O Concello da Bañan vén de remitirlles unha carta aos presidentes das diferentes asocaicións sen ánimo de lucro do municipo informándolles de que a Deputación da Coruña acaba de convocar subvencións para a realización de actividades e investimentos de promoción económica en entidades sen ánimo de lucro. A presentación deberá facerse telemática antes do 29 de marzo e, dende a Consellería de Cultura da Baña, ofrecenlles apoio e axudas ás entidades que o precisen e que soliciten cita no teléfono 981 886 501.

A contía económica destas axudas da Deputación oscila entre un mínimo de 1.200,00 € e un máximo de 28.000,00 €. O prazo de solicitude remata o vindeiro día 29 ás 14.00 horas. Os beneficiarios son: Colexios profesionais, cámaras de comercio, asociacións de empresarios e comerciantes, asociacións de veciños e de mulleres rurais, asociacións de cazadores, legalmente constituídas e con domicilio fiscal na provincia da Coruña.

A tramitación de solicitudes farase telemáticamente a través da plataforma SUBTEL, polo que é preciso que os solicitantes dispoñan de certificado dixital ou DNI electrónico e conta de correo electrónico. (https://www.dacoruna.gal/dicoruna-subtel/acceso/login

O Boletión Oficial da Provincia da Coruña recolle a convocatoria na publicación do día 01/03/2019 (Extractos da resolución nº 2019/5226 e 2019/5227).

Consulta as bases das convocatorias nas seguintes ligazóns:

Bases reguladoras das convocatorias de subvencións da deputación provincial da Coruña, dirixidas a entidades privadas (iniciativa social sen ánimo de lucro e centros especiais de emprego, no ano 2019.

Bases reguladoras específicas da convocatoria do programa de subvencións dirixido a entidades sen ánimo de lucro da provincia da Coruña, dirixido a entidades sen ánimo de lucro da provincia da Coruña para investimentos de promoción económica durante o ano 2019.

Bases reguladoras específicas da convocatoria do programa de subvencións dirixido a entidades sen ánimo de lucro da provincia da Coruña, dirixido a entidades sen ánimo de lucro da provincia da Coruña para actividades de promoción económica durante o ano 2019.

 

20190228 Telefono movil

As operadoras de telefonía móbil Telefónica, Vodafone e Orange están implantando no Concello da Baña os servizos 4G na banda 800MHz. Esta nova tecnoloxía permitirá á veciñanza gozar de conexións móbiles de alta velocidade, dunha mellor cobertura no interior dos edificios e dun maior alcance xeográfico. As parroquias beneficiarias desta medida son San Vicenzo, San Mamede, Lañas, Fiopáns, Troitosende, San Cibrán, Barro e Marcelle. 

A implantación da velocidade 4G responde aos problemas de cobertura que sofren algunhas áreas de orografía complicada e mellora o servizo no interior dos edificios. Tamén facilita a introdución de novos servizos empresariais, ademais de sacar o máximo partido a todo tipo de aplicacións móbiles, grazas á velocidade de descarga e envío de datos.

Para garantir a compatibilidade da nova tecnoloxía coa Televisión Dixital Terrestre (TDT), a entidade xestora do servizo, Llega800, está á disposición dos veciños e veciñas de forma gratuíta (a través do teléfono 900 833 999 e da páxina web www.llega800.es) para resolver calquera conflito ou dúbida previa á instalación e posterior á mesma.

20190223 ALI0615

Voluntarias e voluntarios da Baña comezaron esta tarde a quentar as pedras e facer as primeiras filloas para poder saciar a fame de todos os que mañá se acheguen ata o polideportivo de San Vicente durante o día grande da Festa da Filloa da Pedra. Nesta ocasión, o traballo foi máis pracenteiro grazas a Foliada Filloeira que preparou a organización como novidade da décimo sexta edición desta exaltación gastronómica.

20190223 ALI0605As Pandeireteiras e a Escola de Gaitas da Baña estiveron acompañados durante a tarde deste sábado por As Xoubas e Os Viracunchos do OCT Ultreia (de Santiago), Tíralle do Aire (Negreira) e a charanga Os Sentenarios (de Muros). Entre filloa e filloa, e vendo o animado do ambiente, voluntarias e voluntarios animábanse a botar algunha baila (podes ver o album de fotos no facebook do Concello, neste enlace)

O Concello da Baña e a Asociación Filloa da Pedra teñen preparados 1.400 litros de amoado, feito con auga, fariña, ovos e sal para facer uns cantos miles de filloas. Deles, uns 400 litros xa se acabarán o sábado. Mañá, domingo, dende as dez da mañá, as 36 pedras de 50x50 centímetros estarán dando unha filloa cada sete minutos, aproximadamente, mentres as 100 persoas voluntarias se irán repartindo entre atender as pedras, á cantina, aos visitantes e para servir tamén os chourizos, orellas, nata, mel e, como novidade este ano, o cocido para acompañar ás filloas.

