- Detalles
- Escrito por Alicentis
- Categoría: Turismo
- Visitas: 1230
- O Concello e a asociación de empresarios A Baña Emprende buscan poñer en valor a importancia histórica e turística do castro da Baña
- Un total de seis grupos participaron no Concurso de Clans
- Xogos populares, mercado de artesanía, unha batalla castrexo-romana ou espectáculos de maxia e musicais completaron o programa
A Baña regresou aos tempos anteriores aos romanos con motivo da primeira edición da Festa Castrexa. Centos de persoas reuníronse durante toda a xornada de hoxe, sábado 21 de maio, para celebrar o pasado bañense e gozar dunha xornada de actividades festivas e culturais, nunha acción que pretende poñer el valor os atractivos turísticos do municipio e, en especial, o seu castro. O evento, organizado polo Concello da Baña e pola asociación de empresarios A Baña Emprende, coa colaboración da Asociación de Mulleres Alborada e da Deputación da Coruña, continúa esta noite con actuacións musicais de primeiro nivel.
Numeroso público xuntouse xa de mañá no castro, situado no alto da parroquia de San Vicenzo da Baña, para asistir á apertura do mercado de artesanía, no que os máis de corenta expositores presentes puideron demostrar en vivo o seu desempeño en diversos oficios tradicionais. A rapazada coñeceu de primeira man como se realiza un traballo arqueolóxico, e os maiores recordaron o labor de trenzado da palla, en dous obradoiros. Á unha, o colaborador do informativo humorístico da TVG 'Malicia Noticias' Pepe Capelán, encargouse de abrir a programación festiva co pregón, destacando que “esta é a primeira festa castrexa destas características que se celebra en toda a provincia”.
O alcalde da Baña, Andrés García, manifestou que esta iniciativa responde ao desexo de “poñer en valor o noso patrimonio” e agradeceu “o traballo desenvolvido tanto dende o consistorio como dende a asociación A Baña Emprende na organización da festa e na recuperación dun espazo singular como o castro da Baña”. Trátase de aproveitar este elemento patrimonial singular para captar visitantes interesados no pasado e na cultura, engadindo un atractivo máis á oferta natural e gastronómica coa que conta o municipio.
A festa estoupou a mediodía coa celebración da sesión vermú. O grupo Minguante amenizou os instantes previos á comida; a Festa Castrexa contou cunha abondosa oferta gastronómica para que ninguén quedase con fame de cara a afrontar as actividades da tarde, que comezarán coa simulación dunha batalla entre castrexos e romanos.
A tarde proseguirá con xogos populares destinados aos castrexos e castrexas de menor idade. Ademais de gozar con entretementos tradicionais como os zancos ou as carreiras de sacos, puideron organizar partidas arqueolóxicas para descubrir un tesouro ou aprender a fabricar xerros de arxila ou trísceles, o símbolo polo que se coñece mellor a cultura castrexa. A media tarde actuou o mago José Benigno, “o ilusionista xalleiro”, que deu paso a unha sesión de música popular a cargo dos Gaiteiros da Baña.
O concurso de caracterización castrexa foi un dos momentos máis importantes da Festa. Durante toda a xornada puideron verse pola Baña un total de seis clans vestidos con todos os atributos propios da época: personaxes vestidos de época, lanzas e abalorios deron lustre á celebración, transportando a localidade a unha época pasada hai máis de dous mil anos. No certame o clan mellor caracterizado e o máis diverso recibiron un premio de 200€, mentres que o máis numeroso foi agasallado cunha cea no propio recinto da festa.
A festa segue esta noite coa actuación ás 21h. do grupo vocal De Vacas, un dos máis singulares e destacados da música galega actual grazas á súa mestura de folk, pop e jazz. Ás 22h. está previsto un espectáculo do Bruxo Queiman, que dará paso á festa rachada que habitualmente despregan nas súas actuacións os Festicultores.
Podes ver as fotos da xornada en Facebook: (Preme aquí)
- Detalles
- Escrito por Alicentis
- Categoría: Turismo
- Visitas: 1324
O Concello da Baña vén de facer públicas as bases do Concurso de clans castrexos da I Festa Castrexa 2022, no que se premiará o mellor clan caracterizado, o máis numeroso e o máis diverso. O certame é un dos puntos fortes do programa da festa, que terá lugar o sábado 21 de maio no lugar do Castro.
Os participantes no concurso deberán vestir acorde á temática da festa: casaca e pantalón de liño, capas con pel, calzas de coiro con calcetíns de la... Ademais, cada clan estará identificado cun nome (que deberá constar no momento da inscrición) e portará un estandarte identificativo que os represente.
Hai en xogo premios en metálico, con 200€ para os vencedores nas categorías de clan mellor caracterizado e máis diverso; e tamén unha cea por valor máximo de 200€ para o clan máis numeroso, para desfrutar no recinto da feira castrexa no mesmo día.
Canto a número mínimo de participantes, con dúas persoas será suficiente para optar á modalidade de clan mellor caracterizado, mentres que os máis numerosos deberán superar os 9 integrantes. Por último, a categoría de máis diverso estará composta por un mínimo de 8 persoas que han de ser diversas en idade (avós e netos, por exemplo). As persoas participantes poderán presentarse a distintas categorías.
Aquelas persoas que desexen participar no Concurso de clans castrexos deberán cubrir a ficha de inscrición anexa nesta nova e enviala por correo electrónico a Este enderezo de correo está a ser protexido dos robots de correo lixo. Precisa activar o JavaScript para velo., ou ben entregala nas oficinas do Concello. Así mesmo, os participantes menores de idade achegarán unha autorización de participación asinada pola nai, pai ou titor/a legal.
