• O pavillón de San Vicenzo da Baña abrirá as súas portas este domingo, 17 de marzo, ás 9.30 horas //

  • Os asistentes poderán degustar as filloas ao prezo dun euro cun límite de cinco por persoa //

  • A zoqueira Elena Ferro encargarase do pregón a partir das 13.30 horas //

  • Agrupacións da Escola de Música Tradicional e charangas animarán a xornada //

  • Haberá espazo infantil e toda a familia poderá gozar do espectáculo de Cé Orquestra Pantasma //

A Festa da Filloa da Pedra chegará este domingo 17 de marzo a súa vinte edición, a primeira na que o Concello da Baña se fai coas rendas da organización e poñerá en funcionamento no pavillón de San Vicenzo un total de vinte pedras de propiedade municipal. A festa, con vocación dinámica e participativa, contará cun mercado de artesanía, obradoiros de oficios tradicionais, diversas actuacións musicais e espazo infantil, mentres que o pregón correrá a cargo da zoqueira Elena Ferro.

O Festa da Filloa da Pedra 2024 abrirá as súas portas ás 9.30 horas co mercado de artesanía. Máis de trinta expositores ofrecerán todo tipo de produtos nunha carpa situada a carón do polideportivo. Tamén a esa hora comezarán a funcionar as pedras para atender as demandas do público durante todo o día, nesta ocasión ao prezo dun euro cada filloa e cun límite de cinco unidades por persoa. O manxar bañense poderá acompañarse, ademais, de racións de chourizo e orellas.

A festa completa a degustación con actividades de diversa índole, programadas para entreter aos asistentes de todas as idades durante toda a xornada. Así, e tanto pola mañá como pola tarde, o público poderá desfrutar de demostracións en vivo de oficios tradicionais a cargo de artesáns que traballarán a forxa e o torno de ballesta, ademais de tallar madeira ou facer sanscosmeiros.

Entre as actuacións musicais, destacan as propostas da Escola de Música Tradicional da Baña e de agrupacións da contorna. Gaiteiros e pandeireteiras comezarán a encher a festa de sons tradicionais ás 11.30 horas e amenizarán tamén a tarde, a partir das 16.00 horas, xunto á agrupación coral CantoenCanto. Estarán apoiados na dinamización da festa por charangas ben coñecidas polos seus animados espectáculos de rúa como os dos Celtas, que conta con integrantes da Baña; dos Tabernícolas de Leiradal e da nicrariense Mekanica Rolling Band.

Unha novidade con respecto a edicións anteriores será a actuación ao mediodía do grupo Río de Anxo polas rúas de San Vicenzo, levando a Festa da Filloa máis alá da contorna do pavillón coa idea de animar á veciñanza e á clientela dos locais de hostalería da capital da Baña.

Chegará despois o pregón da man de Elena Ferro, artesá pertencente á terceira xeración dunha familia de zoqueiros amplamente recoñecida por ser quen de poñer de moda con novos deseños un calzado tradicional que estaba practicamente en desuso.

O público miúdo terá tamén un espazo infantil de seu na Festa da Filloa da Pedra. Toda a familia está convidada así mesmo pola tarde ao espectáculo do home orquestra Cé Orquestra Pantasma e poderá gozar tamén con xogos populares.

Tres áreas de estacionamento

Todas aquelas persoas que queiran pasar o día na festa ou aproveitar para xantar, terán á súa disposición unha polbeira e, para facilitar o acceso, habilitaranse tres áreas de estacionamento. Unha, detrás da escola de música Emilio Andújar; outra, fronte á nave municipal; e unha terceira, ao lado do río.

  • O concurso xuntou o sábado máis de 500 participantes de distintas localidades e numeroso público //

  • Repartiuse un total de 3.350 euros en premios en catro categorías //

As marchosas costureiras de ‘Hai que hilvanar para coser e cantar’, chegadas dende Vilagarcía, na categoría de carrozas; e ‘El Chiringuito’, comparsa de Negreira liderada como non podía ser doutro xeito polo mesmiño Georgie Dann, foron as grandes triunfadoras do concurso de Entroido da Baña celebrado este sábado. Varios cantantes, moita festa e o recordo de tempos pasados protagonizaron un desfile que congregou máis de 500 participantes nun día solleiro que animou ao público a saír a rúa.

