• Impartirarse a partir das seis da tarde pola plataforma Zoom

  • Todas as persoas interesadas poden inscribirse chamando ao 607 153 604 ou mandando un mail a Este enderezo de correo está a ser protexido dos robots de correo lixo. Precisa activar o JavaScript para velo.

obradoiro de regueifa

Tralo éxito acadado polo primeiro obradoiro de regueifa en liña celebrado o pasado mes de febreiro, o Concello da Baña volve convocar para este sábado 6 de marzo un novo taller telemático de improvisación oral en verso. O curso, gratuíto, será impartido outra vez a través da plataforma Zoom pola xornalista e profesora de galego Olalla Liñares.

Este taller en liña comezará ás seis da tarde e terá unha duración aproximada de hora e media. Poderá inscribirse calquera persoa que o desexe enviando un correo electrónico ao Servizo de Normalización Lingüística do Concello (Este enderezo de correo está a ser protexido dos robots de correo lixo. Precisa activar o JavaScript para velo.) ou chamando por teléfono ao número 607 153 604. Terá que indicar nome, apelidos, dirección de correo electrónico e número de teléfono. No caso de que o interesado teña menos de doce anos, deberá estar acompañado durante o obradoiro dunha persoa adulta.

No primeiro obradoiro, celebrado o pasado 13 de febreiro, participaron un total de quince persoas. Conectáronse dende A Baña, Negreira, Santiago, A coruña, Vigo e ata Brasil e remataron o taller improvisando xa as súas propias regueifas.

  • Cada un dos galardóns está dotado con 100 euros para gastar no comercio local 

  • Elena fíxose tamén co premio do público ao acadar un maior número de Me Gusta en Facebook

elena coplas

Elena López García, na categoría de adultos, e David e Mateo Pereiro Mejuto, en categoría xuvenil, proclamáronse gañadores do concurso en liña de coplas de entroido bañense, co que este ano o Concello da Baña substitíu o tradicional desfile por causa da pandemia. Cada un dos garlardóns está dotado con 100 euros.

Elena recibirá ademais un lote de libros ao alzarse co premio do público, grazas a que o seu vídeo acadou un maior número de Me Gusta na páxina de Facebook do Concello.

Para reclamar o premio, as persoas gañadoras deberán persoarse no Rexistro Municipal aportando a seguinte documentación: o DNI, unha declaración responsable e un número de conta bancaria. Despois, poderán realizar un gasto equivalente a 100 euros en calquera dos establecementos que teñen a súa sede no termo municipal bañense. Por último, presentarán no Rexistro as facturas do gasto realizado. Teñen de prazo ata o 31 de maio deste ano.

O BOP (Boletín Oficial da Provincia da Coruña) recolle a ordenanza municipal pola que se fixan os novos prezos para o curso 2020/2021 dos servizos que se prestan no PAI (Punto de Atención á Infancia) da Baña. Estes prezos entraron en vigor o pasado mes de xaneiro.

A ordenanza pódese consultar premendo aquí

A táboa de prezos actualizada pode verse no arquivo adxunto. 

Attachments:
Download this file (tarifas_actualizadas_PAI.pdf)tarifas_actualizadas_PAI.pdf[ ]71 kB
  • Os participantes deberán gravar un vídeo de menos de 2 minutos, con coplas de 8 estrofas en galego

  • O concurso está dotado con 300 euros en premios para os gañadores das tres categorías. O premio do público será un lote de libros

  • Precísase inscrición previa e subir os vídeos antes do 19 de febreiro

20210210 concurso coplas

O Concello da Baña anima a veciñanza a tirar de imaxinación, creatividade e novas tecnoloxías para celebrar o Entroido a pesar das restricións derivadas da pandemia. Se o ano pasado o desfile do Entroido da Baña foi un dos máis concorridos da comarca, e chegaron comparsas de toda Galicia, este ano a Concellaría de Cultura convida a todos a volver participar tirando de retranca, enxeño e dotes interpretativas, tres dos apartados que se puntuarán no I Concurso en liña de coplas do entroido bañense. O importe dos premios deberá gastarse no comercio local da Baña, como fórmula para colaborar coa economía do municipio.

