Detalles

Escrito por Alicentis

Categoría: novas

Published: 09 Outubro 2020

Visitas: 658

O Pleno da Corporación da Baña celebrado o pasado 30 de setembro aprobou por unanimidade modificar a comisión municipal de seguimento da covid-19, que pasará a estar integrada por un representante de cada grupo político presente na Corporación, e polos representantes das entidades e colectivos veciñais que estean interesados.

Dende o Concello pídeselle aos colectivos e entidades legalmente constituídos no municipio que, se desexan formar parte desta comisión de seguimento, se poñan en contacto coas oficinas municipais para facilitar o nome e datos de contacto do seu representante municipal. Deberán chamar ao teléfono 981 886 501.

A comisión de seguimento da covid-19 na Baña reunirase o vindeiro mércores, día 14, para modificar a súa composición e integrar aos representantes políticos e veciñais que o soliciten.

Detalles

Escrito por Alicentis

Categoría: novas

Published: 26 Setembro 2020

Visitas: 816

O alcalde da Baña, José Antonio Pereira, volveu enviarlle o pasado mércores unha carta ao novo conselleiro de Sanidade, Julio García Comesaña, e a xerente da área sanitaria de Santiago, reclamándolles que o Sergas cubra as vacacións e baixas da pediatra que atende no centro de saúde, e tamén pedido a modificación do horario da matrona.

Pereira Gil recórdalle ao novo conselleiro que o servizo de Pediatría só funciona dous días á semana no centro de saúde da Baña e que dende o pasado 21 e ata o 6 de outubro a pediatra está de vacacións, unha situación “que obriga a anular todas as citas programadas para revisións e vacinacións” da cativada, “poñendo en risco aos menores”

Igual que fixo o pasado mes de decembro, o alcalde vólvelle reclamar aos responsables do Sergas que cubran as baixas e as vacacións da pediatra no centro de saúde bañense para garantir unha mellor atención aos nenos e nenas do concello e evitar que se teñan que desprazar ata o Hospital Clínico de Santiago, a outros municipios ou a pediatras de pago.

Nesta ocasión, o alcalde tamén lle reclama ao conselleiro e a xerente que modifiquen o horario da matrona, que está obrigando a afrontar unha serie de gastos que resultan “totalmente inasumibles para o Concello”. 

Recentemente, o Sergas modificoulle o horario á matrona, que agora consulta tamén os sábados (aínda que reduciu as horas de atención os días de semana que acode ao centro de saúde da Baña). Isto provoca que “o Concello teña que asumir o sobrecusto do servizo de limpeza e calefacción tamén os sábados, a pesares de que os sábado non asisten usuario a este servizo. Situación que resulta totalmente inasumible para o Concello”, recorda Pereira Gil na carta remitida  o pasado 23 de setembro a Consellería de Sanidade e á Xerencia da área sanitaria de Santiago 

Por estes motivos, Pereira Gil solicítalles ao conselleiro e a xerente que “cubran as vacacións e baixas” da pediatra titular do centro de saúde da Baña, para que os nenos sexan atendidos sen desprazarse fora do municipio. Tamén lles reclama a revisión do horario do servizo de matrona, “polos prexuízos que causa ao Concello”.

Detalles

Escrito por Alicentis

Categoría: novas

Published: 01 Outubro 2020

Visitas: 952

• As dúas mocións presentadas por Compromiso por Galicia foron aprobadas por unanimidade

• Representantes de PSdeG, PP e CxG reuniranse periodicamente para analizar o seguimento da pandemia e adoptar decisións consensuadas

• 22 de xaneiro e 9 de setembro, festivos locais para 2021

O Concello da Baña vai modificar a comisión de seguimento da covid-19 que pasará a estar constituída pola secretaria municipal e un representante de cada grupo político presente na Corporación, que proporá por consenso a adopción das medidas que considere necesarias e o traslado de información sistemática de xeito regular. A proposta presentada por Compromiso por Galicia foi aprobada por unanimidade, despois de que dende secretaría se aclarase que este órgano non é resolutivo e só pode facer propostas. A compra de máscaras para o alumnado do municipio que pediu CxG tamén foi aprobada por unanimidade, así como os días festivos para o 2021, que serán o 22 de xaneiro (San Vicente) e o 9 de setembro (Virxe das Dores), como vén sendo tradicional.

A nova comisión de seguimento da covid-19 constituirase a vindeira semana, momento no que se fixará a periodicidade das reunións. Inicialmente, tanto CxG como PP propoñen reunións semanais deste órgano consultivo, que quedou aberto a participación de representantes veciñais. Esta comisión viría a substituír á constituída ao inicio da pandemia, da que forman parte o alcalde a concelleira de Servizos Sociais e a secretaria.

