Detalles

Escrito por Alicentis

Categoría: novas

Published: 29 Xullo 2021

Visitas: 528

• Aprobada a declaración institucional proposta polo PP solicitando o cese da violencia en Cuba e unha transición pacífica á democracia

• O apoio ao Xacobeo 21-22 contou cos votos a favor do PP e a abstención de PSdeG e CxG

• Por unanimidade o Concello solicitaralle ao Goberno central que anule a débeda que contraerán as entidades locais co Estado polo ingreso a conta do IVE de 2020

O Pleno do Concello da Baña aprobou onte por unanimidade unha declaración institucional presentada polo PP na que se esixe ao goberno de Cuba o cese da violencia inxustificada contra os cidadáns e unha transición pacífica á democracia. Na sesión ordinaria de xullo os tres grupos acordaron solicitarlle ao Goberno central que poña en marcha mecanismos para anular a débeda que os concellos van contraer este ano co Estado de xeito automático pola liquidación negativa da participación nos ingresos do Estado correspondentes ao ano 2020 (vídeo do pleno neste enlace).

O portavoz do PP xustificou a declaración institucional pedindo o cese da violencia en Cuba e unha transición cara a un réxime democrático no feito de que hai moitos emigrantes da Baña na illa caribeña, e que se manteñen relacións coa Asociación Unión Barcalesa na Habana. Os tres grupos apoiaron a iniciativa a prol dos dereitos humanos e en contra do bloqueo, solicitando a fin da violencia inxustificada do réxime cubano contra a cidadanía.

Tamén por unanimidade se aprobou solicitar ao Goberno central que anule a débeda que os concellos van ter de xeito automático este ano por un erro de cálculo do propio Goberno en referencia á Participación nos Ingresos do Estado (PIE) das entidades locais correspondentes ao ano 2020 e que, segundo cálculos da Federación Española de Municipios e Provincias pode ascender a 3.000 millóns de euros.

A proposta reclamando apoio ao Xacobeo 21-22 foi aprobada só cos votos a favor do PP. Tanto dende o goberno do PSdeG como dende Compromiso por Galicia mostráronse de acordo co espírito da proposta, pero consideran que na redacción da moción hai asuntos cuestionables, polo que decidiron absterse.

No capítulo de rogos e preguntas, Andrés García Cardeso propuxo que se solicite a Sogama que faga na Baña labores de concienciación na reciclaxe, e preguntou como estaba a execución do proxecto do IDAE para o cambio de luminarias led. O alcalde respondeulle que o cambio de luminarias está case rematado, e que se espera xustificar a subvención de case medio millón de euros a principios de agosto.

Pola súa parte, dende Compromiso por Galicia César Ramos volveu reclamar que se cambie a xestión do programa Madrugadores, por consideralo moi caro. O alcalde replicoulle que o goberno considera esta programa importante para favorecer que as familias sigan matriculando as súas crianzas no CPI da Baña. “Temos que mimar ao colexio, para que non baixe a matrícula. Este programa é deficitario, como a recollida de lixo ou a piscina, e non por iso se suprimen”, dixo José Antonio Pereira.

Ramos tamén preguntou polo proceso para elaborar a RPT (relación de postos de traballo) e por que o sindicato CSIF abandonou as negociacións, entre outras cuestións.

O vídeo integro do pleno pódese ver neste enlace.

Detalles

Escrito por Alicentis

Categoría: novas

Published: 27 Mai 2021

Visitas: 734

• Rexeitadas as bases reguladoras para a concesión do bonotaxi

• PP votou en contra ao non estar de acordo cos criterios fixados para a concesión, e CxG abstívose

• Gardouse un minuto de silencio polo pasamento do exconcelleiro socialista José Manuel Paredes Suárez, que foi soterrado pouco antes do pleno

O Pleno da Corporación da Baña rexeitou onte as bases reguladoras para a concesión do bonotaxi cos votos en contra de PP (5), a abstención de GxG (2) e o voto favorable do goberno socialista (4). Na sesión gardouse un minuto de silencio polo pasamento do exconcelleiro socialista José Manuel Paredes Suárez, que foi soterrado pouco antes da sesión, e de quen se destacou o traballo que realizou en favor da comunidade durante a súa etapa política (vídeo íntegro do pleno neste enlace).

