- Detalles
- Escrito por Alicentis
- Categoría: novas
- Visitas: 90
-
A cita volveu converterse nun éxito de público, tradición e solidariedade
-
A pregoeira, a zoqueira Elena Ferro, destacou a importancia de conservar este tipo de tradicións que son “parte da nosa cultura”, e animou ás novas xeracións a implicarse na súa preservación
A Baña converteuse este domingo, 17 de marzo, no epicentro da gastronomía e da tradición galega coa celebración da XX Festa da Filloa da Pedra, que contou coa participación de ao redor de 10.000 persoas. Ao longo de toda a xornada, o público puido gozar de actividades para todas as idades, un mercado de artesanía, música en directo e, por suposto, a degustación das tradicionais filloas da pedra, con 6.000 unidades repartidas nesta edición.
O evento arrancou pola mañá no pavillón de San Vicenzo coa actuación das pandeireteiras e gaiteiros da Escola de Música Tradicional da Baña, que deron paso ao pregón da artesá zoqueira Elena Ferro. A pregoeira destacou a importancia de conservar tradicións como esta, “parte da nosa cultura”, e animou ás novas xeracións a implicarse na súa preservación. Elena tamén se atreveu a elaborar filloas e recibiu como agasallo unha pedra filloeira, cortesía do Concello.
Durante o día, vinte pedras filloeiras estiveron en funcionamento continuo para atender a alta demanda de filloas, que o público acompañou con orellas, chourizos e chocolate quente ofrecido pola rapazada do CPI de San Vicente, quen tamén organizou unha venda de camisetas e petiscos para recadar fondos para a súa excursión de fin de curso.
A música foi protagonista da tarde coa enerxía de agrupacións como CantoenCanto, Ce Orquestra Pantasma, a Charanga Tabernícolas de Leiradal e a espectacular Mekanika Rolling Band, que puxo o broche de ouro á celebración. Ademais, os máis pequenos gozaron dun espazo infantil con xogos populares, obradoiros e animación, mentres que os visitantes puideron coñecer os oficios tradicionais na mostra de artesanía en vivo e probar sorte no sorteo solidario dunha pedra filloeira, organizado a favor da Fundación Barcala. Este sorteo logrou recadar un total de 125 euros.
O Festa da Filloa da Baña pechou a celebración do seu vinte aniversario confirmando que é unha cita que segue a medrar e a consolidarse como un referente cultural e gastronómico de Galicia.
- Detalles
- Escrito por Alicentis
- Categoría: novas
- Visitas: 1236
-
O pregón correrá a cargo da artesá zoqueira Elena Ferro
-
Agrupacións de música tradicional e charangas animarán a xornada
-
Haberá mercado de artesanía, espazo infantil e postos de comida
A Baña acollerá o domingo 17 de marzo a vixésima edición da Festa da Filloa da Pedra, un evento organizado polo Concello da Baña que terá como pregoeira á zoqueira Elena Ferro. O pavillón de San Vicenzo será o escenario principal desta celebración, que ofrecerá un variado programa de actividades para todas as idades, incluíndo música tradicional, exhibicións e mercado de artesanía e, por suposto, a degustación das deliciosas filloas da pedra típicas do municipio.
O pavillón de San Vicenzo abrirá as súas portas ás 9.30h para acoller un encontro anual que pon en valor un dos elementos máis representativos da gastronomía bañense: a filloa da pedra. Organizado pola Concellería de Acción Social, Cultural e Servizos á Cidadanía, este ano contará cun pregón moi especial a cargo de Elena Ferro, unha destacada artesá dos zocos galegos, que compartirá a súa paixón polo oficio tradicional e a súa visión innovadora.
O programa está repleto de actividades para todas as idades e gustos. Desde a apertura de portas ás 9.30h, os asistentes poderán desfrutar da música tradicional coas actuacións dos Gaiteiros e Pandereteiras da Baña e coa charanga Os Celtas. Ás 12.00h, o grupo Río de Anxo deleitará ao público con ritmos galegos en San Vicenzo. A acción volverá ao pavillón ás 13.30h, co pregón de Elena Ferro.
A partir das 16.00h, a foliada continuará con máis música, incluíndo a actuación de CantoenCanto e os Gaiteiros da Baña, Cé Orquestra Pantasma, os ritmos contaxiosos dos Tabernícolas do Leiradal e a enerxía de Mekánika Rolling Band.
Ao longo do día, os asistentes poderán gozar dunha mostra de artesanía en vivo, actividades infantís, mercadiño de artesanía, exhibición do Club Petanca Negreira e, por suposto, a degustación das deliciosas filloas da pedra, que poderán acompañarse de racións de orella e chourizos, e que fan desta festa un evento único na nosa contorna. Haberá tamén polbeiro.
- Detalles
- Escrito por Alicentis
- Categoría: novas
- Visitas: 784
-
Nos cinco expedientes extraxudiciais de crédito para pagar a provedores, facturas por máis de 720.000 euros tiñan algún tipo de reparo dende Intervención
-
O alcalde destaca a boa xestión do goberno municipal para facer fronte en oito meses a situación económica que deixou o anterior bipartito
-
O importe do POS+ ascende a 425.000 euros, dos que se destinarán 239.000 a gasto corrente e 185.000 para facer obras
-
O POS+ Adicional para gastos sociais extraordinarios ascende a 68.468 euros
-
Aprobados definitivamente os orzamentos municipais de 2024 e a ordenanza do PAI
O Pleno da Corporación da Baña aprobou onte de forma definitiva os orzamentos municipais para 2024, a ordenanza reguladora do Punto de Atención á Infancia (PAI) e o POS+ Plan Único de Concellos da Deputación da Coruña, así como cinco expedientes extraxudiciais de crédito para pagar facturas a provedores que ascenden a preto de 700.000 euros. O alcalde, José Antonio Pereira, destacou a boa xestión do goberno municipal “que en oito meses foi quen de reducir case á metade a débeda que deixou no Concello o goberno de PP e Compromiso, que ascendía a 1,6 millóns de euros cando chegamos á alcaldía”, dixo.
