Detalles

Escrito por Alicentis

Categoría: novas

Published: 25 Agosto 2021

Visitas: 360

• “Abanca acaba co rural” e “Cartillas fóra” foron algunhas das consignas das persoas que se manifestaron hoxe

• Entregáronse 2.500 firmas contra o peche da única oficina bancaria do municipio

• O alcalde animou a participar na manifestación do 2 de setembro na Coruña xunto con Vimianzo e Zas

• O Concello da Baña pon un autobús gratis e require inscrición previa no teléfono 981 886 501

“Abanca acaba co rural” ou “Queremos unha oficina, non un caixeiro” foron algunhas consignas pronunciadas hoxe pola veciñanza da Baña que se manifestou en San Vicenzo contra o peche da sucursal de Abanca, a única oficina bancaria do municipio. O alcalde socialista e os portavoces do PP e de CxG entregaron 2.500 sinaturas contra a decisión de Abanca de cerrar a oficina da Baña no mes de setembro. O vindeiro xoves, 2 de setembro, os concellos da Baña, Vimianzo e Zas, convocaron unha manifestación na Coruña contra o peche de oficinas da entidade bancaria.

A veciñanza da Baña manifestou esta mañá de xeito rotundo o seu rexeitamento contra o peche da única oficina bancaria do municipio. “Non ao peche”, “Cartillas fora” foron outras das consignas das máis de cen persoas que se concentraron hoxe convocadas polo Concello en protesta pola decisión de Abanca, entidade que se beneficiou de máis de 7.000 millóns de euros de cartos públicos investidos para rescatar as antigas caixas galegas. Houbo ata quen propuxo aos asistentes “retirar xuntos todos os cartos que temos en Abanca se pecha a oficina da Baña”.

O rexeitamento na Baña é tal que o Concello, a Asociación de empresarios A Baña Emprende e outros colectivos recolleron máis de 2.500 sinaturas contra o peche da oficina. Sinaturas que foron entregadas na propia oficina polos representantes dos tres grupos políticos presentes na Corporación, o alcalde José Antonio Pereira, Andrés García Cardeso (PP) e César Ramos (CxG). O Concello remitirá unha carta certificada á sede central de Abanca en Betanzos solicitando que se manteña aberta a oficina da Baña.

Manifestación na Coruña o 2 de setembro

Ao final da manifestación, José Antonio Pereira agradeceulle ás persoas presentes o seu apoio e convidounas a participar o vindeiro xoves, 2 de setembro, na manifestación convocada polos concellos da Baña, Vimianzo e Zas diante da sede de Abanca na Coruña. O Concello da Baña farase cargo do desprazamento en autobús e pídelle as persoas interesadas que se anoten chamando ao teléfono do concello 981 886 501, ata o vindeiro 31 de agosto.

“Todos sabedes o que supón o peche da única oficina de Abanca no noso municipio, e que terá unha grande repercusión social e económica para o noso comercio e a pouca industria que temos”, dixo José Antonio Pereira. “Se temos que depender e desprazarnos a concellos limítrofes para facer xestión financeiras, moitas persoas aproveitarán para facer alí as súas compras”, engadiu. Para o alcalde, o peche de Abanca na Baña prexudicará de forma especial “aos maiores do municipio, máis de 700 persoas que non están familiarizados coas novas tecnoloxías”.

Acordo unánime da Corporación

O pleno da Baña aprobou por unanimidade o pasado 12 de agosto un manifesto institucional rexeitando o peche anunciado por Abanca. En coordinación cos concellos de Vimianzo e Zas (onde a entidade financeira tamén pechará oficinas) os tres alcaldes solicitáronlle unha reunión ao presidente da Xunta, Alberto Núñez Feijóo, “para que nos axude e se poña á fronte das reivindicacións”, posto que os tres rexedores cren que o Goberno galego é o único con capacidade para “falar de ti a ti” coa entidade financeira.

