• O alcalde, a xefa de estudos, representantes das familias e da Corporación reuníronse onte con Mobilidade e a empresa

  • Xunta e Monbus comprometéronse a solucionar todas as deficiencias e a reestruturar algunhas rutas para optimizar  recursos

O alcalde da Baña, Andrés García Cardeso; a xefa de estudos do CPI San Vicente, representantes das familias e da Corporación municipal reuníronse onte na coruña co xefe territorial da Consellería de Infraestruturas e Mobilidade da Xunta, José Antonio Álvarez Vidal; e da empresa Monbus para solicitarlle solucións as múltiples deficiencias do transporte escolar no municipio. 

Dende A Baña reclamáronlle á Xunta e a empresa que adopten as medidas necesarias para que no vindeiro curso non se volvan producir as numerosas incidencias que teñen acaecido este ano, dende que Monbus resultou adxudicataria do transporte escolar no municipio.

O alcalde e a comunidade educativa lembroulles á Xunta e empresa os constantes retrasos na recollida de alumnado, que ten chegado tarde moitos días ao colexio, e incluso houbo días que o autobús non apareceu. A falta de medidas de seguridade (como cintos), ou autobuses en mal estado foron outras da deficiencias que pasaron no curso que acaba de rematar.

Por parte do Concello asistiron á reunión o alcalde; a concelleira de Cultura, Lorena Trillo, e o portavoz socialista, José Antonio Pereira.

Por parte da Xunta e da empresa comprometéronse a arranxar todas as deficiencias trasladadas e a reestruturar algunhas rutas para optimizar os recursos e que o alumnado chegue a tempo ao colexio.

  • Cancións de Beethoven, Vivaldi, Queen, Sabina, Luar na Lubre, Camilo, Aitana ou ACDC  emocionaron ao público

  • O alcalde, Andrés García Cardeso, fíxase como obxectivo para o vindeiro curso duplicar a vintena de alumnos que se formaron este ano

20220704 Festival fin curso escola musica Bana 34

Queen e ACDC abriron e pecharon onte un emotivo festiva de fin de curso da Escola municipal de música da Baña no que público presente acabou aplaudindo de pé ao alumnado de percusión. Durante unha hora, no auditorio das escolas vellas lembrouse a Beethoven e Vivaldi, pero tamén a Sabina, Lugar na Lubre, Camilo ou Aitana, todos eles interpretados pola vintena de alumnos de todas as idades que neste curso se formaron na escola bañense.

Ramón Leis, director e profesor de piano; Moncho Ces, de vento metal; e Juan Leis, percusión, clarinete e saxofón, tiveron como obxectivo “que pequenos e maiores se divertisen e gozasen aprendendo música”. Tal vez por iso conseguiron que Héctor (saxo) e Sonia (clarinete) acudisen dende Negreira ata a Escola de música da Baña acompañados polos seus fillos e onte se animasen a subir por primeira vez a un escenario e tocar en público.

20220704 Festival fin curso escola musica Bana 31

Despois de que Moisés rematase o concerto na batería cun dos temas míticos de ACDC, o alcalde, Andrés García Cardeso, agradeceu a alumnado e familias o esforzo para “acudir neste curso complicado ata a Escola de música da Baña”. “Queremos darlle un impulso grande a escola”, explicou o alcalde, que se marca como  “obxectivo duplicar a vintena alumnos actuais para o vindeiro curso”, sen descartar nun futuro próximo superar as 75 matrículas que chegou a ter o centro bañense.

Antes de abandonar o auditorio, a concelleira de Cultura, Lorena Trillo, entregoulles unha bolsa de lambetadas a cada neno e nena presentes no concerto co que a Escola municipal de música da Baña rematou o curso 2021-2022.

A Escola Municipal de Música da Baña conta con financiación da Deputación Provincial da Coruña. O pasado mes de abril, o BOP publicaba a resolución pola que se lle concedía ao Concello da Baña unha subvención de 10.000 euros ao aveiro da convocatoria do programa de subvención a concellos e entidades locais para o mantemento de conservatorios, escolas de música e escola de danza municipais durante o ano 2022.

20220704 Festival fin curso escola musica Bana 7

  • O alcalde, Andrés García Cardeso, e o xefe territorial de Mobilidade reuniranse nos próximos días para atallar as deficiencias no servizo

O xefe territorial de Mobilidade da Xunta de Galicia púxose esta mañá en contacto co alcalde da Baña, Andrés García Cardeso, en resposta ao escrito enviado o pasado luns pola ANPA do CPI San Vicente e polo Concello da Baña no que se lle informaba sobre o malestar provocado por causa dos reiterados atrasos e incumprimentos no transporte escolar.

O rexedor bañense, que se reafirmou hoxe en esixir unha solución, obtivo o compromiso de programar unha xuntanza entre ámbalas dúas partes. A reunión, que previsiblemente se desenvolverá na última semana deste mes de xuño, terá como obxectivo abordar a problemática actual con Monbus e, sobre todo, marcar as pautas para o bo funcionamento do servizo de cara ao vindeiro curso 2022/23.

