- Detalles
- Escrito por Alicentis
- Categoría: novas
- Visto: 1034
-
Os afectados reafirmaron ante o conselleiro de Industria, Francisco Conde, o rexeitamento á declaración de utilidade pública do parque de Troitomil
-
O vicepresidente primeiro do Goberno galego comprométese a estudar as alegacións e a revisar o proxecto
O alcalde da Baña, Andrés García Cardeso, o seu homólogo de Val do Dubra, Juan Manuel Varela Ferreiro, así como representantes das asociacións veciñais O Outeiro, de San Mamede de Monte; A Fonte Seca e Ventolibre, de San Román mantiveron este mércores unha xuntanza co vicepresidente primeiro da Xunta e conselleiro de Economía, Industria e Innovación, Francisco Conde, ao obxecto de trasladarlle a necesidade de paralizar a tramitación do parque eólico de Troitomil e dos demais parques que se queren implantar na comarca, ata que se “adapte a lei á situación actual”.
Na reunión tamén estiveron presentes a secretaria xeral de Industria, Paula Uría Traba; o director xeral de Planificación Enerxética e Recursos Naturais, Pablo Fernández Vila, e o delegado da Xunta na Coruña, Gonzalo Trenor.
Os afectados reafirmaron ante o vicepresidente primeiro da Xunta o rexeitamento unánime da veciñanza e das forzas políticas da Baña contra a declaración de utilidade pública do parque eólico de Troitomil, publicada o pasado 16 de xuño, así como contra todos os procesos que están en marcha e que afectan ao municipio da Baña.
O conselleiro de Industria escoitou as demandas presentadas e todas as sensibilidades. Segundo trasladou o alcalde da Baña, Conde comprometeuse a estudar todas as alegacións e a dar resposta a cada unha delas, así como a revisar e estudar con detemento o proxecto. “O conselleiro comprometeuse a mirar con lupa todo o proceso e as alegacións”, recalcou o rexedor da Baña.
“Valoramos positivamente esta xuntanza xa que é un problema serio e de vital importancia porque compromete ó noso concello, á nosa veciñanza e á toda a contorna” subliñou Andrés García Cardeso, que lembra o proceso está na fase inicial e que o prazo para presentar alegacións á declaración de utilidade pública do parque eólico remata o 1 de agosto.
O alcalde da Baña indicou que entre os principais argumentos expostos contra a tramitación da declaración de utilidade pública do parque eólico de Troitomiil e todos os que se están a tramitar ou solicitar no municipio atópanse que o proxecto afecta a unha ampla zona arqueolóxica, á mananciais e que altera substancialmente a modificación do solo nunha ampla zona devastada polos incendios en 2006 e unha alteración significativa sobre o PXOM, xa que supón un cambio total sobre boa parte dos terreos e das construcións xa existentes. Cómpre lembrar que o Concello da Baña está pendente dos informes que solicitou á Consellería de Medio Ambiente e a unha arqueóloga.
Presentación de alegacións
Tal e como se acordou no pleno do 30 de xuño, o Concello da Baña mantén a disposición da veciñanza un equipo técnico para axudarlles a presentar e tramitar as alegacións pertinentes contra a declaración de utilidade pública do parque eólico de Troitomil. Tamén está posta a disposición de toda a veciñanza un modelo tipo de alegación (que pode descargarse da páxina web).
Ademais de no rexistro ou na sede electrónica da Xunta de Galicia, as reclamacións pódense presentar tamén no rexistro do Concello da Baña. O equipo de goberno recomenda á cidadanía que non agarde ao último día, o 1 de agosto, para presentar ditas alegacións e que poden acudir aos técnicos municipais para facer os trámites necesarios para presentalas.
- Detalles
- Escrito por Alicentis
- Categoría: novas
- Visto: 878
-
O alcalde da Baña, Andrés García Cardeso, recibiu ao delegado da Xunta na Coruña //
-
Estes programas contaron cun apoio da Xunta de 376.000 euros financiados pola Consellería de Promoción do Emprego e Igualdade //
-
Os/as alumnos/as da Baña realizaron actuacións na escola de Corneira, crearon un parque micolóxico na finca Pedra Miñata, melloras nas áreas recreativas de Fiopáns, Chousa e Chans e o mantemento da vía Mariana //
O alcalde da Baña, Andrés García Cardeso, recibiu este mércores, 20 de xullo, ao delegado da Xunta na Coruña, Gonzalo Trenor e o acompañou na súa visita aos alumnos e ás alumnas do obradoiro de Promoción 2021 centrado en Actividades Auxiliares en Conservación e Mellora de Monte e en Operacións Auxiliares de Revestimentos Continuos en Construcións. Este programas contaron cun apoio da Xunta de 376.000 euros, financiados pola Consellería de Promoción do Emprego e Igualdade.
