- Detalles
- Escrito por Alicentis
- Categoría: novas
- Visitas: 583
-
Na sesión de onte ratificouse por unanimidade a ordenanza de impulso do uso do galego e un recoñecemento extraxudicial de crédito
-
Cos votos do equipo de goberno aprobáronse as melloras de camiños en Cabanas, Menlle de Arriba, A Ermida e Gosende
-
A partir de agora as sesións ordinarias serán bimensuais, o último mércores dos meses impares
-
O alcalde informa de que xa se remitiu á Xunta o noventa por cento da documentación solicitada trala inspección ao PAI
A Corporación da Baña aprobou na sesión ordinaria de onte, e por unanimidade, a ordenanza de impulso do uso do galego e unha modificación extraxudicial de crédito para pagar facturas de provedores. Cos votos a favor do equipo de goberno (7) e a abstención do PSdeG (4), aprobáronse os proxectos para mellorar camiños rurais en Cabanas, Mundris, Menlle de Arriba, A Ermida e Gosende-Carballeira. A partir de agora, os plenos ordinarios pasan a ser bimensuais, celebrándose o último mércores dos meses impares. No capítulo de rogos e preguntas, o alcalde sinalou que moitas das deficiencias atopadas no PAI por unha inspección da Xunta están xa solucionadas ou en vías de solución, e aclarou que todo o persoal está vacinado e ten o certificado de delitos sexuais xa actualizado (ver vídeo íntegro do pleno neste enlace).
Os dous primeiros puntos da sesión foron aprobados por unanimidade. César Ramos defendeu que a ordenanza para o impulso do galego no Concello da Baña ten por obxectivo fomentar o uso do noso idioma e dar cumprimento á Lei de normalización lingüística. Tamén co voto favorable dos once concelleiros se aprobou o recoñecemento extraxudicial de crédito, que permitirá pagarlle aos provedores facturas pendentes do ano pasado. A pesar da unanimidade no debate deste punto, o portavoz socialista, José Antonio Pereira, acusou aos socios de goberno de provocar esta situación ao impedirlle ao ex goberno socialista dedicar no POS dos dous últimos anos a gastos correntes a mesma cantidade que viña destinando o Partido Popular. O alcalde, Anddrés García Cardeso, recordoulle ao seu antecesor que “a situación no Concello é insostible, con facturas sin pagar dende hai máis dun ano, que están prexudicando a moitos provedores”. Cardeso engadiu que PP e Compromiso “non bloqueamos pago ningún” e responsabilizou ao ex rexedor socialista de facer “unha pésima xestión económica”.
As obras obras para incluír no Plan Marco de Agader, para mellorar camiños municipais de acceso a parcelas agrícolas, aprobouse cos votos a favor do equipo de goberno (7) e a abstención dos socialistas (4). A proposta de PP de Compromiso e mellorar accesos en Cabanas, Mundris, Menlle de Arriba, A Ermida e Gosende-Carballeira por uns 84.000 euros. Os socialistas amosáronse dispostos a votar a favor se se facían de cemento dous tramos con moita pendente en ambos camiños. O alcalde aclaroulles que as bases aprobadas por Agader impiden este ano utilizar cemento nas melloras do Plan Marco. García Cardeso sorprendeuse pola abstención dos socialistas, “pois tanto estas obras como as do POS contemplan a metade das vosas propostas”.
No debate para cambiar as sesión plenarias a unha periodicidade bimensual houbo un intenso debate. Dende o PSdeG, José Antonio Pereira, acusou ao goberno bipartito por cambiar os plenos “cando en 2019 obrigaron ao goberno socialista a facelos mensuais”. Para apoiar a proposta solicitou estar presente na xunta local de goberno. César Ramos recordoulle ao portavoz socialista os seus cambios de criterio, “pois en 2015 propuxera plenos mensuais, e no 2019 queríaos trimestrais”. Na votación, o punto saíu adiante cos votos a favor do goberno (7) e en contra dos socialistas (4). A partir de agora os plenos celebraranse cada dous meses, o último mércores dos impares, polo que as seguintes sesións serán en marzo e maio.
Punto de Atención á Infancia
As preguntas formuladas por Mónica González Blanco respecto da inspección feita no PAI pola Xunta de Galicia, o alcalde aclarou xa se remitiu á Consellería de Política Social a maioría da documentación solicitada, ademais de actualizar a información do PAI no Rexistro de Entidades Prestadoras de Servizos Sociais do Goberno galego.