O alcalde incidiu na gran preocupación do Concello e tamén que o goberno municipal ten como unha das súas prioridades a consecución dun transporte escolar eficaz, que lle garanta ao alumnado á asistencia ás clases nos horarios fixados, e que respecte todas as medidas de seguridade.

20190620 Cacharela San Xoan

O Concello da Baña informa de que este ano os particulares non precisarán solicitar autorización municipal para facer as tradicionais cacharelas de San Xoán, se estas se fan en recintos privados.

Só terán que solicitar autorización aquelas asociacións veciñas ou colectivos que vaian facer as cacharelas ocupando a vía pública. Nestes casos, a pesoa responsable terá que presentar unha declaración responsable, segundo o modelo que se atopa na sede electrónica (neste enlace) e presentalo despois no rexistro do Concello ou na propia sede electrónica antes das 14 horas do xoves 23 de xuño de 2022. En caso de dúbida, poden solicitar máis información nas oficinas municipais, chamando ao teléfono 981 886 501.

O modelo de declaración responsable para presentar tamén se pode descargar no arquivo adxunto.

  • O galardón recoñece o seu traballo durante sete anos á fronte da escola unitaria de Lañas, hoxe "un referente para toda a comarca", en palabras do alcalde bañense

  • Caxade quixo compartir o premio "coas familias e co alumnado" e recordou "sete anos marabillosos nos que aprendín máis que ensinei"

20220517 Letras na Banha 01

 

20220517 Letras na Banha 03O mestre e músico Alonso Barreiro Caxade recibiu esta mañá na casa da cultura da Baña o I Premio Daniel García Ramos, instituído polo Concello para recoñecer, con motivo do Día das Letras Galegas, o traballo en favor da lingua e da cultura da terra. O alcalde bañense, Andrés García Cardeso, destacou o "encomiable traballo" realizado polo galardoado durante os sete anos nos que estivo á fronte da escola unitaria de Lañas.

A entrega do galardón realizouse nun acto que abriu a concelleira de Cultura, Lorena Trillo, coa lectura do Manifesto bañense das Letras Galegas 2022. Nel remárcase a necesidade "apoiar todas as manifestacións, tanto artísticas coma doutra índole, que poñen en valor o noso, a nosa lingua, a nosa cultura, a nosa tradición e o compoñente emocional que leva consigo". Trillo chamou a un "compromiso coas Letras" que se estenda "ao longo de todo ano" para conseguir, "como diría Cunqueiro, mil primaveras máis para a lingua galega".

Este compromiso coa lingua e coa cultura propias foi un dos aspectos destacados polo Concello para outorgar por primeira vez o premio Daniel García Ramos, que leva o nome do xuíz bañense pioneiro en ditar unha sentenza en galego. O galardoado, Alonso Barreiro Caxade, deixou unha fonda pegada nos sete cursos nos que impartiu clases na escola unitaria de Lañas, hoxe integrada no CRA A Tarandeira. Alén de mestre, é un incansable promotor da lingua e da cultura a través de diversas iniciativas e, ademais, un dos intérpretes máis destacados da música galega actual a través do proxecto de folk-pop que leva o seu nome, Caxade.

"Acepto este galardón e fágoo extensivo ás familias e ao alumnado da unitaria", dixo Caxade ao recibir o premio. "En Lañas pasei sete anos marabillosos nos que aprendín máis do que ensinei", dixo, destacando que no seu traballo sempre procura ter "respecto polo pasado, polo patrimonio, polo que nos deixou a xente que estivo aquí antes que nós; pero tamén respecto polo futuro, polo que lles imos deixar aos nosos fillos e ás nosas fillas". Neste sentido, reclamou que se defendan "os dereitos lingüísticos das crianzas" para que poidan desenvolver a súa vida no idioma materno.

20220517 Letras na Banha 05O alcalde da Baña, Andrés García Cardeso, enxalzou o "traballo incansable" de Caxade á fronte da unitaria de Lañas: "Só hai que recordar en que estado estaban as instalacións cando el chegou e que estado as deixou. Hoxe, xa integradas no CRA, son unha referencia para toda a comarca". "O traballo silencioso e moitas veces non recoñecido de persoas coma Alonso", expuxo, "é moitas veces o que fai que as cousas boten a andar. Na Baña estámoslle moi agradecidos por toda a dedicación que nos entregou". A concelleira, Lorena Trillo, destacou que, durante os anos de maxisterio de Caxade en Lañas, "non había celebración ou evento no que a rapazada da unitaria non saíse da escola para facerse partícipe e, deste xeito, aprender a sentir o orgullo do propio".

Durante o acto, os Gaiteiros da Baña interpretaron o Himno Galego ante un auditorio en pé no que se atopaban membros da Corporación local; a directora do CPI San Vicente, Mar Sueiro; e a escritora Carme Varela, autora do libro As desterradas, galardoado co XXV Premio Álvaro Cunqueiro para textos teatrais. O evento pechouse cunha sesión de narración oral a cargo da contadora Cris de Caldas.