Preguntas e respostas sobre medidas que lle afectan ao sector agrario durante a emerxencia sanitaria
- Detalles
- Escrito por Alicentis
- Categoría: novas
- Visto: 977
A Consellería de Medio Rural deseñou un protocolo coas instrucións a seguir no ámbito agrogandeiro durante a emerxencia sanitaria provocada polo coronavirus. A suspensión dos permisos de queima, os prazos para solicitar a PAC, o coidado dos animais e cultivos ou os teléfonos de consulta de Medio Rural son algúns dos temas que se detallan neste documento informativo.
Unha das medidas adoptadas pola Administración en todos os ámbitos, e tamén no rural, é a suspensión dos prazos para tramitar procedementos administrativos. A suspensión supón que non "corren" estes prazos, desde a entrada en vigor do estado de alarma, retomarase o seu cómputo cando finalicen os 15 días de duración deste e a expensas dunha prórroga, se a houbese. No caso de presentación telemática dunha solicitude de subvención, esta forma de tramitación segue operativa, se ben os prazos non corren.
Hai que facer unha mención á parte para as axudas europeas da Política Agraria Común (PAC). Así, se ben os prazos marcados pola Administración autonómica ou estatal están suspendidos ou interrompidos polo Real decreto de declaración de alarma, non é así cos prazos europeos. Porén, a Unión Europea vén de ampliar o prazo de solicitudes da PAC para a campaña 2020 ata o 15 de xuño.
Medio Rural informa tamén de que a realización de queimas controladas en terreos rústicos está prohibida ata novo aviso. Tamén quedan sen efecto as autorizacións e comunicacións de queimas xa notificadas e suspéndese a solicitude de novas autorizacións. Xa que logo, non está permitido o uso do lume para ningunha actividade agrícola e forestal.
No referido aos mercados, está prohibida a apertura de mercados gandeiros, agrarios e tradicionais; a excepción dos establecementos de venda de subministracións agrícolas e de alimentos para animais.
No documento de preguntas e respostas publicado por Medio Rural trátanse cuestións de todo tipo. Á pregunta de se é posible saír pasear se se vive no rural rodeado de monte, a resposta é que só se pode saír da casa a pasear un animal de compañía dando só paseos curtos. Figuran tamén as respostas a consultas sobre compartir vehículo para desprazarse ao lugar de traballo, ir alimentar os animais que hai na segunda vivenda, os requisitos no coidado dos terreos de autoconsumo, etc.
A Consellería tamén informa dos protocolos de actuación para as granxas e para o sector agroindustrial e dispón de servizos mínimos para loitar contra os incendios, atender as necesidades de gandeiros e agricultores e coidar dos animais e cultivos dos seus centros de investigación.
Neste enlace pode consultar as preguntas e respostas referidas ás instrucións, protocolos e medios de contacto da Consellería do Medio Rural durante a emerxencia sanitaria.
- Detalles
- Escrito por Alicentis
- Categoría: novas
- Visto: 1026
O Concello da Baña procedeu nas últimas horas a realizar traballos de desinfección nalgúns dos lugares máis concorridos do municipio, como fórmula para previr a expansión do coronavirus Covid-19. A cuadrilla municipal de obras actuou en lugares como as farmacias ou o centro médico, sitios aos que a poboación pode acudir nestes días malia o confinamento decretado polo Goberno.
O consistorio agradece especialmente o esforzo dos operarios da cuadrilla, que están a realizar un labor fundamental na loita que todos e todas mantemos para derrotar a pandemia.
- Detalles
- Escrito por Alicentis
- Categoría: novas
- Visto: 1221
Atendendo as últimas medidas e recomendacións achegadas pola Xunta de Galicia sobre o Covid-19, o Concello da Baña pechará a partir de mañá, venres 13 de marzo, o centro social e da terceira idade, a axencia de lectura, a aula de informática e as escolas de música. Así mesmo, acordou suspender as escolas deportivas municipais e cancelar os actos culturais previstos para os vindeiros días, como a sesión de contacontos de mañá, venres.
