- Detalles
- Escrito por Alicentis
- Categoría: Cultura e educación
- Visitas: 1043
-
Celebrarase en Agra de Chans do 23 ao 30 de xuño en horario de 8.30 a 14.15
-
O prezo é de 12 euros e está destinado a nenos e nenas de entre 4 e 12 anos
-
O prazo de inscrición está aberto ata o 17 de xuño
O curso escolar está a piques de rematar e, coa fin de facilitar a conciliación da vida laboral e familiar, o Concello da Baña pon en marcha un ano máis unha actividade de cociliación en xuño para as crianzas empadroadas no municipio. Entre o 23 e o 30 de xuño, nos días laborables que coinciden co inicio das vacacións de verán, celebrarase unha actividade de conciliación na área recreativa Agra de Chans, destinada a rapaces en idade escolar.
Esta actividade desenvolverase en horario de mañá, entre as 8.30 e as 14.15 horas. Ten un custo de 12 euros por participante.
Aquelas familias que desexen participar poden inscribirse no rexistro do Concello ou mediante sede electrónica. A ficha de inscrición pode descargarse no documento adxunto. Para poder participar, é imprescindible que as crianzas estean empadroadas no Concello da Baña.
 20210610_Ficha_inscricion_concilia_xuño | [ ] | 142 kB |
- Detalles
- Escrito por Alicentis
- Categoría: Cultura e educación
- Visitas: 1494
-
Hai que solicitar o permiso antes das 14:00 horas do martes 22 de xuño
-
A prohibición en lugares públicos quere evitar aglomeracións
-
Nos recintos privados só poderá asistir o número máximo de persoas que determine a normativa sanitaria
-
O alcalde emite un bando no que lembra tamén as normas que rexerán coa fin de evitar incendios
Ante a inminencia da celebración da noite de San Xoán, entre o 23 ao 24 de xuño, o alcalde da Baña publica un bando municipal para lembrar que por causa da covid-19 establécese a prohibición de facer cacharelas en lugares públicos coa fin de evitar aglomeracións. Ademais, no caso de que se faga algunha fogueira nun recinto privado, terán que seguirse unha serie de recomendacións para previr a xeración de incendios forestais. As persoas que desexan realizar unha cacharela terán que presentar unha solicitude no Concello antes das 14:00 horas do martes 22 de xuño.
Á parte de en lugares públicos, tampouco se poderán facer cacharelas en terreos forestais ou nas proximidades de masas arbóreas. As queimas terán que gardar, alomenos, cinco metros de distancia con respecto a leña amoreada, liñas de tendido eléctrico e telecomunicacións e puntos de almacenamento de produtos inflamables.
O número de persoas asistentes á cacharela estará limitado ao que estableza a normativa sanitaria no momento de celebrarse a mesma.
Nas fogueiras non se poderán queimar plásticos, produtos inflamables ou envases presurizados e non poderán superar os 2 metros de altura nin ter máis de 6 metros de base. Estas medidas redúcense á metade (1 metro de altura e 3 de base) no caso de que o lume se faga a menos de 400 do monte.
Por último, as persoas que fagan a fogueira deberán contar cunha mangueira próxima ou baldes de auga e non abandonarán o lugar ata que o lume estea completamente extinguido e sexa humedecido con auga.
Ante calquera incidencia, o bando lembra os teléfono de emerxencias 112 e o 085 de aviso de incendios forestais.
O bando pode consultarse no documento adxunto
| 20210607_Bando_cacharelas_San_Xoan_Baña | [ ] | 105 kB |
- Detalles
- Escrito por Alicentis
- Categoría: Cultura e educación
- Visitas: 1173
- O manifesto institucional reafirma o “compromiso coas letras e coa nosa cultura durante todo o ano”
- “A lingua é o sinal de identidade máis forte que posuímos”, afirmou a concelleira Mónica González
- A actuación de Xarope Tulú e da Escola de Música Tradicional da Baña completaron os actos
- O alumnado do programa de emprego Mocidade 2020 elaborou un maio para a ocasión
O Concello da Baña volveu reiterar onte o seu compromiso coa cultura e a lingua do país, “porque a lingua é o sinal de identidade máis forte que posuímos”, durante o acto institucional co que se conmemorou o Día das Letras Galegas. A actuación da Escola de Música Tradicional da Baña, que rematou o acto tocando o Himno Galego, e a de Xarope Tulú puxeron letra e música á celebración, á que tamén se sumou o alumnado do programa de emprego Mocidade 2020, que elaborou un maio para a ocasión, que se pode ver na casa da cultura.
