- Detalles
- Escrito por Alicentis
- Categoría: novas
- Visitas: 645
-
Este plan marco, que foi aprobado por unanimidade, conta con 10 áreas e tres liñas mestras de actuación
-
Todos os grupos votaron a favor de modificar o POS 2022 e dos logotipos dixitais do concello
O Plan de voluntariado da Baña foi aprobado onte polos tres grupos políticos representados na Corporación, nun pleno no que a unanimidade foi a tónica nos tres puntos sometidos a debate. Todos os concelleiros e concelleiras votaron a favor de facer unha pequena modificación no POS 2022 referente a plataforma de numeración do municipio e para aprobar os logotipos dixitais do Concello. As discrepancias entre goberno e oposición chegaron no apartado de rogos e preguntas. A partir de agora, as sesións ordinarias pasan a ser bimensuais, os últimos mércores dos meses impares.
O tenente de alcalde, César Ramos, explicou que o Plan de voluntariado é un documento base distribuído en tres liñas estratéxicas e dez áreas de actuación para regular o servizo de voluntariado en diferentes temáticas. A preguntas da concelleira socialista Mónica González, Ramos explicou que se vai incluír tamén ao voluntariado xuvenil e abrirse as asociacións ou entidades do municipio que o soliciten. En función do número de persoas que se inscriban poderase habilitar un espazo físico en dependencias municipais. O plan de formación farase de acordo coa Secretaría Xeral de Xuventude da Xunta. O plan foi aprobado por unanimidade.
Tamén por unanimidade aprobáronse os logotipos dixitais do Concello e das diferentes concellarías. Co mesmo resultado saíu adiante a modificación puntual do POS 2022, para atender a unha petición da Deputación da Coruña relativa a plataforma de numeración municipal que incluíra o Concello no Plan de Obras e Servizos.
Antes do capítulo de rogos e preguntas, o alcalde informou que nos vindeiros días, unha vez que se regularice a situación tras a folga de transporte, vaise trasladar ata A Coruña o material doado pola veciñanza da Baña para axudar ao pobo de Ucraína afectado pola guerra. Andrés García Cardeso agradeceu a colaboración dos veciños e veciñas da Baña nesta campaña.
O pasado desfile de Entroido foi un dos temas máis polémicos tratados nos rogos e preguntas. Dende o PSdeG, José Antonio Pereira pediu a dimisión da concelleira de Cultura, Lorena Trillo, e cualificou de “acto de censura” que non se lles permita aos Carnavaleiros da Baña cantar as súas coplas, “como levan facendo dende hai vinte anos” porque facían unha parodia da moción presentada por PP e Compromiso contra o goberno socialista da Baña.
Dende o equipo de goberno, o alcalde, Andrés García Cardeso, considerou unha “mentira maiúscula” as apreciacións do voceiro socialista, e recordou que tanto dende a organización como a propia condutora do desfile lle ofreceu o micrófono e a megafonía do Concello para que os Carnavaleiros da Baña puideran completar a súa actuación. César Ramos e Lorena Trillo, pola súa banda, incidiron na mesma apreciación. “Ninguén censurou nada”, aseguraron, e reiteraron que á comparsa da Baña falloulle a megafonía que tiñan instalada no camión e ofrecéuselle a da organización. “Eu mesma me puxen en contacto con eles para pedirlles desculpas e lles ofrecín participar na Festa da filloa, algo que rexeitaron”, engadiu a concelleira de Cultura.
Os problemas co transporte escolar, as invitacións e os gastos da Festa da filloa da pedra foron outros dos asuntos formulados polo grupo socialista nos rogos e preguntas.
- Detalles
- Escrito por Alicentis
- Categoría: novas
- Visitas: 599
A concelleira Lorena Trillo leu hoxe o manifesto institucional do Concello da Baña polo 8M Día Internacional da Muller, nun acto celebrado ao mediodía na Praza do Concello ao que asistiron membros da Corporación local e veciñas e veciños do municipio.
MANIFESTO INSTITUCIONAL 8 DE MARZO DE 2022
O 8 de marzo é una data destacada no calendario internacional para recordar que a desigualdade de xénero aínda é una realidade en todo o mundo e que se ben foron moitos os logros alcanzados, quedan moitas inxustizas por superar.
O Día Internacional da Muller conmemora a loita das mulleres por alcanzar a igualdade en sociedade e, polo tanto, é unha xornada de reivindicación e loita contra a desigualdade entre homes e mulleres e representa unha homenaxe ás mulleres que impulsaron estes ideais.
Reivindicamos polo tanto a participación das mulleres e a adopción de decisións de forma plena e efectiva na vida pública, así como a eliminación da violencia para lograr unha igualdade plena e o empoderamento de todas as nenas e mulleres.
