20181010 Cartel Escolas Municipais

O vindeiro luns, 15 de outubro, darán comezo as actividades das Escolas Deportivas Municipais, que este curso 2018-2019 ofrecen oito modalidades diferentes: patinaxe, tenis de mesa, bádminton-tenis-pádel, fútbol sala, baloncesto, baile moderno, pilates e aero-step-zumba. 

As persoas interesadas deberán anotarse no Concello da Baña o antes posible. As tarifas estipuladas son para a tempada completa, aínda que o pago farase de xeito fraccionado en tres prazos: o primeiro este mes de outubro, o segundo en xaneiro e o último, en abril.

A tarifa individual é de 60 euros anuais para unha soa actividade e de 90 euros para dúas ou máis disciplinas.

Hai tamén abonos familiares, que custarán 99 euros anuais para dous membros da mesma familia cunha soa actividade cada un; e de 132 euros cando un dos membros acuda a dúas ou máis das actividades ofertadas.

No caso de que participen nas escolas deportivas tres ou máis membros da mesma familia, os prezos serán de 120 euros (unha actividade cada un) e de 150 euros cando un deses membros se anote a dúas ou máis actividades.

Os horarios pódense consultar nos documentos adxuntos, nos que tamén se poden descargar tanto a ficha de inscrición e datos médicos, como o documento para a domiciliación bancaria da cota. Estes documentos en formato PDF pódense cubrir directamente dende o ordenador ou imprimilos para facelo a man.

20181010 3 Horarios Escolas Deportivas

Attachments:
Download this file (20181010_1_Inscricion_Escolas_Deportivas.pdf)20181010_1_Inscricion_Escolas_Deportivas.pdf[Boletin inscrición ás Escolas Deportivas Municipais 2018-19]192 kB
Download this file (20181010_2_Domiciliacion_ecolas_deportivas.pdf)20181010_2_Domiciliacion_ecolas_deportivas.pdf[Orde domiciliación bancaria inscrición Escolas Deportivas]135 kB
Download this file (20181010_3_Horarios_Escolas_Deportivas.pdf)20181010_3_Horarios_Escolas_Deportivas.pdf[Horarios Escolas Deportivas curso 2018-2019]106 kB
Download this file (20181010_4_Cartel Escolas Deportivas 2018-19.pdf)20181010_4_Cartel Escolas Deportivas 2018-19.pdf[Cartel Escolas Deportivas Municipais 2018-19]1203 kB

20181007 Trofeos CMP Trail primer plano

 

20181007 Podium TrailVíctor Cousillas Diéguez, do A.D. Jarnachas, foi o gañador do CMP Trail da Baña, ao percorrer os 27 km da proba longa en pouco máis de dúas horas (2:10:23). O segundo e terceiro posto foi para Hamza Belhadj (2:12:27) e Roberto Tuñas González (2:12:47). Os favoritos en categoría masculina entraron a continuación: Luis Calvo Castro (2:14:20), Pedro Nimo (2:18:17) e Alberto Carou (2:21:52).

En categoría feminina a gañadora foi María Fabeiro Romero, do CDM Vértice, cun tempo de 3:00:24), seguida de María Marque Martínez, do Tartarugas, con 3:07:11 e Sonia Botana González, do clube Nosportlimit, cun tempo de 3:08:10.

Polo que respecta ao minitrail, no que os participantes percorreron 17 km, o gañador en categoría masculina foi Moisés Bereijo Nebril, cun tempo de1:28:32, seguido de Adrián Iglesias Penido (1:29:46) e Manuel Ces Cristobo (1:30:05). Na categoría feminina, a primeira na liña de meta foi Vanesa Mella Barbeito (1:56:27), seguida de Noelia Amado Fernández (2:02:52) e Andrea Martínez (2:03:59).

A celebración desta proba, o terceiro trail que organiza o Concello da Baña, congregou a trescentos participantes no campo de Cartas e a centros de afeccionados que durante toda a mañá seguiron en directo todos os detalles da proba.

Moitos dos participantes loubaron ao chegar a meta a organización do CMP Trail da Baña, así como o percorrido e os paisaxes que puideron admirar durante o percorrido. Algunhas das participantes, e tamén algún que outro corredor, sinalaba, ademais, a dureza e a distancia do percorrido, sobre todo facendo mención aos 17 quilómetros do minitrail.

Nada máis cruzar a meta, os e as atletas puideron repoñer forzas a base de froitas, auga, refrescos e tamén bocadillos de xamón asado que a organización puxo a súa disposición, mentres os máis cativos xogan nos inchables instalados no campo. Os atletas máis perxudicados fisicamente acudiron a recibir unha masaxe dos profesionais de Fisiovita Centro de Fisioterapia que montou unha carpa na liña de meta para axudar a todas as persoas participantes no CMP Trail da Baña.