Na visita tamén participaron a alcaldesa de Santa Comba, María Josefa Pose Rodríguez; o alcalde de Val do Dubra, José Manuel Varela Ferreiro; a primeira tenente de alcaldesa de Negreira; María del Mar García Vidal; así como membros da Corporación da Baña, entre outros.
O delegado da Xunta na Coruña destacou o compromiso dos concellos da Baña, Val do Dubra, Negreira e Santa Comba, asociados para sacar adiante este taller coa empregabilidade porque levan anos de traxectoria de formación contrastada nesta materia e conseguen importantes niveis de éxito nos diferentes programas de formación que afrontan.
Tenor explicou a gran utilidade deste tipo de formación, que está a piques de rematar, porque mellora as capacidades para que as persoas sen emprego atopen un traballo, xa que inclúe tarefas nos concellos e prácticas nas empresas da contorna. Concretamente, no Concello da Baña os/as alumnos/as realizaron actuacións na escola de Corneira, crearon un parque micolóxico na finca Pedra Miñata, realizaron o mantemento da vía Mariana e levaron a cabo actuacións de mellora nas áreas recreativas de Fiopáns, Chousa e Chans.
O delegado da Xunta apuntou que o Goberno galego “seguirá a apostar por estes programas nunha nova convocatoria para o 2023, xa que estes obradoiros son un dos mellores e máis efectivos instrumentos para axudar ás persoas sen emprego a atopar un traballo na súa contorna e en áreas con alta demanda de profesionais”. Tamén indicou que na comarca de Santiago estanse a desenvolver 10 obradoiros de emprego, para os que a Xunta reserva 3,5 millóns de euros para mellorar a formación de 184 desempregados.
- Detalles
- Escrito por Alicentis
- Categoría: novas
- Visto: 904
Unha trintena de persoas participaron onte na andaina inaugural da ruta dos muíños da Baña, durante a que puideron gozar das excelentes paisaxes que hai a carón do río Faílde e mergullarse na historia e na etnografía do municipio.
A ruta dos muíños da Baña é unha senda circular de 7,5 quilómetros de dificultade moderada, que transcorre na maioría xunto ao río Faílde, e que permite visitar un conxunto de 9 muíños tradicionais galegos, fervenzas, montes, escaleiras de pedra, un lavadoiro, e a vella central hidroeléctrica que subministrou luz á capital bañense e ás aldeas próximas a principios do século XX.
Organizada polo club de sendas enxebres Seixos e a Asociación A Baña Emprende en colaboración do Concello, antes da saída inaugurouse na praza do Concello, en San Vicenzo, a sinalización desta ruta. Na andaina participou o alcalde da Baña, Andrés García Cardeso; o concelleiro de Promoción da vida activa e deporte, César Ramos; membros da Corporación da Baña, o presidente da Baña Emprende, Rafa Vieito; e representantes de Seixos.
Podes ver o álbum de fotos no seguinte enlace:
- Detalles
- Escrito por Alicentis
- Categoría: novas
- Visto: 983
-
O conselleiro de Industria, Francisco Conde, escoitará de primeira man o rexeitamento a declaración de utilidade pública do parque de Troitomil
-
O prazo para presentar alegacións remata o 1 de agosto
-
O Concello pon a disposición da veciñanza un modelo tipo de alegacións, que se pode descargar dende a páxina web
-
Haberá xuntanzas informativas en Lañas, o día 12; San Mamede de Monte, o 13, e en Fiopáns, o día 14
-
A veciñanza poderá consultar dúbidas por correo electrónico ao avogado Borxa Colmenero, de Acouga
En dúas semanas o vicepresidente primeiro da Xunta e conselleiro de Industria coñecerá de primeira man o rexeitamento unánime da veciñanza e das forzas políticas da Baña contra a tramitación de parques eólicos no municipio. O Concello pon a disposición das persoas afectadas un modelo tipo de alegación para presentar contra a declaración de utilidade pública do parque eólico de Troitomil (o prazo para reclamar remata o 1 de agosto). Ademais de solicitar informes a Consellería de Medio Ambiente e a unha arqueóloga, dende o goberno municipal chegaron a un acordo do avogado de Acouga, Borxa Colmenero, para que atenda por correo electrónico as dúbidas dos e das bañenses.