O alcalde explicou que despois de recibir a acta de inspección, o pasado día 4, comunicouno no pleno do día 9. Recentemente, el, a concelleira de Cultura e a traballadora social mantiveron unha xuntanza co persoal do PAI para axilizar a entrega de toda a documentación solicitada pola Xunta. Neste senso, tanto o alcalde como a concelleira socialista coincidiron en que todas as traballadoras están vacunadas e teñen certificado de delitos sexuais, aínda que nalgúns casos pendentes de actualizar, algo que xa se está tramitando. Neste senso, e coa intención de tranquilizar ás familias, aseguraron que o único que faltaba o día da inspección e amosarlle a administración autonómica os documentos actualizados que acreditan este punto. Algo que se está a facer.
José Antonio Pereira volveu preguntar polo reparto de calendarios, e pola distribución entre os establecementos hostaleiros duns manteis conmemorativos do Día de Rosalía “que non chegaron a algúns establecementos”. A concelleira de Cultura respostoulle que se os salvamanteis se entregaron a todos os establecementos que onte estaban abertos e quixeron colaborar coa iniciativa. “Hai varios locais que están pechados estes días, outros que os rexeitaron e algúns cos que non logramos contactar”, asegurou.
- Detalles
- Escrito por Alicentis
- Categoría: novas
- Visitas: 427
-
A conselleira de Medio Ambiente asegura que reduciu os residuos na bolsa negra nun 3,5% e incrementou a reciclaxe de plásticos nun 55%
-
Esta mañá visitou o punto limpo, acompañada polo alcalde e o presidente de Sogama
-
Ánxeles Vázquez subliña que as entidades locais avanzan cara a unha xestión máis eficiente e correcta dos diferentes tipos de residuos municipais
A conselleira de Medio Ambiente, Ángeles Vázquez, visitou esta mañá o punto limpo da Baña e puxo a veciñanza deste municipio como exemplo de bo facer na conservación do medio ambiente. Segundo explicou a conselleira, o ano pasado A Baña foi un dos cinco concellos galegos no que máis se reciclou en orixe, ao reducir o lixo da bolsa negra nun 3,5% e incrementar as achegas de plásticos, latas e briks do contedor amarelo nun 55%.
A nivel de Galicia, a conselleira de Medio Ambiente, Territorio e Vivenda salientou que os galegos reciclaron o ano pasado un 1,4% máis de envases de plásticos, latas e briks do contedor amarelo, incrementando en 458,92 as toneladas recuperadas. Polo que respecta aos desperdicios da bolsa negra (fracción resto), a nivel autonómico enviáronse a Sogama 405 toneladas menos de lixo.
Ánxeles Vázquez puxo como exemplo á veciñanza da Baña, polos bos resultados acadados no 2021 tanto desde o punto de vista da produción de lixo convencional como das taxas de reciclaxe de envases lixeiros. Asegurou que A Baña mandou a Sogama 34 toneladas menos de lixo na bolsa negra que o ano anterior e que se recolleron 46,41 toneladas de envases lixeiros no contedor amarelo, o que representa un 55,2% máis que no 2020.
Acompañada polo presidente de Sogama, Javier Domínguez; o alcalde, Andrés García Cardeso; o concelleiro de Servizos Básicos, José Manuel Landeira, e a concelleira de Educación, Lorena Trillo, a conselleira visitou esta mañá o punto limpo da Baña, construído polo Goberno galego en 2005. Neste punto limpo a veciñanza pode depositar determinado tipo de residuos especiais (metais, plásticos, madeira ou electrodomésticos, entre outros) de luns a sábado de 10.00 a 14.00 horas.
O funcionamento desta instalación, segundo indicou, é unha mostra máis do compromiso municipal coa xestión do lixo de orixe doméstica e a posta á disposición da veciñanza tanto de espazos axeitados para o seu almacenamento, como do material e os recursos necesarios para garantir unha correcta separación en orixe.
A este respecto, lembrou que o concello coruñés é un dos 222 adheridos en Galicia ao programa de compostaxe doméstica de Sogama, grazas ao cal 30 vivendas unifamiliares do municipio contan xa co seu propio composteiro para autoxestionar a fracción orgánica dos seus residuos e utilizala para xerar compost de calidade, que poden reutilizar nas súas propias hortas e terreos.