Tras reunirse a semana pasada con Alberto Varela, o presidente da Federación Galega de Municipios e Provincias comprometeuse a impulsar unha enquisa entre os concellos para analizar como lles está afectando a concentración de oficinas bancarias logo de constatar que están abandonando maioritariamente os núcleos rurais deixando sen servizo á súa poboación.

Ademais destas dúas, e a recollidas de firmas entregadas hoxe, os tres alcaldes teñen en marcha outras medidas conxuntas entre as que figuran:

• Establecer contactos con algún ministro do Goberno de España que teña competencias na materia e con deputados do Parlamento galego
• Manter unha reunión con responsables de Abanca
• Estudar a posibilidade de emprender accións legais
• Convocar unha manifestación ante a sede de Abanca na Coruña

Estratexia para incrementar beneficios

O alcalde de Zas, Manuel Muíño, incidiu o pasado día 13 nunha rolda de prensa conxunta que a decisión de Abanca de pechar as oficinas da Baña, de Baíñas (Vimianzo) e de Zas o vindeiro 8 de setembro obedece só ao interese de incrementar as súas ganancias. “Non está motivada por nada que fixeramos nós nin tampouco porque dean perdas. A única fin que ten é aumentar os beneficios da entidade a costa de prexudicar directamente 10.000 persoas nestes tres concellos e noutros limítrofes”, sinalou, e lembrou que Abanca gañou no primeiro trimestre deste ano 137,4 millóns de euros, un 8,2% máis que no mesmo período de 2020.

“É un atentado contra o rural”, manifestou nesa rolda de prensa o alcalde da Baña, José Antonio Pereira, quen lembrou que a oficina de Abanca é a única sucursal bancaria existente no municipio.  “O peche conleva deixar de facer vida no noso concello. Non só os veciños xa non van poder facer xestións, senón que é un pau tamén para o comercio que temos. Ademais, moita da nosa poboación e moi maior e o día que vai cobrar a pensión aproveita para facer compras e outros trámites. Agora vai ter que desprazarse oito quilómetros para sacar cartos”, explicou.

Mónica Rodríguez, alcaldesa de Vimianzo, subliñou o feito de que Abanca non comunicara a decisión. Foron os empregados das oficinas que van pechar os que empezaron a chamar aos veciños para informalos do peche. “Botamos moito de menos que non houbera un aviso e se establecera un diálogo. Súmenos na impotencia. Onde quedan o asesoramento e esa cercanía co cliente da que presumen na súa publicidade? A banca electrónica non o fai todo e hai quen non sabe manexarse coas tecnoloxías. Diminúen os horarios, pechan oficinas, botan empregados... trátase dun grave problema que afecta tamén outros concellos”, indicou.

En total son nove as oficinas que Abanca ten previsto pechar en Galicia neste vindeiro setembro. Ás da Baña, Baíñas e Zas únense as de San Valentín (A Coruña), Campo Lameiro e Campelo (Pontevedra) San Xoán de Río, Padrenda e Quintela de Leirado (Ourense).

Detalles

Escrito por Alicentis

Categoría: novas

Published: 14 Agosto 2021

Visitas: 551

• Consideran que o Goberno galego é o único con capacidade para “falar de ti a ti” coa entidade financieira
• Esta é unha das primeiras medidas conxuntas que levarán a cabo nos vindeiros días

O Alcalde de Zas, Manuel Muíño, en representación do alcalde da Baña, José Antonio Pereira Gil, e da alcaldesa de Vimianzo, Mónica Rodríguez, vén de realizar a solicitude dunha entrevista co Presidente da Xunta de Galicia, Alberto Núñez Feijóo, co fin de abordar o peche das oficinas de Abanca situadas en Zas, Baíñas e A Baña e intentar que medie para que a entidade bancaria reconsidere a súa decisión.