O mércores día 20, pola tarde, o conselleiro de Industria, Francisco Conde, recibirá ao alcalde da Baña e a representantes das asociacións de veciños O Outeiro, de San Mamede de Monte, e A Fonte Seca. Na xuntanza o conselleiro coñecerá de primeira man cales son os argumentos do Concello da Baña e da veciñanza contra a tramitación da declaración de utilidade pública do parque eólico de Troitomil e de todos os que se están a tramitar ou solicitar no municipio da Baña. Como quedou ratificado no último pleno, a Corporación da Baña e os representantes sociais pediranlle ao vicepresidente da Xunta que paralice todos os procesos que están en marcha.
Dende o Concello tamén se solicitou unha entrevista co presidente da Deputación, Valentín González Formoso, para solicitar o apoio do organismo provincial, pero de momento non se obtivo resposta.
Charlas informativas polas parroquias
Ademais de solicitar estas entrevistas, que figuraban na declaración institucional aprobada por unanimidade no pleno do pasado 30 de xuño, dende o goberno municipal organizáronse tres charlas para informar á veciñanza das medidas adoptadas, cales son os dereitos que os asisten, como presentar alegacións e o asesoramento que o Concello pon a súa disposición.
A primeira destas xuntanzas celebrarase o vindeiro martes, día 12, no local social de Lañas, a partir das 20.00 horas. O mércores 13 a reunión será en San Mamede de Monte (19.00 horas tamén no local social). O xoves, día 14, a xuntanza vaise celebrar no local social de Fiopáns ás 20.00 horas.
De xeito paralelo, o equipo de goberno chegou a un acordo con Borxa Colmenero, avogado e membro da asesoría xurídica da Asociación Galega de Consumidores e Usuarios (Acouga), que asesorá a todos os veciños e veciñas da Baña que teñan dúbidas de cales son os seus dereitos e de como presentar alegacións. As persoas interesadas deberán enviarlle un correo electrónico ao enderezo Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.. Invitado pola Asociación O Outeiro, Borxa Colmenero ofreceu o pasado 7 de abril na Baña unha charla sobre os dereitos da veciñanza diante da implantación de parques eólicos no municipio (ver vídeo neste enlace).
O Concello xa solicitou tamén á Consellería de Medio Rural un informe que acredite todos os incendios acontecidos no municipio nos últimos 35 anos nos terreos afectados. Por outra banda, unha arqueóloga está elaborando un informe sobre o impacto dos parques eólicos nas parroquias que están dentro da poligonal do parque eólico de Troitomil.
O obxectivo destes informes, e dos que están a preparar os técnicos municipais, e demostrar que a autorización do parques eólico en Troitomil incumpriría a lexislación vixente e alteraría o Plan Xeral de Ordenación Municipal (PXOM).
Alegación tipo a disposición da veciñanza
O equipo xurídico municipal está preparando as alegacións do Concello para recorrer a declaración de utilidade pública. Ao mesmo tempo, o equipo municipal de urbanismo asesorará a aquelas persoas que precisen axuda para tramitar as alegacións que estimen oportunas. Para falar cos técnicos recoméndase solicitar cita previa no 981 88 65 01.
Xunto a estas medidas, que dan cumprimento ao acordo adoptado no pleno do pasado día 30 de xuño, o equipo de goberno pon a disposición de toda a veciñanza un modelo tipo de alegación contra a declaración de utilidade pública do parque eólico de Troitomil (o modelo pódese descargar na páxina web do Concello da Baña).
O prazo para presentar as alegacións remata o vindeiro 1 de agosto. Ademais de no rexistro ou na sede electrónica da Xunta de Galicia, as reclamacións pódense presentar tamén no rexistro do Concello da Baña. Dende o goberno local recomendan á veciñanza que non agarde ao último día para presentar ditas alegacións, e ofrecen a axuda dos técnicos municipais para facer os trámites necesarios para presentalas.
 Modelo_alegacion_contra_parque_eolico_Troitomil | [ ] | 67 kB |
- Detalles
- Escrito por Alicentis
- Categoría: novas
- Visto: 1138
- Nun pleno extraordinario aprobou unha declaración institucional solicitando a paralización do parque eólico de Troitomil e a tramitación de todos os iniciados
- Facilitarase axuda á veciñanza para presentar alegacións
A Corporación da Baña volveu rexeitar onte por unanimidade de todos os grupos a instalación de parques eólicos no municipio e solicitará a paralización da tramitación da declaración de utilidade pública do de Troitomil, que foi publicada no DOG o pasado 16 de xuño.
Os tres grupos políticos volveron aprobar outra declaración institucional manifestando o “rexeitamento público e total” á implantación e tramitación de todos os parques eólicos iniciados. É un acordo unánime máis da Corporación para rexeitar a implantación abusiva de parques eólicos na contorna. Outros acordos por unanimidade do pleno neste sentido xa se produciron no pleno do 31 de marzo de 2021 e tamén no pleno celebrado o 28 de abril de 2021, no que xa se aprobara outra declaración institucional rexeitando estes parques. O 13 de outubro de 2020 os alcaldes da Baña, Negreira, Mazaricos e Santa Comba asinaran unha declaración reclamando unha normativa eólica xusta para o rural.