No día de hoxe é necesario reflexionar sobre os logros alcanzados nos últimos anos en materia de igualdade, que a pesar de ser moitos, son insuficientes, polo que é preciso planificar os retos pendentes para erradicar todas as formas de discriminación contra nenas e mulleres que persisten aínda hoxe na sociedade.
Hoxe tamén é o día de poñer de manifesto que foron 43 as mulleres vítimas de violencia de xénero no ano 2021 e 6 menores como vítimas da violencia vicaria. O noso sentido recordo e homenaxe a todas elas e ás súas familias, así como a máis firme condena.
Queremos xa que logo, parar de contar asasinadas, violadas, agredidas, discriminadas e excluídas; porque loitamos contra a explotación dos nosos corpos e vidas. Porque demandamos unha educación pública de calidade, non sexista, na que o feminismo estea presente nos currículos e materias; porque queremos que se erradique a fenda salarial, a precariedade e o teito de cristal, a divisón de traballo por xéneo ou a feminización do traballo.
Dende o municipalismo, como coñecedores das necesidades reais da cidadanía e conscientes da potencialidade da igualdade efectiva entre homes e mulleres, queremos que este día 8 de marzo sirva para mobilizar as mulleres e impulsar o empoderamento das mulleres, isto é: MAIS MULLERES Á FRONTE DA TOMA DE DECISIÓNS MUNICIPAIS.
- Detalles
- Escrito por Alicentis
- Categoría: novas
- Visitas: 450
Membros da Corporación da Baña e veciñanza xuntáronse hoxe na Praza do Concello para rexeitar a agresión da Federación Rusa a Ucraína.
A concelleira Lorena Trillo deu lectura á declaración institucional da FEMP para "condenar enérxica e rotundamente os ataques perpetrados en diversas cidades ucraínas, así como o despregue militar desencadeado polo goberno ruso e todas as consecuencias derivadas".
Na concentración pacífica, celebrada hoxe ás 12.30 do mediodía, gardouse un minuto de silencio polas vítimas.
- Detalles
- Escrito por Alicentis
- Categoría: novas
- Visitas: 559
A lectura dun manifesto este 8M ao mediodía na praza do Concello, unha homenaxe o vindeiro domingo 13 de marzo ás protagonistas da serie audiovisual A Baña en feminino. Visibilizando a muller do rural, e a proxección dunha curtametraxe serán os actos cos que o Concello da Baña conmemore este ano o Día da Muller.
Á tradicional lectura do manifesto que cada ano se fai o día 8 de marzo, A Baña engade unha serie de actividades que se desenvolverán o domingo 13 de marzo pola mañá. Neste día, as escolas vellas acollerán unha homenaxe ás doce protagonistas da serie audiovisual A Baña en feminino, vídeos que a razón dun por mes divulgou o Concello ao longo de todo o ano 2021 coa intención de convidar á reflexión sobre o papel das mulleres nas contornas rurais.
Os actos comezarán ás 11 horas coa proxección de As tres caídas de María Santiso, curtametraxe que gañou o Premio do Público na 41 Semana do cine de Lugo e que se achega á sociedade rural galega coa intención de estimular o pensamento crítico sobre os roles tradicionais das mulleres e dos homes. Tras a película, haberá unha mesa redonda co director e coas protagonistas do filme.
Para os actos do domingo 13 de marzo quedan unha ducia de prazas libres para público, polo que as persoas que queiran asistir deberán anotarse no Concello (981 886 501) antes deste venres 11 de marzo, ás 14.00 horas.
- Detalles
- Escrito por Alicentis
- Categoría: novas
- Visitas: 581
-
Na sesión de onte ratificouse por unanimidade a ordenanza de impulso do uso do galego e un recoñecemento extraxudicial de crédito
-
Cos votos do equipo de goberno aprobáronse as melloras de camiños en Cabanas, Menlle de Arriba, A Ermida e Gosende
-
A partir de agora as sesións ordinarias serán bimensuais, o último mércores dos meses impares
-
O alcalde informa de que xa se remitiu á Xunta o noventa por cento da documentación solicitada trala inspección ao PAI
A Corporación da Baña aprobou na sesión ordinaria de onte, e por unanimidade, a ordenanza de impulso do uso do galego e unha modificación extraxudicial de crédito para pagar facturas de provedores. Cos votos a favor do equipo de goberno (7) e a abstención do PSdeG (4), aprobáronse os proxectos para mellorar camiños rurais en Cabanas, Mundris, Menlle de Arriba, A Ermida e Gosende-Carballeira. A partir de agora, os plenos ordinarios pasan a ser bimensuais, celebrándose o último mércores dos meses impares. No capítulo de rogos e preguntas, o alcalde sinalou que moitas das deficiencias atopadas no PAI por unha inspección da Xunta están xa solucionadas ou en vías de solución, e aclarou que todo o persoal está vacinado e ten o certificado de delitos sexuais xa actualizado (ver vídeo íntegro do pleno neste enlace).