“Queremos ter unha reunión con Feijóo para que nos axude e se poña á fronte das reivindicacións”, sinalou o rexedor de Zas durante a rolda de prensa que ofreceron onte os tres alcaldes para anunciar as medidas conxuntas que se levarán a cabo co fin de evitar o peche destas oficinas. “É o presidente de todos os galegos e galegas, polo que debe de atender a petición de defender aos nosos veciños. Ademáis ten unha responsabilidade moral dado que o Estado saneou a banca dándolle máis de 7.000 millóns de euros de todos os cidadáns”, subliñou Muíño. Os tres rexedores consideran que o Goberno galego é o único con capacidade para “falar de ti a ti” coa entidade financieira.

Tal e como souberon polos propios empregados de Abanca e polos veciños, a entidade financeira ten previsto pechar as oficinas de Zas, Baíñas e A Baña o vindeiro 8 de setembro. Este peche afecta directamente a unhas 10.000 persoas tanto destes concellos como doutros limítrofes.

Outras medidas conxuntas

Ademáis desta, os rexedores teñen en marcha outras medidas conxuntas entre as que figuran:

• Solicitar unha reunión co Presidente da Federación Galega de Municipios e Provincias (Fegamp), Alberto Varela
• Establecer contactos con algún ministro do Goberno de España que teña competencias na materia e con deputados do parlamento galego
• Manter unha reunión con responsables de Abanca
• Estudar a posibilidade de emprender accións legais
• Recollida de firmas nos tres concellos
• Convocar unha manifestación ante a sede de Abanca

Detalles

Escrito por Alicentis

Categoría: novas

Published: 17 Agosto 2021

Visitas: 136

• O Concello colocou 2.281 novos puntos de luns 123 centros de medida para conseguir un aforro enerxético do 73%

• O Ministerio para a Transición Ecolóxica aportou 394.546,96 euros con cargo aos fondos Feder, e o Concello puxo o 20% restante

• As obras foron executadas pola empresa Alumbrados Viarios SA cun orzamento de 493.183,66 euros 

O Concello da Baña rematou onte as obras para colocar 2.281 novas lámpadas de led e 123 centros de medida que foron financiados polo Ministerio para a Transición Ecolóxica e do Fondo Europeo de Desenvolvemento Rexional (Feder) cunha achega de 394.546,96 euros. Esta subvención representa o 80% dos 493.183,66 euros en que foron adxudicadas as obras a empresa Alumbrados Viarios S.A.

O Instituto para a Diversificación e Aforro de Enerxía (IDAE) do Ministerio para a Transición Ecolóxica concedeulle ao Concello a subvención o 18 de febreiro de 2019, que conta con financiamento europeo ao estar enmarcada no Programa Operativo FEDER de crecemento sostible 2014-2020, que busca mellorar a eficiencia enerxética e apoiar así a transición cara a unha economía con baixo consumo de carbono e, polo tanto, máis limpa. 

O proxecto presentado polo Concello e financiado polo IDAE permitíu a renovación do alumeado público exterior no municipio, actuando en 2.281 dos 2.327 puntos de luz existentes, substituíndo as vellas luminarias de descarga, con vapores metálicos de iluminación (VSAP, VSBP, VM con HM) por luminarias LED máis eficientes, así como a instalación de novos sistemas de control e de regulación do fluxo luminoso mediante programación no driver da propia luminaria nos 123 centros de medida. Con esta actuación estímase que se disminuiría a potencia de 230,82kW a 81,08kW e conseguiríase un aforro enerxético do 73%.

As obras foron adxudicadas á empresa Alumbrados Viarios SA cun orzamento de 493.183,66 euros o 9 de marzo de 2020. A empresa comezou a execución destes traballos o pasado 22 de xaneiro, finalizando onte (16 de agosto) os traballos. A rúa Castelao, no núcleo de San Vicenzo, foi unha das zonas nas que se colocaron as novas lámpadas LED.

Agora que remataron as obras, máis do noventa por cento das luminarias do municipio da Baña serán de tecnoloxía LED, o que suporá un considerable aforro enerxético, e lle permitirá ao Concello cumprir tamén co Pacto polo Clima promovido pola Unión Europea, asinado pola Baña.