20181007 Podium MiniTrailE despois dunha intensa mañá, na que acompañou o bo tempo, tocou o turno da entrega de trofeos. O alcalde da Baña, Andrés García Cardeso; o concelleiro de deportes, Manuel Tourís Fernández; o representante de CMP, Marcos Sánchez; e Manuel Baleato, de Talleres Baleato, entregábanlles a cada un dos gañadores de cada categoría os trofeos que lles pasaba Orlando Pérez Alvite, de Deportes Alvite.

O Concello quixo entregar tamén un agasallo aos principais patrocinadores da proba. Marcos Sánchez, Manuel Baleato e Orlando Pérez recibiron como recordo unha réplica da casa do concello.

Agora, dende a Concellaría de Deportes están xa a pensar na seguinte edición do CMP Trail da Baña e como mellorar tanto o percorrido como a organización.

Albumes de fotos no Facebook do Concello da Baña.

Fotos dos gañadores e entrega de premios (preme aquí)  

Fotos da carreira e ambiente no campo de Cartas (preme aquí) 

20180926 Trail Presentacion 1

O ex campión de España de maratón e cinco veces campión galego de cros, Pedro Nimo, será un dos corredores que o vindeiro 7 de outubro tome a saída na CMP Trail da Baña que organiza o Concello en colaboración con Grupo de Trail e Montaña (GTraM) Val de Barcala. Esta carreira de montaña contará con probas de 25 e 17 km de percorrido e cunha andaina non competitiva de 10 quilómetros, que discorrerán polos montes da comarca, nun circuíto de dificultade media. Para facilitar a participación, a organización pon á disposición dos atletas servizos gratuítos de gardería, catering e fisioterapia.

O CMP Trail da Baña foi presentado esta mañá no Hostal dos Reis Católicos nun acto no que alcalde da Baña, Andrés García Cardeso, recordou que dende hai anos o Concello leva apostando “pola organización de probas deportivas como unha forma de fomentar unha vida saudable e o espírito de esforzo, superación e colaboración como principais ferramentas para ser mellores persoas”.

20180926 Trail Presentacion 2

Despois de organizar durante tres anos o Campionato Escolar de Campo a Través e o Campionato Galego de Cros Curto, o Concello da Baña quere “contar cunha proba que nos poida caracterizar dentro deste deporte”, destacou Andrés García, motivo polo que apostaron polo Trail da Baña, “unha carreira de montaña dunha dificultade media que nos permite amosar as fermosas paisaxes que temos no noso concello”.

Para o atleta Pedro Nimo, “a opción de dúas distancias e dunha andaina convida a participar” no Trail da Baña. Nimo autodefiniuse como un “atleta de asfalto” para o que “este tipo de probas, que esixen un traballo de forza, encaixa ben nestas datas como preparación para obter uns bos resultados a longo prazo”. “O desnivel de 780 metros é esixente pero non prohibitivo”, explicou o atleta, para o que a carreira bañesa “é unha grande iniciativa nunha zona próxima a Santiago que ten moito por descubrir”.

Esta é a terceira trail que organiza o Concello da Baña, “que este ano se viu respaldada co patrocinio de CMP, “unha marca italiana de roupa deportiva recoñecida internacionalmente”, explicou García Cardeso, que agradeceu o apoio de todos os patrocinadores. Pola súa banda, Marcos Javier Sánchez Varela, representante de CMP, sinalou que “a profesionalidade coa que se está a organizar o trail foi decisiva para que dende Italia se quixeran implicar coa proba”. Sánchez anunciou a intención de CMP de continuar patrocinando o Trail da Baña.

Ademais, esta proba conta coa colaboración de Gráficas Esteiro (Santiago), Deportes P. Alvite (Santa Comba), Talleres Baleato (Val do Dubra), Coca Cola, e de emesports.es, a plataforma on-line de inscricións que tamén se encargará da loxística e do control de tempos.

Menos de 800 metros de desnivel

20180913 Trail Cartel Grande

A proba de 25 quilómetros, ou trail longo, disputarase nun circuíto dunha dificultade media, cun desnivel positivo duns 780 metros; mentres que o mini trail (17 km) conta cun desnivel positivo aproximado de 500 metros, segundo explicou Sergio Vieites, presidente do GTram Val de Barcala. Os corredores tomarán a saída no campo de fútbol das Cartas as 09.45 horas (trail) e ás 10.15 (andaina). A meta estará situada tamén no campo das Cartas, onde os atletas poderán recoller os dorsais o mesmo domingo, 7 de outubro, dende as 08.00 horas.

A estas dúas probas, na que poderán participar corredores federados ou non federados maiores de 18 anos, engádese unha andaina de 10 quilómetros non competitiva, a que tamén poderán ir menores de 16 anos sempre que vaian acompañados dun adulto.

