Telefónica comunicoulle ao Concello da Baña unha avaría na rede, tanto de teléfono coma de Internet, que afecta a diversas zonas do municipio. A casa consistorial e máis o centro de saúde están tendo problemas para recibir chamadas e conectarse á Rede.

O Concello pon a disposición da veciñanza os números de móbil 682 859 367 e 649 908 293 para que quen o precise se poida comunicar coas oficinas municipais mentres dure a incidencia. Desde a compañía telefónica informan de que están a traballar para resolver a avaría o antes posible, aínda que todo fai indicar que podería durar máis do desexado.

Atendendo as últimas medidas e recomendacións achegadas pola Xunta de Galicia sobre o Covid-19, o Concello da Baña pechará a partir de mañá, venres 13 de marzo, o centro social e da terceira idade, a axencia de lectura, a aula de informática e as escolas de música. Así mesmo, acordou suspender as escolas deportivas municipais e cancelar os actos culturais previstos para os vindeiros días, como a sesión de contacontos de mañá, venres.

No ámbito educativo, atendendo a suspensión da actividade lectiva e extraescolar durante 14 días comunicada hoxe pola Xunta de Galicia, o Concello informa do peche a partir do luns do Punto de Atención á Infancia (PAI). Mañá venres, a asistencia ao PAI será opcional, aínda que non se recomenda.

Esta decisión adóptase seguindo as recomendacións da autoridades sanitarias en relación coa contención do coronavirus Covid-19. Nesta liña, o alcalde asinou esta tarde un bando no que detalla as medidas e recomendacións que se van tomar dende o Concello da Baña para loitar contra a pandemia.

  • Por este motivo, o Concello suspende todas as actividades municipais deportivas, culturais e de servizos sociais desde o 13 ata o 29 de marzo.
  • A atención ao público nas dependencias municipais verase limitada a casos de emerxencia,  polo que os trámites que se teñan que realizar serán preferentemente por vía telemática ou ben telefónica no teléfono 981 886 501.
  • Péchanse a aula de lectura, a de informática, os pavillóns, o campo de fútbol, o auditorio da casa de cultura, o centro social e da terceira idade, o Punto de Atención á Infancia, a Escola de Música, as Escalas Deportivas e a casa de cultura.
  • Quedan suspendidas todas as autorizacións municipais para eventos, charlas e coloquios así como as actividades culturais, sociais, deportivas e lúdicas impartidas desde o Concello e realizadas nos edificios públicos municipais.

Dende o Concello da Baña recoméndase

  • Seguir as instrucións ditadas polo Ministerio de Sanidade e a Consellería de Sanidade e contactar co 061 ou co teléfono de información para a cidadanía 900 400 116, no caso de ter algún síntoma.
  • Non celebrar actividades e festas privadas e que as asociacións e entidades do concello eviten aglomeracións .
  • Non facer viaxes e desprazamentos que non se consideren indispensables.
  • Evitar as zonas de máxima concentración do virus.
  • Non visitar centros de maiores, hospitais, centros médicos a excepción de casos de extrema necesidade.
  • Lavar con  frecuencia as mans e a cara con auga e xabón.

O alcalde recorda no bando que o Concello non quere crear demasiada alarma pero esta decisión extraordinaria é necesaria para garantir a saúde e a seguridade de todas as persoas e, ademais, pide que toda a cidadanía colabore na loita contra o virus.

Para solicitar información xeral sobre o novo coronavirus, a Xunta de Galicia pon a disposición da poboación o teléfono gratuíto 900 400 116. Así mesmo, neste enlace pódese consultar toda a información que están a ofrecer as autoridades sanitarias de forma actualizada.

    • O Concello acondicionará provisionalmente a escola e campo de fútbol de Corneira para acoller no verán á Caravana Arriera

    • A Corporación pídelle a Goberno central e Xunta un plan de igualdade de oportunidades, contra a brecha salarial e fomentar as carreiras científicas entre as alumnas

    • Os tres grupos da oposición tamén decidiron subscribirse a Nós Diario, o único xornal escrito en galego

    • Hai máis granxas que piden reducir a contribución e que están pendentes de entregar a documentación pertinente

    • Aprobada definitivamente a ordenanza que lle pide aos madeireiros unha fianza e un seguro de responsabilidade civil

 