Os dous primeiros puntos da sesión foron aprobados por unanimidade. César Ramos defendeu que a ordenanza para o impulso do galego no Concello da Baña ten por obxectivo fomentar o uso do noso idioma e dar cumprimento á Lei de normalización lingüística. Tamén co voto favorable dos once concelleiros se aprobou o recoñecemento extraxudicial de crédito, que permitirá pagarlle aos provedores facturas pendentes do ano pasado. A pesar da unanimidade no debate deste punto, o portavoz socialista, José Antonio Pereira, acusou aos socios de goberno de provocar esta situación ao impedirlle ao ex goberno socialista dedicar no POS dos dous últimos anos a gastos correntes a mesma cantidade que viña destinando o Partido Popular. O alcalde, Anddrés García Cardeso, recordoulle ao seu antecesor que “a situación no Concello é insostible, con facturas sin pagar dende hai máis dun ano, que están prexudicando a moitos provedores”. Cardeso engadiu que PP e Compromiso “non bloqueamos pago ningún” e responsabilizou ao ex rexedor socialista de facer “unha pésima xestión económica”.
As obras obras para incluír no Plan Marco de Agader, para mellorar camiños municipais de acceso a parcelas agrícolas, aprobouse cos votos a favor do equipo de goberno (7) e a abstención dos socialistas (4). A proposta de PP de Compromiso e mellorar accesos en Cabanas, Mundris, Menlle de Arriba, A Ermida e Gosende-Carballeira por uns 84.000 euros. Os socialistas amosáronse dispostos a votar a favor se se facían de cemento dous tramos con moita pendente en ambos camiños. O alcalde aclaroulles que as bases aprobadas por Agader impiden este ano utilizar cemento nas melloras do Plan Marco. García Cardeso sorprendeuse pola abstención dos socialistas, “pois tanto estas obras como as do POS contemplan a metade das vosas propostas”.
No debate para cambiar as sesión plenarias a unha periodicidade bimensual houbo un intenso debate. Dende o PSdeG, José Antonio Pereira, acusou ao goberno bipartito por cambiar os plenos “cando en 2019 obrigaron ao goberno socialista a facelos mensuais”. Para apoiar a proposta solicitou estar presente na xunta local de goberno. César Ramos recordoulle ao portavoz socialista os seus cambios de criterio, “pois en 2015 propuxera plenos mensuais, e no 2019 queríaos trimestrais”. Na votación, o punto saíu adiante cos votos a favor do goberno (7) e en contra dos socialistas (4). A partir de agora os plenos celebraranse cada dous meses, o último mércores dos impares, polo que as seguintes sesións serán en marzo e maio.
Punto de Atención á Infancia
As preguntas formuladas por Mónica González Blanco respecto da inspección feita no PAI pola Xunta de Galicia, o alcalde aclarou xa se remitiu á Consellería de Política Social a maioría da documentación solicitada, ademais de actualizar a información do PAI no Rexistro de Entidades Prestadoras de Servizos Sociais do Goberno galego.
O alcalde explicou que despois de recibir a acta de inspección, o pasado día 4, comunicouno no pleno do día 9. Recentemente, el, a concelleira de Cultura e a traballadora social mantiveron unha xuntanza co persoal do PAI para axilizar a entrega de toda a documentación solicitada pola Xunta. Neste senso, tanto o alcalde como a concelleira socialista coincidiron en que todas as traballadoras están vacunadas e teñen certificado de delitos sexuais, aínda que nalgúns casos pendentes de actualizar, algo que xa se está tramitando. Neste senso, e coa intención de tranquilizar ás familias, aseguraron que o único que faltaba o día da inspección e amosarlle a administración autonómica os documentos actualizados que acreditan este punto. Algo que se está a facer.
José Antonio Pereira volveu preguntar polo reparto de calendarios, e pola distribución entre os establecementos hostaleiros duns manteis conmemorativos do Día de Rosalía “que non chegaron a algúns establecementos”. A concelleira de Cultura respostoulle que se os salvamanteis se entregaron a todos os establecementos que onte estaban abertos e quixeron colaborar coa iniciativa. “Hai varios locais que están pechados estes días, outros que os rexeitaron e algúns cos que non logramos contactar”, asegurou.