- Detalles
- Escrito por Alicentis
- Categoría: novas
- Visto: 743
-
Lectura do manifesto en contra do peche da oficina de Abanca na localidade
-
A declaración conta co apoio dos tres grupos con representación no consistorio
-
É a primeira dunha serie de accións conxuntas para evitar unha decisión lesiva para a veciñanza e para os sectores económicos bañenses
A corporación municipal da Baña deu lectura esta mañá ao manifesto en contra do peche da oficina de Abanca na localidade. O texto de rexeitamento, apoiado por todas as forzas políticas con presenza no Concello, é a primeira das accións que se levarán a cabo de xeito conxunto para evitar unha decisión que prexudicaría á veciñanza e á economía bañense. Vídeo do pleno neste enlace.
O pleno municipal reuniuse de xeito extraordinario ás 9 da mañá. Na sesión deuse lectura á declaración, na que os grupos da corporación expresan o seu "rexeitamento ao peche da sucursal de Abanca en San Vicenzo da Baña, confirmado pola entidade para o próximo mes de setembro".
O texto destaca que este peche deixa á veciñanza "sen ningún punto de atención para as súas xestións bancarias, ao non haber neste momento ningún outro banco que opere diariamente no territorio municipal". A marcha de Abanca da Baña suporá, afirman os grupos municipais, un duro golpe especialmente para as persoas maiores e con menos destrezas dixitais. Ademais, ao obrigar a desprazarse a quen desexe facer xestións presenciais, sairá tamén prexudicada a economía local, nomeadamente os sectores do comercio, a hostalería e os servizos.
O manifesto recórdalle a Abanca a responsabilidade social que herda das caixas de aforros galegas, das que é sucesora, e do feito de que estas fosen rescatadas con diñeiro público antes de seren privatizadas. O peche, apunta a declaración, "camiña xusto no sentido contrario ás políticas de recuperación do rural e de igualdade de oportunidades para as localidades máis pequenas que a sociedade reclama. Un rural sen servizos coma o bancario é un rural menos atractivo, máis empobrecido e cun futuro de moito peor prognóstico".
Son varias as accións conxuntas que se están levando a cabo na Baña para evitar o peche. Os comercios do municipio dispoñen xa de follas para que a veciñanza asine contra esta decisión, algo que tamén se pode facer na Casa Consistorial en horario de atención ao público (8 a 14h.) Ademais, representantes do Concello solicitaron unha reunión coa dirección da empresa, que previsiblemente se levará a cabo a comezos da semana que vén.
O Concello está en contacto con outros municipios con situacións parecidas, como Zas e Vimianzo, e coa Federación Galega de Municipios e Provincias, para recadar apoios.
O manifesto foi consensuado polos tres grupos municipais con representación na Baña. O alcalde, José Antonio Pereira, afirma que o peche "chega nun momento de certa recuperación do tecido empresarial e da hostalería, polo que vai xusto en contra destas iniciativas. A Baña necesita que Abanca siga funcionando e Abanca necesita tamén dos veciños e veciñas da Baña". Pola súa banda, o portavoz municipal do PP, Andrés García, cualificou o anuncio do peche da sucursal de Abanca de "ataque ao rural e á veciñanza". César Ramos, portavoz de Compromiso por Galicia, rexeitou a decisión de Abanca e avogou “por un traballo conxunto de reivindicación dos nosos dereitos e de respecto polos servizos do rural, deixando de lado diferenzas políticas".
O manifesto foi consensuado polas tres forzas políticas e máis o BNG, sen representación na Corporación. Os grupos políticos actuarán unidos e en conxunción coas iniciativas da cidadanía para conseguir reverter unha decisión que consideran moi lesiva para os intereses do municipio.
O vídeo íntegro do pleno pode verse neste enlace (preme aquí).
 Declaración en contra do peche da oficina de Abanca na Baña | [ ] | 123 kB |
- Detalles
- Escrito por Alicentis
- Categoría: novas
- Visto: 931
A corporación municipal da Baña reunirase este xoves nun pleno extraordinario para expresar en conxunto o seu rexeitamento ao peche da sucursal da Abanca na localidade, a única oficina dunha entidade financeira que funciona na actualidade no concello. Os portavoces das tres forzas políticas con representación no consistorio (PP, PSOE e CB) e máis o do BNG reuníronse esta mañá para alcanzar unha postura conxunta fronte a un peche que condena á poboación bañense a se desprazar para facer as xestións bancarias e que afectará de forma moi grave ao tecido económico local.
Na reunión estiveron presentes o alcalde, José Antonio Pereira; os portavoces do PP, Andrés García Cardeso; de Compromiso A Baña, César Ramos, e do BNG, Xosé Manuel Magariños; e a concelleira de Política Social, Emprego, Educación, Cultura e Deportes, Mónica González. Na xuntanza acordouse a celebración do pleno extraordinario do xoves e a redacción dun manifesto co que se quere poñer de relevo o prexuízo que supón para A Baña este peche, que xa é oficial para o mes de setembro pero aínda non foi comunicado de xeito formal ao Concello.