A ruta BTT Filloa da Pedra, que nas dúas edicións anteriores se celebraba o día grande da festa, trasladouse este ano para o domingo 17 de marzo. Os amantes ao ciclismo teñen ese día unha cita para coñecer os excelentes paisaxes da Baña. As inscricións pódense facer na páxina web do Concello da Baña.

Programa para o domingo

 

O domingo 24 será o día grande da XVI Festa da Filloa da Pedra no polideportivo de San Vicenzo, que abrirá ao público a partir das 10.00 horas. Durante todo o día os asistentes poderán degustar as excelentes filloas da pedra que elaborarán as voluntarias e voluntarios da Asociación e que se servirán soas, con chourizo, nata ou mel, coma todos os anos. A novidade desta edición é que as filloas serviranse tamén acompañadas da súa parella perfecta: o cocido.

Os Campantes da Baña e a agrupación Sarillo de Aiazo serán os encargados de poñer a música pola mañá, con actuación ás 12.30 e 14.30 horas, respectivamente. Os máis pequenos terán un espectáculo dedicado para eles as 16.30 horas cos Animacreques, e a partir das seis da tarde a Orquestra Charlestong Big Band animará a verbena.

O Estudo obradoiro de cerámica Alén das Olas impartirá talleres de cerámica durante todo o día, e para repoñer forzas, ademais de degustar as ricas filloas da pedra da Baña, os asistentes poderán achegarse ata os postos de polbo e churrasco que se instalan nas inmediacións do polideportivo municipal.

20190224 Pregoeiras Autoridades

As “filloeiras e filloeiros anónimos, coñecidos só no entorno máis próximo” foron hoxe os protagonistas da XVI Festa da Filloa da Pedra, que quixo render unha homenaxe a todas esas veciñas e veciños da Baña que en 2004 “tivemos que espremer os miolos” para poñer en marcha “unha festa gastronómica, hoxe xa consolidada”, que é coñecida en varios países e ten recollido numerosos premios. 

20190224 Aldara ALI0768Neli Pisco, unha desas filloeiras da Baña que leva dende 2004 traballando na organización da festa, foi a encargada de ler o pregón en representación das 50 filloeiras e 3 filloeiros que este ano colaboraron coa Asociación Filloas da Pedra e co Concello da Baña para levar adiante unha exaltación gastronómica que reuniu a miles de persoas en San Vicenzo. 

Neli Pisco non estivo soa. Acompañárona como pregoeiras Arita País, a filloeira más veterana e de maior idade das que seguen en activo, que foi presentando unha a unha ás persoas que atendían as pedras; e Alba Losa Landeira,que viña sendo a filloeira máis nova da Baña. Un posto, o de filloeira máis nova, que este ano correspondeulle á Aldara Grille Tomé, de tan só 9 anos, que estivo facendo filloas toda a mañá e ata lles ensinou ás conselleiras do Mar, Rosa Quintana, e de Política Social, Fabiola García, como se fan as auténticas filloas da pedra da Baña.

O alcalde, Andrés García Cardeso, agradeceu o traballo e implicación de veciñas e veciños que manteñen viva a Festa da Filloa da Pedra. García Cardeso, coincidindo co aniversario do nacemento de Rosalía de Castro que se celebra hoxe, invitou a todos os presentes “a regalar un libro, e tamén unha filloa da pedra”, ao tempo que tivo un “recordo moi especial” para todos os habitantes de Venezuela “un país no que viven e viviron moitos galegos emigrados e que está a pasar por momentos moi complicados”.  Entre as autoridades que asistiron á festa, ademais dos xa mencionados, atopábanse o delegado da Xunta na Coruña, Ovidio Rodeiro; a alcaldesa de Santa Comba, o de Val do Dubra e o tenente alcalde de Boqueixón.