A concelleira de Cultura, Mónica González, foi a encargada de ler o manifesto institucional, no que se lembra a figura de Xela Arias, a escritora homenaxeada este ano. “Ela consideraba a lingua galega como o principal signo dunha cultura”, afirmou a concelleira, tras recordar que dende 1963, no Día das Letras Galegas só se homenaxearon 5 mulleres, fronte a 56 escritores, algo que espera mude no futuro.
O Concello da Baña volveu reafirmar o seu “compromiso coas Letras, que se estende a unha forte dedicación, día a día, ao longo de todo o ano, coa nosa lingua e a nosa cultura, porque a lingua é o sinal de identidade máis forte que posuímos”, como recolle o manifesto lido por Mónica González.
O alumnado do programa de emprego Mocidade 2020, que se forman en Actividades auxiliares en viveiros, xardíns e centros de xardinería, sumáronse tamén á celebración elaborando un maio que se pode ver na entrada da casa da cultura.
No salón de actos da biblioteca municipal, a Escola de Música Tradicional da Baña interpretou varias pezas de música galega, antes de que se lese o Manifesto bañense das Letras Galegas, que rematou coa interpretación do Himno Galego. Xarope Tulú fixo despois un pequeno percorrido pola obra da poeta, tradutora e editora Xelia Arias nun espectáculo dirixido á mocidade titulado ‘De ti e mailo mundo que apañes’.
O programa de actos para conmemorar o Día das Letras na Baña comezou a media tarde coa actuación de Luis Vallecillo, que mesturou música e teatro no seu espectáculo ‘Cantares das Letras’, pensado para público familiar.
Como complemento a este programa de actos, o Concello da Baña organizou unha exposición na axencia de lectura municipal para lembrar todos os autores e autoras homenaxeados no Día das Letras Galegas. Entre eles atópase a poeta e tradutora Xela Arias, a quen se lle adican este ano.
- Detalles
- Escrito por Alicentis
- Categoría: Cultura e educación
- Visitas: 1455
-
Esta enxeñeira de montes retrata un sector forestal “moi masculino” no que cada vez hai máis mulleres “pero non integradas en todo o proceso”
-
“As mulleres non precisamos unha protección extra; só esiximos respecto e igualdade”, asegura no vídeo publicado polo Concello da Baña
“A fenda de xénero que existe nas ciencias e nas enxeñarías é importante. A falta de referentes femininos non axuda a que as mulleres nos decantemos por este tipo de carreiras”. Quen así fala é Verónica Liñares, enxeñeira de montes e veciña de Ordoeste que protagoniza a sexta entrega da serie audiovisual A Baña en feminino, coa que o Concello busca darlle visibilidade á muller no rural.
Verónica retrata un sector forestal “moi masculino”. “Aínda que cada vez hai máis mulleres, aparecen en certas partes da cadea, pero non están integradas en todo o proceso”, engade. Esta moza de 30 anos cualifica como “positiva” a súa experiencia con homes ao seu cargo, se ben “percibes que a forma de tratarte dista un pouco de como se trata a responsables masculinos”.
No ámbito doméstico, Verónica tivo “a sorte de nacer nunha casa chea de mulleres, polo que non vivín diferenzas canto á crianza”. Porén, di ser consciente de que existen outras situacións nas que se dan “diferenzas nas tarefas e nos horarios de entrada e saída ou unha protección extra ao xénero feminino”, algo que rexeita. “As mulleres non necesitamos unha protección extra, só esiximos respecto e igualdade”.
No profesional e no público, Verónica denuncia que “a voz que máis se escoita segue sendo a masculina”. “Só temos que fixarnos na cantidade de asociacións de montes que están creadas por homes, asociacións de veciños formadas na súa maioría por homes e mesmo asociacións de empresarios. Na Baña temos unha de recente creación onde todos os compoñentes da directiva son homes”. Verónica Liñares reclama un cambio neste rol de “homes nas reunións e mulleres na casa”. Tamén de cara ao futuro, coida que “é importante educar aos nenos e ás nenas en igualdade”, tanto na casa como na escola, e desenvolver ferramentas para traballar a igualdade desde a administración local e desde as propias empresas.