Non o tivo nada fácil o xurado nas principais modalidades do concurso, que repartía máis de 3.300 euros en premios e nas que desfilaron trece comparsas e nove carrozas con participantes chegados non só de concellos limítrofes, cunha destacada presenza do de Negreira, senón tamén de Brión, Trazo ou Ames e mesmo de fóra da provincia.

Repetindo a súa interpretación durante o concurso, ‘El Chiringuito’ celebrou o seu primeiro premio en comparsas, dotado con 900 euros, bailando e cantando con Georgie Dann. Tamén foron moi celebradas as distintas actuacións de ‘Que viva México’, que levou os 400 euros do segundo premio con todo un repertorio de Thalía, Luis Miguel e mariachis. O terceiro, de 150 euros, marchou para Tomiño grazas a espectacularidade das fontes de distintas clases que compoñían ‘Estrelas da noite’.

Xa en carrozas, a máquina de coser xigante e as provistas costureiras de ‘Hai que hilvanar para coser e cantar’ conseguiron levar para Vilagarcía o primeiro premio, de 900 euros. O xurado outorgoulle o segundo e 400 euros á proposta da asociación A Cabarballeira de Trazo; unha volta ás ‘Festas do Apóstolo nos anos 60’ coa súa noria, os cabaliños, a tómbola e mesmo as Marías. Por último, outro clásico como son os pitufos, que visitaron A Baña cunha ‘Pitufilandia’ xestada en Negreira, fixéronse cos 150 euros do terceiro premio.

web2

En canto á modalidade de grupo, o primeiro premio foi para as divertidas plantas ‘Carnívoras carnavalescas’, agasalladas con 150 euros. Segundo clasificouse ‘O rabaño do camiño’, coas seus pequenos granxeiros facéndolle fronte ao lobo para afastalo das ovellas. Gañou 100 euros.

Un espectacular traxe feito con latas de Coca-Cola deulle o os 100 euros do primeiro premio da categoría de individual ao ‘Regreso dos dinosauros’. ‘O quiosqueiro molón’ , con revistas, licor café ou chourizos, fíxose cos 60 euros do segundo premio e, por último, a divertida fregona de ‘Limpezas Perico’ gañou os 40 euros do terceiro.

Repartiron os premios no pavillón de San Vicenzo o alcalde da Baña, José Antonio Pereira; a tenente de alcalde, Mónica González; e a concelleira Patricia Lois. O Concello agradece a colaboración dos farmacéuticos bañenses Joshua Almozara, Iria Álvarez e Pilar Gómez, que actuaron como xurado.

 

  • A recepción dos Reis Magos celebrouse no pavillón de San Vicenzo e arrincou con espectáculo Hoxe sí! da compañía Sempre Arriba

  • Melchor, Gaspar e Baltasar visitaron o centro de maiores, a residencia de Ceilán e a Fundación Anxiños

 

20240105 reis magos banha 9

Fieis á tradición, as Súas Maxestades de Oriente visitaron esta tarde A Baña, sementando ao seu paso maxia e ilusión propias desta xornada tamén máxica. Melchor, Gaspar e Baltasar chegaron ao pavillón de San Vicenzo contra ás seis da tarde, entre os aplausos e o xúbilo do público infantil. Cumprindo co programa previsto, as nenas e os nenos presentes no pavillón puideron charlar co seu rei favorito, tomarse unha foto e recibir como anticipo da noite máis máxica do ano un pequeno agasallo e unhas lambetadas.

20240105 reis magos banha 7

Os pequenos e as pequenas da Baña tamén gozaron dos xogos inchables instalados na pista. E, para recuperar forzas e amornar os nervios, grandes e peques degustaron un anaco de rosca acompañado dun refresco, zume, auga ou batido de chocolate.. Tamén había petiscos especiais para as persoas celíacas ou con problemas de intolerancias.

20240105 reis magos banha 6

O programa desta tarde de festa abríase co espectáculo de música, circo e humor da compañía Sempre Arriba, Hoxe sí!, presentando a Marta Iglesias nun show de linguaxe clown con acrobacia aérea que fascinou ao público.

