- Detalles
- Escrito por Alicentis
- Categoría: novas
- Visitas: 325
Unha trintena de persoas participaron onte na andaina inaugural da ruta dos muíños da Baña, durante a que puideron gozar das excelentes paisaxes que hai a carón do río Faílde e mergullarse na historia e na etnografía do municipio.
A ruta dos muíños da Baña é unha senda circular de 7,5 quilómetros de dificultade moderada, que transcorre na maioría xunto ao río Faílde, e que permite visitar un conxunto de 9 muíños tradicionais galegos, fervenzas, montes, escaleiras de pedra, un lavadoiro, e a vella central hidroeléctrica que subministrou luz á capital bañense e ás aldeas próximas a principios do século XX.
Organizada polo club de sendas enxebres Seixos e a Asociación A Baña Emprende en colaboración do Concello, antes da saída inaugurouse na praza do Concello, en San Vicenzo, a sinalización desta ruta. Na andaina participou o alcalde da Baña, Andrés García Cardeso; o concelleiro de Promoción da vida activa e deporte, César Ramos; membros da Corporación da Baña, o presidente da Baña Emprende, Rafa Vieito; e representantes de Seixos.
Podes ver o álbum de fotos no seguinte enlace:
- Detalles
- Escrito por Alicentis
- Categoría: novas
- Visitas: 496
- Nun pleno extraordinario aprobou unha declaración institucional solicitando a paralización do parque eólico de Troitomil e a tramitación de todos os iniciados
- Facilitarase axuda á veciñanza para presentar alegacións
A Corporación da Baña volveu rexeitar onte por unanimidade de todos os grupos a instalación de parques eólicos no municipio e solicitará a paralización da tramitación da declaración de utilidade pública do de Troitomil, que foi publicada no DOG o pasado 16 de xuño.
Os tres grupos políticos volveron aprobar outra declaración institucional manifestando o “rexeitamento público e total” á implantación e tramitación de todos os parques eólicos iniciados. É un acordo unánime máis da Corporación para rexeitar a implantación abusiva de parques eólicos na contorna. Outros acordos por unanimidade do pleno neste sentido xa se produciron no pleno do 31 de marzo de 2021 e tamén no pleno celebrado o 28 de abril de 2021, no que xa se aprobara outra declaración institucional rexeitando estes parques. O 13 de outubro de 2020 os alcaldes da Baña, Negreira, Mazaricos e Santa Comba asinaran unha declaración reclamando unha normativa eólica xusta para o rural.
No pleno celebrado a última hora da tarde de onte, o alcalde, Andrés García Cardeso, volveu pedir unidade das forzas políticas e da veciñanza para rexeitar a instalacións de parques eólicos no municipio, ao tempo que anuncio que técnicos do Concello están a disposición da veciñanza para axudarlle a presentar reclamacións á tamitación de declaración de utilidade pública do parque eólico de Troitomil (que se poden presentar ata o 1 de agosto). O obxectivo é paralizar a implantación do parque eólico de Troitomil e os demais de Barrosinos e Vilartoxo.
Na sesión de onte había varios veciños das parroquias afectadas no salón de plenos.
Declaracións institucional contra os parques eólicos na Baña
A continuación reproducimos integramente a declaración institucional aprobada onte (que coincide coa lida o pasado luns na rolda de prensa conxunta coa Asociación A Fonte Seca e coa Asociación de Veciños O Outeiro de San Mamede de Monte):
O pasado 16 de xuño de 2022, saíu publicado no Diario Oficial de Galicia e en La Voz de Galicia a información pública da declaración de utilidade pública do parque eólico de Troitomil polo que lle queremos transmitir a nosa preocupación así como o rexeitamento público e total á implantación e tramitación de todos os parques eólicos iniciados.
Por todo isto, temos previsto:
- Demandar formalmente a paralización do proceso de declaración de interese público do parque mentres a Consellería de Industria non dea contestacións ás anteriores alegacións e ás seguintes solicitudes presentadas e pendentes de aceptar:
- Petición á Consellería
- Amparo á valedora.