O alcalde defendeu as bases reguladoras do bonotaxi como medida para facilitar a mobilidade das persoas con mobilidade reducida e persoas maiores de 65 anos con escasos recursos, para que poidan desprazarse dentro do municipio e nun radio inferior a 30 quilómetros. As bases, indicou José Antonio Pereira, foron elaboradas polo departamento de Servizos Sociais do Concello e tentan solucionar os problemas detectados na Baña.

José Andrés García Cardeso (PP) replicou que as bases eran un “amalgama de articulado” que non cumpren os criterios do bonotaxi, que se debería conceder en base a dous criterios claros: persoas con grandes discapacidades ou con mobilidade reducida. David Gontán (CxG) considerou que o texto que recolle as bases “é inmaturo” e debería modificarse, polo menos, en varios criterios.

Na votación, o PSdeG votou a favor (4), o PP en contra (5) e Compromiso por Galicia abstívose (2), polo que as bases foron rexeitadas.

No apartado de rogos e preguntas, e entre outros temas, o PP preguntou polos trámites realizados dende o equipo de goberno diante da Consellería de Educación para mellorar o CPI San Vicente, ou diante da Dirección Xeral de Xuventude para facer actividades ou intercambios xuvenís.

O alcalde contestou que sigue á espera de que dende a Consellería de Educación se dea resposta a solicitude de reunión solicitada para as melloras no colexio. Mónica González, pola súa banda, dixo que se solicitada unha subvención  para voluntariado xuvenil e campamentos, pero que non se solicitaran intercambios porque “non se considera o momento oportuno para facelo e porque non atopamos ningunha documentación do concello sobre os intercambios feitos no pasado”.

Dende Compromiso por Galicia, David Gontán fixo referencia ao asfaltado da estrada do Seilán e pediu que se revisen os sumidoiros  pluviais, “porque se botou asfalto por encima, para limpalas”. Pola súa banda, e entre outros temas, César Ramos preguntou cantas vivendas se van beneficiar da subvención para levar traída de auga á parroquia de Ordoeste.

O alcalde respondeu que se van beneficiar unhas dez ou once casas, e recordou que “é obrigación do Concello dotar de abastecemento de auga e saneamento a toda a veciñanza”.

O vídeo íntegro da sesión pódese ver no canal de Youtube do Concello da Baña, neste enlace.

Detalles

Escrito por Alicentis

Categoría: novas

Published: 02 Xullo 2021

Visitas: 591

• Aprobada unha partida de 30.000 euros para axudas a autónomos e empresas pola crise da covid-19 cos votos a favor de PSdeG e PP e a abstención de CxG

• Por unanimidade solicitaráselle ao Goberno central a rebaixa do recibo da luz reducindo impostos

• PSdeG e CxG rexeitaron a moción do PP contra os indultos aos líderes independentistas catalán e pedindo a dimisión do presidente do Goberno

• Leuse o manifesto de apoio a liberdade sexual de todas as persoas para conmemorar o Día da Liberdade Sexual

O Pleno da Baña aprobou na sesión ordinaria de onte crear unha partida de 30.000 euros para axudar ás persoas autónomas e empresas do municipio a paliar as consecuencias da covid-19 cos votos a favor de PSdeG e PP, e a abstención de CxG. Por unanimidade, a Corporación solicitaralle ao Goberno central que se rebaixe o prezo do recibo da luz actuando sobre determinados impostos e custes regulatorios. Cos votos en contra de PSdeG e CxG rexeitouse a moción do PP que condenaba os indultos aos líderes independentistas e pedía a dimisión do presidente do Goberno central. Na sesión leuse o manifesto de apoio á celebración do Día da Liberdade Sexual. Vídeo do pleno neste enlace

O Pleno da Corporación da Baña aprobou na sesión celebrada o 1 de xullo de 2021 o crédito extraordinario 1/2021 para dotar con 30.000 euros o fondo de financiamento para crear axudas municipais para paliar as consecuencias que a crise da covid-19 ocasinou ás persoas autónomas, empresas, pequenas empresas e micro empresas do municipio. Este punto foi aprobado cos votos a favor do equipo de goberno (PSdeG) e do PP e a abstención de Compromiso por Galicia. 