Na sesión de onte tamén se aprobou o POS+ Adicional para gastos sociais extraordinarios (68.000 euros) e a nova composición da mesa de contratación, que pasará a estar presidida polo alcalde e formada por 3 vogais (o secretario-interventor municipal e dous funcionarios). O secretario da mesa será outro funcionario. “Como alcalde, poderei delegar a presidencia noutro membro da Corporación cando o considere oportuno”, dixo Pereira Gil.
Os orzamentos municipais para 2024 quedaron definitivamente aprobados ao non presentarse alegacións, igual que a ordenanza reguladora do PAI, tras ser atendida a única aportación remitida pola cidadanía. Tamén se aprobou a política de seguridade do Concello, despois de que A Baña se adherise á Oficina Técnica de Ciberseguridade Provincial da Deputación da Coruña.
En canto ao Plan de Obras de Servizos (POS+), Plan Único de Concellos da Deputación da Coruña, que no caso da Baña ascende a 425.482 euros, a Corporación aprobou destinar 239.639 euros a financiar gasto corrente e 185.842 euros para facer obras.
Na relación de obras incluídas nos POS+ figura a mellora do primeiro treito do camiño de Monelos, “que estamos obrigados a urbanizar por sentenza xudicial, polo que incluímos unha partida de 48.370 euros para arranxar o primeiro tramo”, explicou José Antonio Pereira. Tamén se reforzará o firme no viario de Nantón a Buchaín, con 137.472 euros. Outra parte deste viario está incluída no POS+ Complementario “para poder completar a obra”, segundo explicou o alcalde. O plan complementario do POS+, que ascende a 121.000 euros, inclúe tamén a mellora de viarios en Vilar da Torre e a mellora da capa de rodaxe da pista de Cerdeiras (Corneira).
O primeiro Pleno ordinario do ano na Baña tamén aprobou o POS+ Adicional para gastos sociais extraordinarios do exercicio 2024, que ascende a 68.468 euros. Un montante que se distribúe en 24.968 euros para reforzo ou ampliación do persoal técnico dos Servizos Sociais do Concello, 6.000 para axudas de emerxencia, 35.000 euros para ampliar o servizo de axuda a domicilio e 2.500 euros para aluguer de equipamento técnico asistencial para cesión de uso ás persoas que o necesiten.
- Detalles
- Escrito por Alicentis
- Categoría: novas
- Visitas: 485
-
O alcalde José Antonio Pereira Gil, xunto á subdelegada do Goberno na Coruña, María Rivas, e a concelleira Mónica González, presentaron o proxecto na Biblioteca Municipal
-
O obxectivo e promover a reflexión, a sensibilización e a concienciación sobre as situacións de vulnerabilidade das propias mulleres
O alcalde da Baña, José Antonio Pereira Gil, xunto á subdelegada do Goberno na Coruña, María Rivas, e a concelleira de Acción social, cultural e servizos a cidadanía, Mónica González, presentaron hoxe na Biblioteca Municipal Mavi: a maleta viaxeira contra a violencia de xénero.
A iniciativa promovida pola Subdelegación do Goberno achega á veciñanza libros de diferentes temáticas relacionadas co feminismo, a igualdade, o empoderamento, a autoestima ou a violencia machista.
A maleta conta con catorce libros coa idea de que todas as mulleres, independentemente da franxa de idade, poidan formar parte do proxecto.
O obxectivo e promover a reflexión, a sensibilización e a concienciación sobre as situacións de vulnerabilidade das propias mulleres así como o intercambio de ideas sobre as lecturas e experiencias neste tema.
Entre as obras que garda a maleta atópanse títulos como A historia dos bonobos con lentes, Cuentos de buenas noches para niñas rebeldes ou Las chicas son guerreras: 26 rebeldes que cambiaron el mundo.
- Detalles
- Escrito por Alicentis
- Categoría: novas
- Visitas: 564
-
O obxectivo é facilitar a conciliación das familias durante estas festas
-
Está dirixido ás crianzas escolarizadas ata os 13 anos
-
As persoas interesadas poderán inscribirse ata o mércores 7 de febreiro e reservar praza chamando ao 981 81 76 05 ou enviando unha mensaxe ao 629 15 40 51
O Concello da Baña, a través da Concellería de Acción social, cultura e servizo sociais, organiza entre os días 12 a 14 de febreiro os Obradoiros de Entroido co obxectivo de facilitar a conciliación das familias durante estas festas.
As nenas e os nenos da Baña escolarizados ata os 13 anos poderán gozar de diferentes actividades de carácter gratuíto que se desenvolverán na Axencia de Lectura, situada na Casa da Cultura, en horario de 8.00 a 14.00 horas.
As manualidades coa temática do Entroido, a confeccións de máscaras e os diversos xogos, entre outras actividades, formarán parte da rutina durante estas tres xornadas.
As persoas interesadas en participar poderán inscribirse, de balde, ata o mércores 7 de febreiro. Poderase reservar praza chamando ao 981 81 76 05 ou enviando unha mensaxe ao 629 15 40 51.