- Solicitar unha reunión informativa, aberta á cidadanía, na que sexa o secretario do Concello o que nos informe dos pasos dados e do percorrido que temos por diante. É importante que sexa un técnico.
- Presentar unha demanda de paralización da declaración de utilidade pública pola alteración significativa sobre o PXOM xa que de facto é unha alteración total sobre boa parte dos terreos e das construcións xa existentes.
- Enviar o Concello unha solicitude de alegacións ás expropiacións da rede viaria.
- Mandar unha solicitude de traslado á Deputación da Coruña para que faga o mesmo.
- Profundar na alegación contra a partición dos parques. Hai novas sentenzas e hai que insistir en que non ter en conta que esas sentenzas sentan xurisprudencia, podería xerar demandas contra o funcionariado que as asinen.
- Incidir en que a totalidade das infraestruturas do parque, incluídas as de evacuación da enerxía xerada, deberán estar incluídas para a súa consulta pública e avaliación global no presente documento de inicio e non noutros proxectos independentes que lle impiden á cidadanía a avaliación dos impactos ambientais globais do conxunto das infraestruturas do proxecto industrial.
- Solicitarlle a Medio Rural documentación que acredite todos os incendios habidos nese monte durante os últimos 35 anos.
- Insistir en que o Concello non ten capacidade para abastecer de auga potable a poboación afectada e, polo tanto, tratándose dun ben básico, faise inviable a declaración de utilidade pública xa que hai risco severo de que as obras afecten os mananciais, o que supón unha afección moi severa e prexuízos significativos para os recursos hídricos e a vulneración flagrante da Directiva marco da auga (DMA).
Ademais non existe un estudo hidrolóxico e hidroxeolóxico que garanta a calidade das masas de auga superficiais e soterradas e a non afección dos acuíferos. A mercantil promotora obvia as captacións de auga para o uso humano e agrogandeiro e os mananciais e fontes que hai na poligonal do parque eólico e no traxecto da liña de evacuación.
- Insistir en que hai unha forte alteración social e que polo tanto se demanda a paralización desta declaración de utilidade pública.
- Solicitar unha reunión no Parlamento de Galicia co vicepresidente e co conselleiro de Industria, Francisco Conde para que o grupo de goberno vaia da man dos colectivos veciñais e trasladarlle a repulsa ao proxecto eólico de Troitomil.
- Solicitar unha reunión con Valentín Formoso, presidente da Deputación, para que presente alegacións pola estrada O Seilán-Lañas e para que lle mostre o seu apoio ao Concello da Baña.
Co fin de colaborar coas persoas afectadas, o Concello da Baña ponse ao servizo da veciñanza, ata o 1 de agosto, para axudar a tramitar os escritos de alegacións coa finalidade de paralizar a implantación deste parque eólico de Troitomil nesta información pública e nos demais de Barrosino e Vilartoxo.
- Detalles
- Escrito por Alicentis
- Categoría: novas
- Visitas: 325
-
O investimento ascende a 47.980 euros para cambiar luminarias, limpeza de fachada e arreglo de cuberta
O alcalde da Baña, Andrés García Cardeso, e o Conselleiro de Sanidade, Julio García Comesaña, asinaron esta mañá en Santiago un convenio para financiar múltiples melloras no centro de saúde do municipio. Entre as actuacións que se van acometer, por un montante próximo aos 48.000 euros, se inclúen a substitución de todas as luminarias incandescentes ou fluorescentes por lámpadas LED, a diminuír o consumo enerxético, a limpeza por auga a presión da fachada e a revisión das cubertas do centro.
O plan de mellora da eficiencia enerxética do centro de saúde da Baña é a conclusión dunha serie de reunións previas desde que en novembro o alcalde achegara á Consellería de Sanidade unha memoria arquitectónica na que se inclúen como medidas fundamentais adoptar alumeado LED, limpeza da fachada e revisión da cuberta. Estas actuacións, que suporán un investimento de 47.980 euros, teñen por obxectivo reducir o consumo eléctrico no edificio; reducindo tamén a contaminación ambiental asociada á xeración de electricidade.