A unanimidade entre os tres grupos políticos reinou onte na aprobación dos puntos debatidos no Pleno da Corporación da Baña, aínda que despois, no longo capítulo de rogos e preguntas de case dúas horas, tanto Partido Popular como Compromiso por Galicia foron críticos co equipo de goberno socialista. Os tres grupos apoiaron rebaixarlle un 95% o IBI a unha explotación gandeira e a aprobación definitiva da ordenanza que lle pide ás empresas unha fianza e seguro de responsabilidade civil para cortar madeira. As mocións para potenciar a Vía Mariana e que o Concello se subscriba a Nós Diario, presentada por CxG, e a do PP de cara ao 8-M solicitándolle ao Goberno central e á Xunta por en marcha plans de igualdade, de redución da brecha salarial e de fomento das carreiras científicas entre as alumnas tamén se aprobaron por unanimidade  (vídeo do pleno neste enlace).

A rebaixa da contribución nun 95% ás explotacións gandeiras é algo que ten contemplado o Concello da Baña. Onte aprobouse a solicitude presentada por unha delas, e anunciouse que hai máis veciños que tamén solicitaron esta redución no pago do IBI, pero que teñen que presentar a documentación pertinente para ser aprobado en pleno.

20200304 Pleno bana web

Co acordo dos tres grupos, que rexeitaron as alegacións presentadas pola federación de madeireiros, quedou aprobada definitivamente a ordenanza que regula a taxa para permitir a corta de madeira na Baña. A partir de agora, os madeireiros, ademais de presentar un seguro de responsabilidade civil para facer fronte aos posibles danos nas pistas e camiños públicos que se produzan durante a súa actividade, deberán depositar unha fianza. Aquelas empresas que utilicen camións de menos de 16 toneladas deberán depositar unha fianza de 1.600 euros en metálico para responder dos danos que poidan causar. Se os vehículos cargan máis de 16 toneladas, a fianza será de 3.100 euros. 

Na primeira moción presentada por Compromiso por Galicia, pedíase que o Concello da Baña se subscriba a Nós Diario, o único xornal escrito en galego que se publica de martes a sábado, como xeito de contribuír aos obxectivos do Servizo municipal de Normalización Lingüística. A intención é que os exemplares estean a disposición da veciñanza na axencia de lectura e no centro social e da terceira idade, e se poida acceder dixitalmente dende a aula de informática.

Tamén por unanimidade se aprobou a moción para reforzar a Vía Mariana Luso Galaica. César Ramos solicitou que dende o Concello se acondicione provisionalmente tanto a escola como o campo de fútbol de Corneira para colaborar coa Caravana Arriera que este verán ai facer o traxecto dende Santiago a Muxía (o ano pasado chegou de Braga a Compostela), poida durmir na Baña. A intención e que, nunha segunda fase, se poidan ofrecer aos peregrinos desta ruta e do Camiño de Santiago a Muxía unhas instalacións permanentes, buscando a mellor forma de xestión, ben municipal ou a través dunha asociación.

Igual resultado (11 votos a favor) colleitou a moción do Partido Popular relativa ao 8-M, no que se pide ao Goberno central que poña en marcha un novo plan estratéxico de igualdade de oportunidades para dar cumprimento a axenda 2030; impulsar un pacto nacional para a conciliación laboral e fomentar as vocacións tecnolóxicas (STEM) entre as alumnas. O Concello da Baña solicitaralle a Xunta por en marcha medidas para fomentar a igualdade retributiva das mulleres en todos os ámbitos, que fomente entre as mulleres  vocacións  STEM (ciencia, tecnoloxía, enxeñaría e matemáticas) e tamén programas de alfabetización dixital no rural.

Despois de media hora de unanimidade, comezou un amplo capítulo de rogos e preguntas, no que durante preto de dúas horas, tanto PP, que formulou 15 cuestións, como CxG, con outras 20, foron críticos co equipo de goberno (vídeo do pleno neste enlace).