20190224 FilloeirasE mentres Neli Pisco, Arita País e Alba Losa pronunciaban o pregón, a cola para mercar filloas da pedra medraba no polideportivo de San Vicenzo. Miles de persoas pasaron esta fin de semana polo recinto da festa, ata o punto de esgotar as existencias, e iso que a organización foi precavida. Preparáronse 1.400 litros de amoado (a base de auga, sal, fariña e moitos ovos) que deron para facer algo máis de 6.000 filloas. Lino, Manolo e Longueira foron os encargados do cocido, e xa dende o sábado coceron 100 quilos de lacón, 80 de orella, e chourizos, cacheiras, touciño entrefebrado, costela, grelos e patacas que acabaron desaparecendo a medida que ían aumentando os visitantes. Habían quen pedía tamén tapas doces, a base de filloa, chocolate, mel, nata e marmelo con queixo.

Os postos de artesanía dábanlle un colorido especial ao pavillón. Alí tamén estaba o alumnado do CPI da Baña, vendendo camisetas e cuncas para recadar fondos para a excursión de fin de curso. Os Campantes da Baña e Sarillo, de Aiazo, animaron a mañá e a sobremesa, mentres que a Orquestra Charleston Big Band deu comezo a verbena cando aínda as pedras botaban fume e seguían sacando filloas para saciar os padais de moitos visitantes.

Album de fotos no Facebook do Concello (preme aquí).

 20190224 Publico da Festa Filloa Pedra

20190221 Voluntarios Filloeiros web

 

Unha foliada con música tradicional galega é a gran novidade da XVI Festa da Filloa da Pedra da Baña, que amplía a súa programación a dous días de exaltación da cociña tradicional galega. O sábado pola tarde, de cinco a nove no polideportivo de San Vicenzo, haberá música tradicional e degustación de filloas. A Asociación da Filloa da Pedra da Baña mobilizará 100 persoas voluntarias para facer filloas nas 36 pedras de 50x50 centímetros habilitadas para a ocasión cos 1.400 litros de amoado que se prepararán nos dous días. Outra das novidades deste ano é que o domingo a filloa poderá degustarse coa súa parella preferida: o cocido.

A exaltación da festa da filloa da pedra nacía en 2004 promovida polo Concello da Baña, ata que en 2007 nace a Asociación Filloas da Pedra da Baña, que dende entón coorganiza co concello esta exaltación gastronómica que viaxou xa a diferentes países. “Hoxe o Concello da Baña é coñecido en moitos lugares grazas a esta festa. A filloa quere devolverlle parte dese esforzo e axudar a mellorar o futuro do noso concello”, sinalaba Mónica Tomé, secretaria da asociación, no acto de exaltación da filloa celebrado no Pazo de Cores, no que se deron cita tamén as festas das filloas de Lestedo, Zas e Muimenta.

Nesta decimosexta edición, os actos comezarán o sábado, día 23, ás cinco da tarde no polideportivo de San Vicenzo. Alí estarán xa os voluntarios da asociación preparando filloas cuns 400 litros de amoado, para ofrecer como degustación e ir gardando algunhas para o día seguinte. Sobre as 17.30 comezará a Foliada Filloeira, na que intervirán as Pandeireteiras da Baña, As Xoubas e os Viracunchos do COT Ultreia (de Santiago), Tíralle do Aire (Negreira), a charanga Os Sentenarios (de Muros) e os integrantes da Escola de Gaita da Baña. 

E entre peza e peza, baile e baile, os asistentes poderán ver traballar en directo as filloeiras e filloeiros preparando este produto típico da gastronomía galega, ademais de degustar as ricas filloas da pedra. Eso si, o sábado serviranse soas.

O domingo 24 será o día grande da XVI Festa da Filloa da Pedra no polideportivo de San Vicenzo, que abrirá ao público a partir das 10.00 horas. Durante todo o día os asistentes poderán degustar as excelentes filloas da pedra que elaborarán as voluntarias e voluntarios da Asociación e que se servirán soas, con chourizo, nata ou mel, coma todos os anos. A novidade desta edición é que as filloas serviranse tamén acompañadas da súa parella perfecta: o cocido.

Os Campantes da Baña e a agrupación Sarillo de Aiazo serán os encargados de poñer a música pola mañá, con actuación ás 12.30 e 14.30 horas, respectivamente. Os máis pequenos terán un espectáculo dedicado para eles as 16.30 horas cos Animacreques, e a partir das seis da tarde a Orquestra Charlestong Big Band animará a verbena.

O Estudo obradoiro de cerámica Alén das Olas impartirá talleres de cerámica durante todo o día, e para repoñer forzas, ademais de degustar as ricas filloas da pedra da Baña, os asistentes poderán achegarse ata os postos de polbo e churrasco que se instalan nas inmediacións do polideportivo municipal.