20240105 reis magos banha 3

Os Reis Magos tamén visitaron o centro de maiores,a residencia de Ceilán e na Fundación Anxiños, acompañados polo alcalde, José Antonio Pereira Gil, e a concelleira de Cultura, Mónica González. En cada un destes centros, as Súas Maxestades de Oriente entregaron unha rosca.

20240105 reis magos banha 1

Dende o Concello, alcalde e concelleira de Cultura quixeron agradecer a colaboración de todas aquelas persoas que fixeron posible que a festa de Reis desta tarde fose todo un éxito, e, especialmente á técnica de Cultura, Marta Cambeiro.

Podes ver máis fotos no da visita das Súas Maxestades de Oriente no Facebook do Concello

20240105 reis magos banha 8

 

 

.

  • Recoñeceranse os mellores disfraces nas categorías de carrzoas, comparsas, grupos e individual //
  • O desfile percorrerá as rúas Castelao e Tedelle a partir das 16.30 horas e os participantes farán unha pequena actuación diante da escola de música //
  • As inscricións poderán realizarse ata o 14 de febreiro a través da sede electrónica ou presencialmente no Rexistro //

O Concurso de Entroido da Baña, que se desenvolverá na tarde do sábado 17 de febreiro, repartirá un total de 3.350 euros en premios entre os mellores disfraces nun total de catro categorías: carroza, comparsa, grupo e individual. As inscricións estarán abertas ata o mércores 14 de febreiro e poderán facerse a través da sede electrónica nesta ligazón ou presencialmente no Rexistro Xeral cubrindo o formulario correspondente.

O desfile, que adoita concitar numeroso público, percorrerá as rúas Castelao e Tedelle a partir das 16.30 horas e os participantes contarán con cinco minutos para actuar diante da escola de música Emilio Andújar.

Carrozas (formada por un mínimo de sete persoas que deberán desfilar enriba dun móbil) e comparsas (integrada por un mínimo de sete persoas que concorran co mesmo motivo) levarán os premios máis suculentos: 900 euros a primeira, 400 euros a segunda e 150 a terceira. Os grupos (de entre 2 e 6 persoas) optan a dous premios de 150 e 100 euros, respectivamente. Por último, os tres mellores disfraces individuais serán galardoados con 100, 60 e 40 euros.

O xurado valorará vestiario e maquillaxe, a utilización de material de refugallo, a orixinalidade, a posta en escena e a involucración do público.

As inscricións están xa abertas e as persoas interesadas poderán facelas cubrindo as formularios correspondentes e presentándoos tanto a través da sede electrónica do Concello da Baña como presencialmente no Rexistro Xeral en horario de atención ao público. A recollida de dorsais poderá facerse o venres 16 no Concello ou ben o día do desfile a partir das 15.00 horas.

As bases, os formularios de inscrición e as autorizacións para menores poden descargarse nos arquivos adxuntos.

  • A partir das 17.00 horas actuará a Compañía Sempre Arriba cun espectáculo cheo de humor

  • A recepción oficial ás Súas Maxestades será a partir das 18.00 horas

REIS24compri

O Concello da Baña ten preparada unha gran festa para recibir as Súas Maxestades os Reis Magos de Oriente o vindeiro venres, 5 de xaneiro. O obxectivo é acompañar á cativada na espera da noite máis máxica do ano e gozar xuntos dunha tarde especial.

O pavillón de San Vicenzo acollerá unha gran festa a partir das 17.00 horas coa actuación da Compañía Sempre Arriba que presentará a peza Hoxe Sí! Trátase dun espectáculo en linguaxe clown con acrobacia aérea e, sobre todo, moito humor.

A comitiva real chegará ao pavillón municipal ás 18.00 horas para falar co público infantil, e cos maiores que así o desexen. Tamén haberá reparto de agasallos entre os nenos e as nenas.

Tras a recepción oficial, todas as persoas que así o desexen poderán desfrutar da saborosa rosca de Nadal e gozar cos inchables instalados no recinto neste día tan especial.