• Tres representantes da asociación e a concelleira de Cultura estiveron esta mañá facendo filloas acompañadas pola música dos Faíscas da Pontraga

  • De 19.00 a 21.30 continuarán ofrecendo filloas para degustar cos petiscos dos diferentes postos do mercado compostelán

  • Mañá acudirán ao programa ‘Luar’ da TVG para difundir a festa que se vai celebrar o 16 de febreiro, con foliada filloeira o sábado día 15

20200206 Filloa galiciana web

Filloas da pedra da Baña con mel, chourizo e rixóns, ou acompañadas dos diferentes petiscos dos postos do mercado gastronómico La Galiciana de Santiago. Deste xeito está a promocionar hoxe en Compostela a Asociación Filloas da Pedra a festa gastronómica que se vai celebrar a vindeira fin de semana na capital da Baña. Os actos festivos comezarán o sábado, día 15, coa Foliada Filloeira dende as 16.30 horas e durante a cal, ademais de boa música, poderán degustarse filloas da pedra da Baña e filloas de Muimenta.

O día grande da XVII Festa da Filloa da Pedra da Baña celebrarase o domingo 16, dende as dez da mañá. Unha exaltación gastronómica que a Asociación Filloas da Pedra da Baña e a Concellaría de Cultura promocionan hoxe no mercado gastronómico compostelán La Galiciana.

Arita Pais, Lola Landeira, Mónica Tomé –representantes da Asociación– e Mónica González, concelleira de Cultura, estiveron pola mañá facendo filloas para que as puidesen degustar as persoas que acudiron ata La Galiciana. A promoción continuará esta tarde, de 19.00 a 21.30 horas, con degustación de filloas da pedra e dos diferentes petiscos que os postos gastronómicos presentes na Galiciana ofrecerán aos asistentes.

Ademais, a Asociación Filloas da Pedra estará mañá venres no programa ‘Luar’ da TVG para dar a coñecer esta festa en toda Galicia. A intención é que o vindeiro domingo, 16 de febreiro, milleiros de persoas participen na Baña nesta exaltación gastronómica.

Programa do día 16

O programa da XVII Festa da Filloa da Pedra comezará o domingo, ás 10.00 horas, coa apertura do recinto. Ás 11.30 haberá un obradoiro de construción de horta ecolóxica en bancais, que impartirán os participantes no obradoiro de emprego Xóvenes2019. A música matinal correrá a cargo dos Campantes da Baña (12.30 horas), antes de que o director do programa radiofónico ‘+d1 Compostela’, de Onda Cero, Ramón Castro, pronuncie o pregón.

Para xantar, os asistentes poderán degustar filloas da pedra da Baña con lacón con grelos, chourizo, orella, e filloas doces para a sobremesa. Ás 15.30 horas, a Charanga BB+ animará a bailar aos asistentes e, ás 16.30, Silvia Capelo impartirá un taller de estampación e creación de camisetas. A verbena coa orquestra Finisterre, dende as 18.00 horas, permitirá continuar a festa.

A Asociación Filloas da Pedra da Baña, que conta coa colaboración do Concello, ten programadas diferentes actividades para que todos os asistentes poidan gozar dunha xornada festiva. Tirolina, rocódromo e outros divertimentos. Postos de artesanía e gastronomía e os polbeiros tampouco faltarán a esta cita.

 

20200128 Expo violencia xenero cartelO vindeiro venres, 31 de xaneiro, inaugúrase na casa da cultura da Baña a mostra Á violencia de xénero… dille NON!, unha iniciativa da Secretaría Xeral de Igualdade da Xunta que ten como obxectivo impulsar a sensibilización e prevención da violencia de xénero entre a mocidade.

Trátase dunha exposición gráfica ilustrada, dirixida a axudar aos adolescentes a recoñecer, identificar e rexeitar condutas sexistas, nocivas nas súas relacións. Once paneis, de 70 x 100 centímetros, amosan condutas tóxicas como o control, a manipulación, o abuso, a “sextorsión”, a chantaxe emocional e outras formas de maltrato.