No ámbito educativo, atendendo a suspensión da actividade lectiva e extraescolar durante 14 días comunicada hoxe pola Xunta de Galicia, o Concello informa do peche a partir do luns do Punto de Atención á Infancia (PAI). Mañá venres, a asistencia ao PAI será opcional, aínda que non se recomenda.
Esta decisión adóptase seguindo as recomendacións da autoridades sanitarias en relación coa contención do coronavirus Covid-19. Nesta liña, o alcalde asinou esta tarde un bando no que detalla as medidas e recomendacións que se van tomar dende o Concello da Baña para loitar contra a pandemia.
- Por este motivo, o Concello suspende todas as actividades municipais deportivas, culturais e de servizos sociais desde o 13 ata o 29 de marzo.
- A atención ao público nas dependencias municipais verase limitada a casos de emerxencia, polo que os trámites que se teñan que realizar serán preferentemente por vía telemática ou ben telefónica no teléfono 981 886 501.
- Péchanse a aula de lectura, a de informática, os pavillóns, o campo de fútbol, o auditorio da casa de cultura, o centro social e da terceira idade, o Punto de Atención á Infancia, a Escola de Música, as Escalas Deportivas e a casa de cultura.
- Quedan suspendidas todas as autorizacións municipais para eventos, charlas e coloquios así como as actividades culturais, sociais, deportivas e lúdicas impartidas desde o Concello e realizadas nos edificios públicos municipais.
Dende o Concello da Baña recoméndase
- Seguir as instrucións ditadas polo Ministerio de Sanidade e a Consellería de Sanidade e contactar co 061 ou co teléfono de información para a cidadanía 900 400 116, no caso de ter algún síntoma.
- Non celebrar actividades e festas privadas e que as asociacións e entidades do concello eviten aglomeracións .
- Non facer viaxes e desprazamentos que non se consideren indispensables.
- Evitar as zonas de máxima concentración do virus.
- Non visitar centros de maiores, hospitais, centros médicos a excepción de casos de extrema necesidade.
- Lavar con frecuencia as mans e a cara con auga e xabón.
O alcalde recorda no bando que o Concello non quere crear demasiada alarma pero esta decisión extraordinaria é necesaria para garantir a saúde e a seguridade de todas as persoas e, ademais, pide que toda a cidadanía colabore na loita contra o virus.
Para solicitar información xeral sobre o novo coronavirus, a Xunta de Galicia pon a disposición da poboación o teléfono gratuíto 900 400 116. Así mesmo, neste enlace pódese consultar toda a información que están a ofrecer as autoridades sanitarias de forma actualizada.
- Detalles
- Escrito por Alicentis
- Categoría: novas
- Visto: 810
Telefónica comunicoulle ao Concello da Baña unha avaría na rede, tanto de teléfono coma de Internet, que afecta a diversas zonas do municipio. A casa consistorial e máis o centro de saúde están tendo problemas para recibir chamadas e conectarse á Rede.
O Concello pon a disposición da veciñanza os números de móbil 682 859 367 e 649 908 293 para que quen o precise se poida comunicar coas oficinas municipais mentres dure a incidencia. Desde a compañía telefónica informan de que están a traballar para resolver a avaría o antes posible, aínda que todo fai indicar que podería durar máis do desexado.
