Detalles

Escrito por Alicentis

Categoría: Cultura e educación

Published: 31 Agosto 2018

Visitas: 1026

Máis de corenta nenas e nenos da Baña remataron hoxe o campamento urbano no que participaron todo este mes de agosto facendo múltiples actividades, practicando deportes minoritarios e coñecen os pormenores de diferentes oficios e profesións falando cos protagonistas. Actividades lúdicas e musicais, un aperitivo e cos ‘Contos de verán’ de Celtia Figueiras rematou esta actividade, que moitos dos participantes agardan poder repetir o vindeiro verán.

Celtia Figueiras trasladou os seus monicreques ata a area recreativa Agra de Chans, para contar diversos contos e historias relacionados con esta estación do ano, que todos os participantes no campamento seguiron con moito interese, e facendo algún que outro apunte.

Cos ‘Contos de verán’ remataba o Campamento urbano da Baña 2018, pero antes, e durante as dúas últimas semanas, os participantes puideron coñecer os pormenores de diferentes oficios e profesións “que a pesares de non ser todos  eles moi cotiáns, son necesarios, únicos e dificultosos”, como sinalaban os coordinadores do campamento, Luciana García e Sergio Vieites.

Así, Adrián Vázquez, futbolista profesional que esta tempada decidiu colgou as botas, explicoulles a realidade e a dureza do mundo do fútbol, que en moitas aspectos non se asemella a idea que teñen a maioría de nenos e nenas.

Con Olaia Liñares puideron coñecer como é o mundo do xornalismo e o papel destes profesionais para acadar as novas que han de comunicar, tanto en prensa como en radio ou televisión. Aproveitando a presencia de Olaia e as novas tecnoloxías, dende o campamento urbano da Baña fíxose unha conexión por Skype con Diego Villaverde, un xornalista bañense residente en Alemaña, que contou a súa experiencia no país centroeuropeo.

Rubén Suárez, bombeiro de profesión e escalador e aventureiro por vocación, deixou a todo o mundo abraiado coas aventures e desventuras que leva facendo ao longo da súa vida. Rubén aproveitou a conversa para explicarlle a nenas e nenos que deben facer en caso de que se produza un incendio.

Daniela Nieto e Silvia Capelo fixeron un simulacro de rescate na piscina municipal. As dúas socorristas tamén explicaron que se debe facer en caso de que alguén se esté afogando.

A importancia de reciclar e recoller o lixo de xeito adecuado foi unha das cousas nas que fixeron fincapé Juan Allo e Antonio Esturao, ámbolos dous traballadores do servizo de recollida do lixo na comarca, que se achegaron ao campamento co seu camión, para explicar como funciona a compactadora.

Lucía Freire, militar profeisonal na unidade da Brilat en Pontevedra, contoulles aos máis cativos a o que supón ser militar, e cal é a súa experiencia nas estadías que tivo que facer no estranxeiro en diferentes misións de paz.

O oficio de músico tamén tivo un oco neste campameto urbano. O gaiteiro Emilio Lois ensinou os instrumentos que se usaban antigamente para poder chegar a tocar o que hoxe en día coñecemos como a gaita de fol. Con Emilio, nenas e nenos fixeron tamén os seus propios instrumentos como un asubío de avela e un mirlitón.

O alcalde, Andrés García Cardeso, e a concelleira Alicia Blanco amosáronlles aos participantes no campamento as dependencias do concello e explicáronlles o traballo que fan os políticos.

Ese mesmo día, e grazas á colaboración de Sonia Gesto, nenas e nenos puideron coñecer a farmacia Gesto da Baña e a importancia e a finalidade dos medicamentos.

Como non podía faltar o oficio de panadeiro e pasteleiro, Sergio Vieites, coordinador do campamento explicoulles aos máis novos un oficio que el mesmo aprendeu dende pequeno na panadería dos seus pais. Nenas e nenos animáronse a mancharse as mans de fariña para facer pan e unhas madalenas, que debían ter moi bo sabor, porque non sobrou ningunha.

E así rematou unha iniciativa promovida polo Concello da Baña para axudar a conciliar a vida familiar e laboral e darlle unha oportunidade de lecer aos mías novos do concello. Unha experiencias que moitos e moitas das participantes agardan poder repetir o próximo verán.

