- Detalles
- Escrito por Alicentis
- Categoría: Medio ambiente
- Visitas: 1200
-
Representantes das asociacións de veciños de Cabanas, San Mamede do Monte e Fiopáns acompañaron a José Antonio Pereira
-
Reuníronse hoxe co xefe territorial da Consellería de Economía, Emprego e Industria, Isidoro Martínez
O alcalde da Baña, José Antonio Pereira, e representantes das asociacións de veciños de Cabanas, San Mamede do Monte e Fiopáns reuníronse hoxe na Coruña co xefe territorial da Consellería de Economía, Emprego e Industria, para manifestarlle o rexeitamento ao parque eólico de Troitomil. Na reunión manifestáronlle a Isidoro Martínez a oposición tanto do concello como da veciñanza a este proxecto, manifestando que hai máis de 900 alegacións presentadas.
O alcalde comunicoulle ao xefe territorial o acordo plenario, adoptado por unanimidade, de rexeitamento a este parque eólico, apoiando as alegacións que presentaron os veciños, e adiantoulle que este mes a Corporación aprobará un manifesto institucional no mesmo sendo.
José Antonio Pereira insistiu en que as torres están moi preto das casas, debido a dispersión da poboación na Baña e a que é un municipio pequeno, polo que consideran que este proxecto non é axeitado para instalar no municipio.
O alcalde e as asociacións de veciños continuarán mantendo reunións para trasladar o rexeitamento da poboación a este parque eólico diante das diferentes administracións implicadas.
As asociacións veciñais da Baña presentan máis de 600 alegacións contra o parque eólico de Troitomil
- Detalles
- Escrito por Alicentis
- Categoría: Medio ambiente
- Visitas: 1902
-
Os tres grupos municipais e o BNG apoian o rexeitamento ao proxecto e presentarán as súas propias alegacións en nome do Concello
-
Lerán un manifesto veciñal este mércores no pleno
-
A recollida de sinaturas continuará ata o luns 5 de abril
Representantes das asociacións veciñais de Fiopáns, Cabanas, Lañas e San Mamede do Monte citáronse hoxe ás once da mañá ás portas do Concello da Baña para entregar máis de 600 alegacións asinadas pola veciñanza en contra da instalación do parque eólico de Troitomil, que a empresa Green Capital Power quere facer entre os concellos da Baña e Negreira.
“Para empezar, non estamos de acordo co lugar de ubicación. Pero, ademais, rexeitamos todas as afeccións que pode ter para os veciños e a contorna, como os desvíos na canalización de auga, os ruídos ou interferencias nos sinais de telefonía e televisión”, sinalou Javier Alijo, presidente da asociación de San Mamede do Monte.
Os tres grupos políticos con representación na Corporación municipal (PSdeG, PP e CxG) apoiaron a entrega de alegacións desta mañá e anunciaron que redactarán tamén as súas propias en nome do Concello da Baña. Súmase ao rexeitamento do parque tamén o BNG.
O alcalde bañense, José Antonio Pereira, subliñou a “oposición total” de todas as forzas políticas ao proxecto dos muíños de vento. “Tanto os veciños como a Corporación estamos totalmente en contra destes megaproxectos. Porque agora mesmo falamos dun, pero logo haberá unha segunda fase e unha terceira e o Concello da Baña non ten capacidade para albergar este tipo de parques eólicos”.
O rexedor mesmo deixou sobre a mesa a posibilidade de que se produzan novas accións de rexeitamento no futuro. “Estaremos sempre a carón dos veciños para intentar que non saían adiante iniciativas coma esta, que non aportan nada do que necesita o Concello da Baña”, recalcou.
As asociacións veciñais seguirán recollendo sinaturas ata o vindeiro luns, 5 de abril, xa que o prazo para presentar alegacións remata o mércores 7 de abril.
- Detalles
- Escrito por Alicentis
- Categoría: Medio ambiente
- Visitas: 2322
A empresa Capital Energy remitiulle o venres pola tarde ao Concello da Baña os planos de proxecto definitivo do parque eólico de Troitomil. A empresa comunica que nos próximos quince días a Dirección Xeral de Industria llos remitirá á xefatura correspondente para a súa exposición pública, que terá lugar previsiblemente no mes de xaneiro.
Estes planos poden consultarse no arquivo adxunto.
![Download this file (20201130_PE Troitomil_Planos_ProyectoSectorial[7824].pdf)](/media/com_attachments/images/file_icons/pdf.gif){kind=icon} planos_pe_troitomil | [ ] | 19299 kB |
- Detalles
- Escrito por Alicentis
- Categoría: Medio ambiente
- Visitas: 1565
-
A documentación pódese consultar nos concellos da Baña e Negreira ou no portal web das consellerías de Economía e de Medio Ambiente
-
Facilitamos os enlaces co acceso a esta documentación
O Diario Oficial de Galicia (DOG) vén de anunciar hoxe que comeza a exposición pública da documentación do parque eólico de Troitomil, que a empresa Green Capital Power vai facer nos concellos da Baña e de Negreira.