O alcalde, José Antonio Pereira, sinalou que se intentou incrementar o fondo cunha partida superior aos 30.000 euros, pero que non é posible polos compromisos adquiridos xa polo concello a nivel económico. Dende a oposición, Andrés García Cardeso considerou escasa a contía e dixo que o PP xa solicitara esta medida hai un ano, polo que apoiaría a proposta. David Gontán asegurou que Compromiso por Galicia está a favor de crear convocatorias de axudas ás empresas, pero non como se fixo, considerou que non se especifica como se concederán estas axudas nin a quen van dirixidas, polo que optaron por absterse na votación.

O Plan de acción para o clima e a enerxía sustentable (PACES), que ten por obxecto reducir a emisión de gases de efecto invernadoiro na Baña nun 40% antes de 2030 foi aprobado cos votos a favor de PSdeG e PP, aínda que no grupo popular criticou que non se solicitara a subvención para elaboralo. Por este mesmo motivo, CxG votou en contra neste punto. O alcalde replicou que cando o PSdeG asumiu o goberno da Baña o plan xa estaba iniciado e que foi elaborado por persoal municipal.

Sí houbo unanimidade para instar ao Goberno central a rebaixar o prezo do recibo da luz actuando sobre determinados impostos e custes regulatorios, como solicitaba a moción do PP. Os tres grupos estiveron de acordo que en España é un dos países da Unión Europea onde o prezo da luz é máis alto e onde se pagan máis impostos.

PSdeG e CxG rexeitaron a moción do PP par condenar os indultos outorgado aos líderes independentistas cataláns e solicitar a dimisión do presidente do Goberno, Pedro Sánchez. A moción non saíu adiante ao contar con 6 votos en contra e 5 a favor.

Despois do apartado de moción, Mónica González leu un manifesto sobre a celebración do Día da Liberdade Sexual ou Día do Orgullo LGTBI, que se conmemorou o luns 28 de xuño, motivo polo que durante a sesión estivo despregada no salón de pleno a bandeira arcoiris. No manifesto amósase a defensa e total compromiso do Concello da Baña coa igualdade de dereitos de todas e todos os cidadáns, sexa cal for a súa orientación e identidade de xénero, afectiva e/ou sexual.

No capítulo de rogos e preguntas, dende a oposición interesáronse pola execución de diferentes actuacións en estradas e preguntaron cando vai entrar en funcionamento a traída de abastecemento de auga en Emes Barcala, que está pendente da instalación eléctrica. O alcalde respondeu que se está tramitando o expediente para executalo o antes posible.

Andrés García Cardeso, entre outras cuestións, volveu insistir en que se vixíe a actuación das empresas madeireiras que están estragando camiños públicos e pediu que a brigada municipal limpe os espazos públicos máis concorridos, ademais de solicitar que se coide o mobiliario público.

Dende Compromiso por Galicia, César Ramos pediu os datos de asistentes ao servizo de madrugadores do CPI e reclamou o informe de secretaría para poder executar a moción de CxG aprobada no pleno de novembro para rebaixar o recibo do lixo un 15%.

O vídeo íntegro do pleno pódese ver neste enlace (preme aquí).

Detalles

Escrito por Alicentis

Categoría: novas

Published: 29 Abril 2021

Visitas: 710

• Rexeitada a proposta de orzamentos para 2021 cos votos en contra do PP (5) e a abstención de CxG (2)

• A Corporación aprobou o manifesto institucional “a prol do Concello da Baña libre dos parques eólicos”

• Unanimidade para rebaixar o recibo do IBI a dúas explotacións gandeiras do municipio e modificar o proxecto de pavimentación nunha vía pública en Nantón

O Pleno da Corporación da Baña rexeitou onte, cos votos en contra do PP e a abstención de CxG, a nova proposta de orzamentos presentada polo equipo de goberno. O Pleno apoiou ás asociacións de veciños de Cabanas, Fiopáns, Lañas e San Mamede do Monte co manifesto institucional A prol do Concello da Baña libre dos parques eólicos. Por unanimidade, aprobouse rebaixar o recibo do IBI a dúas explotacións gandeiras do municipio e para modificar o proxecto de pavimentación dunha vía pública en Nantón.