Na actualidade, a única oficina bancaria do municipio é a que agora Abanca decidiu abandonar, situada nun local propiedade do mesmo banco e que, polo tanto, non lle xera á empresa gastos de alugueiro. Quedar sen ningún punto no que facer xestións financeiras obrigará aos veciños a se desprazaren a outros concellos, o que afectará gravemente a sectores coma os do comercio, a hostalería ou os servizos. Ademais, e considerando que A Baña conta cunha poboación envellecida que se manexa con pouca destreza coas aplicacións de banca electrónica, deixará nunha situación moi difícil a unha parte importante da veciñanza.
Desde o Concello quérese destacar que aínda que esta sexa a decisión dunha empresa privada, hai que ter en conta que Abanca recolle o testemuño de entidades públicas como foron as caixas de aforros, polo que debería seguir mantendo dalgún xeito o aspecto de servizo á sociedade co que aquelas entidades operaban. Deixar sen oficina a municipios como A Baña acentúa as dificultades que xa padecen os territorios do rural e traballa xusto na dirección contraria ás necesarias políticas que queren devolver a estas zonas a competitividade e dotar aos seus habitantes de mellores servizos e igualdade de oportunidades.
O Concello está a xestionar a celebración dunha reunión coa dirección da entidade para evitar este peche, previsto para setembro.
- Detalles
- Escrito por Alicentis
- Categoría: novas
- Visto: 754
-
Aprobada a declaración institucional proposta polo PP solicitando o cese da violencia en Cuba e unha transición pacífica á democracia
-
O apoio ao Xacobeo 21-22 contou cos votos a favor do PP e a abstención de PSdeG e CxG
-
Por unanimidade o Concello solicitaralle ao Goberno central que anule a débeda que contraerán as entidades locais co Estado polo ingreso a conta do IVE de 2020
O Pleno do Concello da Baña aprobou onte por unanimidade unha declaración institucional presentada polo PP na que se esixe ao goberno de Cuba o cese da violencia inxustificada contra os cidadáns e unha transición pacífica á democracia. Na sesión ordinaria de xullo os tres grupos acordaron solicitarlle ao Goberno central que poña en marcha mecanismos para anular a débeda que os concellos van contraer este ano co Estado de xeito automático pola liquidación negativa da participación nos ingresos do Estado correspondentes ao ano 2020 (vídeo do pleno neste enlace).
O portavoz do PP xustificou a declaración institucional pedindo o cese da violencia en Cuba e unha transición cara a un réxime democrático no feito de que hai moitos emigrantes da Baña na illa caribeña, e que se manteñen relacións coa Asociación Unión Barcalesa na Habana. Os tres grupos apoiaron a iniciativa a prol dos dereitos humanos e en contra do bloqueo, solicitando a fin da violencia inxustificada do réxime cubano contra a cidadanía.
Tamén por unanimidade se aprobou solicitar ao Goberno central que anule a débeda que os concellos van ter de xeito automático este ano por un erro de cálculo do propio Goberno en referencia á Participación nos Ingresos do Estado (PIE) das entidades locais correspondentes ao ano 2020 e que, segundo cálculos da Federación Española de Municipios e Provincias pode ascender a 3.000 millóns de euros.
A proposta reclamando apoio ao Xacobeo 21-22 foi aprobada só cos votos a favor do PP. Tanto dende o goberno do PSdeG como dende Compromiso por Galicia mostráronse de acordo co espírito da proposta, pero consideran que na redacción da moción hai asuntos cuestionables, polo que decidiron absterse.
No capítulo de rogos e preguntas, Andrés García Cardeso propuxo que se solicite a Sogama que faga na Baña labores de concienciación na reciclaxe, e preguntou como estaba a execución do proxecto do IDAE para o cambio de luminarias led. O alcalde respondeulle que o cambio de luminarias está case rematado, e que se espera xustificar a subvención de case medio millón de euros a principios de agosto.
Pola súa parte, dende Compromiso por Galicia César Ramos volveu reclamar que se cambie a xestión do programa Madrugadores, por consideralo moi caro. O alcalde replicoulle que o goberno considera esta programa importante para favorecer que as familias sigan matriculando as súas crianzas no CPI da Baña. “Temos que mimar ao colexio, para que non baixe a matrícula. Este programa é deficitario, como a recollida de lixo ou a piscina, e non por iso se suprimen”, dixo José Antonio Pereira.
Ramos tamén preguntou polo proceso para elaborar a RPT (relación de postos de traballo) e por que o sindicato CSIF abandonou as negociacións, entre outras cuestións.
- Detalles
- Escrito por Alicentis
- Categoría: novas
- Visto: 329
O Concello da Baña está a executar o Plan de mellora de camiños municipais de acceso a parcelas agrícolas 2021-2022 nos lugares de Nantón, Trece-O Campelo e Vilar da Torre.
A actuación conta cun investimento total de 63.122,01 euros e enmárcase no programa "Feader: Europa inviste no rural" Plan marco de mellora de camiños municipais de acceso a parcelas agrícolas 2021-2022. O importe da axuda é de 56.466 euros.