O pleno da Baña adxudícalle á empresa Aluvisa o cambio a led de 2.200 luminarias que financia o IDAE
- Detalles
- Escrito por Alicentis
- Categoría: novas
- Visto: 1060
-
O contrato ascende a 493.000 euros e inclúe a proposta da firma de engadir 89.000 euros en melloras de unidades de obra
-
Compromiso por Galicia abstívose alegando os problemas, incluso xudiciais, que tivo a empresa na Coruña, Sevilla, Asturias e Cataluña
-
PP e PSdeG votaron a favor da proposta presentada pola Mesa de Contratación e adiantan que os técnicos e o xefe de obra deberá vixiar con esmero a execución das actuacións
O Pleno da Corporación da Baña aprobou esta mañá, cos votos a favor de PSdeG e PP e a abstención de Compromiso por Galicia, a proposta da Mesa de Contratación de adxudicarlle á empresa Alumbrados Viarios SA a substitución de máis de 2.200 luminarias no municipio por lámpadas led para contribuír ao aforro enerxético e á redución de CO2 á atmosfera. O proxecto, que ascende a 493.000 euros, IVE incluído, está financiado polo IDAE, do Ministerio para a Transición Enerxética, e do Programa Operativo FEDER da Unión Europea con case 400.000 euros. Na súa oferta, Aluvisa inclúe a execución de melloras de unidades de obra por importe de 89.000 euros e unha garantía total das luminarias de 10 anos. (o vídeo da sesión pódese ver neste enlace)
A empresa deberá presentar antes deste venres toda a documentación requirida, incluído un aval de 20.000 euros, para poder asinar o contrato. O prazo de execución das obras é de 8 meses, que comezarán a contar en canto se firme a acta de traza de planta, polo que a previsión do Concello é de que este ano poida estar rematada a mellora da iluminación pública na Baña.
A proposta de Aluvisa foi a recomendada pola Mesa de Contratación, que analizou a oferta presentada por outras catro firmas que acudiron ao concurso. Tanto o equipo de goberno como o Partido Popular indicaron que ían votar a favor desta proposta. Na intervención de CxG, César Ramos recordou que as cinco empresas teñen puntuacións similares na Mesa de Contratación nos apartados obxectivos, polo que pediu ver o expediente. Ao mesmo tempo informou de que, como se pode comprobar ao buscar en Internet, Aluvisa tiña abertos varios expedientes administrativos e algúns xudiciais na Coruña, Sevilla, Asturias e Cataluña por problemas coas execucións de obras, polo que optaron por absterse na votación.
O alcalde sinalou que esa situación non impedía que Aluvisa se puidese presentar ao concurso da Baña, e incluso gañalo, como foi o caso. Ao tempo que anunciou que o director de obra estará encima para comprobar que as obras se executan de acordo co proxecto, e coincidiu con Andrés García Cardeso en que tamén os técnicos do IDAE supervisarán a execución.
Máis de 2.200 novas lámpadas
Este proxecto conta cunha axuda do Instituto para a Diversificación e Aforro de Enerxía (IDAE) do Ministerio para a Transición Ecolóxica e financiamento europeo ao estar enmarcada no Programa Operativo FEDER de crecemento sostible 2014-2020. Esta achega representa o 80% do investimento total, 394.546,96 euros, mentres que o Concello debe asumir o 20% restante, ata os 493.183,70 euros nos que foi adxudicado o proxecto.
Con esta actuación que o Concello da Baña acaba de adxudicar a Aluvisa poderanse renovar 2.281 puntos de luz dos 2.327 existentes no termo municipal, cambiando as lámpadas por outras de tecnoloxía LED máis eficientes e con menos consumo, polo que se estima que o aforro enerxético será dun 73%, ao pasar dos 230,82 KW ata 81,08 KW. Ademais de cambiar as luminarias, tamén está previsto substituír cadros eléctricos.
Plan Marco 2020-2021
Ademais de proceder ao sorteo para designar os integrantes das mesas electorais para as vindeiras eleccións autonómicas do 5 de abril, no Pleno de hoxe tamén se aprobaron as obras que se van incluír no Plan Marco 2020-2021, para a mellora de camiños municipais de acceso a parcelas agrícolas.
Neste apartado houbo unanimidade dos tres grupos para incluír accesos en Agra de Portochán, Marcelle-Cabanas, Braña de Gosende e na Ermida. Estas catro actuacións representan un investimento de 59.679 euros