O proxecto ‘A Baña en feminino. Visibilizando a muller rural’ consta de doce audiovisuais que se están a publicar na canle de Youtube do Concello ao longo deste ano. A mestra xubilada Dolores Allo inaugurou a serie o pasado mes de xaneiro falando das súas vivencias e dos avances que experimentou a sociedade nas últimas décadas de cara a acadar a igualdade. En febreiro, o protagonista foi Carlos Sande, un mozo filloeiro que reclamaba “condicións idóneas” para que as mulleres conten coas mesmas oportunidades ca os homes en todos os eidos vitais. Xa en marzo, a ex perruqueira Isabel Giraut, promotora da Asociación de Mulleres na Baña, insistía na importancia de que dende pequenos rapaces e rapazas sexan educados para asumir idénticas responsabilidades no fogar. Na mesma liña, coincidindo co Día do Libro o pasado 23 de abril, a gañadora do premio Álvaro Cunqueiro de teatro Carme Varela abogaba por liberar as mulleres da carga dos coidados. A soldadora Nerea Vázquez protagonizou o vídeo que se publicou no Día do Traballo, no que falaba da presión que sentiu cando decidiu estudar para un oficio tradicionalmente masculino ou das dificultades laborais coas que se atopan as mulleres no sector do metal.
- Detalles
- Escrito por Alicentis
- Categoría: Cultura e educación
- Visitas: 1607
-
A gañadora do último premio Álvaro Cunqueiro de teatro sinala que seguen sendo os homes quen deciden o que se publica
-
Pide que se facilite o acceso á lectura no rural
As mulleres poden gañar certames literarios porque se presentan dende o anonimato, aí non hai diferenzas. Pero non teñen as mesmas opcións cando chaman á porta dunha editorial para publicar, porque as mulleres estamos fóra do circuíto. E, se escribes literatura infantil ou xuvenil, aínda bueno, pero non se che ocorra escribir ensaio, que é cousa de homes, ou columnas de opinión nos xornais”. Así o sinala Carme Varela, gañadora hai só uns meses do premio Álvaro Cunqueiro para textos teatrais na súa vixésimo quinta edición coa súa obra ‘As desterradas’.
Carme Varela, nada e residente en Duomes de Arriba, na parroquia bañense de Sanamede do Monte, protagoniza neste 23 de abril, Día do Libro, a cuarta entrega de A Baña en feminino, serie de vídeos que, a razón dun por mes, amósannos durante todo este ano cal é o papel que representan as mulleres nunha contorna rural como a bañense en diferentes profesións.
Para Carme, quen recoñece que “desgrazadamente queda moito por andar en temas de igualdade”, a boa nova “é que estamos no camiño”. Na literatura, que hoxe celebramos, coida que o gran problema para que as mulleres teñan as mesmas oportunidades é que “tanto os críticos literarios como os catedráticos de literatura, que son quen fan o cribado do que se publica, son homes e ven o mundo cos ollos dun home, polo que os temas que lles preocupan ás mulleres van quedando de lado”. Outro problema, xa máis xeral, “é o acceso á cultura no mundo rural”. “Hai que ter unha biblioteca próxima, porque a lectura é o que alimenta o escritor”, sostén.
En clave de solucións, insiste Carme Varela en actuar en tres direccións. A primeira “é traballar na infancia coas nenas e cos nenos, mesmo máis con estes, porque non hai igualdade se eles non participan”. A segunda, é lograr que a mocidade goce das mesmas oportunidades reais para desenvolverse profesionalmente. E, por último, distribuír con equidade o papel de coidadores entre homes e mulleres. “Unha cousa brutalmente necesaria é descargarnos ás mulleres da pesada cargada dos coidados. É un lastre que levamos de sempre, o de coidar primeiro dos nenos e despois dos maiores”, subliña a filóloga e escritora.
O proxecto ‘A Baña en feminino. Visibilizando a muller rural’ consta de doce audiovisuais que se publican na canle de Youtube do Concello ao longo deste ano. A mestra xubilada Dolores Allo inaugurou a serie o pasado mes de xaneiro falando das súas vivencias e os avances que experimentou a sociedade nas últimas décadas de cara a acadar a igualdade. En febreiro, o protagonista foi Carlos Sande, un mozo filloeiro que reclama “condicións idóneas” para que as mulleres conten coas mesmas oportunidades ca os homes en todos os eidos vitais. Xa en marzo, a ex perruqueira Isabel Giraut, promotora da Asociación de Mulleres na Baña, insistía na importancia de que dende pequenos rapaces e rapazas sexan educados para asumir idénticas responsabilidades no fogar.