As bases do concurso, a ficha de inscrición e a autorización para menores de idade poden descargarse nos arquivos adxuntos.
 Autorización para participantes menores de idade | [ ] | 157 kB |
| Bases do Concurso de clans castrexos 2022 | [ ] | 106 kB |
| Ficha de inscrición no Concurso de clans castrexos 2022 | [ ] | 163 kB |
- Detalles
- Escrito por Alicentis
- Categoría: Turismo
- Visitas: 998
-
Os primeiros asistentes á XVIII Festa da Filloa da Baña tiveron a oportunidade de aprender a facer filloas da pedra e de Muimenta na Escola Filloeira //
-
A animación musical correu a cargo da Foliada Filloeira e do dúo Matices //
-
O pavillón de San Vicenzo abre este domingo ás dez da mañá para acoller un completo programa gastronómico e de lecer ata ben entrada a noite //
Ao redor de dous mil litros de amoado feito con auga, fariña do pais, ovos e sal; 34 pedras; e máis dunha ducia de voluntarias da Asociación Filloas da Pedra abriron esta tarde no polideportivo de San Vicenzo a 18ª edición da Festa da Filloa da Pedra da Baña coa idea de recibir esta fin de semana milleiros de visitantes para seguir dando a coñecer un produto e unha tradición que levan pasando de xeración en xeración dende hai séculos.
Como novidade desta edición, as primeiras persoas que se achegaron hoxe ao pavillón bañense tiveron a oportunidade de participar na Escola Filloeira. O cociñeiro José Manuel Mallón elaborou varias propostas á vista do público para demostrar que as filloas son unha gran base tanto para platos salgados como doces. Tamén filloeiras da localidade luguesa de Muimenta, coas súas planchas de ferro, compartiron cos asistentes cales son os seus segredos para facer filloas.
A animación da festa púxoa primeiro a Foliada Filloira, sumando á celebración gastronómica as actuacións dos gaiteiros e pandereteiras da Escola de Música Tradicional da Baña. Despois, foi o dúo Matices quen convidou a bailar ao público congregado no pavillón.
Mañá, domingo, continuará a festa ao longo de todo o día e ata ben entrada a noite. Mozas e mozos da Baña nados no ano 2004, como a Festa da Filloa, serán os encargados de dar o pregón. Ademais, no pavillón, que abrirá ás súas portas ás 10.00 da mañá, todos os asistentes poderán gozar da música dos Gaiteiros da Baña (12.00 horas), a charanga Os Atrevidos (15.30 horas), a orquestra Olympus (18.00 horas) e o DjSonic (21.00 horas). Para nenas e nenos está programado o espectáculo musical infantil de Pakolas ás 17.00 horas.
José Manuel Mallón estará á fronte da food truck na que se cociñan os ingredientes cos que a Festa da Filloa convida cada ano a acompañar o manxar bañense, tales como lacón e grelos, chourizo ou orella. Para os máis lambóns, ou como sobremesa, ofértanse ademais chocolate, mel ou marmelada. E, como xa vén sendo habitual, unhas carpas pola parte de atrás do polideportivo ofrecerán polbo e churrasco. Todas as persoas que se acheguen ata a Baña atoparán tamén postos postos de venda de artesanía, churros ou rosquillas, ademais dalgunha atracción de feira para a xente miúda.
- Detalles
- Escrito por Alicentis
- Categoría: Turismo
- Visitas: 990
- Detalles
- Escrito por Alicentis
- Categoría: Turismo
- Visitas: 2321
-
As vistas desde o Pico de Santa Mariña abranguen lugares tan emblemáticos como o Pico Sacro ou os montes Pindo e Iroite
-
O acceso agora sinalizado convida a facer uns vinte minutos de camiñada dende o lugar do Barro, aínda que tamén se pode subir en coche
O pico da Santa Mariña, o cumio de maior altura do Concello da Baña, conta dende hoxe cun bambán e un banco desde os que admirar as espectaculares vistas (ver aquí localización en Google Maps). Pódese chegar a eles nus vinte minutos de camiñada grazas a unha nova ruta de sendeirismo de apenas 1.200 metros, que conta con sinais de madeira desde a estrada que une O Barro con Cabanas. A iniciativa, bautizada como “Desde A Baña á terra-Desde A Baña ao aire”, responde ao desexo da Concellaría de Promoción de Vida Activa e Deportiva de ampliar para a veciñanza as propostas saudables de lecer e tempo libre ao mesmo tempo que se promociona o municipio como destino turístico.
O premio da camiñada é unha panorámica de 360 grados sobre lugares tan emblemáticos como o Pico Sacro ou os montes Iroite e Pindo. O novo bambán e o banco comparten agora espazo no cumio bañense cun vértice xeodésico construído no ano 1981 xunto aos restos da antiga ermida de Santa Mariña, levantada posiblemente en época medieval e derrubada a finais do século XVIII. A tradición di que o propio monte tiña un carácter sagrado e orientaba ventos e choivas.
Entre os itinerarios alternativos que permiten acceder ao Pico de Santa Mariña atópase a Ruta do Progreso, un percorrido circular de preto de once quilómetros creado polo alumnado do colexio de San Vicente da Baña e que parte do núcleo urbán de San Vicenzo para pasar, entre outros lugares, pola antiga fábrica de luz e o pazo de Leis.
O Concello da Baña xeolocalizou a nova atración do municipio en Facebook e Instagram coa dobre finalidade de facilitar o acceso e convidar a veciñanza e visitantes a etiquetar a ubicación das fotos que fagan. Un bo lugar para deixar o coche é a aldea do Barro. Pero, no caso de non poder ou non querer camiñar, o certo é que os automóbiles chegan ata o cumio. O desvío é o mesmo da ruta sendeirista.