Podes ver o album de fotos no Facebook do Concello da Baña, neste enlace

Detalles

Escrito por Alicentis

Categoría: Cultura e educación

Published: 13 Xullo 2018

Visitas: 916

O alcalde da Baña, Andrés García Cardeso, recibeu esta semana ao presidente da Unión Barcalesa na Habana, Manuel Rodríguez Barreiro, quen visitou o concello aproveitando á visita que fixo aos seus familiares Ferraces.

Manuel Rodríguez aproveitou a súa visita ao Concello da Baña para entregar os xustificantes da achega que o propio rexedor lle entregara durante a súa recente visita á Habana para colaborar co mantemento do panteón social da Unión Barcalesa no cemiterio de Colón. A comisión de goberno bañense acordara concederlle mil euros ao colectivo de emigrantes ou descendentes de emigrantes para conservar o seu patrimonio no país caribeño.

Ao mesmo tempo Rodríguez Barreiro tamén lle presentou ao alcalde bañense o proxecto que está deseñando a Unión Barcalesa na Habana para dixitalizar as actas da sociedade. Manuel Rodríguez tamén aproveitou a súa visita a Galicia para reunirse co alcalde de Negreira.

Detalles

Escrito por Alicentis

Categoría: Cultura e educación

Published: 11 Agosto 2018

Visitas: 957

Os deportes minoritarios, e aqueles pouco coñecidos no noso país, foron esta semana os protagonistas no Campamento Urbano da Baña, que se está a desenvolver na área recreativa Agra de Chans. Grazas ao esforzo dos monitores e voluntarios de diferentes clubes, as nenas e nenos que asisten a este campamento puideron coñecer e practicar floorball, acrosport, korfbal, ping pong, voleibol, fútbol gaélico, béisbol, fútbol americano ou kárate.

A coordinadora do campamento, Luciana García Freita, destacou o “gran entusiasmo dos rapaces e rapazas, que lles permitiu descubrir outros deportes divertidos e cheos de posibilidades, máis aló do fútbol, baloncesto, ou tenis, que tamén lles gustan moito. Ademais, puideron descubrir que estas novas disciplinas deportivas se lles dan bastante ben”, engade.

Durante este días, os monitores dos campamento fixeron un esforzo adicional para que esta nova experiencia fose agradable para os participantes no campamento, “aproveitando recursos propios e elaborando material necesario para que se puidese desenvolver cada deporte coa súa indumentaria, regras e fin adecuado”, sinala Luciana García.

Os monitores tamén contaron coa colaboración de representantes dalgúns dos clubes da contorna que practican estes deportes. Así, ata a área recreativa Agra de Chans achegáronse membros da Agrupación Deportiva do Coto, de kárate, de Negreira; do Club de Béisbol e Sóftbol Os Tilos e do Santiago Black Ravens FA, de fútbol americano.

Ademais dos deportes minoritarios, os xogos tradicionais tamén tiveron cabida esta semana no campamento urbano da Baña. Nenas e nenos saltaron á corda, xogaron á petanca, á Mariola ou cas buxainas durante estes últimos días.

Os nenos e nenas de 3 a 12 anos que participan no campamento urbano da Baña teñen aínda ata o 31 de agosto para gozar cun amplo e variado programa de actividades.

Podes ver un álbum de fotos, que resume toda a semana, no facebook do Concello da Baña (preme aquí).

Detalles

Escrito por Alicentis

Categoría: Cultura e educación

Published: 26 Xuño 2018

Visitas: 805

Numerosos familiares e veciños encheron onte o auditorio da Escola de Música Municipal da Baña durante o festival de fin de curso, no que o alumnado puido amosar os seus progresos durante o último trimestre. Máis de trinta intervencións encheron de música as dúas horas que durou o concerto, con mención especial para Laura Buj, que vai entrar no conservatorio, e para Manuel Palma, o alumno de máis idade, que interpretou á guitarra ‘Mi Favorita’. Outro dos protagonistas foi Antonio Liñares, que puido estrear ‘Andando e correndo’, a peza que el mesmo compuxo e que interpretou á lira, acompañado de Mateo Suárez na batería. Ao rematar, o alcalde, Andrés García Cardeso, aseguroulles a familiares e alumnado que dende o Concello “seguiremos apostando pola formación musical, e traballando para darlles a mellor preparación musical a nenos e nenas”, aos que animou a “empezar con forza o próximo curso”. A Escola Municipal de Música da Baña contou no curso 2017-18 con 60 alumnos, segundo indicou o seu director, Ramón Leis.

Pódese ver o album de fotos deste concerto no Facebook do Concello