Nestes intres hai xa inscritos máis de 40 atletas no CMP Trail da Baña. Os interesados en participar deberán anotarse antes das 23.59 horas do vindeiro xoves, 4 de outubro, na web www.emesports.es, na que tamén se poderá consultar o regulamento.

O percorrido, que ten unha dificultade media, transcorre polos montes da Baña. Estará sinalizado e contará con dous puntos de avituallamento líquido e sólido (para o trail), e un punto para o mini trail. Os participantes deberán levar, como material recomendable para esta proba, impermeable, teléfono móbil cargado, vaso e sistema de hidratación propio, segundo explicou Sergio Vieites.

Haberá premios para os tres primeiros da xeral, e de cada unha das tres categorías establecidas para o trail, tanto en homes como en mulleres: absoluta (maiores 18 anos), veteranos 1 (maiores 40 anos) e veteranos 2 (maiores 55 anos).

Na presentación de hoxe no Hostal estiveron presentes, ademais de Andrés García Cardeso e Sergio Vieites, o atleta Pedro Nimo; Marcos Javier Sánchez Varela, representante de CMP; e representantes das marcas patrocinadoras.

20181005 trail baña Camisetas

Pedro Nimo e Alberto Carou figuran entre os 300 atletas que este domingo participarán no CMP Trail da Baña, unha carreira de montaña que consta de tres probas: o trail longo, de 27 km con 780 metros de desnivel; unha minitrail de 17 km e 500 metros de desnivel; e unha andaina non competitiva de 10 quilómetros que permitirán ás persoas participantes gozar das excelentes paisaxes da Baña.

Máis da metade dos inscritos competirán nas dúas probas de maior dificultade, 62 deles no trail longo e outros 92 no minitrail. Os atletas tomarán a saída no campo de Cartas ás 09.45 horas. Media hora despois comezarán a andaina non competitiva as 142 persoas anotadas, que percorrerán 10 quilómetros polos montes da Baña.

Organizado polo Concello da Baña e o grupo GTraM Val de Barcala, o CMP Trail da Baña conta co patrocinio de CMP (unha marca italiana especializada en roupa e calzado deportivo), Talleres Baleato (Val do Dubra), Gráficas Esteiro (Santiago), Deportes P. Alvite (Santa Comba), Coca Cola e emesports.es. 

Os participantes recibirán, entre outros agasallos, unha camiseta de CMP e contarán cun servicio de fisioterapia e cátering para repoñer forzas ao final da proba. Todos os atletas terán tamén á súa disposición un servizo de gardería no que deixar aos seus fillos ou fillas.

As inscricións pódense facer en emesports.es ata o catro de outubro

O pasado ano participaron máis de 250 atletas


20180913 Trail Cartel GrandeO Concello da Baña segue apostando pola organización de carreiras de montaña e o vindeiro 7 de outubro celebrarase o Campagnolo Trail, no que os corredores poderán elixir entre participar na proba longa, de 25 quilómetros, ou na curta, de 17 km. Tamén se celebrará unha andaina sobre unha distancia de dez quilómetros. Para a organización destas probas, a Concellería de Xuventude e Deportes conta coa colaboración do Clube GTraM Val de Barcala (grupo de trail e montaña).

Os atletas percorrerán os montes do concello, nun circuíto de perfil medio-baixo, que permitirá gozar dos fermosos paisaxes da comarca de Barcala.

Os interesados en participar na proba deberán ter máis de 16 anos e inscribirse na web www.emesports.es ata as 23.59 horas do xoves 4 de outubro. O prezo da inscrición é de 15 euros para o trail longo (25 Km), 10 euros para a proba curta (17 km) e de 5 euros para a andaina de 10 km. A andaina celebrarase para atender a demanda de moitos afeccionados. Aínda que non será competitiva, terá certas pautas de pasos e controis.

Para a organización desta proba, a Concellería de Deportes do Concello da Baña conta co patrocinio de CMP Campagnolo, especializada en produtos de roupa e calzado especificamente deseñados para a práctica deportiva. Ademais, o Concello conta coa colaboración de Gráficas Esteiro, Deportes P. Alvite, Talleres Baleato e Coca Cola.

Todos os atletas participantes recibirán como agasallo unha camiseta técnica e, ao finalizar a proba, poderán repoñer forzas nun catering gratuíto. Na zona de meta haberá servizos de fisioterapia para os corredores e tamén unha gardería para aqueles que desexen viaxar ata a Baña acompañados dos seus fillos ou fillas.

Na edición do ano pasado participaron máis de 250 atletas. Pódes ver o vídeo resumo desta competición no canal de Youtube do Concello da Baña e tamén neste enlace

A continuación incluimos as imaxes cos perfiles e percorridos de cada unha das probas do trail.

Percorrido e perfil o trail longo

20180913 Trail Longo Bana perfil

 

 

 

 

 

 

 

 

 

 

 

 

 

 

 

Percorrido e perfil do trail curto

20180913 Trail Curto Bana perfil