A concelleira de Cultura da Baña, Lorena Trillo, está a participar en Hungría nun encontro de traballo do proxecto europeo da Rede de Cidades. A xuntanza, impulsada polo programa Europa para a Cidadanía, reúne a representantes de trece países.

Trillo López resaltou a importancia deste tipo de encontros que "favorecen o intercambio de ideas e proxectos entre cidadáns de diferentes países para construír un futuro mellor". A concelleira bañesa pronunciou unha conferencia sobre a paz en Europa, na que falou do proceso de integración, dos tratados e da ampliación da Unión Europea.

Así mesmo, Lorena Trillo reuniuse con alcaldes e representantes de sete municipios europeos: Rait Pihelgas, deputado director da Asociacion de Cidades e Municipios de Estonia; Filippo Currenti, alcalde de Gallodoro en Italia; Mutide Priede, secretaria xeral da Asociación de Gobernos Locais de Letonia; Roberto Schilirò, presidente do consello da Unión dos municipios da área de Naxos e Taormina (Italia); Bazan Tibor, alcalde de Hévízgyörk (Hungría); John Boxall, alcalde de Vittoriosa (Malta) e Georgi Yordanov Georgiev, alcalde de Lukovit (Bulgaria).

O encontro de tres días de duración, que finaliza mañá xoves 21 de abril, serviu tamén para coñecer os costumes e tradicións de Hungría e visitar algúns dos lugares máis emblemáticos de Hévízgyörk.