Por todo isto, a conselleira felicitou ao alcalde da Baña, Andrés García, subliñando que grazas ao esforzo e ao traballo realizado neste eido, os concellos galegos avanzan cara a unha xestión máis eficiente e correcta dos residuos municipais, o que se traduce tamén nun aforro económico importante que beneficia de forma directa aos cidadáns.
Neste sentido, explicou que Sogama aplica desde 2019 unha redución do 10% no canon que lle cobra aos concellos polo tratamento dos residuos a cambio de que acrediten unha redución da produción de lixo e/ou un aumento da reciclaxe dos envases lixeiros. O concello de A Baña leva tres anos beneficiándose deste incentivo, cun aforro de máis de 18.000 euros que repercutiu nas facturas do lixo que pagan os veciños por este servizo.
Pola súa banda, o rexedor agradeceu que desde a Xunta se considere que A Baña “está facendo as cousas ben” en materia de residuos e subliñou o importante papel e implicación que está a xogar neste sentido a veciñanza. “Se entre todos poñemos un pouco de sensatez, contribuiremos a mellorar o medio ambiente”, engadiu.
Galegos máis comprometidos
Cómpre lembrar que aínda que a xestión dos residuos de orixe doméstica é unha competencia municipal, o Goberno galego traballa e apoia aos concellos para axudalos a conseguir os obxectivos marcados pola UE nesta materia.
En concreto, a conselleira referiuse á obriga de implantar, antes do 31 de decembro de 2023, a recollida diferenciada da fracción orgánica a través do quinto contedor, o de cor marrón. Un obxectivo que Galicia aspira a cumprir, tal e como lembrou, grazas a unha ampla rede de infraestruturas integrada por 17 instalacións á que a Xunta destinará preto de 40 millóns de euros e que dará servizo á practica totalidade dos galegos.
- Detalles
- Escrito por Alicentis
- Categoría: novas
- Visitas: 399
Facendo algo de exercicio, compartindo un par de horas cos amigos e animando as rúas da Baña con vistosos disfraces. Así pasaron o último día do ano pasado as 80 persoas que participaron na primeira edición da San Silvestre da Baña, que serviu tamén para renderlle unha homenaxe a Alba Pérez, a atleta da Baña foi bronce no Campionato de España de marcha en ruta sub20.
Coa organización da proba colaboraron Protección Civil de Negreira e Santa Comba, así como a Escola de Música Tradicional da Baña, que se encargou de poñerlle á tarde algo de música galega.
Na praza do Concello puidéronse ver disfraces de Spiderman, Batman, leopardos, patos e moitos gorros de Papá Noel. Ao rematar a proba, os participantes levaron unha medalla como agasallo.
- Detalles
- Escrito por Alicentis
- Categoría: novas
- Visitas: 853
-
O Concello volve contar con Xunta de Goberno Local, que se reunirá o segundo xoves de cada mes
-
O alcalde terá dedicación exclusiva, con 32.900 euros brutos anuais
-
A concelleira de Cultura terá dedicación parcial de 25 horas semanais e 16.000 euros de salario bruto anual
A Corporación da Baña celebrou onte o primeiro pleno ordinario da nova etapa do goberno de coalición entre Partido Popular e Compromiso, no que se estableceu o novo sistema de organización para o que resta de lexislatura. Na sesión só se aprobaron por unanimidade os puntos relativos as comisións informativas e a designación de representantes municipais nos órganos colexiados supramunicipais. Vídeo íntegro do pleno neste enlace (preme aquí)
Cos votos a favor de Partido Popular e Compromiso e a abstención dos socialistas, aprobouse o mantemento das sesións ordinarias o último mércores de mes e a creación da Xunta de Goberno Local, que se reunirá o segundo xoves de mes a partir das 13.30 horas.
Co mesmo resultado (7 votos a favor e 4 abstencións) aprobouse a dedicación exclusiva do alcalde, Andrés García Cardeso, cunha retribución bruta anual de 32.900 euros, e a dedicación parcial (25 horas semanais) da concelleira de Cultura, Educación, Muller e Igualdade e Normalización Lingüística, Lorena Trillo, cunha retribución bruta anual de 16.000 euros.