Neste concurso poderán participar todas as persoas que o desexen, graven un vídeo de menos de 2 minutos con coplas de Entroido, e o compartan na páxina de Facebook do Concello da Baña. As persoas interesadas teñen ata o 17 de febreiro para inscribirse, e ata o venres 19 para subir o seu vídeo. Cada persoa pode presentar un máximo de 2 vídeos.

Establécense tres categorías: infantil (para menores de 9 anos), xuvenil (de 9 a 18) e adultos (maiores de 18 anos). En caso de grupos, os integrantes deberán ser conviventes e ningunha das persoas participantes poderá superar a idade indicada para cada categoría. O concurso estará dotado con 100 euros en premio para o gañador de cada categoría. Haberá tamén un premio especial do público (aquel vídeo que consiga máis gústame na páxina de Facebook), que consistirá nun lote de libros.

Para participar, primeiro hai que mandar un correo electrónico ao Servizo de Normalización Lingüística do Concello, ao enderezo Este enderezo de correo está a ser protexido dos robots de correo lixo. Precisa activar o JavaScript para velo. indicando nome completo, DNI e idade dos participantes, así como o título do vídeo (que será o mesmo que o título da copla). En 24 horas recibirán a resposta de que está confirmada a inscrición e xa poderán subir o vídeo, como comentario a publicación que faga o Concello sobre este concurso na páxina de Facebook.

As coplas teñen que estar en idioma galego, ter un mínimo de 8 estrofas, ser cantadas e inéditas.

O xurado, presidido pola concelleria de Cultura e composto por por cinco persoas, fará público o seu veredicto o 24 de febreiro. Para elixir aos mellores vídeos de cada categoría valorará a letra, interpretación, posta en escena, calidade lingüística, enxeño, humor, retranca, sentido crítico, relación coas temáticas da contorna e vinculación coa tradición do Entroido.

Os gañadores terán ata o 31 de maio para presentar no Concello a xustificación de que fixeron un gasto igual ou superior ao importe do premio en calquera empresa, comercio ou establecemento que teña a súa actividade na Baña.

Consulta as bases no documento adxunto. 

  • O taller celebrarase o sábado 13 de febreiro a partir das 18:00 horas na plataforma Zoom

  • Terá unha parte teórica e outra práctica, na que as persoas participantes aprenderán mecanismos básicos para regueifar

inscricions

O Concello da Baña abre ata o día 10 o prazo de inscrición para participar nun obradoiro gratuíto de regueifa que se desenvolverá por videoconferencia na plataforma Zoom na tarde do 13 de febreiro.

O obradoiro terá unha breve parte teórica, na que se falará de que é a regueifa e se fará un percorrido pola súa historia ata o momento actual; e outra parte práctica, na que as persoas participantes poderán aprender mecanismos básicos para regueifar.

Este taller en liña comezará ás 18:00 horas e a duración será de ao redor de unha hora e media. Impartirao a barcalesa Olalla Liñares, xornalista e docente de Lingua Galega que desde o ano 2017 está vencellada á improvisación oral en verso a través de proxectos como Enreguéifate.

O Concello da Baña realizou unha enquisa virtual coa fin de saber cal era o interese neste obradoiro. Respondeu unha ducia de persoas, once delas maiores de 17 anos. Os menores de 12 anos poden asistir tamén, pero deberán estar acompañados dunha persoa adulta mentres dure o taller.

A enquisa tamén revelou que a maioría das persoas interesadas preferían que o obradoiro se fixese en sábado. Das nove respostas á pregunta de que día da semana elixirían, catro optaron polo sábado, dous polo venres, outras dúas polo xoves e unha polo mércores.

En canto á hora, contestaron dez persoas, con empate a tres entre as 16:00 horas e as 18:00 horas, as opcións máis elixidas.

As inscricións no obradoiro poden facerse tanto por correo electrónico (Este enderezo de correo está a ser protexido dos robots de correo lixo. Precisa activar o JavaScript para velo.) como por teléfono (607 153 604), indicando nome, apelidos, dirección de correo electrónico e número de teléfono.