César Ramos foi moi crítico co funcionamento desta comisión, que, dixo “facilita información parcial”. Por iso dende CxG propuxeron unha comisión paritaria entre os tres grupos políticos, que poida establecer medidas para evitar a propagación do coronavirus e facilitar información sistemática e imparcial. O PP tamén considera necesaria esta comisión para propoñer medidas por consenso. A secretaria municipal aclarou que este órgano non é resolutivo e que só podería propoñer actuacións.

Para axudarlles ás familias a sufragar os gastos extraordinarios que neste comezo de curso representa a compra de máscaras e xel, Compromiso por Galicia solicitou que o Concello merque máscaras para facilitarlle ao alumnado empadroado no concello. A proposta foi aprobada por unanimidade, e farase extensiva a todo o alumnado dos centros educativos da Baña, estean empadroados ou non, como solicitou o alcalde. Mercaranse máscaras reutilizables para entregarlle un mínimo de dúas a cada neno ou nena.

Tamén por unanimidade aprobouse a iniciativa de CxG para reclamarlle ao Goberno central que se aplique un IVA reducido do 4% á compra de máscaras e xel hidroalcohólico (actualmente é do 21%) como ocorre en outros países. Tamén se lle solicitará á Xunta de Galicia que asuma a desinfección dos parques infantís.

Dende o Partido Popular amosaron a súa satisfacción porque o IDAE aceptara as alegacións do Concello e manteña a subvención de 394.546,96 euros para substituír 2.281 luminarias do alumeado público do municipio (das 2.327 puntos existentes) por lámpadas.

Andrés García Cardeso (PP) preguntou por que non se modificou a ordenanza de taxa do PAI para establecer matrícula gratuíta para o segundo fillo, como anunciara a Xunta. A concelleira de Servizos Sociais, Mónica González, respondeu que ata estes últimos días, dende a Consellería de Política Social non aclararon como había que tramitar esa gratuidade. “A Xunta acaba de indicar que asumirá esa matrícula con cargo ao convenio e pediunos documentación, que estamos a preparar para remitirlle o antes posible. Ata o de agora, todos os concellos con puntos municipais de atención á infancia non tiñamos amparo legal para esa matrícula gratuíta”, explicou.

O vídeo íntegro do pleno pódese ver na canle de Youtube do Concello da Baña (neste enlace)

Nota: Fragmento de vídeo cedido por CxG dende 1:48:17 a 1:54:22

Detalles

Escrito por Alicentis

Categoría: novas

Published: 10 Setembro 2020

Visitas: 898

O Servizo Galego de Saúde (Sergas) chamou hoxe por teléfono ao alcalde da Baña para dicirlle que tiña que permanecer illado no seu domicilio ata o día 21, por ter estado en contacto co traballador do Concello que o luns, día 7, deu positivo na covid-19. 

José Antonio Pereira Gil seguirá teletraballando dende a casa ata que se cumpra a corentena ditaminada polas autoridades sanitarias. Na conversa telefónica de hoxe, o alcalde recordoulle ao persoal do Sergas que o pasado martes, día 8 de setembro, fixera unha proba PCR que dera negativo. Malia a este resultado, o Sergas insistiu que debía gardar corentena ata o día 21 deste mes.

Atendendo á petición das autoridades sanitarias, o alcalde permanece no seu domicilio dende que recibiu a chamada telefónica. José Antonio Pereira seguirá mantendo comunicación constante por vía telefónica e telemática co persoal do Concello para atender as súas obrigas ata que remate a corentena.

Ata o momento, as autoridades sanitarias tan só decretaron o illamento domiciliario do alcalde, que estivo en contacto co traballador municipal que o pasado luns deu positivo en coronavirus. O resto de persoal do concello pode seguir acudindo ao seu posto de traballo.

O resto de traballadores municipais deron negativo

A concelleira de Cultura e este traballador municipal foron os únicos que, ata o momento, deron positivo na proba do coronavirus e atópanse illados nas súas casas dende o sábado e o luns pasado, respectivamente. Ambos evolucionan favorablemente.

Ante esta situación, o mesmo luns, o Concello ofrecéulles a todos os traballadores e traballadoras municipais a posibilidade de facer probas diagnósticas (PCR ou test serolóxicos), que en todos os casos deron negativo. 

Hoxe, o Sergas púxose en contacto co alcalde para decretar o seu illamento domiciliario polo contacto que tivo co traballador municipal enfermo. 

José Antonio Pereira recoméndalle a veciñanza utilizar a asistencia telefónica e telemática para realizar as xestións que necesiten facer coa administración local, para evitar aglomeracións na casa consistorial. O alcalde insiste que nestes momentos é preciso manter a calma e extremar as medidas de seguridade e hixiene:

• Uso obrigatorio da máscara
• Hixiene continua de mans
• Manter a distancia social e evitar as reunións multitudinarias

En caso de ter síntomas compatibles coa Covid-19 (febre, tose seca, malestar xeral, dificultade para respirar), non vaian directamente ao centro de saúde, deben chamar ao 061. Poden obter máis información na web coronavirus.sergas.es e no teléfono 900 400 116.