Detalles

Escrito por Alicentis

Categoría: novas

Published: 12 Agosto 2021

Visitas: 535

• Lectura do manifesto en contra do peche da oficina de Abanca na localidade

• A declaración conta co apoio dos tres grupos con representación no consistorio

• É a primeira dunha serie de accións conxuntas para evitar unha decisión lesiva para a veciñanza e para os sectores económicos bañenses

A corporación municipal da Baña deu lectura esta mañá ao manifesto en contra do peche da oficina de Abanca na localidade. O texto de rexeitamento, apoiado por todas as forzas políticas con presenza no Concello, é a primeira das accións que se levarán a cabo de xeito conxunto para evitar unha decisión que prexudicaría á veciñanza e á economía bañense. Vídeo do pleno neste enlace.

O pleno municipal reuniuse de xeito extraordinario ás 9 da mañá. Na sesión deuse lectura á declaración, na que os grupos da corporación expresan o seu "rexeitamento ao peche da sucursal de Abanca en San Vicenzo da Baña, confirmado pola entidade para o próximo mes de setembro".

O texto destaca que este peche deixa á veciñanza "sen ningún punto de atención para as súas xestións bancarias, ao non haber neste momento ningún outro banco que opere diariamente no territorio municipal". A marcha de Abanca da Baña suporá, afirman os grupos municipais, un duro golpe especialmente para as persoas maiores e con menos destrezas dixitais. Ademais, ao obrigar a desprazarse a quen desexe facer xestións presenciais, sairá tamén prexudicada a economía local, nomeadamente os sectores do comercio, a hostalería e os servizos.

O manifesto recórdalle a Abanca a responsabilidade social que herda das caixas de aforros galegas, das que é sucesora, e do feito de que estas fosen rescatadas con diñeiro público antes de seren privatizadas. O peche, apunta a declaración, "camiña xusto no sentido contrario ás políticas de recuperación do rural e de igualdade de oportunidades para as localidades máis pequenas que a sociedade reclama. Un rural sen servizos coma o bancario é un rural menos atractivo, máis empobrecido e cun futuro de moito peor prognóstico".

Son varias as accións conxuntas que se están levando a cabo na Baña para evitar o peche. Os comercios do municipio dispoñen xa de follas para que a veciñanza asine contra esta decisión, algo que tamén se pode facer na Casa Consistorial en horario de atención ao público (8 a 14h.) Ademais, representantes do Concello solicitaron unha reunión coa dirección da empresa, que previsiblemente se levará a cabo a comezos da semana que vén.

O Concello está en contacto con outros municipios con situacións parecidas, como Zas e Vimianzo, e coa Federación Galega de Municipios e Provincias, para recadar apoios.

O manifesto foi consensuado polos tres grupos municipais con representación na Baña. O alcalde, José Antonio Pereira, afirma que o peche "chega nun momento de certa recuperación do tecido empresarial e da hostalería, polo que vai xusto en contra destas iniciativas. A Baña necesita que Abanca siga funcionando e Abanca necesita tamén dos veciños e veciñas da Baña". Pola súa banda, o portavoz municipal do PP, Andrés García, cualificou o anuncio do peche da sucursal de Abanca de "ataque ao rural e á veciñanza". César Ramos, portavoz de Compromiso por Galicia, rexeitou a decisión de Abanca e avogou “por un traballo conxunto de reivindicación dos nosos dereitos e de respecto polos servizos do rural, deixando de lado diferenzas políticas".

O manifesto foi consensuado polas tres forzas políticas e máis o BNG, sen representación na Corporación. Os grupos políticos actuarán unidos e en conxunción coas iniciativas da cidadanía para conseguir reverter unha decisión que consideran moi lesiva para os intereses do municipio.

O vídeo íntegro do pleno pode verse neste enlace (preme aquí).

Attachments:

Declaración en contra do peche da oficina de Abanca na Baña

[ ]

123 kB