No pleno celebrado a última hora da tarde de onte, o alcalde, Andrés García Cardeso, volveu pedir unidade das forzas políticas e da veciñanza para rexeitar a instalacións de parques eólicos no municipio, ao tempo que anuncio que técnicos do Concello están a disposición da veciñanza para axudarlle a presentar reclamacións á tamitación de declaración de utilidade pública do parque eólico de Troitomil (que se poden presentar ata o 1 de agosto). O obxectivo é paralizar a implantación do parque eólico de Troitomil e os demais de Barrosinos e Vilartoxo.
Na sesión de onte había varios veciños das parroquias afectadas no salón de plenos.
Declaracións institucional contra os parques eólicos na Baña
A continuación reproducimos integramente a declaración institucional aprobada onte (que coincide coa lida o pasado luns na rolda de prensa conxunta coa Asociación A Fonte Seca e coa Asociación de Veciños O Outeiro de San Mamede de Monte):
O pasado 16 de xuño de 2022, saíu publicado no Diario Oficial de Galicia e en La Voz de Galicia a información pública da declaración de utilidade pública do parque eólico de Troitomil polo que lle queremos transmitir a nosa preocupación así como o rexeitamento público e total á implantación e tramitación de todos os parques eólicos iniciados.
Por todo isto, temos previsto:
- Demandar formalmente a paralización do proceso de declaración de interese público do parque mentres a Consellería de Industria non dea contestacións ás anteriores alegacións e ás seguintes solicitudes presentadas e pendentes de aceptar:
- Petición á Consellería
- Amparo á valedora.
- Solicitar unha reunión informativa, aberta á cidadanía, na que sexa o secretario do Concello o que nos informe dos pasos dados e do percorrido que temos por diante. É importante que sexa un técnico.
- Presentar unha demanda de paralización da declaración de utilidade pública pola alteración significativa sobre o PXOM xa que de facto é unha alteración total sobre boa parte dos terreos e das construcións xa existentes.
- Enviar o Concello unha solicitude de alegacións ás expropiacións da rede viaria.
- Mandar unha solicitude de traslado á Deputación da Coruña para que faga o mesmo.
- Profundar na alegación contra a partición dos parques. Hai novas sentenzas e hai que insistir en que non ter en conta que esas sentenzas sentan xurisprudencia, podería xerar demandas contra o funcionariado que as asinen.
- Incidir en que a totalidade das infraestruturas do parque, incluídas as de evacuación da enerxía xerada, deberán estar incluídas para a súa consulta pública e avaliación global no presente documento de inicio e non noutros proxectos independentes que lle impiden á cidadanía a avaliación dos impactos ambientais globais do conxunto das infraestruturas do proxecto industrial.
- Solicitarlle a Medio Rural documentación que acredite todos os incendios habidos nese monte durante os últimos 35 anos.
- Insistir en que o Concello non ten capacidade para abastecer de auga potable a poboación afectada e, polo tanto, tratándose dun ben básico, faise inviable a declaración de utilidade pública xa que hai risco severo de que as obras afecten os mananciais, o que supón unha afección moi severa e prexuízos significativos para os recursos hídricos e a vulneración flagrante da Directiva marco da auga (DMA).
Ademais non existe un estudo hidrolóxico e hidroxeolóxico que garanta a calidade das masas de auga superficiais e soterradas e a non afección dos acuíferos. A mercantil promotora obvia as captacións de auga para o uso humano e agrogandeiro e os mananciais e fontes que hai na poligonal do parque eólico e no traxecto da liña de evacuación.
- Insistir en que hai unha forte alteración social e que polo tanto se demanda a paralización desta declaración de utilidade pública.
- Solicitar unha reunión no Parlamento de Galicia co vicepresidente e co conselleiro de Industria, Francisco Conde para que o grupo de goberno vaia da man dos colectivos veciñais e trasladarlle a repulsa ao proxecto eólico de Troitomil.
- Solicitar unha reunión con Valentín Formoso, presidente da Deputación, para que presente alegacións pola estrada O Seilán-Lañas e para que lle mostre o seu apoio ao Concello da Baña.
Co fin de colaborar coas persoas afectadas, o Concello da Baña ponse ao servizo da veciñanza, ata o 1 de agosto, para axudar a tramitar os escritos de alegacións coa finalidade de paralizar a implantación deste parque eólico de Troitomil nesta información pública e nos demais de Barrosino e Vilartoxo.