• Coincidindo co Día do Neno, a presidenta da ANPA do CPI San Vicente é a protagonista do vídeo de novembro de ‘A Baña en feminino’

  • Reivindica o papel do colexio en prol da equidade e recomenda que nais e pais eviten os prexuízos e a linguaxe sexista

  • Coida que a conciliación é clave de cara a avanzar na plena incorporación da muller ao mundo laboral

 

“Temos que fomentar nos colexios todas aquelas actividades en prol da equidade e educar aos nosos fillos para que eles loiten por conseguir a máxima igualdade de oportunidades posible, de xeito que poidan ser o que queren ser”. É o apuntamento que fai hoxe, Día do Neno, Mónica Rial, veciña da Baña, presidenta da ANPA do CEIP San Vicente e protagonista dunha nova entrega da serie de audiovisuais A Baña en feminino, coa que o Concello convida a reflexionar sobre a igualdade e visibilizar a muller no ámbito rural.

Ademais de á educación, Mónica Rial sinala tamén á conciliación familiar como unha das condicións para que poida avanzarse cara á igualdade real. Na Baña, di, “estamos nun punto de cambios. Poderían ser maiores e máis rápidos, si, pero o noso é un concello rural, pequeno, envellecido e cambiar a mentalidade custa”. Aínda así, en comparación con xeracións anteriores, si ve avances moi claros. “Miña avoa contaba que moitas nenas non podían ir á escola porque tiñan que quedar na casa a axudar coas tarefas. Agora nenas e nenos teñen a mesma atención escolar, as mulleres son empresarias e levan elas soas as explotacións gandeiras”, explica.

Todas as actividades promovidas pola ANPA no colexio de San Vicente desenvólvense baixo o prisma da igualdade. De cara aos pais, Mónica Rial recomenda “reeducarnos a nós mesmos, para evitar as ideas preconcibidas ou deixar de utilizar palabras sexistas”. Advirte que, sen decatarnos, influímos negativamente nas nosas fillas e fillos opinando “sobre o que queremos, de quen queremos e como queremos, sendo moitas veces ofensivos” e que eles reproducen os nosos comportamentos.

20211120 Bana feminino Monica Rial web

A Baña en feminino

O vídeo de Mónica Rial, que pode verse na canle municipal de Youtube, é o undécimo e penúltimo vídeo do proxecto ‘A Baña en feminino. Visibilizando a muller rural’. Trátase dunha iniciativa do Concello bañés que, coa publicación dun audiovisual por mes ao longo do presente ano 2021,  ten como fin reflexionar sobre o papel das mulleres na contorna rural e fomentar a igualdade dándolle voz a veciñas do municipio que se desempeñan en diversos eidos. As anteriores protagonistas foron:

  • Manuela Tojo. Veciña de Faílde de 89 anos, protagonizou o vídeo de outubro no Día da Muller Rural.  Nel repasou unha traxectoria que non foi nada común porque, ao contrario do que adoitaba pasar cando ela era nova, sendo muller desenvolveuse laboralmente fóra da casa, desempeñou un oficio tradicionalmente masculino como era o de ferreira e foi tamén pioneira ao converterse na primeira bañense en sacar o carné de conducir.
  • Rosa Rodríguez, cantante do Dúo Rosán, radiografiou o pael da muller na música no mes de setembro, coincidindo coa celebración das festas patronais de San Vicenzo da Baña. “Agora hai máis mulleres que levan a batuta e seguiremos avanzando”, subliñou, ademais de receitar “inculcar o respecto desde ben pequeniños” como fórmula para conseguir a igualdade entre homes e mulleres.
  • Noelia Castro, graduada en Educación Infantil e monitora de ocio e tempo libre, convidou a reflexionar sobre o cambio de mentalidade necesario para a igualdade. Fíxoo nun vídeo publicado no Día Internacional da Mocidade, no que esta veciña de Lañas de 22 anos salientou a importancia dos campamentos como “espazos idóneos para promover a igualdade desde a primeira infancia”.
  • Carme Liñares, avoa de cinco netos, protagonizou o vídeo publicado en xullo, con motivo do Día Internacional das Avoas e dos Avós. Esta veciña de Cabanas constataba o difícil que foi “chegar á liberdade de hoxe, porque antes a muller non tiña voto para nada” e convidaba a non dar pasos atrás.
  • Verónica Liñares, enxeñeira de Montes e veciña de Ordoeste, incidiu no mes de xuño na necesidade de dotar á sociedade de “referentes femininos para que desapareza a fenda de xénero existente nas ciencias e nas enxeñarías”.
  • A soldadora Nerea Vázquez protagonizou o vídeo que se publicou no Día do Traballo, no que falaba da presión que sentiu cando decidiu estudar para un oficio tradicionalmente masculino ou das dificultades laborais coas que se atopan as mulleres no sector do metal.
  • Coincidindo co Día do Libro o 23 de abril, a gañadora do premio Álvaro Cunqueiro de teatro Carme Varela avogaba por liberar as mulleres da carga dos coidados. “É un lastre que levamos de sempre, o de coidar primeiro dos nenos e despois dos maiores”, subliñaba a filóloga e escritora de Duomes de Arriba.
  • Xa en marzo, a ex perruqueira Isabel Giraut, promotora da Asociación de Mulleres na Baña, insistía na importancia de que dende pequenos rapaces e rapazas sexan educados para asumir idénticas responsabilidades no fogar.
  • En febreiro, o protagonista foi Carlos Sande, un mozo filloeiro que reclamaba “condicións idóneas” para que as mulleres conten coas mesmas oportunidades ca os homes en todos os eidos vitais, ao tempo que censuraba a existencia de “micromachismos que temos tan interiorizados que nin os cuestionamos”.
  • A mestra xubilada Dolores Allo inaugurou a serie ‘A Baña en feminino’ o pasado mes de xaneiro, co gallo do Día Internacional da Educación, falando das súas vivencias e dos avances que experimentou a sociedade nas últimas décadas de cara a acadar a igualdade.

 

  • Terá postos de agasallos, gastronomía, espectáculos, obradoiros, música e a visita de Papá Noel
  • Celebrarase no pavillón municipal dende o medidía ata as oito da tarde

  • Haberá servizo de bus polas parroquias co mesmo percorrido cos días de feira

cartel

Libros, roupa ou artesanía serán algúns dos artigos que se poderán adquirir no mercadiño de Nadal da Baña que, tralo paréntese obrigado do pasado ano por causa da covid, chegará o domingo 12 de decembro á súa sexta edición. O pavillón municipal acollerá tamén obradoiros e espectáculos, haberá comida e, como non podía ser doutro xeito, contará coa visita de Papá Noel. O público poderá facer as súas compras entre as doce da mañá a as oito da tarde e terá á súa disposición un autobús que fará o mesmo percorrido polas parroquias bañenses que os primeiros luns de mes para asistir ás feiras mensuais.

A só 24 horas de abrirse a inscrición, xa confirmaron a súa participación no mercadiño de Nadal da Baña máis de trinta postos. Neles, atoparemos este ano libros ou roupa de segunda man, ademais de numerosas propostas de artesanía para que poidamos adquirir agasallos orixinais e respectuosos co medio. Tamén haberá oferta gastronómica, á que se sumarán unha pulpería e unha churrería.

Ademais, os visitantes poderán participar en distintos obradoiros. Impartiranse tres, un de artesanía en palla, outro de papel e un máis de instrumentos tradicionais. Aquelas persoas que queiran participar poderán apuntarse o propio día do mercadiño no pavillón ou reservar praza chamando ao Concello da Baña ou ao móbil 682 85 93 67.

A programación lúdica complétase cun espectáculo de maxia a cargo de Dani Polo, programado para o mediodía, e da obra de teatro infantil ‘Debulendo lendas.. galegas’ da compañía Tarabelos, que dará comezo ás 16: 30 horas. Actuacións de pandereteiras e da agrupación local de música tradicional Os Campantes da Baña contribuirán á animación ao longo da tarde.

Por último, cativas e cativos poderán coñecer ao mesmo Papá Noel e facerlle as súas peticións para esta Noiteboa a partir das 18.30 horas.

magosto a baña 2021 1

O Concello da Baña recupera este ano a celebración do tradicional magosto. A festa das castañas terá lugar o sábado 30 de outubro na Praza do Concello ás 19.00 horas.