 

 

  • O contrato ascende a 493.000 euros e inclúe a proposta da firma de engadir 89.000 euros en melloras de unidades de obra

  • Compromiso por Galicia abstívose alegando os problemas, incluso xudiciais, que tivo a empresa na Coruña, Sevilla, Asturias e Cataluña

  • PP e PSdeG votaron a favor da proposta presentada pola Mesa de Contratación e adiantan que os técnicos e o xefe de obra deberá vixiar con esmero a execución das actuacións

 

 

O Pleno da Corporación da Baña aprobou esta mañá, cos votos a favor de PSdeG e PP e a abstención de Compromiso por Galicia, a proposta da Mesa de Contratación de adxudicarlle á empresa Alumbrados Viarios SA a substitución de máis de 2.200 luminarias no municipio por lámpadas led para contribuír ao aforro enerxético e á redución de CO2 á atmosfera. O proxecto, que ascende a 493.000 euros, IVE incluído, está financiado polo IDAE, do Ministerio para a Transición Enerxética, e do Programa Operativo FEDER da Unión Europea con case 400.000 euros. Na súa oferta, Aluvisa inclúe a execución de melloras de unidades de obra por importe de 89.000 euros e unha garantía total das luminarias de 10 anos. (o vídeo da sesión pódese ver neste enlace)

A empresa deberá presentar antes deste venres toda a documentación requirida, incluído un aval de 20.000 euros, para poder asinar o contrato. O prazo de execución das obras é de 8 meses, que comezarán a contar en canto se firme a acta de traza de planta, polo que a previsión do Concello é de que este ano poida estar rematada a mellora da iluminación pública na Baña.

A proposta de Aluvisa foi a recomendada pola Mesa de Contratación, que analizou a oferta presentada por outras catro firmas que acudiron ao concurso. Tanto o equipo de goberno como o Partido Popular indicaron que ían votar a favor desta proposta. Na intervención de CxG, César Ramos recordou que as cinco empresas teñen puntuacións similares na Mesa de Contratación nos apartados obxectivos, polo que pediu ver o expediente. Ao mesmo tempo informou de que, como se pode comprobar ao buscar en Internet, Aluvisa tiña abertos varios expedientes administrativos e algúns xudiciais na Coruña, Sevilla, Asturias e Cataluña por problemas coas execucións de obras, polo que optaron por absterse na votación.

O alcalde sinalou que esa situación non impedía que Aluvisa se puidese presentar ao concurso da Baña, e incluso gañalo, como foi o caso. Ao tempo que anunciou que o director de obra estará encima para comprobar que as obras se executan de acordo co proxecto, e coincidiu con Andrés García Cardeso en que tamén os técnicos do IDAE supervisarán a execución.

Máis de 2.200 novas lámpadas

Este proxecto conta cunha axuda do Instituto para a Diversificación e Aforro de Enerxía (IDAE) do Ministerio para a Transición Ecolóxica e financiamento europeo ao estar enmarcada no Programa Operativo FEDER de crecemento sostible 2014-2020. Esta achega representa o 80% do investimento total, 394.546,96 euros, mentres que o Concello debe asumir o 20% restante, ata os 493.183,70 euros nos que foi adxudicado o proxecto.

Con esta actuación que o Concello da Baña acaba de adxudicar a Aluvisa poderanse renovar 2.281 puntos de luz dos 2.327 existentes no termo municipal, cambiando as lámpadas por outras de tecnoloxía LED máis eficientes e con menos consumo, polo que se estima que o aforro enerxético será dun 73%, ao pasar dos 230,82 KW ata 81,08 KW. Ademais de cambiar as luminarias, tamén está previsto substituír cadros eléctricos.

20200309 Pleno Baña aluvisa web

Plan Marco 2020-2021

Ademais de proceder ao sorteo para designar os integrantes das mesas electorais para as vindeiras eleccións autonómicas do 5 de abril, no Pleno de hoxe tamén se aprobaron as obras que se van incluír no Plan Marco 2020-2021, para a mellora de camiños municipais de acceso a parcelas agrícolas.

Neste apartado houbo unanimidade dos tres grupos para incluír accesos en Agra de Portochán, Marcelle-Cabanas, Braña de Gosende e na Ermida. Estas catro actuacións representan un investimento de 59.679 euros

O alcalde informa que durante os últimos días o servizo técnico encargado do mantemento da iluminación pública detectou que algunhas caixas e cadros de mando foran forzadas, abertas e manipuladas. O Concello pide a colaboración da veciñanza para impedir que este tipo de accións se repitan, posto que repercuten negativamente na veciñanza ao non funcionar a iluminación pública. Ademais, solicita a colaboración cidadá para que se algunha persoa ve algún cadro eléctrico en mal estado ou algún tipo de acto anormal, contacte co Concello da Baña.