- Detalles
- Escrito por Alicentis
- Categoría: novas
- Visto: 1078
-
O alcalde remarca que o informe da Xunta non é unha aprobación, porque está condicionado a que se cumpran os requisitos que figuran no documento publicado no DOG

Os técnicos municipais do Concello da Baña está na analizar en profundidade o informe de 30 páxinas coa declaración de impacto ambiental (DIA) formulada pola Dirección Xeral de Calidade Ambiental, Sostibilidade e Cambio Climático da Consellería de Medio Ambiente, Territorio e Vivenda, e que saíu onte publicado no Diario Oficial de Galicia (DOG). O informe íntegro pode descargarse dende a páxina da Consellería (neste enlace) ou dende o arquivo adxunto.
O alcalde, Andrés García Cardeso, remarca que o informe da Xunta non representa unha aprobación formal do mesmo, senón que a súa aprobación está supeditada a que se cumpran os condicionados que figuran ao longo do documento.
Na declaración publicada no DOG, a Dirección Xeral resolve “Formular a declaración de impacto ambiental do parque eólico Troitomil, considerando que o proxecto é ambientalmente viable sempre que se cumpra, ademais do recollido no estudo de impacto ambiental e a restante documentación avaliada, o condicionado que figura ao longo deste documento, tendo en conta que no caso de que exista contradición entre eles, prevalecerá o disposto” nesta declaración de impacto ambientel.
Na mesma resolución, a xunta establece que “ademais do obrigado cumprimento das condicións sinaladas” no documento, “se se manifesta calquera tipo de impacto non considerado ata o momento, este órgano ambiental poderá ditar, do xeito que proceda, os condicionados adicionais que resulten oportunos”.
Andrés García Cardeso pediulle aos técnicos municipais que analicen en profundidade esta declaración de impacto ambiental para poder presentar as reclamacións que sexan necesarias cando sexa o momento oportuno.
- Detalles
- Escrito por Alicentis
- Categoría: novas
- Visto: 1081
-
O Concello traballa nos modelos de alegacións que porá a disposición das persoas afectadas nos vindeiros días //
O Diario Oficial de Galicia (DOG) publicou na súa edición de onte, mércores 16 de novembro, o anuncio do acordo da Xefatura Territorial da Coruña polo que se somete a información pública a solicitude de utilidade pública, coa conseguinte necesidade de urxente ocupación do proxecto do parque eólico de Vilartoxo, que afecta aos concellos da Baña e Val do Dubra, así como a listaxe de persoas propietarias de bens afectados.
As persoas interesadas poderán presentar as súas alegacións no prazo dun mes, a contar dende hoxe, mércores 17 de novembro, e ata o 30 de decembro.
Dende o Concello da Baña, o alcalde Andrés García Cardeso, subliña que os técnicos municipais e a Asesoría xurídica están xa traballando nos modelos de alegacións, que se porán a disposición das persoas interesadas nos vindeiros días.
No portal de transparencia da Xunta de Galicia neste enlace pódese consultar o estado actual do proxecto, en fase de suxestión, así como o plano xeral e os planos individuais dos predios afectados polo proxecto.
- Detalles
- Escrito por Alicentis
- Categoría: novas
- Visto: 1106
-
O fotógrafo local amosou algunhas das fotos que fixo por Galicia durante a marea negra provocada polo petroleiro afundido en 2002
-
Actualmente afincado en Italia, o artista agarda “que non se volva repetir unha traxedia similar”

O fotógrafo bañense quixo facer hoxe “algo de memoria” e lembrar a traxedia que provocou a marea negra provocada polo afundimento do petroleiro Prestige en novembro de 2002. Na casa da cultura da Baña o artista, actualmente residente en Italia, amosou algunhas das fotografías que fixo durante a catástrofe para “lembrar o acontecido e que non volva ocorrer unha traxedia similar”, dixo.

Naquel duro inverno de 2022, Javier Iglesias Ramos guiouse pola radio para “ir percorrendo a costa galega segundo as noticias que escoitaba” para facer fotos, todas en branco e negro. Nas imaxes, que esta mañá amosou na casa de cultura, aparece reflectida toda a traxedia dende moi diferentes ángulos: o traballos dos mariñeiros, a chegada dos voluntarios, as aves cheas de fuel, o chapapote na costa galega, as manifestacións e a tristura de tanta xente.
Ao final da súa exposición, amosou un vídeo que recolle algunhas destas imaxes titulado ‘Black Tide Oil Slick’ (‘Marea negra, marea negra’) que se pode ver neste enlace (preme aquí).
Antes e despois da charla de Javier Iglesias, os Gaiteiros da Baña interpretaron dúas pezas que Emilio Lois recuperou de veciños hai anos. “A muiñeira ‘A ventosela’ escoitella a principios de século a Francisco Caamaño, de Marcelle”, recordaba Emilio Lois. Tras o acto, tocaron ‘Viva Ribeira’, que lle ensinou Eduardo de Evaristo, de Corneira.