Os socialistas criticaron ao novo goberno por incrementar os salarios, con relación ao goberno anterior, e manter os plenos ordinarios con carácter mensual, cando dende o PSOE xa propuxeran ao principio da lexislatura que fosen bimensuais. Dende o equipo de goberno, César Ramos (Compromiso) replicoulle ao portavoz socialista, José Antonio Pereira, que esta é unha proposta negociada entre os socios de goberno e sinalou que na etapa anterior, polo contrario, "pedímoslle ata oito veces que negociara o salario sen que nos chamara”. Posturas semellantes se manifestaron na asignación da dedicación e salario da concelleira de Cultura.
No capítulo de rogos e preguntas, José Antonio Pereira (PSOE) preguntou por que se retrasou o reparto dos calendarios municipais, ao que o alcalde, Andrés García Cardeso, contestoulle que o reparto se está a facer con persoal voluntario e traballadores municipais “porque Correos pedíanos case tres mil euros pola distribución e díxonos que non o faría ata xaneiro”.
Pereira tamén preguntou cando se retomarán as clases na Escola de Música, contestando García Cardeso que se fará cando haxa un informe xurídico que lle dea garantías ao procedemento. Actualmente, está en fase de adxudicación o proceso de licitación da xestión da Escola Municipal de Música, aínda pendente de resolver pola mesa de contratación. Ademais, o contrato menor co anterior equipo directivo rematou en decembro. “Foi un proceso mal proposto polo anterior goberno (por sacar o proceso de licitación unha vez iniciado o curso) que agora tratamos de resolver do mellor xeito posible para recuperar as clases canto antes cos dous profesores que son persoal municipal”, concluíu García Cardeso.
Pódese ver o vídeo íntegro do pleno neste enlace (preme aquí)
- Detalles
- Escrito por Alicentis
- Categoría: novas
- Visitas: 1316
José Andrés García Cardeso recuperou hoxe a alcaldía da Baña ao prosperar a moción de censura presentada polo Partido Popular e Compromiso por Galicia contra o socialista José Antonio Pereira Gil. No Pleno celebrado esta mañá pola Corporación da Baña, Cardeso contou cos sete votos a favor de PP e CxG e os catro en contra do PSdeG. O vídeo íntegro da sesión pódese ver neste enlace (preme aquí)
A sesión de hoxe, como establece a Lei Electoral, estivo presidida pola mesa de idade, formada por José Manuel Landeira Liñares (PP), como concelleiro de maior idade, e Lorena Trillo López (CxG A Baña), a máis nova. A moción de censura fora presentada o pasado 26 de novembro polos dous grupos entón na oposición. Cardeso recupera así a alcaldía que ostentou durante 24 anos ata as eleccións celebradas en 2019.
Na súa intervención, Andrés García Cardeso asegurou que a moción de censura é “unha figura lexítima e democrática” contemplada na Lei Electoral Xeral. Tras repasar os motivos que levaron a Partido Popular e Compromiso por Galicia A Baña a presentar a moción, Cardeso dixo que “a política debe servir para unir e non para enfrontar. Por riba das ideoloxías, o importante son as persoas, os veciños e veciñas e o interese xeral”, afirmou o novo alcalde. Concluíu reiterando o compromiso “deste novo goberno plural para acadar o mellor para a Baña”.
O ex alcalde, José Antonio Pereira, considerou un “acto inxusto” a moción e asegurou que o de hoxe era “un día triste” para o municipio. “Demostramos que un goberno progresista podía mellorar as cousas despois de 24 anos, a pesar da nula colaboración dos outros dous grupos políticos presentes na Corporación”. “Son o alcalde ao que non deixaron traballar polo benestar da Baña”, concluíu Pereira Gil, antes de agradecerlle aos traballadores e traballadoras municipais e á veciñanza o seu apoio.
Pola súa banda, César Ramos recordou que no ano 2019 Compromiso por Galicia lle dera o seu apoio ao grupo socialista, “que non foi quen de aproveitar unha oportunidade histórica e demostrou a súa inoperancia”. Para César Ramos “tan lexítimo é o goberno saínte como o entrante”. Rematou a súa intervención afirmando que dende CxG “obramos con valentía para sacar isto adiante. Dentro de 16 meses, a veciñanza fará a súa valoración nas eleccións”.