Durante o acto desta mañá, ao que tamén asistiu a xerente da Área Sanitaria de Santiago e Barbanza, Eloína Núñez, o conselleiro de Sanidade agradeceu a disposición do alcalde da Baña para poder asinar o convenio co tempo suficiente para a licitación e execución da obra en prazo e forma, co fin de que canto antes pacientes e profesionais conten cun centro de saúde mellor e máis confortable.
Pola súa parte, o alcalde da Baña interesouse polos problemas que houbo no centro de saúde por falta de persoal de enfermería. “Cando lle preguntei contestou que xa estaba arranxado, que fora un problema de carácter puntual”. Segundo o alcalde, tras notificar estas incidencias foron resoltas de maneira inmediata.
Ademais, lembrou que non é a primeira mellora experimentada polo centro de saúde da Baña nos últimos anos pois, froito do investimento de 8 millóns de euros en equipamento, derivado do Plan Galego de Atención Primaria 2019-2021, este centro recibiu un electrocardiógrafo e un espirómetro por un importe total de 5.929 euros.
- Detalles
- Escrito por Alicentis
- Categoría: novas
- Visitas: 558
-
O equipo de goberno mantivo unha reunión co colectivo Fonte Seca e a asociación de veciños O Outeiro de San Mamede de Monte
-
Ofrecerán unha rolda de prensa conxunta o vindeiro luns, día 27, para explicar a postura de rexeitamento contra o parque eólico
O alcalde da Baña, Andrés García Cardeso, e o tenente de alcalde, César Ramos Domínguez, mantiveron unha xuntanza onte pola tarde cos representantes do colectivo veciñal Fonte Seca e da Asociación de veciños O Outeiro de San Mamede de Monte ao obxecto de reafirmar as posturas de rexeitamento contra o proxecto de parque eólico de Troitomil.
A xuntanza prodúcese tras o anuncio da Consellería de Economía, Industria e Innovación, publicado o 16 de xuño no Diario Oficial de Galicia, polo que se somete a información a declaración de utilidade pública, e a necesidade de urxente ocupación que iso implica, do proxecto do parque eólico de Troitomil.
Membros do goberno da Baña e representantes das dúas asociación acordaron coordinar as medidas de rexeitamento ao proxecto e convocar unha rolda de prensa conxunta para explicar os motivos desta postura. A esta rolda de prensa, que se celebrará o vindeiro luns, día 27 de xuño, ás 20.00 horas no salón de plenos, están convocadas tamén toda a Corporación, grupos políticos e a veciñanza en xeral.
A vindeira semana celebrarase tamén un pleno extraordinario, cun único punto na orde do día, no que se deixará constancia da oposición total tanto á declaración de utilidade pública e urxente ocupación dos terreos do proxecto do parque eólico de Troitomil como ao propio proxecto en si dos muíños de vento.
Ademais, o Concello da Baña remitirá unha carta informativa toda a veciñanza na que se explicará e se argumentarán os motivos polo que se rexeita pública e taxativamente a implantación e a tramitación dos parques eólicos no municipio.
- Detalles
- Escrito por Alicentis
- Categoría: novas
- Visitas: 436
- A unidade móbil estará dispoñible de 09:45 a 14:30 horas diante do centro de saúde
A Baña. 21-06-2022.- A Axencia galega de Doazón de Órganos e Sangue (ADOS) desplazarase o luns 4 de xullo ata o concello da Baña para facilitar e promover a doazón de sangue entre os seus habitantes. A unidade móbil da axencia permanecerá estacionada diante do centro de saúde toda a mañá para que as persoas interesadas en doar poidan acercarse.
A unidade e a extracción son totalmente seguras e manteñen un rigoroso protocolo para evitar riscos na situación actual. Entre estas medidas se atopa o teléfono gratuíto para solicitar cita automaticamente 900 100 828.