- Detalles
- Escrito por Alicentis
- Categoría: novas
- Visto: 816
-
Aprobada unha partida de 30.000 euros para axudas a autónomos e empresas pola crise da covid-19 cos votos a favor de PSdeG e PP e a abstención de CxG
-
Por unanimidade solicitaráselle ao Goberno central a rebaixa do recibo da luz reducindo impostos
-
PSdeG e CxG rexeitaron a moción do PP contra os indultos aos líderes independentistas catalán e pedindo a dimisión do presidente do Goberno
-
Leuse o manifesto de apoio a liberdade sexual de todas as persoas para conmemorar o Día da Liberdade Sexual
O Pleno da Baña aprobou na sesión ordinaria de onte crear unha partida de 30.000 euros para axudar ás persoas autónomas e empresas do municipio a paliar as consecuencias da covid-19 cos votos a favor de PSdeG e PP, e a abstención de CxG. Por unanimidade, a Corporación solicitaralle ao Goberno central que se rebaixe o prezo do recibo da luz actuando sobre determinados impostos e custes regulatorios. Cos votos en contra de PSdeG e CxG rexeitouse a moción do PP que condenaba os indultos aos líderes independentistas e pedía a dimisión do presidente do Goberno central. Na sesión leuse o manifesto de apoio á celebración do Día da Liberdade Sexual. Vídeo do pleno neste enlace
O Pleno da Corporación da Baña aprobou na sesión celebrada o 1 de xullo de 2021 o crédito extraordinario 1/2021 para dotar con 30.000 euros o fondo de financiamento para crear axudas municipais para paliar as consecuencias que a crise da covid-19 ocasinou ás persoas autónomas, empresas, pequenas empresas e micro empresas do municipio. Este punto foi aprobado cos votos a favor do equipo de goberno (PSdeG) e do PP e a abstención de Compromiso por Galicia.
O alcalde, José Antonio Pereira, sinalou que se intentou incrementar o fondo cunha partida superior aos 30.000 euros, pero que non é posible polos compromisos adquiridos xa polo concello a nivel económico. Dende a oposición, Andrés García Cardeso considerou escasa a contía e dixo que o PP xa solicitara esta medida hai un ano, polo que apoiaría a proposta. David Gontán asegurou que Compromiso por Galicia está a favor de crear convocatorias de axudas ás empresas, pero non como se fixo, considerou que non se especifica como se concederán estas axudas nin a quen van dirixidas, polo que optaron por absterse na votación.
O Plan de acción para o clima e a enerxía sustentable (PACES), que ten por obxecto reducir a emisión de gases de efecto invernadoiro na Baña nun 40% antes de 2030 foi aprobado cos votos a favor de PSdeG e PP, aínda que no grupo popular criticou que non se solicitara a subvención para elaboralo. Por este mesmo motivo, CxG votou en contra neste punto. O alcalde replicou que cando o PSdeG asumiu o goberno da Baña o plan xa estaba iniciado e que foi elaborado por persoal municipal.
Sí houbo unanimidade para instar ao Goberno central a rebaixar o prezo do recibo da luz actuando sobre determinados impostos e custes regulatorios, como solicitaba a moción do PP. Os tres grupos estiveron de acordo que en España é un dos países da Unión Europea onde o prezo da luz é máis alto e onde se pagan máis impostos.
PSdeG e CxG rexeitaron a moción do PP par condenar os indultos outorgado aos líderes independentistas cataláns e solicitar a dimisión do presidente do Goberno, Pedro Sánchez. A moción non saíu adiante ao contar con 6 votos en contra e 5 a favor.
Despois do apartado de moción, Mónica González leu un manifesto sobre a celebración do Día da Liberdade Sexual ou Día do Orgullo LGTBI, que se conmemorou o luns 28 de xuño, motivo polo que durante a sesión estivo despregada no salón de pleno a bandeira arcoiris. No manifesto amósase a defensa e total compromiso do Concello da Baña coa igualdade de dereitos de todas e todos os cidadáns, sexa cal for a súa orientación e identidade de xénero, afectiva e/ou sexual.
No capítulo de rogos e preguntas, dende a oposición interesáronse pola execución de diferentes actuacións en estradas e preguntaron cando vai entrar en funcionamento a traída de abastecemento de auga en Emes Barcala, que está pendente da instalación eléctrica. O alcalde respondeu que se está tramitando o expediente para executalo o antes posible.
Andrés García Cardeso, entre outras cuestións, volveu insistir en que se vixíe a actuación das empresas madeireiras que están estragando camiños públicos e pediu que a brigada municipal limpe os espazos públicos máis concorridos, ademais de solicitar que se coide o mobiliario público.
Dende Compromiso por Galicia, César Ramos pediu os datos de asistentes ao servizo de madrugadores do CPI e reclamou o informe de secretaría para poder executar a moción de CxG aprobada no pleno de novembro para rebaixar o recibo do lixo un 15%.
O vídeo íntegro do pleno pódese ver neste enlace (preme aquí).