O alcalde levou onte a pleno unha nova proposta de orzamentos para o presente exercicio, que actualiza os ingresos e modifica algunha partida de gastos respecto da presentada ao pleno de febreiro e que fora retirada da orde do día. José Antonio Pereira defendeu que esta proposta permite incrementar o gasto social, licitar servizos (como o de Axuda no Fogar ou comedor sobre rodas), actualizar as nónimas dos cinco traballadores que teñen pendente de regularizar a súa situación e facerlle fronte aos gastos de persoal despois da sentenza do xulgado do social. “Son unhas contas realistas que solucionan moitos problemas da veciñanza”, insistiu o alcalde, que recordou que das dúas reunións ás que convocou á oposición só asistiu o PP a unha delas, e que nin populares nin Compromiso por Galicia fixeron ningunha aportación ás contas.

Dende o Partido Popular, Andrés García Cardeso volveuse ratificar nas críticas que xa fixera no pleno de febreiro aos presupostos, recriminándolle ao alcalde que non incluíra ningunha das peticións que o PP xa fixera nun escrito presentado hai un ano cunha serie de medidas para facerlle fronte a situación xerada pola pandemia. Cardeso criticou ao alcalde por non querer dialogar, non contar coa oposición e non coñecer a realidade dun concello rural.

Máis crítico foi o portavoz de Compromiso por Galicia. César Ramos volveu insistir en que se ían abster na votación e recordou que o seu partido está disposto a buscar unha solución para acabar esta lexislatura “se o alcalde dimite”. “Non temos problemas co Partido Socialista”, afirmou Ramos recordando que recuperaran a alcaldía grazas a CxG, “pero mentres siga sendo alcalde non volveremos reunirnos con vostede. Debe facer un acto de dignidade e dimitir”, díxolle a José Antonio Pereira.

O alcalde replicoulle afirmando que o Concello necesita uns presupostos que beneficien aos veciños. “Se non me quere a min na alcaldía, presente unha moción de censura. Eu estou aquí por un acordo plenario que vostede apoiou”, díxolle José Antonio Pereira ao portavoz de Compromiso por Galicia. “Con estes presupostos iralle mellor aos veciños, non ao alcalde. Vostede recoñece que os presupostos lle valen, que non lle vale é o alcalde”, concluíu Pereira.

Na votación, os presupostos foron rexeitados ao contar só cos votos a favor do equipo de goberno socialista (4 votos) e cos votos en contra do grupo popular (5 votos). Compromiso abstívose (2 votos).

Por unanimidade da Corporación aprobouse rebaixar o IBI nun 95% a unha granxa da Ermida, e nun 50% a outra de Cabanas. Neste caso só se rebaixa a metade porque existen instalacións dedicados a outros usos diferentes. Tamén por unanimidade se acordou modificar o proxecto de pavimentación nunha vía pública en Nantón.

A Corporación leu o manifesto institucional A prol do Concello da Baña libre dos parques eólicos no que os tres grupos políticos amosan o seu rexeitamento á instalacións de parques eólicos no municipio (de xeito especial ao de Troitosende) e apoian ás asociacións de veciños de Cabanas, Fiopáns, Lañas e San Mamede do Monte que no mes de marzo solicitaron o apoio do Concello para opoñerse a instalacións que se prevé construír en Troitosende. (Pode ler o manifesto íntegro neste enlace)

No capítulo de rogos e preguntas, entre outros temas o PP preguntou se se estaba a facer algún estudo para tomar medidas que eviten a soidade dos maiores, e volveu reclamar que obrigue a todas ás empresas madeireiras a solicitar licencia municipal e a reparar os camiños que sufran danos.

Dende Compromiso volveron pedir datos sobre as persoas da Baña que se inscribiron na aplicación Ximnasio TV e que se traslade aos grupos políticos da oposición os escritos que se dirixan ao pleno da Corporación, petición que tamén fixo o PP.

Vïdeo íntegro do pleno neste enlace (preme aquí)