- Detalles
- Escrito por Alicentis
- Categoría: novas
- Visto: 1021
-
A Consellería de Educación vai cambiar cuberta e ventás e mellorar as fachadas de todo o edificio //
-
Solicitoulle ao Concello a licenza para unhas obras que se prevé duren cinco meses e que poderían comezar en primavera //
-
Responde a solicitude do alcalde e da comunidade educativa //

A vicesecretaria xeral da Consellería de Educación remitiulle onte ao alcalde da Baña unha carta solicitándolle ao Concello que conceda a licencia de obras para acometer a rehabilitación integral do CPI San Vicente. Xunto coa petición, a Xunta remite tamén o proxecto básico e de execución dunhas obras que ascenden a 1.161.179,44 euros e que permitirán cambiar a cuberta e ventás e mellorar a impermeabilización do centro para conseguir unha mellor eficiencia enerxética.
A previsión do alcalde e que a reforma poida comezar na vindeira primavera, unha vez conclúa a período de licitación. As obras teñen un prazo de execución de cinco meses, polo que poderían estar rematadas cando comece o vindeiro curso escolar.
As obras fóranlle solicitadas ao xefe territorial de Educación, Indalecio Cabana, nunha reunión que mantivera no seu despacho co alcalde, Andrés García Cardeso, e o tenente de alcalde, César Ramos, o pasado 3 de xaneiro. Dez días despois, o propio Cabana fixera unha visita ao colexio para ver o estado do centro, durante a cal a directora do centro, Mar Sueiro, xunto co alcalde e a concelleira de Cultura, Lorena Trillo, lle amosaron a necesidade de acometer esta reforma integral.
Durante o verán, técnicos da Consellería estiveron tomando medicións no centro para elaborar o plan de actuación. Agora, a Xunta remítelle ao concello o proxecto das obras que a Consellería sacará a licitación de forma inminente, e que inclúen as melloras nas cubertas e impermeabilizacións, fachadas, carpintería exterior, acabados interiores e instalacións co obxectivo de incrementar o illamento e mellorar a eficiencia enerxética do edificio e o confort do alumnado. Con esta actuación o edificio adaptarase ás novas esixencias construtivas establecidas no Plan de nova arquitectura pedagóxica de Galicia.
- Detalles
- Escrito por Alicentis
- Categoría: novas
- Visto: 1058
-
O certame ABaña Tapas celebrarase ao longo destas tres primeiras fines de semana de novembro //
-
O público terá a súa disposición nos establecementos as tarxetas para votar e o Pasaporte de tapas //
-
O Concello establece dous premios de 450 € e 250 €, respectivamente, para as dúas mellores propostas culinarias //
Hoxe arrinca na Baña o primeiro concurso de tapas ABaña Tapas e a ruta gastronómica organizado polo Concello ao obxecto de promocionar a hostalaría local, incentivar a gastronomía do municipio e o fomento dos produtos autóctonos de tempada e de proximidade. En total son cinco os establecementos hostaleiros que participan na proposta gastronómica que se desenvolverá ao longo destas tres primeiras fins de semana de novembro (4-5-6; 11-12-13 e 18-19 e 20 de novembro).
Os locais participantes son Taberna do Barro (O Barro), no que se poderán degustar as súas tapas de 12.30 a 15.00 horas e de 19.30 a 22.00 horas; e Casa Morena, en horario de 20.00 a 22.00 horas. Estes dous locais participan as tres fins de semana. Parrillada O Barro (Barro) participará só os domingos días 13 e 20 de novembro, en horario de 12.00 a 14.00 horas. O Arranca de Ordoeste o fará só os venres e os sábados, de 12.00 a 16.00 horas. E, finalmente, O Muiño (San Vicenzo) participará no concurso de tapas só a última fin de semana, a do 18 ao 20 de novembro e en horario de 12.00 a 15.00 horas e de 19.00 a 22.00 horas.
O Concello establece dous premios, un primeiro de 450 € e un segundo de 250 € para as dúas mellores tapas. As tapas gañadoras sairán do voto ponderado do tribunal profesional e do público (usuarios dos locais de hostalaría).
Cada local poderá presentar ao certame gastronómico un máximo de dúas tapas, podendo aumentar a tres no caso de ofrecer unha tapa sen glute, vexetariana ou vegana.
En cada establecemento, cada persoa só poderá votar as tapas consumidas nel e, en ningún caso, tapas doutro local. Será un único voto por tapa consumida.
O público terá a súa disposición nos locais hostaleiros participantes as tarxetas para votar e tamén se lle facilitará o Pasaporte de tapas. Todas aquelas persoas que completen o pasaporte poderán participar no sorteo dunha noite de aloxamento para dúas persoas na casa rural A Carballeira do Tambre (Troitosende) e no sorte doutra noite para dúas persoas na casa rural O Folgo, de Ordoeste.