O programa complétase co espectáculo 'Consertasso nas hortas', unha proposta de Brais das Hortas na que se misturan teatro, humor e música e que dará comezó ás 18.00 horas. Para asistir, é preciso reservar entrada chamando ou mandando un wasap ao número de teléfono 607 153 604.

No caso de chuvia, prevese trasladar á celebración ao local das escolas vellas.

 

 

20211101 Magosto Bana1

O Concello da Baña puxo a disposición da veciñanza máis de 50 quilos de castañas para gozar un concurrido magosto no que rapazada e maiores puideron gozar este sábdo en San Vicenzo, nunha tarde amenizada polos gaiteiros da Escola de Música Tradicional da Baña e polo espectáculo Consertasso na horta, co que Brais das Hortas involucrou a un público que encheu o auditorio da Escola Municipal de Música.

20211101 Magosto Bana1

Ademáis de música e castañas, a rapazada puido gozar co taller de debuxo e maquillaxe, e houbo tamén candidatos para participar no pousadoiro e facerse fotos desfrazados para celebrar o Samaín.

A festa tamén se sumou o programa de TVG Sabadeando, que fixo varias conexións en directo. Como asegurou Emilio Lois en directo, un magosto sen música tradicional non é magosto. O programa pódese ver neste enlace, coa primeira conexión en directo no minuto 6:27, e outra posterior, das seis que se fixeron en total, no minuto 45:50.

20211101 Magosto Bana9

Deste xeito, o Concello da Baña recuperou a celebración tradicional do magosto, despois do parón motivado pola covid-19. Dende a Concellería de Cultura fan un agradecemento especial a Emilio Lois e a Escola de Música Tradicional da Baña, á Asociación Alborada, á Asociación A Baña Emprende, e ás voluntarias e voluntarios e ao persoal municipal que colaboraron na organización da festa.

Máis fotos na páxina oficial de Facebook do Concello da Baña (preme aquí)

20211101 Magosto Bana9

  • O servizo de normalización lingüística da Baña participa na organización deste certame, que reparte 7.500 euros entre os gañadores das doce categorías

  • Poden participar todas as persoas maiores de 14 anos con canle en Youtube que publicasen alomenos cinco vídeos despois do 23 de outubro de 2020

youtube web

Os Premios Youtubeiras, que conta entre os seus organizadores co servizo de normalización lingüística do Concello da Bala, pecha este venres 22 de outubro o prazo de inscrición para participar na súa quinta edición. En xogo hai un total de 7.500 euros, que se repartirán entre os gañadores dunha ducia de categorías: canle, vídeo, youtubeiro/a, calidade lingüística, impacto, calidade técnica, comunicación, creatividade, musical, didáctico, pioneiro e premio do público.

O xurado profesional que estudará as propostas recibidas estará formado nesta ocasión polo sociolingüísta Fernando Ramallo, o xornalista Adirán Lede, a profesora de lingua galega Noemí García, a realizadora e coordinadora do Carballo Interplay Sonia Méndez e a xornalista e responsable do programa #DígochoEu da TVG Esther Estévez.

Para decidir o premio do público, difundirase a través das redes sociais de Youtubeiras un formulario no que se recompilarán todos os vídeos que se presentan ao certame e que poderán votarse dende o 25 de outubro ata o 3 de novembro.

Os Premios Youtubeiras, impulsados polos servizos de normalización lingüística de dez concellos, as tres universidades galegas e a Deputación da Coruña, teñen como obxectivo impulsar a creación en Youtube e visibilizar as/os youtubeiras/os en galego. Na presente edición, e coa fin de dar un paso máis de cara a fomentar o mantemento das canles, non se poden presentar vídeos illados. As persoas participantes, ademais de ter cumpridos os 14 anos, terán que ter canle en Youtube con alomenos cinco traballos publicados con data posterior ao 23 de outubro de 2020.

Os premios de canle, vídeo e youbeiro/a están dotados con 1.000 euros cada un, as persoas gañadoras do resto das categoráis levarán 500 euros.