Á violencia de xénero… dille NON! inscríbese no conxunto de actuacións que está impulsando a Xunta de Galicia nos 78 concellos adheridos á Rede de entidades locais contra a violencia de xénero. Poderá visitarse ata o xoves 13 de febreiro na casa da cultura da Baña de luns a venres, en horario de 9.00 a 15.00 e de 16.30 a 19.30 h.

20191220 Apalpador concerto

Mañá venres, día 20 de decembro, toda a cativada da Baña ten unha cita ás 18.15 na Casa da Cultura, para recibir un ano máis a visita do Apalpador, que correrá a cargo da compañía o Carballo con Botas. Pero a diversión non rematará aquí porque ás 19.30 horas Senén Vaamonde, Manuel Dopico e Alfredo Dourado (A Roda) porán música á tarde con ‘Os merlos do amencer’, un concerto didáctico de dinamización lingüística.

A Consellería de Economía, Emprego e Industria convoca o programa Emprega Xuventude coa finalidade de facilitar a inserción laboral das persoas mozas menores de 30 anos desempregadas que presentan desvantaxes e dificultades particulares para permaneceren no mercado de traballo, favorecer o emprego estable e facilitar a empregabilidade e ocupabilidade.

Por medio desta convocatoria as empresas terán a posibilidade de obter axudas para a contratación indefinida inicial, a contratación temporal cunha duración inicial mínima de 12 meses e formación por conta allea

Inclúense dous tipos de axuda compatibles:

- Bono de contratación, por medio do cal se proporcionará unha subvención para a contratación indefinida inicial e a temporal, cunha duración mínima inicial de doce meses, das persoas desempregadas mozas menores de 30 anos.
- Bono de formación (opcional), dirixido ás persoas contratadas por medio desta orde, para levar a cabo accións formativas que melloren os seus coñecementos e habilidades relacionados co posto de traballo

Prazos:
- As solicitudes de axudas polas contratacións realizadas entre o 1 de outubro de 2019 e a data da publicación destas axudas deberán presentarse antes do 9 de marzo de 2020.
- As axudas previstas polas contratacións subvencionables realizadas desde a entrada en vigor desta orde deberán solicitarse ata o último día do segundo mes seguinte á data en que se inicie a relación laboral indefinida ou temporal pola cal se solicita subvención.

O prazo para a presentación das solicitudes de axudas estará aberto ata o 30 de setembro de 2020.  

As solicitudes están dispoñibles en https://sede.xunta.gal co código TR349T
Máis información no DOG do 7 de xaneiro de 2020 e en http://emprego.ceei.xunta.gal/portada-conselleria

20191209 Cartel silleda parkA veciñanza da Baña está convidada a participar nunha saída ao Silleda Park o 27 de decembro. O precio da actividade será de 4 euros para os participantes maiores de 3 anos, xa que os menores de esa idade poderán ir gratis. O transporte corre á conta do Concello. O autobús sairá da Praza do Concello o día acordado ás 15.30 horas.

Unha vez no Silleda Park, os asistentes poderán gozar do saltón, simulador, pista de coches, dragón, mini scalextric, inchables, tren da bruxa, pistas deportivas, maquillaxe e globoflexia, do show dos pallasos, da exposición de dinosaurios animatronics e de moitas atraccións e actividades máis.

A volta do recinto feiral internacional de Galicia A BANCA-Silleda-Pontevedra será ás 22.15 horas.

Para apuntarse, os interesados deben dirixirse a Concellería de Cultura do Concello da Baña ata o 24 de decembro, día no que remata o prazo de inscrición. A veciñanza empadroada na Baña terá preferencia.

Os menores deben ir acompañados de un adulto, tendo en conta que non excederá a dous adultos por unidade familiar.