O prazo para presentar alegacións é de 30 días a partir de mañá. A documentación estará exposta a disposición dos interesados nos concellos da Baña e de Negreira, así como nas dependencias da sección de Enerxía da Xefatura Territorial da Vicepresidencia Segunda e Consellería de Economía, Empresa e Innovación, ubicada na rúa Vicente Ferrer, número 2, 2º andar da cidade da Coruña (aténdese de 9.00 ás 14.00 horas, de luns a venres, con cita previa no correo electrónico seccion. Este enderezo de correo está a ser protexido dos robots de correo lixo. Precisa activar o JavaScript para velo. ou nos teléfonos 981 18 49 83 e 18 49 23).
O estudo de impacto ambiental estará tamén dispoñible, durante o mesmo prazo, nas dependencias da Xefatura Territorial da Coruña da Consellería de Medio Ambiente, Territorio e Vivenda .
A documentación relativa a este parque eólico, que foi remitida pola Xunta de Galicia ao Concello da Baña, pódese consultar nos seguintes enlaces:
Documentación do parque eólico de Troitomil no portal web da Consellería e Economía
Acordo do 15/02/2021 de Información Pública (DOG):
Documentación Técnica do Proxecto:
Proxecto Execución (xaneiro 2021-vsdo.29/01/21):
Plano Xeral das instalacións:
Estudo de Impacto Ambiental (EIA) (abril 2020-asdo.26/05/20):
Proxecto Sectorial de incidencia supramunicipal (maio 2020-vsdo.26/05/20):
- Detalles
- Escrito por Alicentis
- Categoría: Medio ambiente
- Visitas: 1683
Os alcaldes da Baña, Mazaricos, Negreira, Outes e Santa Comba solicitan que a instalación de parques eólicos nos seus municipios redunde en beneficio dos intereses da poboación do rural, principal afectada por estas infraestruturas. Nunha declaración institucional, os cinco rexedores amosan a súa preocupación e a da veciñanza pola creación de novos parques, remarcando que os habitantes destas zonas sufrirán os inconvenientes deste tipo de instalacións pero apenas notarán o beneficio económico que xeran.
Asinan a declaración José Antonio Pereira Gil, alcalde da Baña, e os seus homólogos de Mazaricos, Juan José Blanco Riveiro; de Negreira, Manuel Ángel Leis Míguez; de Outes, Manuel González López; e de Santa Comba, David Barbeira García. Con esta acción queren poñer de manifesto a fonda preocupación da cidadanía "polo elevado número de proxectos de parques eólicos previstos" nestes territorios. A inquietude da veciñanza, explican, vén dada polo "impacto medioambiental dos parques proxectados, varios deles nas proximidades de núcleos habitados e que ademais se veñen a sumar aos xa existentes".
Os alcaldes recordan que a lexislación establece unha distancia mínima de 500 metros con respecto aos núcleos habitados, que lles parece "escasa", máis aínda cando os parques se atopan fragmentados en diversos proxectos cando, "en realidade, amosan unha continuidade e que comparten infraestruturas polo que deberían ser considerados un único parque".
Os asinantes manifestan a súa contrariedade polo feito de que "a lexislación actual non posibilita que a poboación rural se beneficie dunha maneira xusta da presenza desta industria nos seus territorios. Ao contrario do que acontece noutros países, non existen mecanismos que compensen a asimetría existente no poder de negociación entre promotores eólicos e veciñanza, sobrevoando nas negociacións a ameaza de expropiación pola declaración de interese público por parte da propia administración". "É particularmente preocupante", proseguen, "que só os propietarios dos terreos directamente afectados reciban algún tipo de compensación, en calquera caso insuficiente, mentres que o resto de veciños que soportan os custes ambientais non teñen ningún beneficio económico directo. Nese sentido, a compensación que recibimos os concellos polo Fondo de Compensación Ambiental, derivado do canon eólico, é totalmente insuficiente". Deste xeito, "a percepción maioritaria é que as poboacións rurais estamos a soportar en exclusiva os custos ambientais da produción de enerxía eólica, mentres que os beneficios que permanecen no territorio son mínimos".
Así, os alcaldes da Baña, Mazaricos, Negreira, Outes e Santa Comba afirman que "a enerxía eólica debe ser e pode ser fomentada sen atentar contra os intereses ambientais e socioeconómicos da contorna onde se produce", posto que "só desa maneira pode pasar de ser unha ameaza a ser unha oportunidade para o noso rural". Por isto, solicitan ás instancias pertinentes, en particular ao Parlamento de Galicia, que modifique o marco normativo e, mentres, que paralice os proxectos en marcha.
| Declaración. Desenvolvemento sustentable e xusto da enerxía eólica no rural | [ ] | 93 kB |