo Plan nacional de seguridade.
Pediatra no centro de saúde
A moción presentada polo BNG para instar á Consellería de Sanidade a que sempre manteña cuberta a praza de pediatra no centro de saúde da Baña aprobouse por unanimidade. Mónica González explicou que dende mediados de novembro ata o 12 de xaneiro o centro de saúde non contou cun pediatra, “o que provoca graves trastornos para as familias e unha mala atención para as crianzas”.
Ademais de cubrir de xeito inmediato todas as ausencias da pediatra no centro de saúde bañense e reclamar as medidas adoptadas para a solución definitiva da situación, o BNG tamén lle pide ao concello que faga un seguimento activo desta problemática.
José Antonio Pereira cualificou este problema de “crónico” e lembrou as iniciativas que xa se levaron a cabo dende o propio Concello e desde o grupo socialista en diferentes estancia, “de momentos tivemos boas palabras, pero non houbo solución” para que a praza de pediatría do centro de saúde da Baña estea sempre cuberta. O alcalde criticou que, ao contrario do que di, a Xunta non apoia o rural “ao non apostar por ofrecer os servizos que se precisan, como é o de pediatría”.
Dende o PP, Andrés García Cardeso tamén apoiou a moción, se ben trasladou que “dende a administración sinalan que non hai profesionais para cubrir as baixas”.
A Corporación tamén apoiou a iniciativa do PP en defensa do sector primario polo acordo acadado pola Unión Europea con Mercosur. Entre outros puntos, a moción solicítanlle ao goberno central que defenda as cláusulas de salvagarda para esixir que todos os produtos agroalimentarios procedentes de terceiros países cumpran cos mesmos controis e estándares de calidade que os esixidos na Unión Europea.
Jesús Pena indicou que o PSdeG vai apoiar a moción, como concello gandeiro e rural como o da Baña. A moción aprobouse cos votos de PP (5) e PSdeG (5) e a abstención do BNG.
- Detalles
- Escrito por Alicentis
- Categoría: novas
- Visitas: 4362
-
A celebración comeza ás 12.00 horas coa actuación da Escola de Música Tradicional da Baña
-
Os obradoiros creativos e de coroas naturais, así como os xogos populares animarán a participación veciñal
-
A visita de Papá Noel e do Apalpador será un dos momentos máis esperados
-
Haberá postos de artesanía, doces típicos e poderán degustarse as populares filloas de pedra
O pavillón municipal da Baña será o vindeiro domingo 14 de decembro o punto de encontro das festas do municipio coa celebración do Mercado de Nadal 2025, unha cita organizada dende a Concellería de Acción Social, Cultural e Servizos á Cidadanía que regresa cun programa variado e pensado para todas as idades.
A xornada comezará ás 12.00 horas coa apertura oficial e a actuación da Escola de Música Tradicional da Baña, que dará paso, ás 12.30 horas, ao primeiro obradoiro creativo: Miña casiña, meu lar, con sesións de mañá e tarde para todos os interesados. Xa pola tarde, ás 15.30 horas, será a quenda do grupo As Atrevidas de Monte, que encherán o pavillón de música e diversión, mantendo o espírito festivo e familiar durante toda a xornada.
Ás 16.00 horas, o público poderá participar no obradoiro de coroas naturais, organizado por AFA Avania e dirixido a persoas adultas e a cativada a partir de 6 anos, para o que é necesaria inscrición previa no teléfono 697 342 138.
Ás 17.00 horas, a compañía A Xanela do Maxín presentará o espectáculo familiar Agasallos do Apalpador: palabras e xoguetes un espectáculo familiar no que o Apalpador baixa das montañas do Courel para recuperar palabras en galego esquecidas. As nenas e nenos participarán redescubrindo nomes de xoguetes e expresións antigas, e despois poderán xogar e dar vida a esas palabras nunha instalación con xogos e xoguetes tradicionais.
Tras a representación, chegará un dos momentos máis esperados: a chegada conxunta de Papá Noel e o Apalpador, prevista para as 18.15 horas, seguida de xogos populares abertos a todas as idades ás 18.30 horas. Ás 19.30 horas, darase a coñecer o fallo do concurso de Postais de Nadal en galego, no que participou a mocidade do concello co obxectivo de facer visible o noso idioma nestas datas. Todas as postais estarán expostas na feira, completando así unha xornada cultural e lúdica para todos.
O Mercado pechará ás 20.00 horas, despois dunha intensa xornada na que veciñas e veciños poderán tamén gozar dos tradicionais postos de artesanía, doces típicos e das populares filloas de pedra.
A Concello da Baña convida á veciñanza a achegarse ao pavillón para compartir unha xornada festiva, apoiar o comercio local e vivir o espírito do Nadal en comunidade.