O Concello da Baña comezou o pasado luns, 11 de maio, celebrando a Semana Bañense das Letras 2015 cunha Tarde Infantil entre Letras na Escola de Educación Infantil de Lañas que comezou ás 18.00 h.

En primeiro lugar, Ana e Tiko, voluntarias xeorxianas do programa europeo Erasmus, contaron o conto Fidelidade de león en versión xeorxiana e galega. E a continuación actuou Charo Pita co seu espectáculo Canta Conta, que deleitou as persoas asistentes cunha manchea de contos ao ritmo de instrumentos, de palmas, de asubíos, de cancións... e cunha gran dose de humor.

Participaron principalmente os nenos e as nenas de infantil da EEI de Lañas e de San Vicenzo, do PAI da Baña, do programa Maimiños e Furabolos, xunto coas súas familias que, en conxunto, formaron un público dedicado, atento, divertido e participativo.

Unha vez que rematou a actuación, as persoas participantes tiveron a ocasión de coñecer as instalacións da EEI de Lañas e toda a rapazada puido xogar e aproveitar o que quedaba dunha estupenda tarde de sol.

Ficheiros: 

Campamentos_Deportivos_2015.pdf

Ficha_inscricion_01.pdf

 

O pasado xoves, 7 de maio, arredor de 130 nenos e nenas das escolas infantís da comarca de Barcala participaron no intercambio anual na Baña que esta vez estivo centrado no proceso de elaboración do pan, desde que se moe a fariña ata que se mete no forno da panadería.

Como novidade, este ano ampliouse o número de centros participantes; xunto coas escolas infantís de Aro, Lañas e San Vicenzo incorporouse parte do alumnado de infantil do CEIP O Coto a esta actividade organizada polo Concello da Baña e a EEI de Lañas.

Para poder realizar esta actividade, todos os anos colaboran de maneira desinteresada empresas e veciños do Concello da Baña co fin de que o alumnado poida achegarse ás tarefas que realizan habitualmente. Nesta ocasión volveron participar a panadería O Barro e Pepe, o muiñeiro do muíño de Ponte Calexa, así como Feiraco que achegou os batidos de chocolate para a merenda dos nenos e nenas.

Comezaron a mañá reuníndose na área recreativa de Chans co fin de compartir con Urxa, a trasno da biblioteca da Baña, as vivencias do ano pasado e o contacontos Urxa, a trasno da Baña. Urxa serve de punto de enlace e de continuidade desta actividade. Logo, visitaron a panadería O Barro; amasaron na masa do pan no local social do Barro, onde tamén merendaron; recolleron cadanseu bolo de pan e remataron a xornada de convivencia en Fiopáns visitando e vendo como funciona o muíño de Ponte Calexa e xogando á busca do tesouro polos camiños dos arredores.

Esta foi unha boa ocasión para que o alumnado das escolas infantís se coñecesen, interactuasen e se enriquecesen coas experiencias dos profesionais dos distintos oficios do Concello da Baña que xenerosamente ofrecen o seu tempo e a súa simpatía.

Ficheiros: 

2015semana_banense_das_letras.pdf

Queres colaborar como voluntario/a no teu concello durante o verán?

O CONCELLO DA BAÑA BUSCA 8 VOLUNTARIOS/AS PARA APOIAR AS ACTIVIDADES DO CAMPAMENTO URBANO DOS MESES DE XULLO E AGOSTO DE 2015

Ao abeiro da Orde do 7 de abril de 2015 pola que se regulan as bases das subvencións para entidades de acción voluntaria e entidades locais enmarcadas no programa Servizo de Voluntariado Xuvenil e se procede á súa convocatoria para o ano 2015, o Concello da Baña selecciona 8 voluntarios/as para apoiar as actividades do Campamento urbano nos meses de xullo e agosto do 2015.

Despois do éxito da experiencia do ano 2014, animamos ás mozas e mozos con idades comprendidas entre os 16 e 30 anos de idade, empadroadas/os no Concello da Baña, a que participen neste proxecto relacionado co tempo libre e que favorece a conciliación da vida familiar e laboral da veciñanza.

Cada participante obterá unha dotación de 6 euros por día que exerza como voluntaria/o  para gastos de manutención e transporte (cun mínimo de 6 horas ao día e por un total de 60 días). Durante o tempo de execución do proxecto, as persoas voluntarias terán cobertura do seguro de responsabilidade civil e de accidentes.

Ao finalizaren os proxectos, as persoas voluntarias que participen neles obterán da Dirección Xeral de Xuventude e Voluntariado un certificado de educación non formal acreditativo da acción voluntaria des­envolvida.

As persoas voluntarias que concorresen á mesma convocatoria en anos anteriores non poderán volver a participar.

 Valorarase ter formación ou coñecementos no ámbito relacionado coa actividade.

As persoas interesadas deberán cubrir a SOLICITUDE e entregala no concello,  ata o venres 8 de maio de 2015, xunto cunha copia do DNI a través das seguintes vías:

§    Por correo electrónico, no enderezo: Este enderezo de correo está a ser protexido dos robots de correo lixo. Precisa activar o JavaScript para velo.                  (Indicarase no asunto: Voluntariado na Baña).

§    Persoalmente nos Departamentos de Cultura e/ou Emprego do Concello da Baña                                            (na planta alta).

§    No caso dos/as menores de idade, será preciso achegar tamén copia do DNI e autorización do/a pai/nai/titor/a legal.

Máis información nos teléfonos: 981 886 501 – 607 721 711

Ficheiros: 

Solicitude_Voluntariado_no_Concello_da_Bana_2015.pdf